Die kans om oor te begin (Vergifnis)

Vergifnis is die wonderlikste ding wat God vir ons gegee het. As jy nie kan vergewe nie, het jy nog nie mooi verstaan waaroor God en sy boodskap gaan nie. Dit is God se manier om die verhouding tussen ons as gelowiges gesond te hou.

God het eerste vir ons gewys hoe vergifnis lyk. Dit is om ŉ swak geheue te hê as dit by ander se foute kom, om nie oor dinge wat ander teen jou gedoen het, te top nie. Dit is veral om nie planne uit te dink hoe jy ander kan terugkry nie. Vergifnis is presies die teenoorgestelde van wraak. So het God nie vasgekyk teen wat ons alles teen Hom gedoen het nie. Hy het eenvoudig in liefde daarby verby gekyk en ons alles vergewe.

Net so wil Hy hê moet ons met mekaar maak. Ons moet vergeet wat ander teen ons gedoen het. So gee ons mekaar kans om voor en weer te begin. Dink net wat sal gebeur as almal al die dinge wat jy verkeerd gedoen het, teen jou hou. Jy sal geen vriende meer oorhê nie. Maar juis omdat hulle jou vergewe en aanvaar soos jy is, kan jy nog hulle vriend of vriendin wees. Vergifnis gee lewe en laat mense oor begin. Dit is die petrol wat ons verhoudings nodig het om aan te gaan.

Maar wat is vergifnis presies. Beteken dit dat ek heeltemal moet vergeet van iets wat iemand teen my gedoen het en wat my baie seergemaak het? Nie noodwendig nie; vergifnis beteken dat jy iets wat teen jou gedoen is, oorsien; nie dat jy nooit weer daaraan sal dink of dit sal onthou nie. Vergifnis is dat jy nie wraakgedagtes teen die ander persoon koester nie. Jy moenie hier binne in jou gedurig planne maak oor hoe jy die ander ou gaan terugkry nie. As iemand jou baie seergemaak het, kan jy dit waarskynlik nooit vergeet nie. Ons kan nie ons geheue programmeer om alles net te vergeet nie (as jy oud word, begin dit wel te gebeur). Ons onthou eenvoudig dinge en voel partymaal selfs emosioneel daaroor. Dit is menslik. Maar dit beteken nie dat jy nog nie vergewe het nie. Al onthou jy nog, maar maak nie planne om die ander persoon terug te kry of seer te maak nie, het jy vergewe.

Boek: Geloof in Aksie-Bybel
Skrywers: Prof Jan van der Watt, Dr Stephan Joubert, Dr Johan Smith
Uitgewers: Christelike Uitgewers Maatskappy

Verbond

Die twee dele van die Bybel is bekend as die Ou en die Nuwe Testament. Testament is eintlik ŉ ander woord vir ooreenkoms of verbond.

Verbond is die woord wat gebruik word as God ŉ ooreenkoms met mense maak. As Hy byvoorbeeld na die vloed vir Noag beloof dat Hy nooit weer die wêreld met water sal vernietig nie, dan is dit ŉ ooreenkoms of verbond. As Hy vir Abraham ŉ groot nageslag en ŉ land van sy eie beloof as Abraham Hom getrou dien, is dit ŉ verbond. Net so maak Hy ŉ verbond met die volk Israel by die berg Sinaï dat Hy vir hulle ŉ God sal wees as hulle vir Hom ŉ volk sal wees. Hy sal vir hulle sorg as hulle sal leef soos sy volk. Dan gee die Here vir die volk die Tien Gebooie as riglyn hoe hulle as sy volk moet leef (Eksodus 20). Daarom noem mense partymaal die Tien Gebooie die “Verbondswet”, want dit is deel van die ooreenkoms tussen God en sy mense.

Een ding moet ŉ mens hier nie miskyk nie. So ŉ ooreenkoms het nie net van een kant af gekom nie. God sou doen wat Hy beloof het, maar sy mense moes ook doen wat hulle beloof het. As deel van hierdie ooreenkoms moes hulle volgens God se wil leef. Indien nie, is hulle bereid om die straf daarvoor te dra. Die beskrywing van die tipe straf wat toegepas gaan word as iemand die ooreenkoms breek, is deel van die ooreenkoms: wie dit nie nakom nie, moet voel. Daarom is dit so ernstig as hulle nie na God luister nie. Ongehoorsaamheid beteken hulle breek hulle ooreenkoms en verhouding met God. Dan verdien hulle elke stukkie ongelukkigheid of straf wat van God se kant af kom.

Jesus het ook so ooreenkoms met ons kom sluit. As ons in Hom glo, sal ons God se kinders wees, ja, God sal vir ons ŉ Pa wees en ons sal sy kinders wees. En daarom moet ons soos sy kinders leef. Daar is egter een verskil tussen die verbond van Jesus en die verbonde van die Ou Testament. Jesus help ons as ons nie heeltemal soos soet kinders leef nie. Sy genade maak ons sondes toe. As daar straf uit te deel is, verdra Hy dit in ons plek. Uit liefde vir Hom en ons hemelse Vader moet ons egter elke dag so leef dat Jesus nie te veel vir ons hoef te skerm nie.

Boek: Geloof in Aksie-Bybel
Skrywers: Prof Jan van der Watt, Dr Stephan Joubert, Dr Johan Smith
Uitgewers: Christelike Uitgewers Maatskappy

Ek bly sonder kos en sulke dinge, maar nie om te dieet nie, maar om te vas

Die Bybel praat van ŉ gebruik om ter wille van jou godsdiens nie kos te eet vir ŉ ruk nie – dit word vas genoem (Matteus 6:16-18). In plaas daarvan om te eet, fokus jy op God. Sodra jy honger word, of etenstyd aanbreek, sê jy vir jouself nee vir die kos en dink dan liewer aan die Here en praat met Hom. Op die manier word die vastyd ŉ spesiale tyd vir jou en God. In die tyd kom jy sommer baie nader aan hom.

Die probleem in die Bybel was dat sommige mense wel gevas het, maar om verkeerde redes. Hulle wou hê mense moes sien hoe godsdienstig hulle is. Hulle het nie gevas sodat hulle nader aan die Here kon kom nie, maar sodat mense meer van hulle kon dink. Daarom was die Here nie baie gelukkig daaroor nie.

Ons vas nie eintlik meer vandag nie, want Jesus het gesê dat as die Here elke dag so naby jou is, ja, in jou is, moet jy geen oomblik van Hom vergeet nie. Hy moet soos jou beste vriend wees. Dan hoef jy nie spesiale tye af te sonder om Hom te soek nie. Nee, jy moet elke dag saam met Hom feesvier en jou lewe geniet.

Dit beteken nou nie dat dit verkeerd sou wees as jy tog vir ŉ rukkie “vas” om net weer op jou verhouding met die Here te konsentreer nie. Jy kan iets wat jy graag doen of eet vir ŉ ruk los, net om jou daaraan te herinner dat jy gereeld met Jesus moet praat en moet doen wat Hy vra. Maar dan moet jy dit met die regte gesindheid en doel doen: om nader en nader aan jou Here te kom.

Boek: Geloof in Aksie-Bybel
Skrywers: Prof Jan van der Watt, Dr Stephan Joubert, Dr Johan Smith
Uitgewers: Christelike Uitgewers Maatskappy

Vals profete

Mense kan jou soms so deurmekaar praat oor die godsdiens dat jy nie weet wie om te glo en wie nie. Dit was in die Bybelse tyd al so en dit is baie gevaarlik, want ŉ mens kan maklik op die verkeerde pad beland.

Die Bybel is ons anker as dit by waarheid kom. As iemand vir jou iets vertel wat met die Bybel bots, moet jy maar katvoet loop. In 1 Johannes 4:1-3 sê Johannes dat selfs as iemand beweer die Heilige Gees self het vir hom die boodskap gegee – en die boodskap verskil van die boodskap van Jesus – moet jy hom nie glo nie. Immers, die Gees sal mos nie ŉ boodskap gee wat Jesus ondermyn nie. As iemand so ŉ boodskap, wat met Jesus s’n bots, aan jou wil afsmeer, is dit die sekerste teken van ŉ dwaalleraar. Paulus sê dit nog sterker: hy sê dat selfs as ŉ engel deur die venster vlieg en voor jou kom staan en sê jy moet iets anders as die goeie boodskap van Jesus glo, moet jy vir hom sê hy kan maar gaan vlieg (Galasiërs 1:8). Jesus se boodskap staan vir jou vas.

Partykeer kom mense na jou toe en sê “Die Here (of die Gees) het dit of dat vir my oor jou gesê”. Baie keer is dit sommer ŉ seermaak boodskap. Moenie dit sommer net so glo nie. Die Here sal mos nie by ander oor jou “skinder” sonder om vir jou self ook daarvan te sê nie. Nee, as Hy oor jou iets wil sê, sal hy dit vir jou ook sê. Hy sal dit vir jou op ŉ manier bevestig. Oppas vir mense wat jou met godsdiens probeer manipuleer.

Boek: Geloof in Aksie-Bybel
Skrywers: Prof Jan van der Watt, Dr Stephan Joubert, Dr Johan Smith
Uitgewers: Christelike Uitgewers Maatskappy