Michele vra:

Wie is die hoer in openbaring?

Openbaring 17:1,15,16; 19:2

Antwoord

Prof Francois Malan antwoord:

Die naam wat op die voorkop van die hoer in Openbaring 17 geskryf staan, word in vers 5 in Grieks beskryf as ’n mustêrion, ’n geheim, iets waarvan die inhoud voorheen nie bekend was nie, maar aan sekere persone bekendgemaak is, ’n geheim wat net aan daardie persone bekend is. Haar naam word dan aangegee as ‘Babilon die Grote.’ Die engel verduidelik in verse 7-18 die geheim aan Johannes. In vers 18 word gesê dat die hoer die groot stad is, wat heerskappy oor die konings van die aarde het.

Toe Openbaring geskryf is het Babilon vir baie lank nie meer bestaan nie. Maar in Openbaring word die naam Babilon veral gebruik vir die stad Rome, wat op sewe heuwels gebou is (17:9), dit is die sewe koppe waarop die vrou sit, waarvan vers 7 praat. Daar is ook sewe konings wat die keisers van Rome voorstel. Vyf van hulle het al tot ’n val gekom en die sesde heers op die oomblik toe Johannes die gesig op Patmos gesien het. Keiser Domitianus het vir Johannes na die eiland Patmos verban. Hy is moontlik die sesde koning waarvan die teks praat. Die sewende het nog nie gekom nie (17:9-10). Die getal sewe stel in Openbaring volledigheid  of volkomenheid voor. Dit verwys na die volle tydperk van die heerskappy van die keisers van Rome.

Rome was die hoofstad en setel van die regering van die Romeinse ryk wat die hele ryk met geweld beheer en onderdruk het. Die verskillende lande wat aan Rome belasting moes betaal en die goewerneurs wat die lande namens Rome regeer word gesimboliseer deur vers 7 se tien horings van die dier wat die stad dra, soos vers 12 die goewerneurs ook konings noem.

Eintlik stel Rome alle goddelose magte voor. Rome is skuldig aan lasterlike afgodery, verleidelike immoraliteit en uitspattige luuksheid waarmee sy die nasies verlei (17:3-4). Volgens 17:6 vervolg en vermoor die goddelose magte ook die christene, die getuies van Jesus, soos Domitianus en sy voorganger Nero gedoen het. 

Die dier waarop die hoer ry wil die hele wêreld beheer en die tien goewerneurs wat genoem word konings wat nog nie die koningskap ontvang het nie, help die dier om die hele wêreld te beheer (vgl. 17:12-13). Hoofstuk 18 vertel van die val van die bose regerings van die wêreld en dat God uiteindelik die enigste oorwinnaar sal wees. Hy bly in beheer. Die ontugtige vrou is die hoer. Sy is die bose regerings en goddelose magte wat deur die vuurrooi draak, die Satan (Openb 12:9) gebruik word. Sy sal vernietig word deur dieselfde magte wat sy so wellustig gedien het (Openb 18:2-23).   

Skrywer: Prof Francois Malan

Vraag

Ek wil graag weet of die 1000 jaar vrede op aarde gaan wees of in die Hemel? Waar in die Bybel kan ek dit duidelik sien? Party sê dis in die Hemel omdat die aarde dan heeltemal verwoes sal wees maar soos ek verstaan gaan Satan na die 1000 jr losgemaak word en die mense versamel uit die 4 hoeke van die aarde en ook die geliefde stad omring; maar hoe gaan satan dit doen as die aarde dan heeltemal verwoes is?

Antwoord

Prof Jan van dr Watt antwoord:

Die leser se vraag oor die duisendjarige vrederyk raak ’n interessante vraag aan, maar bevat ’n paar misvattings, daarom het hy of sy die vraag gestel. Op ons webwerf is daar ’n hele paar artikels wat oor temas rakende die 1000jarige vrederyk gaan – tik maar net ‘duisendjarige’ as soekterm in en die artikels oor die eindtyd, Openbaring 20, chiliasme ens. sal daar gekry kan word. Die duisendjarige vrederyk word op net een plek in die Bybel genoem, naamlik in Openbaring 20:1-6 (daar is ’n artikel oor die gedeelte op Bybelkennis.co.za). In Openbaring 19 word daar vertel van die aardse magte wat hulle rieme styfloop teen die Ruiter op die wit perd  (Jesus) en vernietig word. Hierdie magte (die dier en valse profeet wat in hf 13 as die trawante van Satan beskryf word word in 19:20 in die poel van vuur gegooi) is egter  net die instrumente van Satan. Die duiwel word dan vir 1000 jaar gebind en die martelare heers vir 1000 jaar. Die wêreld is dan nog nie vernietig nie – dit gebeur eers in hf 21:1. As die 1000 jaar verby is, word die Satan losgelaat en probeer weer vir ’n tydjie om Jesus te oorwin, maar sonder sukses. Die Satan word dan finaal vernietig (20:7-10) en dan vind die finale oordeel plaas, waarin die gelowiges wat goed gedoen het van die ongelowiges wat nie aan God gehoorsaam was nie, veroordeel word. Dan kom die nuwe Jerusalem (hf 21).

Die vraag hoe die 1000jarige vrederyk verstaan moet word, was van die begin van die Christendom af ’n vraag. Party het aarvaar dat dit fisies ‘n 1000 jaar is waar vrede op die aarde gaan heers, voor die Here finaal kom. Ander meen weer dat die 1000 jaar simbolies is, en nie presies duisend jaar nie. Hulle beweer dan dat dit byvoorbeeld die periode tussen die eerste koms van Jesus en die tweede koms beskryf. Jesus het immers die duiwel met sy eerste koms uitgewerp (Joh 12:31) en so geestelike vrede vir die gereddes gebring. As mens mooi na die teks kyk, sien mens dat net martelare gaan opstaan. Dit maak die volgende verklaring baie waarskynlik: In die Ou Testament het mense geglo dat goeie gelowiges ’n lang en gelukkige lewe uit die hand van God gaan ontvang. Dit is hulle beloning vir hulle vroomheid. Tog is daar gelowige soldate wat as martelare vir God gesterf het om sy volk te verdedig. Hoewel hulle dus vroom was, het hulle nie ’n lang en gelukkige lewe gehad nie. Het God nou in die steek gelaat en sy belofte gebreek? Nee, God sal hulle op ’n spesiale manier weer opwek en aan hulle die lewe teruggee wat hulle verloor het (lees 2 Makkabees 6 en 7). Daarom, net voor die finale oordeel, wek God die martelare  op en beloon hulle met 1000 jaar (die volledige getal) vrede en heerskappy. Dan gaan die proses voort en die nuwe Jerusalem kom.

’n Laaste opmerking: Openbaring 20 praat glad nie van die wegraping nie en in die konteks vind ons ook niks daarvan nie. Ander tekste uit die Bybel is eers in die 18^e eeu deur ’n klein groepe Amerikaanse Christene met Openbaring 20 in verband gebring en toe het die teorieë oor die 1000 jarige vrederyk begin, wat  met die wegraping verbind word.  

Skrywer:  Prof Jan van der Watt

Vraag

Magda vra

Ek het onlangs ‘n interessante You Tube-video raakgeloop en geluister oor bogenoemde onderwerp. Ek sluit die skakel na die video in (https://youtu.be/npk34pB5P4A). Het u dalk enige opinie oor die besprekings en inhoud?

Antwoord

Prof Hermie van Zyl antwoord:

Ek het na die video gekyk en vind dit ’n insiggewende bespreking vanuit sekere Bybelgedeeltes oor hoe die Bose as beide bonatuurlike mag én in samewerking met menslike oormoed en sisteme, in opstand kom teen God se goeie skepping en probeer om dit voortdurend omver te werp en weer af te trek na die oertoestand van chaos en duisternis (Gen 1:2). Die Bybelgedeeltes word op ’n eksegeties aanvaarbare manier bespreek. Ek stem nie met alle detailuitleg saam nie, maar die oorhoofse teologiese sieninge is na my mening gesond en die moeite werd om te oordink.

Let wel, bogenoemde opinie van my is slegs gebaseer op die video ter sprake. Ek weet nie wat die twee gespreksgenote in die video oor ander onderwerpe te sê het nie. Daaroor kan ek my dus nie uitspreek nie.

Die video handel oor die volgende sake:

• Die slang in die paradys
• Die vlieënde draak van Jesaja 14:29
• Lusifer as benaming vir die duiwel, en waar dit vandaan kom
• Die Satan as teenstander van God en die skepping
• Genesis 6:1-4: Die hemelwesens (letterlik: “seuns van God”) wat met die dogters van die mense getrou het, hoe dit verband hou met die ontstaan van “reuse”, en wat laasgenoemde behels
• ’n Oorhoofse interpretasie van al bogenoemde gegewens. Die video probeer ’n gemeenskaplike patroon tussen genoemde gebeure vind omtrent die werking van die Bose. Dit kom daarop neer dat daar ’n interaksie tussen menslike en bonatuurlike boosheid is, nie net in die Bybel nie, maar ook in ons eie tyd. ’n Mens moet ’n oog ontwikkel vir hoe subtiel die Bose nog steeds te werk gaan in ons eie tyd. Ons moet dus nie sommer die Bybelse verhale oor die Bose as ongeloofwaardige mites afmaak nie, maar juis insig bekom oor wat hierdie verhale ons ten diepste wil bied.

Ons vraagsteller kan gerus ook kyk wat op die webblad van bybelkennis.co.za oor die satan en demone geskryf is. Daar is talle artikels hieroor. Daar is ook bydraes wat ek self hieroor gelewer het, met die volgende titels: “Bevrydingsbediening” en “Binding van Satan en demone”. Sleutel hierdie titels by die soekfasiliteit van die webblad in, asook die begrippe “satan” en “demone”, en bekom so al die gegewens.

Skrywer:  Prof Hermie van Zyl

Liesl vra:

In watter stad/dorp is Stefanus gemartel en waar staan dit in die Bybel? In watter stad/dorp het Petrus sy visioen gehad en waar staan dit in die Bybel?

Wie was die gehoor vir wie die volgende Bybelboeke geskryf is: Genesis, Numeri, Josua, Rigters, Rut, 1 en 2 Samuel, 1 en 2 Konings, Esra, Nehemia, Ester, Job, Psalms, Spreuke, Hooglied, Jesaja, Klaagliedere, Miga, Habakuk.

Antwoord

Prof Hermie van Zyl antwoord:

Stefanus se martelaarskap: Stefanus was een van die sewe wat gekies is om te help met die versorging van die Griekssprekende weduwees (Hand 6:1-6). Ons lees van sy martelaarskap in Handelinge 7 (7:54-60 om presies te wees). Hierdie gebeure het in Jerusalem plaasgevind (vgl Hand 8:1). Trouens, al die gebeure van die begin van Handelinge tot en met hoofstuk 7 speel in Jerusalem af. Eers van hoofstuk 8 af versprei die evangelie (en gelowiges) na die omringende gebiede, soos Judea en Samaria. En van Handelinge 13 af versprei die evangelie na buite Palestina, na die (destydse) uithoeke van die bewoonde wêreld rondom die Middellandse See. Hierdie verspreiding is ook in ooreenstemming met die “program van aksie” wat in Handelinge 1:8 aangekondig word.

Visioen van Petrus: Petrus het sy visioen oor die rein en onrein diere in Joppe gehad. Ons lees daarvan in Handelinge 10:5-16. Joppe (vandag Jaffa) was ’n belangrike kus- en hawedorp van Palestina, ongeveer 50 km suid van Sesarea en 50 km noordwes van Jerusalem. Sesarea was die stad waar die Romeinse prokurator wat oor Judea geregeer het, sy hoofkwartier gehad het.

Gehoor (eerste leserskring) van Bybelboeke: Hierdie is ongelukkig nie ’n vraag wat maklik afgehandel kan word in die bestek van hierdie antwoord nie. Dit vereis ’n taamlik omvangryke beredenering. Die beste is om ’n Bybelkommentaar te raadpleeg, soos Die Bybellennium. ’n Eenvolume-kommentaar. Redakteurs: Fika J van Rensburg en Marius Nel. Uitgegee deur Christelike Uitgewersmaatskappy. Daarin word by elke Bybelboek volledige inligting gegee oor die skrywer, gehoor, tyd en plek van ontstaan. En dit bevat ook kosbare uitleg oor die inhoud van elke Bybelboek.

Skrywer:  Prof Hermie van Zyl