“When we are at our wits end for an answer then the Holy Spirit can give us an answer. But how can he give us an answer when we are still well supplied with all sorts of answers of our own?” Karl Barth

Kwesbaarheid

Daar is beperkinge op ons kennis, vermoëns en energie. Maar ons is geneig om ons swakhede weg te steek. Daar is ‘n geweldige krag daarin om kwesbaar voor mense te wees. Wat gebeur as ons ons swakhede probeer wegsteek?

• Ons swakhede word erger
• Ons word oneerlik en vals
• Die waarheid kom onvermydelik uit en mense is dan ontnugter met wat hulle sien.

Hoekom is kwesbaarheid ‘n deug by leiers? Rick Warren gee ‘n paar redes.

1. Dit is emosioneel gesond

Om ‘n beeld van volmaaktheid voor te hou, vereis baie emosionele energie. Ons word moeg van werk om ons masker op te hou – ‘n masker om ander te oortuig dat ons sterk is. As jy oor jou beeld bekommerd is, is jy op pad om uit te brand. Om mense die hele tyd te beïndruk, is uitputtend … en tydelik. Uiteindelik sal mense jou swakhede weet. Om kwesbaar te wees, maak jou vry. Bely julle sondes eerlik teenoor mekaar en bid vir mekaar, sodat julle gesond kan word (Jakobus 5:16). Ons moet ons sondes aan God bely om verlos te word. Ons moet egter ook met ander oor ons swakhede praat om genees te word.

2. Dit bemagtig ons geestelik

God weerstaan hoogmoediges, maar aan nederiges gee Hy genade (Jakobus 4:6). Ons kan nie by ‘n bediening betrokke wees sonder die genade van God nie. Hoe kry ons hierdie genade wat ons nodig het? Deur nederig te wees voor God en ander mense.

3. Dit is aantreklik vir verhoudings

As ons besluit om ons maskers weg te gooi, verbaas ons mense met ons egtheid. Ons is geneig om mense wat opreg, eerlik, nederig en kwesbaar is, lief te hê. So geheg is ons aan julle dat ons nie net die evangelie van God aan julle gegee het nie, maar ook ons lewe vir julle sou wou gee, want ons het julle lief gekry (1 Tessalonisense 2:8). As jy jou sterkpunte deel, skep jy kompetisie. As jy jou swakhede deel, skep jy ‘n gemeenskap. Jy sê basies vir mense: Ons is saam hierin.

4. Dit is ‘n teken van leierskap

Ons volg net leiers wat ons vertrou. Die eerste vereiste vir leierskap is geloofwaardigheid. Hoe eerliker jy is, hoe meer geloofwaardig is jy. As jy byvoorbeeld openheid in jou kleingroep verwag, moet jy die eerste wees om oop te maak. Jy moet besluit of jy mense wil beïndruk of beïnvloed.

5. Dit verhoog die impak van jou verkondiging

Jy is altyd meer doeltreffend as ‘n persoonlike getuie as jy kwesbaar is as wanneer jy ‘n vaardige spreker is. As jy met ander oor die evangelie praat, vra die volgende vrae:

• Watter stryd en swakhede moet ek met ander deel?
• Watter voordering maak ek waaruit ander kan leer?
• Wat leer ek tans veral uit my mislukkings?

“In the church of Jesus Christ there can and should be no non-theologians.” Karl Barth

Emosies

Sommige dae wens ons ons kan sonder emoses klaarkom. Ons word opgewonde oor ‘n nuwe idee en word ontmoedig as niemand anders dink dit is ‘n goeie idee nie … of dit werk nie. As jy nie jou emosies verstaan en weet hoe om hulle te hanteer nie, sal jy nooit jou volle potensiaal bereik nie.

Tog is emosies noodsaaklik. Hoe hanteer jy jou emosies? Hier is ‘n paar riglyne.

1. Emosies wat nie hanteer word nie, sink meer leiers as wat ons besef.

Wat doen ons met ons emosies? Leiers weet dat maak nie saak hoe hulle voel nie, hulle moet bid en genoeg slaap kry. Hulle kan ook die saak met vriende bespreek.

2. Moenie dat môre se besluite vandag se emosies bepaal nie.

Natuurlik het dinge wat ons vandag doen ‘n impak op môre, maar dit help nie om nou al daaroor te tob nie.

3. Moenie dat jou emosies die werklikheid verdraai nie

Emosies verdraai die werklikheid, maar dit is nooit so sleg as wat jy dink nie. Emosies maak dat jy negatiewe dinge nog meer negatief sien as wat jy behoort te doen. Positiewe emosies kan jou ook seermaak as hulle nie op die werklikheid berus nie.

4. As jy emosioneel is, vertrou wyse leiers die oordeel van ander meer as hulle eie

As jy oormatig positief is, kan jy die werklikheid ignoreer en naderende probleme nie raak sien nie. Daarom moet jy die oordeel van ander vertrou net soos jy jou eie oordeel vertrou.

5. Moenie dat emosies tot selfsugtige gedrag lei nie

As dinge sleg gaan, dink jy net aan jouself. Emosionele pyn maak jou nog meer selfsugtig. Jy luister nie na ander nie; jy onttrek jou; jy blameer ander. Alles gaan nou net oor jouself en jou behoeftes.

Ons moenie die indruk kry dat emosies net negatief is nie. Daar is ook positiewe aspekte. Emosies mag jou passie verhoog. In gemeentes wat goed doen, speel passie ‘n groot rol. Passie word deur emosies aangeblaas. Ons kan nie maklik voorgee dat ons passievol oor iets is nie. Volgehoue passie sonder emosies is onmoontlik.

Mense word aangetrek na mense met passie.

“You can’t do anything about the length of your life, but you can do something about its width and depth.” – H.L. Mencken

Gemaak na die beeld van God

Een van die basiese lewensvrae wat ons gereeld vra, is: Wie is ek? Baie mense word beïnvloed deur wat hulle dink ander mense van hulle dink. Wat sê die Bybel oor hierdie vraag? Toe die vraag oor wie ek is aan Luther gestel is, was sy antwoord: You are the bearer of an alien dignity. Wat bedoel hy hiermee? Hy bedoel dat terwyl ons vasstel wie ons is deur wat ons doen en hoe ons met ander vergelyk, is dit verkeerd. Hy glo nie die vraag “Wie is ek” is die regte vraag nie. Die vraag moet wees: “Wie s’n is ek?” Wie se beeld dra ek?

Luther se antwoord dat ons die beeld van Iemand buite ons dra wat aan ons groot waardigheid gee, is die Bybelse antwoord. Daardie Iemand is God – ons dra God se beeld.

Toe het God gesê: Kom Ons maak die mens as ons verteenwoordiger, ons beeld, sodat hy kan heers oor die vis in die see, die voëls in die lug, die mak diere, die wilde diere en al die diere wat op die aarde kruip. God het die mens geskep as sy verteenwoordiger, as beeld van God het Hy die mens geskep, man en vrou het Hy hulle geskep (Genesis 1:26 – 27).

Is dit belangrik? Beslis. As jy nie weet na wie se beeld jy gemaak is nie, sal jy nooit weet waarom jy leef nie.

Beelddraer. Wat beteken dit? Mense moet God in die skepping verteenwoordig. As jy ooit wonder of Christene by dinge soos klimaatsverandering betrokke moet raak, hou op wonder: die antwoord is duidelik. Die vraag is nie of jy ‘n beelddraer is nie, maar watter soort beelddraer jy is. Jy verteenwoordig God in die skepping. God het aan die mens ‘n skepping gegee wat glad gefunksioneer het. Eendag gaan Hy dit van ons terug vra. Eendag gaan Jesus Christus terugkeer en Hy sal die mens verantwoordelik hou. Die eerste deel van beelddraer wees, is ‘n taak – om te heers oor die skepping. Hier gaan dit nie net oor die omgewing nie, maar oor ‘n skepping van God.

Die Drie-eenheid en beelddraer

Hierdie besluit van God om die mens te maak, is in die vorm van ‘n gesprek. God sê: Kom Ons maak die mens. Wie is hierdie Ons? Is dit die koninklike meervoud? As die koningin van haarself praat, sê sy ons. Of verwys hierdie Ons na die Drie-eenheid? Hierdie is nie so belangrik nie, want ons weet uit die res van die Skrif dat God drie-enig is. Wat belangrik is, is dat ons almal na die beeld van God gemaak is. Ons leef dit op verskillende maniere uit.

Ons is beelddraers, maar wat van die sondeval? Is ons steeds beelddraers? Nou moet ons ook aan ander beelddraers wat hulle beeld vergeet het, getuig. Maar wat beteken dit in die praktyk? Ek is ‘n verloste beelddraer – as gevolg van die vergifnis deur Jesus Christus word die gevolge van die sondeval omgekeer.

Die mens is ongelooflik, nie op grond van wie ons is nie, maar wie s’n ons is – na wie se beeld ons gemaak is. Daarom moet ons wakker wees om te sien wat God deur ons wil doen. Soos ons as beelddraers leef, besef ons gou dat ons dit nie alleen kan doen nie. Ons kan dit slegs as deel van ‘n geloofsgemeenskap doen.

Our minds, to whatever part of creation, to whatever design, to whatever hope they turn, find nothing but trouble, disaster, and utter wretchedness: but comfort and rest are nowhere to be found save with God. – H. Zwingli

Psalm 9 (5)

[Ek gaan dwarsdeur van die Nuwe Testament en Psalms. ‘n Direkte Vertaling van die Bybelgenootskap van Suid-Afrika (2014) gebruik maak.] Hierdie is ‘n lang psalm so ek gaan ‘n hele aantal blogs aan hom spandeer.

Billy Graham lees elke maand al 150 psalms. Vir hom het hulle duidelik ‘n besondere betekenis. Meeste van ons, ek ingesluit, lees die psalms nie so sistematies nie – ons pik hier en pik daar. Daarom het ek besluit dat ek hierdie jaar ‘n bietjie dieper in die psalms wil delf. Ek het veral gebruik gemaak van John Goldingay se drie-volume kommentaar – Psalms.

9:20 – 10:2: ‘n Pleidooi

Die psalm keer nou terug na ‘n pleidooi. Hulle staan eintlik sentraal in hierdie psalm (9 en 10). Die gebruik van die Here se naam is algemeen. As ‘n mens dit so doen, is dit ‘n poging om Hom te oorreed om op te tree. Dit kan die psalmis doen op grond van sy verhouding met God.

9:20 – 21: Staan op, Here, laat mense nie die oorhand kry nie; laat nasies voor U teregstaan.

Vervul hulle met ontsag, Here; laat die nasies erken hulle is net mense. Sela

In vers 20 beteken God se opstaan dat die mense nie sterk word en die nasies ontdek dat God besluit vir hulle. Aan die een kant verheug die psalmis hom dat God op sy troon sit; aan die anderkant wil hy hê dat God opstaan en optree. As die nasies in die kuil wat hulle gegrawe het, moet val, moet hulle gestoot word. God moet die heidene laat skrik dan sal hulle Hom erken vir wie Hy is.

Die digter praat oor die verhouding tussen al drie partye. God se magtige reddingsdade word hier beskryf. Hy het as regter ingegryp en in die digter se guns uitspraak gelewer. God het sy vyande verslaan en hom laat seëvier. Hierdie ondervinding is vir hom aangrypend: God, die Wêreldregter, ontferm Hom oor ‘n enkele, hulpelose mens.

Die psalmis gee ook ‘n versekering aan almal wat in nood is: God is altyd gereed om ‘n regverdige uitspraak te lewer. Daarom kan elkeen wat in gevaar verkeer na die Here toe gaan. God self is die toevlug, want hy plaas sy volgelinge buite die bereik van hulle vyande. Deur sy dade toon die Here aan sy volgelinge dat Hy is wat Hy is: ‘n helper in tye van nood. Wie sy Naam bely, laat Hy nie alleen nie. Hierdie versekering bring die bidder opnuut daartoe om sy medegelowiges op te roep om te sing tot eer van die Here. Elke loflied wat God se verlossingsdade besing, is terselfdertyd ook ‘n getuienis waarin heidene van Hom verneem. Vir hulle is dit nie net ‘n waarskuwing nie, maar ook ‘n uitnodiging om met hulle nood na Hom toe te gaan.

In die slot rig die digter ‘n aantal versoeke tot die Here. Hy vra dat God moet ingryp; dat Hy die nasies moet oordeel; dat Hy hulle met vrees sal vervul. Die bidder doen ‘n kernuitspraak: die mens, wat na sy aard eintlik swak is, wil sterk wees, en sy enigste hoop op redding is dat God Homself in sy grootsheid sal openbaar sodat die mens sy eie swakheid sal besef en eerbied vir God sal hê. Die gelowige en die volk van God weet: my vyande is maar net mense. Net God kan die sondaar weer op die regte pad bring. Hy is die Allerhoogste. En tog help Hy die hulpeloses wat op Hom vertrou, dié wat sy Naam bely.

Wat wil die digter met al hierdie dinge vir ons sê?

1. God is by alle mense betrokke – sowel gelowiges en goddeloses. Al voel ek as gelowige dat God soms nie luister as ek om hulp roep nie, hoor God tog alles wat ek vra. En al dink die goddelose die meeste van die tyd dat God nie weet van al sy geknoei nie, sien God tog alles wat hy doen.
2. Die digter wil my leer hoe God teenoor my en die goddeloses optree. In sy verhouding met ons as sy kinders doen God talle weldade. As die goddeloses ons aankla, is Hy die een wat ons verdedig; as ons lewens in gevaar verkeer, red Hy; as ons eensaam is, staan Hy ons by; as ons siek is, genees Hy; treur ons, vertroos Hy. In sy verhouding met die goddelose deel God straf uit; Hy veroordeel diegene wat Hom vergeet; Hy verwoes diegene wat sy volk verdruk; Hy laat ons vyande struikel; Hy laat hulle val in die gat wat hulle self gegrawe het; Hy laat hulle omkom.
3. Die digter wil ons wys hoe God se weldade ons verhouding met Hom en met die goddeloses beïnvloed. Sy gawes gee ons rede om Hom te prys; sy redding neem my vrees vir die goddelose weg.