Prof. Francois Tolmie

francois_tolmie_100

Francois Tolmie is in 1959 in Keetmanshoop in Namibië gebore. Hy matrikuleer aan die Hoërskool Middelburg Kaap en gaan studeer daarna vir predikant. Hy voltooi sy teologiese opleiding aan die Universiteit van die Vrystaat waar hy later ook doktorsgrade in Nuwe Testament en Grieks verwerf.

Na ‘n kort tyd as predikant van die NG Gemeente Walvisbaai word hy beroep as dosent in Nuwe Testament aan die Fakulteit Teologie (Universiteit van die Vrystaat) waar hy tans professor in Nuwe Testament is. Hy stel veral belang in die Johannesevangelie en die Briewe van Paulus – waaroor hy al heelwat akademiese artikels en drie boeke geskryf het.

Afgesien van sy akademiese werk het hy ook verskeie populêr-godsdienstige werke geskryf, onder andere as medewerker van die Bybellennium. In 2006 het Francois saam met Prof Jan van der Watt aan die “Apokriewe” gewerk wat deur CUM (Vereeniging) uitgegee is. Hy is ook een van die vertalers van die Afrikaanse Bybel vir Dowes. Hy is getroud met Ansa en hulle het drie kinders en is tans die Dekaan van die Teologiese Fakulteit Universiteit van die Vrystaat.

Dr. Coen Slabber

oom_coen_3_100

Oom Coen, soos ons hom noem, kwalifiseer as ‘n mediese dokter vroeg sestigerjare, waarna hy in New York navorsing gaan doen. Hy spesialiseer as ‘n ginekoloog (infertiliteit) en word later aangestel as die dekaan, Mediese Fakulteit, Universiteit van Oranje Vrystaat. Hiervandaan is hy na Departement Gesondheid, waar hy uittree as Direkteur Generaal middel negentigerjare. Daarna het hy ‘n rukkie vir Deloitte en Touche gekonsulteer.

Hy is tans die bladbaas by die Bybelkennis.co.za en ‘n mentor vir almal. Oom Coen en sy vrou Martie is voltyds betrokke met werk en hulp in gemeenskappe. Hy is ‘n sprekende voorbeeld van iemand wat sukses bereik het, dit op 67-jarige leeftyd omgeskakel na betekenisvolle bydrae in die gemeenskap en kerk, sonder enige vergoeding.

Hy is getroud met Martie. Hulle het vier kinders. Oom Coen is ook tans ‘n medewerker by www.ekerk.co.za en ook baie betrokke by die Kankervereeninging.

Prof. Jan van der Watt

Prof Jan van der Watt Jan van der Watt (Geb. 5 Nov 1952) matrikuleer in 1970 in Port Elizabeth, Daarna verwerf hy BA aan die Universiteit van Port Elizabeth en BA (Hons), MA, en DLitt (Grieks) en BD, Nagr Dipl Teol en DD in Nuwe Testament, alles met lof.

Hy begin sy loopbaan as dosent en hoof van die Departement van Nuwe Testament aan die Univesiteit van Fort Hare. In 1986 word hy aangestel as professor aan die Universiteit van Pretoria waar hy tans die hoof van die Departement Nuwe-Testamentiese Wetenskap is. Hy is ook persoonlike akademiese raadgewer van die rektor van die Christelike Universiteit van St Petersburg (Rusland) waar hy ook honorêre professor is. Hy was al gasdosent in lande soos Duitsland, Nederland, Oostenryk, Rusland, Amerika, Suid-Korea. Studente uit verskeie wêrelddele studeer ook onder sy leiding, bv. uit Rusland, Romenië, Suid-Korea, Thailand, Amerika, Hong Kong, Rwanda, Australië.

Hy is tans die hoogs-gegradeerde teoloog in Suid-Afrika wat permanent aan ‘n universiteit werk (die gradering word deur die Nasionale Navorsingsraad van Suid-Afrika gedoen). Hy was 8 jaar voorsitter van die Johannesseminaar van die wêreldliggaam van Nuwe-Testamentici. Hy het verskeie toekennings en erkenings ontvang, onder andere deur die Alexander von Humboldt Stigting (Duitsland), Centre for Theological Inquiry (Princeton, VSA), Tyndale Fellowship (Cambridge, Engeland), bekroning deur die S.A. Akademie vir Wetenskap en Kuns en die Christelike boekhandelaarsvereniging van Suid-Afrika.

Onder sy byna 40 boeke en oor die 100 artikels tel Die Boodskap, Die Bybel A-Z, My eerste Boodskap, verskeie Bybelstudies oor bv 1 Korintiërs, 1 Johannes, boeke oor vergifnis, engele, gebed ens.

Hy is tentmaker-leraar by die Ned Geref gemeente Kemptonpark Oos en Faerie Glen (Pretoria) en aanbieder van ‘Verstaan jy wat jy lees?’ (Vrydagoggende 8h00) op Radiokansel.

Prof JaN en sy vrou Shereen

Prof Jan en sy vrou Shereen

Prof Dionne Craffort

Prof Dionne is ‘n Emeritus professor in Teologie aan die Universiteit van Pretoria.