“It is not bigotry to be certain we are right; but it is bigotry to be unable to imagine how we might possibly have gone wrong.” – G. K. Chesterton

Ek kan God deur gestremdhede ken

In A Good and Perfect Gift beskryf Amy Julia Becker hoe sy haar dogter, Penny, wat met Down Sindroom gebore is, grootgemaak het. Sommige mense kyk na Penny en besef wat met haar verkeerd is. Hulle vergelyk haar met wat hulle as normaal beskou. Hulle idee van mense met verskille en gestremdhede maak hulle blind – hulle sien nie die unieke, kosbare meisie raak nie. Vir Amy en haar man is Penny egter ‘n gawe van God. Sy, gemaak na die beeld van God, weerspieël haar Skepper op baie maniere. Sy maak Hom aan ander bekend.

In die eerste eeu het gestremdhede ‘n stigma gedra – soos dit vandag steeds dikwels die geval is. Baie mense het geglo dat die oorsaak van gestremdhede sonde was. Die persoon wat met gestremdhede gebore is – dus nog nie die geleentheid gehad het om te sondig nie – het ‘n teologiese debat ontketen. Toe mense ‘n man wat blind gebore is teenkom, het hulle gewonder wat dit veroorsaak het (Johannes 9). Deur wie se sonde is dit dat hierdie man blind gebore is: sy eie of sy ouers s’n? vra hulle vir Jesus.

Groot was hulle verbasing toe Jesus antwoord: Dit is nie deur sy eie sonde nie en ook nie deur sy ouers s’n nie. Onmoontlik. Hierdie man, verduidelik Jesus aan hulle, is blind gebore sodat die werke wat God doen in hom gesien kan word. Vanaf sy geboorte was God se plan dat hy vir Jesus sou ontmoet. As Jesus hierdie man se fisiese oë oopmaak, sou die geestelike oë van baie ander ook oopgemaak word en sou hulle Jesus as die Seun van God herken.

Hierdie ontmoeting demonstreer vir ons die verskil van hoe God en hoe ons as mense dinge en mense sien. Diegene wat ons so maklik as anders identifiseer – selfs sondig – is dikwels diegene deur wie God se goedheid geopenbaar word.

Ons glo steeds dat die sterk en gesonde, die ryk en mooi mense die beeld van God dra. God het egter verkies om Homself te verneder; Hy besluit dat Hy deur swakheid sal werk. Die magtige God gee om vir diegene wat swak is. God word in ons swakhede geopenbaar.

The world does not consist of 100 percent Christians and 100 percent non-Christians. There are people (a great many of them) who are slowly ceasing to be Christians but who still call themselves by that name: some of them are clergymen. There are other people who are slowly becoming Christians though they do not yet call themselves so – C. S. Lewis

Bonhoeffer (9)

Ek wil enkele gedeeltes uit 40-Day Journey with Dietrich Bonhoeffer (Augsburg Books) hanteer.

Dissipels doen nie net afstand van hulle regte nie, maar hulle doen selfs afstand van hulle eie geregtigheid. Hulle kry geen krediet vir wat hulle doen en opoffer nie. Al geregtigheid wat hulle het, is om te honger en dors na wat reg is.

Hulle sal nie hulle eie of God se geregtigheid op aarde hê nie Hulle kyk deurentyd vooruit na God se toekomstige geregtigheid. Hulle kan dit nie self vermag nie. Diegene wat Jesus volg, honger en dors die hele pad. Hulle verlang na die vergifnis van alle sondes en volkome vernuwing; hulle smag na die vernuwing van die aarde en God se volmaakte geregtigheid.

Bonhoeffer gee weer twee Bybelverse:

• Geseënd is dié wat honger en dors na wat reg is, want hulle sal versadig word (Matteus 5:6).
• Wat die Here sê, gebeur, alles wat Hy doen, staan vas.  Hy het geregtigheid en reg lief, die hele wêreld is vol van die Here se troue liefde (Psalm 33:4 – 5).

Honger en dors ons ooit na reg in ons lewens? Wat doen ons om dit te stil? Dink aan daardie plekke waar mense ly as gevolg van ongeregtigheid. Bid dat gelowiges nee sal sê vir lyding en ongeregtigheid en dan sal saamstaan en werk vir geregtigheid.

Here, mag u koninkryk van geregtigheid in my lewe en in die wêreld kom. Amen.

I tell you our strength, whenever we have any, is our greatest weakness, and our fancied wisdom is our real folly. —C.H. Spurgeon

Algemene genade

Hoekom het Adam en Eva nie onmiddellik gesterf na hulle oortreding in die paradys nie? God het immers verklaar dat Adam weer na die aarde wou terugkeer: Stof is jy, en jy sal weer stof word (Genesis 3:19). Wat het hulle in staat gestel om aan te hou leef en die voordele van die lewe – kos, kinders, ens – te geniet? Hoekom geniet so baie sondaars vandag steeds daardie selfde voordele?

Genade – dit is God se seëninge wat almal per definisie onverdiend is. Hy laat immers sy son opkom oor slegtes en goeies, en Hy laat reën oor dié wat reg doen en oor dié wat verkeerd doen (Matteus 5:45). Hierdie staan bekend as algemene genade, want dit is vir alle mense – geen onderskeid word getref nie.

Wayne Gruden (Systematic Theology) sê dat algemene genade die genade is waardeur God aan mense ontelbare seëninge gee, maar nie deel van verlossing is nie. Hierdie genade is nie tot fisiese seëninge – reën, kos en gesondheid –  beperk nie, maar sluit seëninge op baie ander gebiede in – intellek, kreatiwiteit, moraliteit, ens. Soos alle genade is dit ‘n onverdiende guns. Die doel is om ons oë op ons liefdevolle Skepper te vestig.

There are only two kinds of people in the end: those who say to God, “Thy will be done,” and those to whom God says, in the end, “Thy will be done.” All that are in Hell chose it – C. S. Lewis

Bonhoeffer (8)

Ek wil enkele gedeeltes uit 40-Day Journey with Dietrich Bonhoeffer (Augsburg Books) hanteer.

Geen regte beskerm die geloofsgemeenskap – daardie gemeenskap van vreemdelinge in die wêreld nie. Hulle is die nederiges wat afstand van al hulle regte gedoen het vir die saak van Jesus Christus. Wanneer hulle beledig word, is hulle stil; wanneer geweld hulle aangedoen word, verdra hulle dit; wanneer hulle uitgegooi word, aanvaar hulle dit.

Hulle maak nie hofsake vir hulle regte nie; hulle maak nie ‘n bohaai as ‘n ongeregtigheid hulle aangedoen word nie. Hulle wil nie regte vir hulleself toe-eien nie. Tog sê Jesus: Hulle sal die nuwe aarde ontvang (Matteus 5:5). Die aarde behoort aan diegene sonder regte en mag. Diegene wat tans die aarde met geweld en ongeregtigheid besit, sal dit verloor.

Bonhoeffer gee weer twee Bybelverse vir ons:

• Geseënd is die sagmoediges, want hulle sal die nuwe aarde ontvang (Matteus 5:5).
• U het die gesmeek van die hulpeloses gehoor, Here. U gee hulle nuwe moed. U verhoor hulle gebed, U behartig die regsaak van die weeskind en van die mens in nood, sodat niemand op aarde langer in vrees hoef te lewe nie (Psalm 10:17 – 18).

Is ons sagmoedig? Verdedig ons voortdurend ons regte? Ons moet bid vir die  wat magtig is, die wat trots is, die wat staan op hulle regte, dat hulle werklik sagmoedig sal word, en die beswil van ander soek in plaas van hulle eie.

Here, help my om van my regte afstand te doen. Gee aan my die gawe van sagmoedigheid en maak my ‘n instrument vir u vrede. Amen.