Lyding en heiligmaking

 

Of summer and [the church attendance slump] my aunt always used to say, “It’s just nice to have a break sometimes.” To which my mother would respond, “Aren’t you glad God doesn’t feel the same way about you?” – Eric Vanden Eykel

 

Lyding en heiligmaking

Daar is min dinge wat Christene meer verwar as lyding.  Ons hoor dikwels die vraag: “Hoekom gebeur slegte dinge met goeie mense?” Lyding vir ‘n gelowige is nooit sonder ‘n doel nie. Die probleem is dat baie van ons nog nooit die Bybelse perspektief van lyding geleer het nie.

 

Daar is storie na storie oor lyding in die Bybel, maar selde weet ons hoekom die mense gely het. Oor hierdie onderwerp skryf Paulus:

Ons verheug ons ook in die swaarkry, want ons weet: swaarkry kweek volharding, en volharding kweek egtheid van geloof, en egtheid van geloof kweek hoop; en die hoop beskaam nie, want God het sy liefde in ons harte uitgestort deur die Heilige Gees wat Hy aan ons gegee het (Romeine 5:3 – 5).

Om ons in swaarkry te verheug, moet ons ons aandag op die kennis van wat die Gees is ons produseer deur lyding, fokus.

  1. Lyding kweek volharding

Volharding in die Bybel beteken vashou aan ‘n spesifieke optrede ten spyte van probleme. Soos ons deur beproewing gaan, ontwikkel ons meer volharding om nuwe en groter uitdagings die hoof te bied.

Julle moet bly wees wanneer allerlei beproewings oor julle kom, want, soos julle weet, as julle geloof die toets weerstaan het, stel dit julle in staat om te volhard. En die volharding moet end-uit volgehou word sodat julle tot volle geestelike rypheid kan kom, sonder enige tekortkoming (Jakobus 1:2 – 4).

 

  1. Volharding kweek karakter

Soos God volharding en die vermoë om swaarkry te verwerk in ons kweek, bring Hy ons karakter na vore. Karakter is die beeld van Christus wat in ons teenwoordig is wat duideliker in ons word. Midde in die lyding gee God genade aan ons om dit te verduur. Dit bring die onsuiwerhede in ons lewens na vore en verwyder dit. Petrus verwys na hierdie konsep:

Verheug julle hieroor, selfs al is dit nodig dat julle ‘n kort tydjie bedroef gemaak word deur allerhande beproewings sodat die egtheid van julle geloof  getoets kan word. Julle geloof is baie kosbaarder as goud, goud wat vergaan. Selfs die suiwerheid van goud word met vuur getoets, en die egtheid van julle geloof moet ook getoets word, sodat dit lof en heerlikheid en eer waardig mag wees by die wederkoms van Jesus Christus (1 Petrus 1:6 – 7).

 

  1. Karakter kweek hoop

Karakter kweek hoop in lyding. Hoop is die vreugdevolle verwagting van wat God belowe het.

Mag God, die bron van hoop, julle deur julle geloof met alle vreugde en vrede vervul, sodat julle hoop al hoe sterker kan word deur die krag van die Heilige Gees! (Romeine 15:13).

 

As dissipels van Jesus moet ons moeilike tye gebruik om te word dit wat ons in Christus is. Totdat die aardse vaas gebreek is, is die skatte daarin onsigbaar. Soos ons gebrokenheid gesien word, word Jesus gesien. Soos ons swaarkry ondervind, sal elke toets van die lewende God ons verander in suiwer goud tot sy heerlikheid.

 

 

 

 



Groei sterker

 

I’m not afraid of failure. I’m afraid of succeeding at things that don’t matter.” William Carey

 

Groei sterker

Sorg daarenteen dat julle steeds toeneem in die genade en kennis van ons Here en Verlosser, Jesus Christus (2 Petrus 3:18).

Billy Graham vertel van die ingenieus wat baie jare lede ‘n swaaibrug oor ‘n diep kloof moes oprig. Die grootste probleem was om die swaar staalkabels van die een kant van die kloof na die ander te kry. Dit was in die dae voor helikopters. Die rivier onder in die kloof was vol rotse – dit was te gevaarlik om die kabels per boot van die een kant na die ander te neem. Die oplossing: een van die ingenieurs neem ‘n vlieër en vlieg dit oor die kloof. Aan die ander kant word die vlieër doelbewus grond toe gebring. Daar was nou die dun tou van die vlieër tussen die twee kante. ‘n Swaarder tou word aan die tou van die vlieërs gebind en oor die kloof getrek. Hierdie proses word ‘n paar maal herhaal elke keer met sterker toue. Uiteindelik was dit moontlik om die staalkabels oor te trek.

Geestelike groei is soos die bou van hierdie brug. Soos die skakel oor die kloof sterker geword het, wil God hê dat ons geloof sterker en sterker groei.

 As julle maar geloof het so groot soos ‘n mosterdsaadjie, sal julle vir hierdie berg sê: ‘Gaan staan daar anderkant!’ en hy sal gaan.  Niks sal vir julle onmoontlik wees nie (Matteus 17:20).

As jou geloof se wortels nie in die Bybel is nie, sal dit verwelk. Net ‘n sterk geloof sal jou teen versoeking en twyfel beskerm.

 

Wil jy hê dat jou geloof moet groei? Dan moet die Bybel jou denke versadig. Geloof kom deur die hoor van die boodskap wat ons in God se woord kry. Geloof gebeur nie sommer net nie – dit groei as dit in die vrugbare grond van God se Bybel geplant is.

 

 



Psalm 18 (3)

 

Christ is much more powerful to save than Adam was to destroy – Johannes Calvyn

 

Psalm 18 (3)

[Ek gaan dwarsdeur van die Nuwe Testament en Psalms. ‘n Direkte Vertaling van die Bybelgenootskap van Suid-Afrika (2014) gebruik maak.] Ek gaan ‘n paar blogs aan hierdie psalm spandeer, want dit is een van die langste psalms in die Bybel.

Billy Graham lees elke maand al 150 psalms. Vir hom het hulle duidelik ‘n besondere betekenis. Meeste van ons, ek ingesluit, lees die psalms nie so sistematies nie – ons pik hier en pik daar. Daarom het ek besluit dat ek hierdie jaar ‘n bietjie dieper in die psalms wil delf. Ek het veral gebruik gemaak van John Goldingay se drie-volume kommentaar – Psalms.

 

18:8 – 16:

Die Here se reaksie op die psalmis se bedreiging word nou verder beskryf. Die fisiese verskynsels wat hier genoem word, word dikwels in die Bybel gebruik om God se teenwoordigheid en betrokkenheid te beskryf. God was dus betrokke by Dawid se lewe. Hierdie verse beskryf die koms van die Here, maar beskryf Hom nooit nie.

 

Toe het die aarde geskud en geruk; die fondamente van die berge het gebewe.

Die gebeure was aardskuddend – skud, ruk en bewe. Die feit dat die aarde se fondamente geskud het, wys dat hierdie gebeure die stabiliteit van die aarde bedreig het. Fondamente is deel van die aarde se sekuriteit.

 

Dit het geskud, want sy toorn het ontvlam.

9Rook uit sy neus het opgestyg;

Die woord skud word herhaal. Nou word die rede gegee: die Here is kwaad. Dit is wat die aarde laat skud het.

 

‘n Vuur uit sy mond het verteer, gloeiende kole het daaruit gebrand.

Ons sal later sien dit verwys onder andere na weerlig,

 

10Hy het die hemel afgebuig en neergedaal; duisternis was ondere sy voete

Die Here is nog in die hemel. Daar het Hy die psalmis se uitroep gehoor. Maar nou beweeg die Here – Hy buig die hemel af. Hy daal neer. Maar daar was duisternis onder sy voete, want enigeen wat die Here sien, sal nie leef nie. Die duisternis beskerm die mense.

 

11Hy het op ’n gerub gery,Hy het gevlieg, gesweef op die vlerke van die wind

Hoe het die Here neergedaal? Hy ry op ‘n gerub. Die gerubs is aanduidend van die Here se teenwoordigheid.

 

12Hy het donkerte sy beskutting gemaak; rondom Hom was sy skuiling ‘n donker watermassa, ‘n dik laag wolke.

 13Uit die glans voor Hom het sy wolke verby getrek, met hael en gloeiende kole vuur.

Hierdie vers keer terug na die donkerte wat die Here van mense afskerm. Dit beskerm die mense Die Here kan die duisternis deurdring met hael en gloeiende kole.

 

14Die Here laat die donder weerklink in die hemelruim; die Allerhoogste laat sy stem hoor met hael en gloeiende kole vuur.

15Hy stuur sy pyle en jaag hulle uiteen; Hy werp sy weerligstrale en bring hulle in verwarring.

Dit is die psalmis se vyande wat uitmekaar gejaag word.

 

16Die beddings van die strome het sigbaar geword; die fondamente van die aarde is ontbloot vanweë u dreiging, Here, vanweë die windvlaag uit u neus,

Beddings van strome dui gewoonlik op water op aarde en nie water bo die hemel nie. Die ondergrondse waters word blootgestel. Die fondamente van die aarde word ontbloot. Daarmee word die sekuriteit van die aarde bedreig.

 

Ons het nou gesien hoe die Here reageer op die doodsgevaar wat die psalmis bedreig het, Volgende keer kyk ons na hoe die Here verlos.

 

 



Moenie herkou nie

 

Evil is not a principle in creation itself but is the willful distortion of good gifts into an arsenal deployed against God’s reign. —Michael Horton

 

Moenie herkou nie

Anders as koeie herkou ons nie ons kos nie, maar ons is baie geneig om ons gedagte te herkou. Om te herkou, beteken dat ons gedagtes uit die verlede, gewoonlik onaangename gedagtes,  oor en oor herdink. Hoekom doen ons dit? Dit is gewoonlik gebeure waarin ons seergekry het of sleg behandel is – veral as dit nie opgelos is nie. Deur herhaaldelik weer na hierdie gebeure te kyk, voel ons dat ons gevoelens teenoor dié wat betrokke was, geregverdig word. Ons doen dit veral as ons gedagtes nie met iets anders besig is nie – daar is niks nuuts om na te kyk nie.

 

Hoekom is dit van geen waarde nie? Om dit weer en weer te speel, is nie dieselfde as om dit op te los nie. Dit gaan dikwels gepaard met emosies soos frustrasie, verraad en kwaad wees. Alles word ook ‘n bietjie vaag en onakkuraat. Dit is moeilik om nuwe, positiewe interaksies te ontwikkel as die kanaal op herhalings vasgehaak het.

 

Hoe stop ons dit? Besef dat daar geen waarde daarin is om gebeure gedurig te herkou nie. Vra net: Watter lesse kan ons uit die gebeurtenis leer? Doen iets om die konflik op te los of beweeg net aan. As jy agterkom jou gedagtes dryf in hierdie rigting, probeer doelbewus om die kanaal te verander. Hou jou denke aktief.

 

Watter tonele herkou jy gereeld? Hoekom laat jy dit toe? Die kontrole is in jou hande. Verander die kanaal.

The longer we dwell on our misfortunes the greater is their power to harm us” – Voltaire.