Bose Geeste

Bose Geeste – Jan van der Watt

Percy vra:

Iemand het vir my ‘n vraag gevra, wat nog nie kan antwoord nie, nl. as ‘n sekere persoon nie glo nie, maar doen goeie werk en dade (sy woonplek is skoon) sal daar nie later bosegeeste intrek nie? Die persoon is n nie gelowige.

Antwoord:

Prof Jan van der Watt antwoord:

Die Bybel sê dat ons deur geloof gered word (Joh 3:16). Goeie dade is die resultaat van ons geloofsverhouding met God en nie die omgekeerde nie. Laat ek dit met ‘n voorbeeld illustreer: As ek nie ‘n polisieman is nie en ek trek ‘n roekelose bestuurder van die pad af (‘n goeie daad) gaan dit my net in die moeilikheid bring, want ek het nie die status van ‘n polisieman nie (ek het nie die ‘papiere’) nie. As ek egter presies dieselfde doen omdat ek ‘n polisieman is dan gaan die roekelose bestuurder moeilikheid kry. Met ander woorde, dit is die status wat die verskil maak. As ek in Jesus glo, word ek ‘n kind van God. Wat ek dan doen, doen ek omdat ek sy kind is en nie omdat ek iets daardeur wil of kan verdien nie.

Die Heilige Gees woon in die gelowige (1 Kor 3:16). Daarom is daar nie plek vir bose geeste nie. Hulle kan jou wel probeer aanval, maar sal jou nooit kan oorneem nie (Ef 6:10 en verder). Dit sal die Heilige Gees nie toelaat nie.  Die ongelowige het egter nie die Heilige Gees in hom of haar nie. Die kans bestaan dus altyd dat ‘n bose gees daar plek kan maak, al doen die persoon die regte dinge. Dit is nie die regte dade wat die bose geeste gaan uithou nie, maar die Heilige Gees. Die veiligste is dus om Jesus jou vriend te maak en naby Hom te leef.

Skrywer: Prof Jan van der Watt