Die Bybelse betekenis van nederigheid – Kobus Kok

Vicky vra:

Ek soek graag n beter verduideliking van die woord nederigheid

Antwoord:

Dr. Kobus Kok antwoord:

Nederigheid (tapeinos en Praytes in Grieks) is  volgens Paulus ‘n vrug van God se Gees se werking in jou lewe (Rom 12:16; Gal 5:23; 1 Tim 6:11; 1 Pet 3:4; Jak 3:17; Matt 5:5). Nederigheid beteken dat mens nie van jouself meer dink as wat jy behoort nie (Rom 12:3; 1 Kor 4:6). Mens moet eerder toelaat dat God jou denke volgens sy wil inrig (Rom 12:2). Nederigheid begin volgens die Bybel eerstens by ‘n ware verstaan van wie God is (Matt 11:29). Indien ons verstaan wie God is, dan verstaan ons ook wie ons is, en wie ander is (2 Kor 10:1). Ons besef dan dat ons tot niks in staat is nie. Dit is net God se genade wat ons maak wat ons is. Ons ontdek ook dat God se krag juis tot uiting kom as ons swak is (Efes 3:20). Daarom roem ons nie op ons eie prestasies en vermoë nie, maar gee altyd erkenning aan God. Die resultaat van hierdie nuwe identiteitsverstaan is dat mens nie in die eerste plek jou eie belange wil bevredig nie, maar op ander mense se behoeftes fokus (Fil 2:5-10).  So iemand is nederig omdat hy of sy ander bo hulself stel, en kan dan deur God gebruik word tot diens (Matt 6:2). Uiteindelik kom dit alles neer op die wyse waarop Jesus geleef het (Fil 2:5-10; 2 Kor 10:1).

Skrywer: Dr Kobus Kok

Is karate sonde? – Kobus Kok

Pieter vra:

Goeie Dag Wat is die kerk se standpunt teenoor Karate? Is dit verkeerd van kinders om dit te doen, gegee karate is nie alles in hulle lewe nie, en doen nog ander sport. Doen die kind sonde soos dit wel in baie kerk mense oë gesien word.

Antwoord

Dr. Kobus Kok antwoord.

Die Olimpiese spele is nie deur Christene uitgedink nie. Inteendeel, dit het sy ontstaan gehad in ‘n Griekse, heidense konteks tot eer van die gode. Christene wat vandag aan die Olimpiese spele deelneem, is egter nie besig om sonde te doen nie. Net so het karate sy ontstaan gehad in ‘n Japannese kulturele konteks in die omgewing van hedendaagse Okinawa nadat koning Sho Hashi in 1429 alle wapens verband het. Die Japannese het toe wapenlose verdedigingsmeganismes ontwikkel. Karate beteken ook “leë hand”.

Vandag is Karate bloot goeie oefening en is goed vir die liggaam omdat dit “core stability” verhoog en mens se spiertonus versterk. Karate of ander vorms van Oosterse vegkuns kan egter sonde word indien dit misbruik word. Indien karate iemand motiveer tot geweld, is dit sonde. Indien karate met vreemde geloofsoortuigings vervleg word wat jou van die Christendom vervreem, dan word dit sonde. ‘n Christen sal ook weet wanneer die grense oortree word en daardie praktyk stopsit. Gebruik gesonde geestelike oordeel.

Skrywer: Dr Kobus Kok

‘n Droom – Jan van der Watt

‘n Leser vra:

Ek het gedroom van satan wat in ‘n vorm van groot “geloofwaardige man” ‘n nuwe “gemeente” stig. Hy het met sy praatjies my man so oorgeneem en dat ek heeltyd baklei teen satan en sy “dissipels” om my kinders geen leed aan te doen nie. Hulle wou my kinders vat en ek het net heeltyd gepleit dat hul klaar my man het en asb. my kinders moet los. Ek het net heeltyd vir my kinders gesê dat dit nie saak maak hoe hul gemartel gaan word, hulle moet net in God glo en nooit oorgee om te sê dat hul satan se kinders sal word nie. Hulle het my kinders gegryp en my seun in ‘n kamer gesit en ek kon net glad nie die deur oopkry nie. Ek het my kind se bloedstollende geskreeu hoor terwyl ek die geluid van kettings hoor hoe hul hom slaan. Ek het in my droom die heeltyd probeer om my kinders te red en uit die plek te kom en is gejag deur die ander mense. Toe ek wakker word was dit asof daar ‘n aaklige teenwoordigheid om my was en het ek net heeltyd gebid en ons huis vrygespeek teen satan. Die droom pla my baie veral omdat daar tans konflik in ons kerk gemeenste is en ek in ‘n stryd sit of ons uit die gemeente moet gaan en waarna soek ek uit die kerk?

Antwoord:

Prof Jan van der Watt antwoord:

Beste Magdalena, jou droom bly maar net ‘n droom. Lees gerus die gedeeltes oor die duiwel op bybelkennis.co.za. Die Here is sterker as die duiwel en as jy in Hom glo het die duiwel nie houvas op jou nie, tensy jy dit bewustelik toelaat. Hy sal jou probeer uitvang, maar as jy naby die Here bly sal hy dit nie regkry nie. Jy hoef ook nie jou kinders teen die duiwel te beskerm nie. Jesus doen dit. Wat jy kan doen is om gereeld te bid, veral ook vir jou man en kinders.

Skrywer: Prof Jan van der Watt

Is Katolieke Christene? – Jan van der Watt

Jurgens vra:

Is Katolieke Christene? Gaan hulle hemel toe? Hulle bid aan Maria as “tussenganger”. Is dit nie afgodery nie? Moet my asb nie hierdie politiese korrekte antwoord gee nie – maar ek weet reeds dis wat julle gaan doen…. As dit olraait is dat hulle bid tot Maria, hoekom kan ek nie tot my pa bid wat dood is toe ek 10 was nie? Komaan ouens – gee my ‘n reguit eerlike antwoord.

Antwoord:

Prof Jan van der Watt antwoord:

Aan die laaste sin van Jurgens se brief lyk dit of hy klaar weet wat die regte antwoord is. Die ‘ouens’ (dis nou ons) moet net eerlik wees en antwoord wat hy wil hoor – en as die antwoord is wat hy wil hoor, is dit die eerlikste antwoord wat ons kan gee; die omgekeerde is natuurlik ook waar. Ons probeer so eerlik wees as wat ons maar kan. Bybelkennis.co.za het geen spesifieke agenda behalwe om soveel moontlik inligting beskikbaar te stel nie.

Natuurlik is die Katolieke Christene, om die waarheid te sê, ver meer as die helfte van die mense wat op aarde sê hulle is Christene behoort aan die Rooms-Katolieke kerk. Indien mense in Jesus glo, is jy ‘n Christen, dit leer die Bybel ons. Om via Maria tot die Vader of Seun te bid, diskwalifiseer jou nie as Christen nie. Deur met Maria in gebed te praat, maak haar nie God of die Seun nie.

Dit sou miskien goed wees om net te kyk waarom die Rooms-Katolieke dit doen. In die tyd van die Nuwe Testament en kort daarna was dit die gebruik binne die Mediterreense families dat die kinders vir hulle ma’s vra as hulle iets by hulle pa’s wou hê. Hulle het nie sommer die pa’s reguit gevra nie, meestal uit respek. Die gebruik het daartoe gelei dat die mense uit respek vir God vir die moeder van Jesus begin vra het om hulle versoeke oor te dra. Dit was dus nie om Maria te aanbid nie,  maar om God die Vader te respekteer. Die gebruik kan egter nie op ‘n teks in die Bybel gebaseer word nie, maar het binne die vroeë Christendom ontwikkel. Maria word gevra omdat sy as ma baie naby aan Jesus staan, iets wat Jurgens se pa nie op dieselfde manier is nie. Tog, binne die Roomse kerk word daar tot heiliges ook gebid, omdat daar aanvaar word dat hulle ook in die hemel is. Hulle kan bemiddelend die versoeke aan die Vader of Seun oordra. Dit het egter later wel so ontwikkel dat heiliges gevra word om gelowiges te help. Uit Protestantse hoek word gevoel dat dit nie aanvaarbaar is nie.

Die vraag van Jurgens vestig die aandag tog op ‘n belangrike saak: baie van die gebruike wat ons in die kerk het, kom nie direk uit die Bybel nie, maar het deur die loop van die geskiedenis ontwikkel en so deel van die kerk se tradisie geword. Ons moet dus nie te vinnig wees om sekere dinge wat ons in die kerk doen te verabsoluteer as goddelik nie. Van die dinge kom wel uit die Bybel uit, maar beslis nie alles nie.

Skrywer: Prof Jan van der Watt