Die Eerste Brief van Johannes (9) – Jan van der Watt

Deel 2: ‘n Geesvervulde lewe – in die gesin van God

Hoofstuk 8: ‘n Lewe … as kind van God

Die lewe is vol geleenthede om regtig Christen te kan wees en ’n verskil te maak. Jy moet egter weet hoe om dit te benut—tussen al die vaaghede en probleme oor die Christelike lewe wat ons dikwels ervaar.

  Die groep is belangriker as die indiwidu

Bye is wonderlike goed! Hulle werk nie net hard nie, maar is ook vir almal ’n voorbeeld van samewerking en opoffering. As ’n by byvoorbeeld ’n klomp blomme met nektar kry, hou hy dit nie geheim nie, maar vlieg dadelik terug nes toe om vir die ander te gaan vertel. Sy groeplede is vir hom belangriker as hyself. Elke by doen ook nie maar net wat hy wil nie, maar tree op soos die groep wil. As die nes bedreig word, sal die by sonder om te vra die aanvaller steek en so sy eie lewe vir die groep gee.

Die rede waarom bye so maak, is omdat hulle nie indiwidueel aan hulleself dink nie. Die groep en die groep se belange is belangriker as die indiwiduele by.

So wil God hê moet sy gesin ook wees!

Met die antieke gesin was dit nie anders nie. In Hoofstuk 3 het jy gesien dat die kerk deur Johannes beskryf word as die “geestelike” gesin van God. Destyds is daar ook gesê dat die gesin as groep belangriker as die indiwiduele lede is. Die pa was die een wat namens die groep die gesag gedra het en die reëls gemaak het. Elke groeplid moes volgens die reëls lewe as hy homself lid van die groep wou noem. Die lid van die groep moes dus nie in die eerste plek vra wat hy of sy self wou hê nie, maar wat die groep van hom of haar verwag! Daarin lê die karakter van die gesin.

God die Vader laat nie sy kinders in die duister oor hoe hulle moet optree nie. Hy sê presies wat Hy van hulle as sy gesin verwag.

• Lees 1 Joh. 2:3–5 en 3:24. Dink oor hoe hierdie verse verstaan kan word in die lig van wat hierbo oor die Vader en sy gesin gesê is.

Ons word deesdae met moeilike vrae gekonfronteer, byvoorbeeld of aborsie geregverdig is, of homoseksualiteit toelaatbaar is en so aan. Die groot argument van die mense wat hierdie en soortgelyke probleem-sake aan die brand steek, is dat elke mens die reg het om te besluit wat hy wil doen; almal is “vry” en daarom kan die een nie vir die ander voorskryf nie. Kortom, die reg om te besluit wat ek wil doen of nie wil doen nie, lê by myself. So reken hulle.

1. Dink na oor hierdie vraag wat nou by die Christen opkom: Kan die Christen vir homself besluit wat reg of verkeerd is? Indien nie, na wie moet die Christen dan luister om te weet wat reg of verkeerd is?

As die Christen hom- of haarself ’n kind van God wil noem, moet hy of sy bereid wees om na die Vader te luister.

 

Ouboet, help!

Die kerk—die gelowiges—is die gesin van God. In die gesin is Jesus die spesiale, unieke Seun van God (vgl. Joh. 1:18 en 3:16). As Seun van die Vader is Hy egter ook die gelowiges se “Ouboet”.

Hoe sal die gelowiges nou weet hoe die Vader wil hê dat hulle in die wêreld moet optree? Die Vader is immers onsigbaar (Joh. 1:18). Die onsigbare Vader het egter ’n plan gemaak. Hy het sy Seun gestuur om vir ons as voorbeeld te dien van wat Hy van ons verwag. Kyk maar na Hom en jy sal weet hoe om op te tree.

1. Vul nou by elke Skrifgedeelte hieronder in wat oor die verhouding tussen die gelowige en Jesus gesê word. Skryf telkens in die eerste reël wat oor Jesus gesê word, en in die tweede reël wat oor die gelowige gesê word.

1 Joh. 2:6:

1 Joh. 2:29:

1 Joh. 3:3:

1 Joh. 3:5–6:

1 Joh. 3:16:

1 Joh. 4:17

(1) Hoe, sou jy sê, moet die gelowige se lewe lyk volgens die beskrywings in die verse hierbo?

(2) Behoort daar ’n verskil te wees tussen die manier waarop die gelowige in ’n situasie optree en hoe Jesus in dieselfde situasie sou optree? Waarom sê jy so?

Persone wat aan dieselfde gesin behoort, tree dieselfde op. Presies hoe ons moet optree, het Jesus aan ons kom wys.

 

Vader, hoe moet ek optree?

Die pa van die antieke gesin het die gedrag van die gesin bepaal. Die pa was immers die een wat gesê het wat reg en wat verkeerd is.

’n Paar vrae duik nou op:

(1) Hoe is die gelowige se Pa? (1 Joh. 4:8 en 16.)

(2) Hoe moet die kind wees? (1 Joh. 4:7–8 en 16.)

(3) Hoe belangrik, dink jy, ag God die werke van die gelowige? Verduidelik dan ook hoekom jy so sê.

(4) Wat moet ’n mens aflei as ’n persoon sê dat hy of sy wel ’n gelowige is, maar nie eintlik so optree nie? (1 Joh. 3:10 en Jak 2:14–17.)

Wie ’n kind van God wil wees, moet soos ’n kind van God optree! Lidmaatskap aan die gesin eis gehoorsaamheid aan die Vader.

(5) Dink nou aan die volgende vraag: Hoe wil die Vader hê moet sy kinders oor hulleself dink? Kies elke keer hieronder Ja of Nee. Motiveer telkens waarom jy ‘n spesifieke keuse maak.

•  Ek is maar ‘n arme sondaar wat tot niks goeds in staat is nie. Eintlik probeer ek nie eers nie, want ek weet sommer ek gaan misluk.

Ja/Nee

Motiveer:

•  Ek kan soos Jesus wees.

Ja/Nee

Motiveer

•  Ek moet net my bes probeer om soos Jesus te wees, hoewel ek weet ek kan eintlik nie.

Ja/Nee

Motivering:

Die lewe is vol geleenthede

Dink net daaraan: As ’n mens die lewe positief sien, kan dit nogal ’n verskil maak! Die lewe is immers vol geleenthede om regtig Christen te kan wees.

Neem byvoorbeeld die kere wat jy jou liederlik vir iemand vererg en hom net wil invlieg! Wag so ’n bietjie! Besef dit: Ergernisse en probleme is eintlik vir jou ’n kans om jou Christenskap uit te leef! As jy liewer nie jou humeur verloor nie, maar liefdevol reageer, bereik jy mos iets konstruktief tot eer van God! Versoekings en beproewings is geleenthede om VIR GOD TE LEEF!

’n Christen moet nie van die probleme van die lewe weghardloop nie, maar moet die lewe positief soos Jesus aanpak. Watter vertroue plaas God nie in ons nie: om van ons te verwag om sy gesin—soos Jesus—in die wêreld te gaan wees!

 

Skrywer: Prof Jan van der Watt

Die Eerste Brief van Johannes (8) – Jan van der Watt

Deel 2: ‘n Geesvervulde lewe – in die gesin van God

Hoofstuk 7: Vervulling met die Gees

Die landerye onderkant ’n besproeiingsdam kan alleen vrug lewer as dit water uit die dam kry. So kan ’n gelowige alleen sinvol leef deur die krag van die Gees van God wat elke gedagte, daad, beweging of gesindheid “vul”. Die gelowige is van die Gees van God afhanklik om ’n normale Christelike lewe te lei! En tog is ons ervaring en verstaan van die Gees so vaag.

  Hoe weet ek dit is die Gees?

Sê eers vir jouself duidelik hoe jy die werk van die Heilige Gees in jou verstaan deur die volgende twee vrae te beantwoord.

1. Verduidelik hoe jy die “vervulling met die Heilige Gees” verstaan.

1. Hoe kan ’n mens (prakties) weet dat die Heilige Gees in jou werk?

Twee-uur een nag lui die telefoon. Jy skrik jou boeglam en wonder wie siek of miskien dood is!

Toe jy optel, hoor jy ’n kerkvriendin van jou vrou. Sy val met die deur in die huis en begin jou uitvreet oor wat jy alles verkeerd doen. Sy sê die Heilige Gees het nou vir haar gesê om vir jou te sê dat jy jou moet bekeer. Jy is op pad hel toe as jy so aangaan! Kaplaks sit sy die telefoon weer neer.

Jy het eers gewonder waaroor dit gaan. Toe hoor jy jou vrou het by ’n Bybelstudie ’n opmerking gemaak dat jy so besig is dat jy selfs na ure moet werk. Die vriendin het dit duidelik verkeerd vertolk. Om een of ander rede het sy gevoel sy moet jou bel en jou regsien.

Sy beweer egter dat dit die Heilige Gees is wat haar gelei het…

Die groot vraag by baie Christene is: Hoe weet jy of hoe kan jy weet of dit regtig die Heilige Gees is wat met jou praat?

Dink na oor die volgende vraag en formuleer ’n antwoord daarop:

Wanneer kan jy seker wees die Heilige Gees lei jou?

Mense sê gedurig die Heilige Gees het dit of dat vir hulle gesê, of het hulle sus of so gelei. Dikwels kry ’n mens in ’n gesprek met so ’n persoon selfs die gevoel dat God jou vergeet het, omdat dit klink of God so direk met hierdie mense praat. Wat van jou? Hoekom “hoor” jy God nie so duidelik soos hulle nie?

Die taak van die Heilige Gees

Johannes gee nogal ’n duidelike beskrywing van die taak van die Heilige Gees. Die taak word deurgaans in die lig van Jesus beskryf.

Lees die volgende gedeeltes en dui elke keer aan wat die Heilige Gees doen.

1. Joh. 14:25–26:

2. Joh. 15:26:

3. Joh. 16:13–15:

4. Gal. 1:8:

Die Heilige Gees tree net binne die raamwerk van Jesus en sy verkondiging op. En dit is die raamwerk waarvan ons in die evangelie van Jesus Christus leer!

Dit is interessant dat volgens Joh. 16:13 die Gees ook dinge gaan openbaar wat nog gaan kom, maar dat dit nie in botsing is met die verkondiging van Jesus nie!

Daarmee het die Bybel eintlik aan ons ’n belangrike sleutel gegee om vas te stel of te “toets” of die Heilige Gees by iets betrokke is of nie.

Die toets vir die Gees: As iets met die EVANGELIE VAN JESUS bots, of op punte nie daarmee ooreenstem nie, kom dit nie van die Heilige Gees nie!

 

Toets die “Gees”

In die vroeë kerk was daar ook mense wat beweer het dat hulle “deur die Gees” praat. Dat daar sulke groepe in die Johannese gemeente was, het ons alreeds in die eerste Bybelstudie gesien.

Die probleem met die bewering: “die Heilige Gees het vir my gesê,” is dat dit nie kontroleerbaar is nie. As iemand dit vir jou sê, voel jy nie dat jy eintlik met hom of haar kan stry nie. Dit mag lyk of jy die gesag van God nie wil erken nie!

Moet ’n mens iemand wat sê dat hy of sy deur die Heilige Gees praat, “toets” en indien wel, hoe? (Kyk ook weer na die deel wat hierbo bespreek is.)

Vergelyk jou antwoord met die antwoord wat jy op die vraag net na die vertelling van dié voorbeeld aan die begin gegee het.

 

Vervul met die Gees

Ons hoor dikwels dat daar gesê word dat elke gelowige die Heilige Gees in hom of haar het.

Tog is daar gelowiges wat sê dat baie mense wat hulleself Christene noem, nie eintlik weet wat die “krag” van God se Gees oftewel die “vervulling met die Heilige Gees” regtig beteken nie! Maar as ’n mens die slag “vervul” is en daardie wonderlike ervaring gehad het, is dinge vir jou nooit weer dieselfde nie.

Nou wonder ’n mens: hoe pas die bewering dat alle gelowiges die Heilige Gees het by die bewering dat ’n mens spesiaal met die Gees vervul moet word?

1. Kan altwee die bewerings direk hierbo gelyktydig waar wees? Dink hieroor en soek ’n oplossing.

1. Lees Joh. 14:16–17; 1 Joh. 3:24; Rom. 8:9 en 1 Kor. 12:3. Wat sê hierdie verse oor die vraag of die gelowige die Heilige Gees het?

1. Wat sê Joh. 14:26; 16:13; Gal. 5:25 en Rom. 8:5 oor die manier waarop die Heilige Gees in ons lewe teenwoordig is en ons lewe wil beïnvloed?
2. 
   

Vervulling is ’n verhouding

As dit gaan oor die vervulling met die Heilige Gees, moet ons onthou dat dit gaan oor ’n verhouding wat tussen twee persone bestaan.

Daarom word uitdrukkings gebruik soos: ons moet ons deur die Gees laat lei of laat beheers. Dit beskryf die verhouding wat daar tussen ons en die Gees bestaan.

Die Gees is in ons. Die Gees maak soos ’n intieme vriend deel van ons lewe uit.

Die Gees wil bewustelik invloed op ons uitoefen deurdat die Gees ons wil lei of beheers.

Soos in die geval van enige verhouding is dit egter moontlik om die invloed van die ander party te ignoreer en net te doen wat jy wil. Dan bedroef so ’n persoon die ander party. Net so kan die gelowige die Gees bedroef.

Dit beteken nie dat hulle nou sonder die Gees is nie, maar dat hulle verhouding met die Gees vertroebel is. Soos in ’n gewonde verhouding moet hierdie saak reggestel word deur die verhouding te suiwer. Gaan op jou knieë en praat die probleem uit en herstel die verhouding.

Wie egter konstant bewus is van die Gees se teenwoordigheid in sy of haar lewe en sy wil en besluite geheel en al ondergeskik maak aan die leiding van die Gees, sal in alles wat gedoen word die wil van die Gees ten volle (vervuld) uitleef.

Soos in die geval van ’n gewone verhouding voel ’n mens soms nader aan die ander persoon en soms verder van hom af. Jy voel nie altyd dieselfde nie, maar dit verander nie die feit dat daar ’n verhouding tussen julle bestaan nie.

Net so met die Gees. Dit mag wees dat jy ’n besondere ervaring van die nabyheid van die Gees het en oorspoel word deur die bewustheid van sy nabyheid. Later mag die “gevoel” weg wees, maar dit beteken nie dat die Gees nou minder by jou is nie.

Die belangrike ding is dat daar by jou die begeerte moet wees om jou in gehoorsaamheid deur die Gees te laat lei. Jy moet geestelik sensitief bly vir sy teenwoordigheid en leiding in jou lewe.

As jy onseker is hoe die vervulling met die Gees werk, dink daaraan hoe ’n verhouding tussen twee persone werk. Gebruik dit dan as voorbeeld vir die manier waarop jy die verhouding tussen die Gees en jouself kan verstaan!

 

Skrywer: Prof Jan van der Watt

Die Eerste Brief van Johannes (7) – Jan van der Watt

Deel 2: ‘n Geesvervulde lewe – in die gesin van God

Hoofstuk 6: Daar is God! … maar dis dan Jesus!

Waar sou ons sonder Jesus gewees het? Ons sou ten minste God nie werklik geken het nie, ons sou nie geweet het hoe om op te tree nie, ons sou geestelike lyke gewees het. Maar nou weet ons beter… En tog wonder ons nog watter verskil dit regtig in ons lewe bring.

  

Jesus, die Een wat God kom “verklap”

 

Kan jy jouself indink hoe dit was voor die wêreld geskep is? Al wat daar was, is God. By Hom alleen was die ewige lewe, die waarheid, vrede, wysheid en so aan. Met die skepping het God alles volgens sy wysheid gemaak en lewe aan die skepping gegee. Soos ’n skilder met ’n skildery het God iets van hierdie kwaliteite van Hom in die skepping weggelê. Daarom kan ons iets van God uit die skepping leer!

Tog het God onsigbaar gebly (1 Joh. 4:12)—Hy was nie in die skepping vasgevang nie. Geen mens het direkte toegang tot Hom gehad nie. Deur drome, gesigte, profete en so meer het Hy met die mense op aarde gepraat.

Jesus het alles egter kom verander. Hy, wat self God is (1 Joh. 5:20), het sigbaar as mens na hierdie aarde gekom. In sy woorde kon ons die woorde van God self hoor en in sy optrede kon ons die manier sien waarop God werklik wil hê dat ons sinvol moet leef. Nou hoef ons nie op indirekte manier (deur die skepping of deur drome) na God te soek nie. In Jesus leer ons wat God regtig van ons verwag.

Daarom noem ons die Christendom ’n openbaringsgodsdiens. Ons suig nie sommer wat ons glo uit ons duim uit nie, maar glo dat God dit self aan ons kom wys het deur sy Seun, Jesus.

Deur Jesus in ons optrede en gesindhede na te volg, kan ons sê dat ons werklik leef soos God vir ons bedoel het om te leef.

• As Jesus die voorbeeld is van hoe ons lewe moet lyk en hoe ons moet optree, maak ’n lys van die manier waarop Jesus opgetree het. Skryf direk na elkeen van jou stellings ’n voorbeeld of twee. Laat die regterhandse kolom oop vir vraag (ii) hieronder. Die regterhandse kolom met kleiner as die linkerhandse kolom wees.

Jesus het/was:

• Meet jou lewe aan wat jy van Jesus hierbo gesê het: gee jouself in die regterkantste smal kolom hierbo ’n punt uit tien vir elke eienskap wat jy van Jesus opgenoem het.

Wanneer jy jouself bepunt, onthou: Jesus moet as voorbeeld vir jou lewe dien.

1. Lees die volgende dele in die evangelies. Skryf in die linkerkolom hieronder die kwaliteite wat uit 1 Johannes kom. Pas dan die Skrifgedeeltes in die regterkolom by die ooreenstemmende kwaliteite van Jesus in die linkerkolom.

1 Johannes 1:2	Johannes 4:39 – 42
1 Johannes 3.3	Lukas 23:47 Johannes 18:38 Johannes 19:4
1 Johannes 3:5	Matteus 15:10 – 20
1 Johannes 4:14	Johannes 11:25 Johannes 14:6
1 Johannes 5:18	Johannes 10:28

Vergelyk nou hierdie kwaliteite met wat jy in Vraag 1 hierbo geantwoord het.

ONTHOU: Wie jy is, is wat jy kan doen. En wat jy kan doen, wys wie jy is.

 

Jesus, die rein en sondelose Redder

Die pa sorg dat dit reg gaan in sy gesin. Hy is verantwoordelik daarvoor om aan die kinders te leer hoe hulle moet optree.

Die manier waarop ons hemelse Vader dit doen, is deur sy Seun as VOORBEELD vir sy ander kinders te stuur (soos jy hierbo gesien het).

As Jesus vol sonde was, sou Hy ons werklik kon red uit ons sonde uit?

As Jesus onrein was, sou Hy ons werklik rein voor God kon stel?

As Jesus nie sterker as Satan was nie, sou Hy ons kon bewaar?

Dit is duidelik dat Jesus ons Redder kan wees omdat Hy werklik sondeloos en rein is.

Jesus is die sondelose en rein Redder.

Die groot vraag in die Christendom is: WIE IS JESUS VIR JOU?

Jou antwoord oor wie Jesus vir jou is, beantwoord ook die vraag wat Hy vir jou kan doen!

Word ’n paar oomblikke stil en dink na oor wie Jesus werklik vir jou is!

Jesus reken met Satan af!

• Wat was die doel van die koms van Jesus volgens 1 Joh. 3:8?
• Op watter maniere, dink jy, het Jesus hierdie doel van Hom bereik?
• Hoef ons nou glad nie meer bekommerd te wees oor Satan nie? Hoekom sê jy so?
• Lees nou 1 Joh. 5:21 en dink oor wat Johannes daarmee bedoel.

 

Jesus is ook God!

1. As iemand vir jou vra: “Is Jesus God?” wat sou jy antwoord?

2. Kyk hoeveel “bewyse” jy uit die Bybel kan kry dat Jesus regtig God is.

3. Lees nou 1 Joh. 5:20; Joh. 1:1, 18; en 20:28.

4. Hoe moet ’n mens 1 Joh. 2:23; Joh. 10:30 en 17:21 verstaan?

5. Wat sê die gedeeltes hierbo oor die “Drie-eenheid”?

Die Eerste Brief van Johannes (6) – Jan van der Watt

Deel 2: ‘n Geesvervulde lewe – in die gesin van God

Ons begin nou met die tweede deel van ons Bybelstudie.

Hoofstuk 5: ‘n Vader duisend? Duisend maal meer!

Niemand minder as God self sê dat Hy na jou sal omsien as jy sy kind is nie. Glo jy dit? Waarom is daar dan nog twyfel en vrees by jou?

 ’n Klein, klein wêreld … jóú wêreld?

Hoewel ons op die maan en ander planete land en met teleskope dieper die ruimte inkyk as ooit tevore, is ons wêreld geneig om al hoe kleiner te word. Hoe dan so?

Die rede is omdat ons die grense al hoe nouer om onsself as mense trek. Alleen dit wat sogenaamd bewys kan word, met die oog gesien en met die verstand uitgeredeneer kan word, glo ons regtig en is vir ons waar! Dinge wat ons nie mooi kan verstaan nie, bestaan volgens ons eintlik nie regtig nie. Ons leer ons kinders op skool dat iets alleen “wetenskaplik” en dus “waar” is as ons dit met ’n eksperiment kan bewys—en so kyk ons self na die lewe.Die gevolg is dat ons wêreld “klein” geword het—net so groot as wat ons verstand kan begryp of ons oë ver kan sien … en dit is nie so baie ver nie.

“Ons wêreld” te klein vir God

Hierdie houding van ons het egter een vernietigende gevolg: ons het God so uit ons wêreld begin uitsluit. Ons kan God nie met die verstand verklaar of met die oog sien nie. Hy is te groot daarvoor! Omdat ons egter net glo wat ons kan verklaar of kan sien, plaas ons God so buite die wêreld of realiteit wat vir ons geloofwaardig lyk.

Ons sit wel miskien in die kerk, maar ek glo nie werklik dat God my finansiële probleem sal kan oplos nie. Ek vertrou Hom nie heelhartig vir ’n besluit wat ek moet neem nie. Dit is vir my te onseker en te onverklaarbaar. Ek wil liewer die beheer in my eie hande neem… En so word my wêreld klein omdat dit sonder God is.

Stel nou eers vas hoe “groot” of “klein” jou wêreld regtig is:

1. Vertrou jy gewoonlik vir alles blindelings op God? Wat sê jou antwoord vir jou oor jou “wêreld”
2. Hoe lyk jou gebedslewe? Bid jy byvoorbeeld met oorgawe omdat jy iets verwag?. Wat sê jou antwoord vir jou oor jou “wêreld”?

 

God is ons Vader

Ons het uit die vorige Bybelstudies gesien dat God die Vader van die Christelike gesin is. Lees weer die gedeelte oor die antieke gesin in die vorige Bybelstudie deur.

1. Wat is die funksies van die pa volgens daardie beskrywing?

1. Wat kan jy van God, die Vader, verwag veral as jy onthou dat Hy baie beter as ’n gewone pa is?

Wat ’n groot gedagte is dit om te dink dat God jou Vader is; Hy wil jou so naby aan Hom hê dat jy jou geestelike arms om Hom kan slaan, jou vrese in sy oor kan fluister, jou probleme met Hom kan bespreek, alles met die wete dat Hy HOOR en die beste laat gebeur. As ons Vader versorg en beskerm Hy ons immers!

1. Lees die vorige sin weer en word ’n minuut of wat stil terwyl jy die wonderlike gedagte oordink. Dink mooi wat dit presies vir jou beteken. Leef jy so?

 

God is liefde

As ons God wil verstaan, moet ons eers verstaan wat liefde is.

1. Wat is Goddelike liefde presies volgens 1 Joh. 4:9–10?

2. Wat is die gevolg hiervan vir jou alledaagse lewe? Byvoorbeeld: dink jy God sal sommer enigiets onnodig (pynliks) met jou laat gebeur? En indien so iets gebeur, hoe moet jy dit sien?

3. Nog ’n voorbeeld van die gevolg op Vraag 1 hierbo: Sal God jou in die steek laat? Indien iets gebeur wat jou so laat voel, hoe moet jy dit verwerk?

God het sy liefde vir jou aan die kruis bewys; sy liefde vir jou lê nie daarin dat dit net altyd met jou goed gaan volgens die manier wat jy dit sien en dat alles gebeur soos jy dit wil hê nie.

IMMERS: God se liefde is nie soos die wind wat nou waai en netnou gaan lê nie. Ons situasies mag wissel van goed na sleg, maar die bewys van liefde aan die kruis bly vas en seker deur al ons situasies heen.

WEET VERSEKER EN VOEL VERTROOS: In die geskiedenis het God sy liefde met die bloed van Jesus aan sy kinders verklaar!

God is getrou en regverdig

Is God buierig en wispelturig? Enigiemand wat iets van God af weet, sal die antwoord sommer dadelik kan gee. Nee, God is nie buierig en onvoorspelbaar nie.

Hy het wel die mag om soms die onvoorspelbare te kan doen. Kyk net hoe verslaan Hy Satan op die onwaarskynlikste plek, naamlik aan die kruis, toe Satan begin dink het dat hy ’n kans het om te wen! Soms gebruik God wel die Gideonsbende of die skaapvelletjie met die dou op.

God is nie Iemand wat sy Woord breek nie! Soos Hy Homself aan ons openbaar het, so is Hy!

Juis hierdie gedagte beklemtoon Johannes met die woorde in 1 Joh. 1:9 as hy God getrou en regverdig noem. God is getrou aan Homself en sy beloftes. Hy is alles wat ons van ’n getroue en regverdige Vader kan verwag!

Dink oor die volgende paar situasies. Verduidelik elke keer jou antwoord.

As God getrou en regverdig is, wat beteken dit vir my as

1. Ek ’n troetelsonde het waarvan ek bewus is, maar nie van ontslae wil raak nie?

2. Ek gevaar loop om my werk te verloor of gebrandmerk te word omdat ek nie oneerlik wil wees in my werk soos die baas verwag nie?

3. Ek nie meer met my huweliksmaat oor die weg kan kom nie?

4. Iets vreesliks met my gebeur, soos as ek my werk verloor of ek ’n geliefde aan die dood afstaan?

 

Skrywer: Prof Jan van der Watt