You’ll never get to a person’s soul until you understand their hurts – Ravi Zacharias

God se woord is waar

Johannes 17 staan ook bekend as Jesus Christus se Hoëpriesterlike gebed. In hierdie hoofstuk bid Jesus vir sy dissipels. In vers 17 vra Hy dat sy dissipels aan die Vader toegewy moet wees deur die waarheid. Dan voeg Hy by: U woord is die waarheid.

Jesus verwys hier na die Woord van God wat ons vandag ken as die Ou Testament. Die Jode het geglo dat dit van God kom. Die versameling boeke – die Ou Testament – was dan God se Woord. Maar in vers 17 kry ons Jesus se siening van die Woord – onthou Jesus is hier aan die woord.

Hoe kan ons sê dat ons vir Jesus Christus volg en die Skrif verwerp – so asof ons beter as Hy weet wat die waarheid is.

Beginning well is a momentary thing: finishing well is a lifelong thing – Ravi Zacharias

Die Bron van die apostoliese boodskap

Waar het die apostels hulle boodskap gekry. Gelukkig gee Paulus vir ons die antwoord. In 1 Korintiërs 2 verdedig Paulus sy bediening onder die gelowiges in Korinte. Hy verdedig ook sy gesag as apostel. Hy maak dit baie duidelik dat hy nie die bron van sy verkondiging is nie: Wat ons verkondig, is die wysheid van God, die verborge waarheid wat bedek was en wat God van ewigheid vir ons voorbestem het tot ons ewige heerlikheid (2:7).

Maar wie het hierdie wysheid van God aan die apostels geopenbaar? Aan ons dan het God dit deur die Gees bekend gemaak, want die Gees deursoek alle dinge, ook die diepste geheimenisse van God (2:10). Wat baie belangrik is, is dat die boodskap van God af kom. Net die Heilige Gees kan sy gedagtes ken. Dit word in 2:13 opgesom: Dit verkondig ons ook, nie met geleerde woorde wat die menslike wysheid ons leer nie, maar met woorde wat die Gees ons leer.

Paulus onderskei hier tussen:

• Die gedagtes van God – die inhoud van sy boodskap.
• Die woorde wat die Gees hom leer – die vorm van sy boodskap.

Die apostoliese boodskap is dus God se gedagtes geleer in die woorde van die Heilige Gees. Hierdie is belangrik vir ons verstaan van die Skrif:

• God is die Bron van die boodskap.
• Die Woord is die produk van sy boodskap.
• Die Heilge Gees is die agent wat God se boodskap vir ons ontsluit.

We must learn to find the back door to people’s hearts because the front door is heavily guarded – Ravi Zacharias

Psalm 23 (4)

[Ek gaan dwarsdeur van die Nuwe Testament en Psalms. ‘n Direkte Vertaling van die Bybelgenootskap van Suid-Afrika (2014) gebruik maak.]

Ek gaan ‘n paar blogs aan hierdie psalm spandeer.

Billy Graham lees elke maand al 150 psalms. Vir hom het hulle duidelik ‘n besondere betekenis. Meeste van ons, ek ingesluit, lees die psalms nie so sistematies nie – ons pik hier en pik daar. Daarom het ek besluit dat ek hierdie jaar ‘n bietjie dieper in die psalms wil delf. Ek het veral gebruik gemaak van John Goldingay se drie-volume kommentaar – Psalms.

Teologiese implikasies

Hierdie psalm plaas daaglikse aktiwiteite soos eet, drink en soeke na veiligheid in ‘n God-gesentreerde perspektief.Die lewe van God se mense word geleef tussen ongehinderde vreugde in die teenwoordigheid van God en twee aspekte van die onsekerheid van die lewe:

• Die onsekerheid of ons kos om te eet en water om te drink sal hê; en
• Vyandigheid van ander mense.

Hierdie twee aspekte is werklikhede van die lewe. Die psalm nooi mense uit om hulle trou te verklaar. Martin Luther praat van voorsiening en beskerming in alle Anfechtungen (versoekings, aanvalle, nood, ens). Al lyk dit asof Jahwe as herder misluk, moet ons aanhou vertrou dat Hy ons herder is. Ons moet aan God se woord en sy beloftes vashou. Dan sal ons agterkom dat God vir ons intree – Hy gebruik sy stok en staf vir ons.

In die Nuwe Testament word Jesus die goeie herder (Joh 10:11), die groot Herder (Heb 13:20 – 21) en die Opperherder (1 Pet 5:4) genoem. Ons is sy skape. Dit beteken nie dat ons dom, bang en passiewe diere is nie. Dit beteken wel dat ons aan Hom gehoorsaam is en verstandig genoeg is om die Een wat ons op die regte pad lei, te volg. Die klem in hierdie psalm val nie op die dierlike eienskappe van skape nie, maar op die dissipelskap van dié wat die Here volg. As ek die goeie herder sien, volg Hom.

Ek leer ware tevredenheid ken as ek God die herder toelaat om my te lei. As ek egter die sonde bo sy leiding verkies, kies ek om my eie pad te loop. Dan kan ek nie die Here blameer vir die samelewing waarin ek woon nie. My Herder weet waar die weivelde en water is wat my kan versterk. Ek sal daar uitkom as ek gehoorsaam agter Hom aanloop. As ek teen sy leiding opstandig raak, doen ek my eie saak skade aan. Ek moet hierdie dinge onthou as ek weer my eie kop wil volg en nie die leiding van die herder nie.

Die oorweldigende les van hierdie psalm is dat God liefde is, dat God lojaal is en dat God ons nooit sal los nie. Die lewe is nie net rose nie. In dankbaarheid is ek bewus van God se teenwoordigheid in my lewe as dit met my goed gaan. Juis daarom, sê Dawid, kan ek seker wees van sy teenwoordigheid as dit nie goed gaan met my nie. Selfs as die lig verdoof en die donkerte kom, is Hy by my. Letterlik praat hy hier van “die vallei van diep duisternis”. God se vertroosting en krag is met my in alle vorms van duisternis – depressie, verwerping deur my vriende, ernstige siekte, die dood, ens. Dawid argumenteer nie hieroor nie – hy sê net dat dit so is. God se teenwoordigheid in donker tye is net so werklik en waar as in goeie tye.

Faith lives on prayer, indeed, faith is nothing but prayer. The moment we really believe, we are already praying, and when we cease praying we also cease believing. –  Emil Brunner

Droom jy?

Mense wat drome het, kan vlieg. As jy ophou droom begin jy doodgaan. As jy jou drome najaag, begin jy jou drome leef. As jy jou droom van alle drome ontdek, ontwikkel jy vinnig. Maar: jy het net een lewe om jou droom te ontdek en te volg.

Waar kry ons ons drome? Dink jy ooit daaraan dat God vir jou drome gee? Mense wat groot dinge in die lewe bereik het, is deur hulle drome gedryf. ‘n Goeie voorbeeld hiervan is Martin Luther King – I have a Dream.

Wat is jou droom? As jy jou droom ontdek het, wy jy jou lewe daaraan toe. Dan val al die ander dinge in plek. Jou beste drome neem ten volle besit van jou – dit los jou nie. Jy droom groot drome, want dit is hoe God met jou praat – Hy sê vir jou wat Hy wil hê jy in jou lewe moet bereik.

Godsdiens is nie genoeg nie. Om lidmaat van die kerk te wees, is nie genoeg nie. Al wat voldoende is, is Jesus Christus. Maar ek kan net by Hom kom, as ek Hom volg. Daarom moet ons ons lewens vir Hom gee en ons drome word ‘n werklikheid.

Wat beteken dit om Hom te volg?

• Om Jesus Christus te aanvaar is nie voldoende nie – dit is net die begin. Hy verwag meer van ons: ons moet ons hele lewe aan Hom oorgee.
• Geestelike dissiplines (Bybellees, bid, nadenke, ens) het ‘n plek in ons lewens. Maar ons moet altyd onthou dat dit slegs ‘n manier is om ‘n hoër doel te bereik. Self is hulle nie die doel nie. Dit is nie voldoende nie. Wat nodig is, is dat ons ons volkome aan God oorgee.

Laat God se droom vir jou en jou lewe jou lewe oorneem. Volg Hom.