If the Lord’s bearing our sin for us is not the gospel, I have no gospel to preach – Spurgeon

Modelleer

Ek het vir julle ‘n voorbeeld gestel, en soos Ek vir julle gedoen het, moet julle ook doen (Johannes 13:15)

Wees my navolgers, broers, en let op die mense wat lewe volgens die voorbeeld wat ons vir julle stel (Filippense 3:17).

Mense boots mense na. Dit is dikwels onbewustelik. Ons wil graag soos iemand anders wees. Om ander mense as rolmodelle te kies, kan voordelig wees, want dit motiveer ons om gedurig te verbeter.

God as model

God vorm ons en rus ons toe om die regte besluite te neem. In Psalm 23 is die psalmis ‘n skaap in God se kudde. Hy lei my op die regte paaie ter wille van sy Naam. Soms kry ons die indruk dat die herder niks doen nie, maar die psalmis stel dit duidelik: Hy lei. God lei my deur elke dag. In die proses stel Hy ons bloot aan invloede wat ons meer volwasse sal maak. Hy doen dit onder andere deur modelle voor ons te sit. God stuur gelowiges oor ons pad sodat ons van hulle kan leer.

Ek wil jou insig gee, ek wil jou die pad leer wat jy moet loop. Ek wil jou raad gee, my oog oor jou hou. (Psalm 32:8). Hier kry ons werkwoorde – leer …insig gee … raad gee – wat in ‘n klaskamer tuishoort. Hoe moet ons leer?

• Deur die Skrif te lees en te verteer. Ons moet wysheid kry uit dit wat ons lees.
• Modelle wat ‘n impak op verskillende vlakke het.

Wat doen modelle?

Modellering is nie dieselfde as heldeverering nie. In heldeverering fokus ons op die persoon wat bewonder word. As God egter modelle voor ons bring fokus ons ons denke op God wat ons modelle in staat gestel het om te leef en te dien. Ons fokus nie op die persoon self nie. Modelle help ons om die grootheid en goedheid van God duideliker te sien.

• Modelle vergroot ons visie. Modelle laat my die morele en geestelike ideale wat Christene so hoog aanslaan, duideliker sien. Abstrakte ideale kry lewe as ons sien hoe hulle uitgeleef word. Natuurlik is Jesus Christus die beste model ooit. Kyk na modelle om jou en sien hulle nederige liefde. Dit fokus en vergroot ons visie van liefde.
• Modelle laat ons besef wat kan en behoort te wees in ons lewens. Modelle wys vir ons moontlikhede waaraan ons nooit gedink het nie.
• Modelle kan ons in ons roeping help. Baie sendelinge is deur die voorbeeld van ander sendelinge getrek.

Die primêre model vir alle Christene is Jesus Christus. In sy voorbeeld kry ons die krag om ons lewens te verander.

The church is the traveller’s inn where the wounded are healed – Augustinus

Oordeel: nie so maklik nie

If only it were all so simple! If only there were evil people somewhere insidiously committing evil deeds, and it were necessary only to separate them from the rest of us and destroy them. But the line dividing good and evil cuts through the heart of every human being. And who is willing to destroy a piece of his own heart? -Aleksandr Solzhenitsyn, The Gulag Archipelago

Solzhenitsyn plaas die vinger op die problem: ons harte is maar ‘n mengelmoes. In Matteus 25 lees ons van die Seun wat by sy wederkoms die skape en bokke sal skei.  Maar wat van diegene wat soms soos bokke en soms soos skape optree?

Hierdie ontleding is akkuraat. Nie een van ons is altyd vriendelik met die geringstes onder ons nie, maar ons ignorer hulle darem ook nie altyd nie. Beteken dit nou ons goeie en slegte dade word opgetel en bepaal watter groep is in die meerderheid? Ons kan sê dat ons nie weet hoe God oordeel nie. Tog vertel Hy hierdie verhaal in Matteus 25:31 – 46. Kyk net hoe eindig Hy: En hierdie menses al die ewige straf ontvang, maar dié wat die wil van God gedoen het, die ewige lewe.

Gregorius van Nicea sê dat dit hier gaan oor elke siel, en nie  een siel teenoor die ander nie. Die oordeel is ‘n skeiding tussen goed en kwaad wat ons in elke hart kry. Dit is God se redding van sy skepping in slawekettings. Die skape en bokke is so ingeteel dat ons hulle nie van buite kan onderskei nie.

Wees baie versigtig om te oordeel.

Thinking deeply about the gospel is the only way to consistently feel deeply about the gospel. —C. J. Mahaney

Hoe weet ek wat God se wil is?

Hoe kan ons God se wil vir ons vasstel? In die Skrif kry ons drie beginsels.

1.     Soek raad

In die Spreuke-boek kry ons gereeld oproepe om wysheid te soek, maar ons lees ook dat die pad na wysheid loop deur die soeke na raad by diegene wat reeds wys is. In die dwaas se oë is sy eie pad die regte; wie wysheid het, luister na raad (12:15. Kyk ook na 11:14, 13:10, 15:22, 19:20; 15:2).

Hoe meer verreikend die besluit is, hoe belangriker is dit om raad te vra. Hierdie beginsel kry ons duidelik uit die verhaal van Jetrro se besoek aan Moses, sy skoonseun, in Eksodus 18. Moses vertel vir Jetro wat hy alles doen. Die volgende dag gaan Jetro kyk na wat Moses doen. Hy vra vir Moses: Waarom doen jy die volk dit aan? Jetro sê vir Moses wat hy besig is om te doen is nie reg nie. Daar moet ‘n duidelike werksverdeling kom – Moses moet bekwame manne kry om van sy take te doen. Moses moes leer om te delegeer. Jetro gee selfs ‘n kort beskrywing van die soort mense wat Moses moes soek. Dan lees ons: Moses het na sy skoonpa geluister en gedoen wat hy gesê het.

Die lewe is soms meer ingewikkeld. Eeue na Moses lees ons die verhaal van Absalom wat in opstand teeen Dawid kom. Dawid moes uit Jerusalem vlug. Moet hy nou vir Dawid agtervolg of moet hy eers sy mag konsolideer? Hy het twee raadgewers. Agitofel was Dawid se top raadgewer, maar nou is hy aan Absalom lojaal. Hy beveel aan dat Dawid onmiddellik agterna gesit word en verslaan word. Gusai was ‘n vriend van Dawid, maar sit in Absalom se binnekring. Hy doen hom voor as iemand wat bereid is om vir Absalom raad te gee. Gusai se raad is dat Absalom voorlopig niks doen nie. Absalom volg sy raad – die verkeerde raad, want kort daarna sterf Absalom en Agitofel hang homself op (2 Samuel 15 – 18).

Almal van ons het raadgewers nodig, maar ons moet die raad wat ons kry versigtig oorweeg.

2.     Oorweeg die raad wat jy kry

In 1 Konings 12 lees ons die verhaal van Rehabeam en die skeuring van die ryk. Na Salomo se dood kom die volk na Rehabeam en vra verligting van die swaar las wat op hulle geplaas is – hoë belastings, dwangarbeid, ens. Rehabeam konsulteer twee groepe mense:

• Die ouer mense. Hulle beveel aan dat Rehabeam gehoor gee aan die versoeke van die volk.
• Die jonger manne. Hulle beveel aan dat hy hulle verpligtings vermeerder. Hy moet die volk laat besef dat hy die koning is.

Rehabeam aanvaar die raad van die jonger manne – die verkeerde keuse. Dit lei tot die skeuring van die ryk.

Hoekom lyk dit vir ons uit hierdie verhale asof daar slegte raad van God kom? Gusai se raad lei tot Absalom se dood; die jonger manne se raad aan Rehabeam lei tot die skeuring van die ryk. In 2 Samuel 15:31 bid Dawid: Here, laat daar tog niks kom van Agitofel se raad nie. God luister na Dawid se gebed en Absalom neem ‘n dwase besluit. In 1 Konings 12:15 lees ons: Die koning het nie aan die versoek van die volk voldoen nie. Dit was ‘n beskikking van die Here …  Absalom en Rehabeam se aanvaarding van slegte raad werk na God se groter doel. God se wil word gedoen.

Wat leer ons hieruit?

• Dit is reg om raad by God se mense te vra, maar ons moet altyd die raad versigtig oorweeg.
• Ons moet begin deur te vra waarom ons raad wil hê? Wat is ons motief? Is dit om soos Absalom en Rehabeam ons eie ego te bevorder? Of is dit om God se heerlikheid te bevorder? As dit oor my sukses en selfverheeliking gaan, kan ons nie verwag dat ons gaan slaag nie.

3. Evalueer die raad wat jy kry

Die Nuwe Testament voeg nog by hierdie hierdie wysheid om die raad wat ons kry, te evalueer.

• In Galasiërs 2:11 – 14 wys Paulus vir Petrus tereg. God kan ‘n persoon gebruik om ‘n ander tereg te wys. Paulus dring daarop aan dat ons ons geloof eerlik, deursigtig en reguit moet beoefen. Dit beteken ons optrede moet met ons woorde ooreenstem. In Handelinge 10 lees ons van Petrus se besoek aan Kornelius. Daar besef Petrus dat nie-Jode ook deel van God se koninkryk is. Hy eet saam met hulle. Maar toe ‘n groepie Joodse gelowiges daar aankom, onttrek Petrus hom. Hy soek nie konfrontasie nie. Vir Paulus was dit misleiding en hy verset hom openlik teen Petrus omdat sy optrede duidelik verkeerd was. Beide Petrus en Paulus gaan voort met sendingwerk. Petrus het Paulus se teregwysing gehoor en verander.
• Soms mag selfs die eenparige raad van God se mense ons nie lei in die rigting wat God aandui nie. In Handelinge 20:22 sê Paulus vir die ouderlinge van Efese dat hy na Jerusalem toe gaan gedring deur die Gees. Wat daar met my sal gebeur, weet ek nie. In Handelinge 21 lees ons van verskeie groepe wat Paulus afraai om na Jerusalem te gaan: die gelowiges in Tirus (21:4), die profeet Agabus (21:11) en die mense wat saam met Paulus was (21:12). Eenparig teen Paulus se besluit. Tog gaan Paulus na Jerusalem. Soos verwag was daar probleme. Maar dit is ook hoe Paulus uiteindelik in Rome gekom het – die stad waarheen God hom gestuur het. Met ons hart gerig op Jesus moet ons soms die raad van goeie, gelowige vriende verwerp.

“If you would not murder yourself, take particular care never to preach too loud or too long. Always conclude the service within the hour. Then preaching will not hurt you.”–John Wesley

Ek verstaan nie alles nie

Miskien is alles nie vir ons duidelik nie; miskien is daar dele wat ons nie verstaan nie. Paulus sê vir Timoteus: Dink na oor wat ek sê; die Here sal jou insig gee om alles te verstaan (2 Timoteus 2:7). Moenie alleen voel as jy nie alles verstaan nie. Die Bybelskrywers leer ons dat God ons denke oopmaak om die boodskap van die evangelie te verstaan. Dit is hoe dit in Filippi begin het: God het die denke en hart van Lidia geopen: Een van dié wat geluister het, was ‘n vrou met die naam Lidia, wat die Joodse geloof aangeneem het … Die Here het haar vir Paulus se woorde ontvanklik gemaak (Handelinge 16:14).

Paulus is op sy tweede sendigreis. Hy sien die visioen van ‘n man wat hom smeek: Kom oor na Masedonië toe en help ons. In onderwerping aan die Heilige Gees maak Paulus gereed om na Masedonië te gaan omdat ons tot die oortuiging gekom het dat God ons geroep het om die evangelie aan hulle daar te verkondig. God is besig om sy plan om die evangelie tot aan die eindes van die wêreld te verkondig in werking te stel. Hy gebruik mense om sy sending uit te voer. Hy lei hulle deur sy genadige voorsiening en die Heilige Gees se leiding.

God in sy voorsienigheid lei ons dikwels deur deure toe te maak. Paulus  word verhoed om  na Asië en Bitinië te gaan (Handelinge 16:6 – 7). Soms wil ons iewers heen gaan, maar eindig deur elders te dien. Ons taak is om die werk wat God elke dag vir ons gee, te doen. Ons moet gereed en gewillig wees om rigting te verander as die Heilige Gees ons lei. Miskien spandeer ek te veel tyd om die volgende 10 jaar van my lewe te beplan  en gee nie genoeg tyd om die volgende 10 dae te beplan nie.

Hou op om jou oor jou “lewensplan” te bekommer en volg vir Jesus Christus. Moet ek iemand van Jesus Christus vertel? Is daar ‘n nuwe werk waarheen die Heilige Gees my lei? Het jy onlangs ‘n maaltyd of koffie gedeel met iemand wat Jesus Chistus nie ken nie? Hulle mag dit nie hardop sê nie, maar baie soebat: “Kom en help ons.”