Monte vra:
HOE HANTEER JY IEMAND WAT ANTI OU APOSTOLIESE KERK IS
Antwoord
Prof Francois Malan antwoord:
Kan jy hom oortuig dat die Ou Apostoliese Kerk aanvaar dat mense in ander kerke ook deur Jesus Christus gered word, dat die Heilige Gees ook in hulle woon en dat hulle ook kinders van God is sonder die tussenkoms van die apostel?
Skrywer: Prof Francois Malan
Anton vra:
Kan U my a s b help met die volgende :
Hoe het visser manne die sabat dag geheilig aangesien hulle – ( Petrus ) in die aand vis gevang het, en siende dat die sabat dag die vrydag aand 6 uur begin het en die Saterdag 6uur die aand ge eindig het .
Beteken dit dat Petrus die donderdag aand sou vis vang en die vrydag deur die verloop van die dag slaap.
Antwoord
Prof Francois Malan antwoord:
Die Joodse Sabbat strek van Vrydagaand met sononder tot Saterdagaand met sononder. Gedurende dié tyd mag nie met jou daaglikse werk voortgegaan word nie. Petrus-hulle kon dus Vrydag visvang tot voor sononder en weer van Saterdagaand met sononder voortgaan met visvang. Gewoonlik was die nag die beste tyd vir visvang, maar ander het van vroegoggend begin visvang (vgl. bv. Lukas 5:2,5; Joh 21:3; Markus 1:19 vir deurnag visvang; vir bedags vgl. Markus 1:16; Matteus 4:18).
Die vis wat Donderdagnag of Vrydag deur die oggend gevang is kon Vrydag deur die dag verkoop word. Die vis wat Saterdagnag gevang is kon Sondag verkoop word. Vrydagnag was daar nie vis gevang nie, en Saterdag is nie vis verkoop nie.
Vissers het soggens hulle vis verkoop wat die nag of vroeg oggend gevang is en het daarna gaan slaap.
Skrywer: Prof Francois Malan
Jaqueline vra:
Ek het ’n vraag: Kry ons as mense profetiese of geestelike drome? Ek het drome wat my baie pla, dis van die min kere dat ek die drome in detail onthou. Ek skryf altyd my drome neer wanneer dit kom by dié tipe drome. Ander, “gewone” drome pla my nie. So, is dié “spesiale” tipe drome geestelik of is ek maar net oorsensitief of mal?
Laat ek ’n voorbeeld gee. Ek het al gedroom dat ek my in ’n plek bevind waar daar net afgebrande geboue en rook is. Dit lyk soos die oordeelsdag. ’n Man in die droom met ’n kopdoek aan, soos in die tyd van die Israeliete, vat my na ’n tafel waar hy met my praat, maar ek kan nie onthou waaroor ons gepraat het nie. Alhoewel, hy het iets genoem van “die boek van die lewe”.
Nog ’n voorbeeld. Ek droom ek klim op ’n wolk wat my opvat na ’n plek waar daar net vrugte en groente is, geen diere of vleis nie. Ek het gepraat met ’n groot man in ’n wit kleed, maar kan nie onthou wat nie. Al wat hy gesê het, is: “Praat met my.” Ek het met hom gepraat, hy het geluister en my weer terug gestuur. Na baie maande klim ek weer op ’n wolk wat my na dieselfde plek toe vat, maar die keer was daar niks. Ek het die droom al drie keer gekry.
Ander kere het ek gedroom ek word aangeval. Dan het ek die Ons Vader-gebed as my wapen gebruik wat die Satan se aanvalle afgeweer het.
Nog ’n droom is waar ek my bevind op ’n plek wat ek vermoed die doderyk is. In die droom vat my ma my soontoe. Sy is oorlede in Feb 2019. Sy het my gevra hoe dit met ons gaan. Ek het haar vertel wat tans gebeur met my sussies-hulle, ensovoorts. Maar soos wat ek met my ma praat, het sy weggeraak en alles het begin donker word, soos ligte wat afgaan. Ek hardloop toe, en daar is ’n swart man wat sweef en my ’n donker gang wys om uit te kom. Maar ek het gesê, nee, en gehardloop vir ’n wit deur, daardeur gegaan en wakker geskrik.
Antwoord
Prof Hermie van Zyl antwoord:
Met profetiese of geestelike drome bedoel die vraagsteller waarskynlik of die soort drome wat sy beskryf het, besondere geestelike betekenis of boodskap vir haar lewe het. Die onuitgesproke gedagte by haar mag selfs wees: Praat God nie dalk met my persoonlik op hierdie manier nie? En indien wel, hoe moet ek hierdie drome dan interpreteer?
Oor hoe ons drome in die algemeen – en veral hierdie besondere soort drome – teologies moet beoordeel, is daar al redelik uitvoerig op die webblad Bybelkennis.co.za geskryf. In hierdie artikels sal ons vraagsteller beslis antwoorde op haar vrae kry. Ek verwys haar dus na die volgende artikels op ons webblad:
Sleutel net die betrokke artikel se titel in die soekfasiliteit-blokke in, en kry dan die artikel op die webblad.
Skrywer: Prof Hermie van Zyl
Trudi vra:
Is dit nodig om wedergebore te word?
Jy hoef nie (noodwendig) wedergebore te wees nie.
Antwoord:
Prof Jan van der Watt antwoord:
Die woord wedergeboorte het sy oorsprong in Joh 3:3 (5) waar Jesus met Nikodemus oor redding praat. Daar word twee woorde langs mekaar in die Grieks gebruik, naamlik gennaô (om gebore te word) en anôthen (kan twee betekenisse hê, nl. ‘weer’ of ‘van bo’ = van God af). Dit kan dus met weer-gebore of met van bo (=van God) gebore vertaal word.
Soek ons deur die Nuwe Testament kom ons agter dat dit eintlik net Johannes is (in sy evangelie en briewe) wat sê dat mens ‘gebore’ (weer of van bo) moet word. 1 Petrus noem dit ook twee maal in sy eerste brief (1:3, 23) en Paulus net in Titus 3:5 (’n moeilike verwysing om te verstaan).
Waarom is dit net eintlik Johannes wat van geboorte praat (en nie die ander Nuwe-Testamentiese skrywers nie? As daar in die Nuwe Testament oor redding gepraat word, word dit feitlik altyd met beelde (metafore) beskryf, omdat dit so wonderlike gebeurtenis tussen God en mens is. Paulus is lief om beelde uit die alledaagse sosiale lewe te neem, soos om vrygekoop te word (soos ’n ‘slaaf’ van sy meester (die sonde), of om met God versoen te word, wat beteken dat Iemand (Jesus) namens die mens onderhandel om die vrede met God te herstel, of regverdigmaking, met ander woorde dat ’n mens regverdig verklaar word, soos iemand in die hof. Matteus of Markus hou daarvan om te praat van navolging, die kruis soos Jesus dra en hom volg, ens.
Toe Johannes aan sy gemeente moes verduidelik hoe redding werk, het hy (en Petrus) die beeld van ’n familie gekies – God is ons vader en ons is Sy kinders. Hy sorg vir ons (hff. 4 en 6) hy beskerm ons soos ’n goeie vader (Joh 10:28-30), deur die Heilige Gees leer Hy ons, ens. Hy gebruik dus al die dinge wat in ’n gewone familie gebeur en pas dit geestelik op ons as gelowiges toe, om so uit te druk dat as ons aan ons redding dink, ons dit wat geestelik met ons gebeur in terme van die aardse bekende kan verstaan, naamlik ’n familie. Nou hoe het ons in ons aardse families ingekom? Ons is gebore. Net so moet gelowiges (van bo, of weer) gebore word om in die geestelike familie van God te kom. Dit is dus duidelik dat Johannes ’n sekere beeld (die familie) verkies om redding te beskryf, terwyl Paulus liewer hofbeelde (regverdiging) of slawe-beelde (loskoping) gebruik.
Die beelde staan nie teenoor mekaar nie, maar vul mekaar aan. Dit is almal maniere om die wonder van ons redding te beskryf. Paulus sou sê: Julle met regverdig word, of losgekoop word, terwyl Johannes sou sê: julle moet wedergebore word.
Uit die verduideliking is dit dus duidelik dat ‘wedergeboorte’ nie die enigste term is wat in die Nuwe Testament gebruik word om redding te beskryf nie. Dit is ’n belangrike manier om redding te beskryf, want dit herinner ons aan die feit dat ons kinders van ’n wonderlike Vader is. Ons moet egter nie maak of dit die enigste manier is om van redding te praat nie – ons mag nie van Paulus, of Markus en die ander vergeet wat ook op hulle besondere maniere van die redding praat nie. Om ‘n Christen te wees moet jy noodwendig gered wees, en in die Nuwe Testament is daar baie wonderlike maniere om daaroor te praat.
Wat die artikel oor die split van die NGK betref, dink ek moet ons vir die brief dankie se, maar se dat ons fokus op Bybelse temas en nie kerkpolitiek nie. Daar is egter heelwat artikels in die databank van Bybelkennis wat mens kan help om ‘n verantwoordelike standpunt hieroor in te neem, wat ons is van oortuiging dat die Bybel die vaste fondament van die Kerk van Jesus Christus is.
Skrywer: Prof Jan van der Watt