1 Petrus 3:21 – Jan van der Watt

Pieter vra:

Ek wil graag weet hoe 1 Pet. 3:21 verstaan behoort te word wanneer dit ‘n soteriologiese dimensie (of “reddingsdimensie”) aan die doop gee in sy hoedanigheid “as ‘n bede/antwoord [eperotema]”? Want as die doop red “as ‘n bede/antwoord [eperotema],” impliseer dit nie dat die soteriologiese dimensie van die doop ook aan die subjektiewe kant van die doop (gesuggereer deur die woord “eperotema”) gekoppel word (en nie alleen aan die objektiewe “deur die opstanding van Jesus Christus”) nie? (Ek verstaan dat die teks ‘n “ex opere operato”-siening van die doop teenspreek, maar dit is tog sekerlik moontlik om die subjektiewe element in terme van geloof te beskryf eerder as die ritueel self?)

Antwoord:

Prof Jan van der Watt antwoord:

1 Petrus 3:21 is inderdaad ’n moeilike gedeelte in die Bybel. 1 Pet 3:21 is die enigste teks in die Bybel waar dit lyk of daar direk gesê word dat die doop red. Dit is ook byvoorbeeld een van die redes waarom daar gesê word Sola Scriptura (die Bybel alleen). Dit beteken onder andere dat ons nie alleen een moeilike vers moet gebruik om leerstellings op te bou nie, maar dat ons gebalanseerd moet kyk na al die gedeeltes wat byvoorbeeld oor die doop gaan en dit dan gebalanseerd in verhouding tot mekaar moet oorweeg. In 1 Kor 10, waar Paulus sê dat die Israeliete deur die wolk en water gegaan het, maar tog nog verlore gegaan het, sien ons byvoorbeeld dat Paulus nie van mening was dat mens gered sal word deur doodgewoon gedoop te word nie. Dit gaan om veel meer. ’n Belangrike Bybelse groep boeke soos die Johannese Evangelie en Briewe noem nie eers die doop as dit om redding gaan nie. Nee, mens moet in Jesus glo – daar vind mens redding.

Kommentatore verskil hoe om 1 Pet 3:21 te verstaan. Daar is byvoorbeeld ’n argument wat die aflegging van die vuilheid van die liggaam sien as dat ’n persoon voor die tyd reeds sy of haar sonde afgelê het en dat die doop dus nie na redding verwys nie, maar dit net bevestig, want die persoon het hom of haar reeds bekeer. Die appel of bede tot ’n skoon gewete wat met die doop saamhang wys wel dat die doop nie net ’n leë ritueel is nie, maar dat daar verwagtinge mee saamgaan. Dit bly egter ’n baie moeilike gedeelte waarvoor daar nie verklarings bestaan wat heeltemal seker is nie.

Skrywer: Prof Jan van der Watt

Buite-egtelike kinders – Jan van der Watt

Amanda vra:

Wat is die stand van buite egtelike kinders, my dogter het so baba en my 2de man sê die kind is van die duiwel en dat God nie so kind sal aanvaar nie?

Antwoord

Prof Jan van der Watt bantwoord:

Dit is nie die skuld van die kind dat hy of sy buite-egtelik gebore is nie. Om so kind nou ’n kind van die duiwel te noem is onverantwoordelik. Dit is die ouers wat aangespreek moet word. God se liefde is daar vir almal op die wêreld (Joh 3:16) ook vir buite-egtelike kinders en hulle ouers. As dit gesê word, beteken dit nie dat God sonde goedkeur nie, maar dit beteken wel dat almal by God welkom is, indien hulle Hom in geloof en gehoorsaamheid aanvaar. Mense kan dus verander en God wil hê dat hulle moet verander. As mens in God glo, word jy sy kind en kan dan onmoontlik die kind van die duiwel wees, al het jy vroeër sonde gedoen. Almal doen maar een of ander tyd sonde en daarom het ons almal God se vergifnis en liefde ewe veel nodig.

Skrywer: Prof Jan van der Watt

Die Oordeelsdag – Jan van der Watt

Louis maak die volgende stelling:

The Bible has revealed Judgment Day to commence May 21, 2011. Much have been written about this and you have probably seen it reported in the media. Please don’t discard this date based on Mat 24:36 and Mark 13:32. When we carefully consider everything else the Bible has to say on the subject, there is no contradiction with the above mentioned scriptures. Please look at the material which is provided free for anyone to have a look at. www.wecanknow.com www.familyradio.com www.ebiblefellowship.com  

Antwoord:

Prof Jan van der Watt antwoord:

Ek skryf hierdie reaksie op 22 Mei 2011 en is nog steeds hier, wat natuurlik beteken die voorspelling was vals. Die Bybel sê dat ware profete word uitgeken aan die feit dat hulle profesieë waar is. Hierdie en soortgelyke voorspellinge is al dikwels deur die afgelope tweehonderd jaar gemaak. Dit maak liggelowige mense bang en mislei hulle. Die uitleg van die tekste is baie subjektief en haal alles buite konteks aan. Wees dus versigtig vir die tipe voorspellings. Van al die baie voorspellings wat deur die jare gemaak is, het nie een waar gekom nie. Hou vas aan die volgende (Matt 24:36): ‘³⁶“Maar niemand weet wanneer daardie dag en uur kom nie, nie die engele in die hemel nie en ook nie die Seun nie. Net die Vader weet dit’. 

Skrywer: Prof Jan van der Watt

Die bruid van Jesus – Jan van der Watt

Johan vra:

Is daar `n skrif in die Bybel wat aan ons noem dat ek die bruid van Jesus is en kan die bruid dan lewende water gee soos Openbaring 22:17.

Antwoord:

Prof Jan van der Watt antwoord:

Die beeld van die bruid was een van die Bybelse beelde wat gebruik is om te beskryf wat gebeur met die wederkoms. Jesus as bruidegom sal kom om sy bruid te gaan haal. Die finale tyd saam met Jesus word dus met ’n bruilofsfees vergelyk (sien Matt 22:1-14). In Open 19:7-9 lees ons:

‘⁷Laat ons bly wees en juig 

en aan Hom die eer gee, 

want die bruilof van die Lam 

het aangebreek, 

en sy bruid het haar daarvoor 

gereed gemaak. 

⁸God het haar dit vergun om fyn, helder blink klere aan te trek.” 

Hierdie fyn klere is die regverdige dade van die gelowiges. 

⁹Toe sê die engel vir my: “Skryf op: Geseënd is hulle wat na die bruilofsmaal van die Lam uitgenooi is.”’ 

Hier kan ons sien dat die kerk as ’n bruid beskryf word wat wag vir haar bruidegom. Sy moet haar intussen voorberei vir sy koms deur goeie dade te doen. In Open 21:2 lees ons verder: ‘²En ek het die heilige stad, die nuwe Jerusalem, van God af uit die hemel uit sien afkom. Die stad was gereed soos ’n bruid wat vir haar man versier is.’ Hier word die beeld van die bruid weer gebruik om die nuwe Jerusalem te beskryf.

In Joh 3:28-30 beskryf Johannes die Doper Jesus ook as die bruidegom wat sy bruid kom haal. In Johannes 4 kom die Samaritane dan in ‘n groot groep na Jesus, hulle bruidegom.

Skrywer: Prof Jan van der Watt