No man more truly loves God than he that is most fearful to offend Him. —Thomas Adams

Hoekom het Jesus sy Messiasskap tydens sy bediening verberg?

Hy het die bose geeste nie toegelaat om te praat nie (1:34). Nadat Jesus die melaatse man genees het, sê Hy vir hom: Moet vir niemand iets hiervan vertel nie (1:44). By drie geleenthede word bose geeste beveel om niks te sê nie (1:25, 1:34, 3:11). Jesus vereis stilte na vier wonderwerke (reiniging van ‘n melaatse man – 1:44; die opwekking van Jaïrus se dogtertjie – 5:43; die genesing van ‘n doofstom man – 7:36;  die genesing van ‘n blinde man – 8:26). Twee maal word sy dissipels beveel om stil te bly (8:30; 9:9). Twee maal onttrek Jesus Hom sodat die mense nie te wete moet kom waar Hy is nie (7:24; 9:30). Dit is ironies dat hierdie opdrag om stil te bly dikwels die teenoorgestelde effek het – die mense hou aan praat oor Jesus.

Wat kan ons hieruit aflei?

• Jesus wou die indruk dat Hy net ‘n wonderwerker is, vermy. Mense wat toordery beoefen, soek die aandag vir hulleself. Jesus het gekom om die mag en gevolge van sonde in hierdie wêreld te oorwin.
• Jesus wou publisiteit wat nie gehelp het nie, vermy. Hy wou tye hê vir die private onderrig van sy dissipels. Jesus se reputasie maak dat mense om Hom saamdrom. Hierdie skare vereis aandag. Elke oomblik wat Hy met hulle deurgebring het, was ‘n oomblik wat Hy nie intiem met sy dissipels kon verkeer en hulle leer nie.
• Jesus wou die mense se wanbegrip oor die Messias vermy. Jesus se messiasskap word deur diens en lyding gekenmerk – nie sensasionele vertonings van  wonderwerke nie. Tog het die mense steeds geglo dat Hy gekom het om die Romeinse heerskappy omver te gooi.
• Jesus wou die nederigheid van die lydende Dienaar van die Here beliggaam.
• Jesus wou die mense inlig dat net deur geloof in ‘n gekruisigde Verlosser kan die messiasskap persoonlik toegeëien word. Ons kan nie sy volheid begryp sonder om te besef dat Hy moes gesterf het nie. Ons hou nie van Hom net omdat Hy  wonderwerke gedoen het nie. Ons vertrou Hom, want Hy het vir ons gesterwe en sy opstanding is vir ons oorwinning.
• Jesus wou identifisering vanuit ‘n bron soos demone en vals godsdiensleiers verhoed.
• Hy wou sy identiteit wegsteek om te wys na die vyandigheid van die politieke en godsdiensleiers van sy tyd. Daar was ‘n groot kontras tussen Jesus se nederige liefde en die Fariseërs se opgeblase godsdienstigheid.

Die rede waarom mense Jesus nie as die Messias herken het nie, was omdat hulle ‘n politieke en militêre Messias gesoek het – iemand wat die Romeine juk van hulle skouers kon afgooi. Hy was nie die soort Messias waarvoor hulle gehoop het nie, maar Hy was wel die Messias wat hulle en ons nodig gehad het. Ons het nie ‘n Messias nodig wat ons net van politieke onderdrukking en siekte sou vrystel nie. Ons het ‘n Messias nodig wat sy lewe as losprys vir sondaars sou gee. God het vir ons die soort Messias gestuur wat ons nodig gehad het.

“Once we deeply trust that we ourselves are precious in God’s eyes, we are able to recognize the preciousness of others and their unique places in God’s heart.” (Henri Nouwen)

Hoe moet ons sondaars hanteer?

As ons nie saamstem met ‘n besluit nie, beskuldig ons mekaar oor en weer. Hoe het Jesus sondaars hanteer?

1. Moenie ander oordeel nie

Moenie oordeel nie, sodat oor julle nie geoordeel word nie; met dieselfde oordeel waarmee julle oor ander oordeel, sal oor julle geoordeel word, en met dieselfde maat waarmee julle vir ander meet, sal vir julle gemeet word (Matteus 7:1 – 2). Ons kan nie verwag dat ongelowiges soos gelowiges moet optree nie. Ons moet fokus daarop om vir hulle ‘n lig te wees – om hulle lief te hê. Herhaaldelik sê die Bybel dat ons ander moet liefhê Dit is baie moeilik om ander lief te hê as ons kwaad is vir hulle of hulle haat.

2. Jesus bewys barmhartigheid aan die een wat in sonde betrap is

Jesus was in die tempel besig om die mense te leer. Die skrifgeleerdes en Fariseërs bring toe ‘n vrou wat op owerspel betrap is daar aan. Hulle beskuldig haar en vra vir Jesus wat hulle met haar moet doen. Jesus buk en skryf iets in die sand – wat weet ons nie. Uiteindelik kom Hy regop en antwoord hulle: Laat die een van julle wat ‘n skoon gewete het, eerste ‘n klip op haar gooi (Johannes 8:7). Hy buk weer en skryf weer in die sand. Een vir een loop die mense weg – die familiehoofde eerste. Jesus bewys verbasende, oorweldigende barmhartigheid vir hierdie vrou. Hy reageer eers toe al die ander mense weg was. Hy vra vir haar: Mevrou, waar is hulle? Het nie een van hulle die oordeel oor jou voltrek nie? … Ek doen dit ook nie. Gaan maar, en moet van nou af nie meer sonde doen nie. Jesus het die reg om te oordeel, maar Hy bied genade aan almal van ons.

3. Jesus het nie die waarheid verberg nie

Jesus was dikwels barmhartig met sondaars, maar daar was tye dat sy onderrig maar moeilik was – so erg dat baie mense Hom verlaat het. Lees net Johannes 6:60 – 68. Jesus was duidelik oor die waarheid al was dit nie gewild nie. Hy het nie net probeer om ‘n groot aantal volgelinge te werf nie – sy roeping was om die waarheid en liefde te deel op ‘n manier wat die wêreld sou skud. Die skare het nie  uitmekaar gegaan omdat Jesus onbeskof of veroordelend was nie. Wees altyd gereed om ‘n antwoord te gee aan elkeen wat van julle ‘n verduideliking eis oor die hoop wat in julle lewe.  Maar doen dit met beskeidenheid en met eerbied vir God (1 Petrus 3:15). Daar is ‘n tyd om mense te waarsku teen die gevare van ‘n wêreldse leefwyse. Ons het teerheid en die heilige waarheid nodig. Ons mag nie bang wees vir God se waarheid nie al maak dit ons ook ongewild.

Moenie oordeel nie; bied oorweldigende barmhartigheid aan sondaars; moenie die waarheid wegsteek omdat jy bang is vir die skare nie.

The Bible simultaneously pictures God as utterly sovereign, and as a prayer-hearing and prayer-answering God. —D.A. Carson

‘n Profeet soos Moses (4)

Ek sal ‘n profeet vir julle na vore laat kom, een van julle volksgenote. Hy sal soos jy wees. Ek sal my woorde in sy mond gee, en hy sal vir sy volksgenote alles sê wat Ek hom beveel (Deuteronomium 18:18).

Jesus het herhaaldelik voorspel dat Hy deur die Romeinse en Joodse leiers doodgemaak sou word (Matteus 16:4; 17;12 en 23; 20:18 – 17; 26:2). Hy het ook besef dat Hy deur kruisiging sou sterwe. Hoekom moes Hy sterwe? Om sy lewe te gee as losprys vir baie mense (Matteus 20:28) en vir die vergewing van sondes (Matteus 26:28).

Die grootste teken van alles was dat Hy op die derde dag uit die dood opgewek is. Jesus het dit reeds voor sy dood belowe: Hulle sal Hom doodmaak, en op die derde dag sal Hy uit die dood opgewek word (Matteus 17:23). Geen profeet het ooit so ‘n belofte oor homself gemaak nie; geen profeet het nog ooit uit die graf opgestaan nie. Jesus Christus het dit voorspel en gedoen. Daar is geen twyfel dat Jesus Christus die profeet is wat Moses voorspel het nie.

Petrus was ‘n ooggetuie van hierdie gebeure. Op ‘n stadium het hy hom by Jesus se vyande gevoeg en Hom selfs verloën. Na Jesus se opstanding besef Petrus dat die dood nie meer iets is wat gevrees moet word nie. Met die krag van God se Gees staan hy voor hierdie selfde vyande op en hou ‘n toespraak in die Pilaargang van Salomo (Handelinge 3:17 – 24). In hierdie toespraak haal hy Deuteronomium 18 aan. Aangesien Jesus Christus ‘n profeet soos Moses is, is Hy nou die nuwe Middelaar vir sy mense. ( Daar is immers net een God, en daar is net een Middelaar tussen God en die mense, die mens Christus Jesus – 1 Timoteus 2:5).

Wat sal gebeur as ons nie luister nie? Elkeen wat nie hierdie Profeet gehoorsaam nie, moet van die volk afgesny word (Handelinge 3:23). So ‘n persoon is nie meer deel van God en sy mense nie. Ons lewens hang daarvan af of ons versigtig na hierdie Profeet luister. God se teenwoordigheid is vir ons te groot – ons kan Hom nie direk sien of hoor nie. Daarom het ons ‘n Middelaar nodig.

Vir die Jode by Sinai gee God ‘n middelaar – Moses – maar Hy belowe dat ‘n ander Middelaar sou kom. Die Nuwe Testament wys vir ons dat hierdie nuwe Middelaar Jesus Christus is. Daarom moet ons sy boodskap met respek hanteer as ons ons lewe met Hom en sy mense wil deel.

You may choose to look the other way, but you can never say again that you did not know. –William Wilberforce

 Die belang van kerse in tye van terreur

Kort na die onlangse gebeure in Parys het mense op verskillende plekke in verskillende lande bymekaar gekom. Hulle het kranse gelê; Hulle het gebid; hulle het Amazing Grace gesing; hulle het mekaar se hande vasgehou; hulle het die kleure van die Franse vlag vertoon; hulle het gehuil. Hulle het ook kerse aangesteek. Die aansteek van kerse het deel van die openbare liturgie na terroriste aanvalle geword. In die Weste het kerse ‘n godsdienstige aura om hulle, maar selfs ateïste steek hulle aan.

As jy vir mense vra waarom hulle dit doen, gaan jy waarskynlik baie verskillende antwoorde kry. Ons doen dit dikwels vir ‘n rede waarvan ons nie bewus is nie. Miskien laat dit ons terugdink aan twee geheimenisse in die lewe, sê Mark Galli.  Johannes beskryf dit so: Die lig skyn in die duisternis, die duisternis kon dit nie uitdoof nie (Johannes 1:5).

Sien die duisternis

Kerse gee maar ‘n klein bietjie lig. Sy swak vlammetjie is kwesbaar teen wind. Kerslig maak ons van die duisternis bewus en die dreigemente van meer duisternis as die vlam uitgedoof word.  “Look at how a single candle can both defy and define the darkness.” Dit was Anne Frank se woorde in die teenwoordigheid van Nazi-terreurdade. ‘n Kers druk die duisternis uit tot op die grens van die lig en gee aan ons die geleentheid om na te dink. Onder andere dink ons na oor terrorisme.

Die Lig van Hoop

Om ‘n kers aan te steek saam met die kerse van ander mense is een manier om die duisternis weg te dryf. Kerse wat in die duisternis flikker bring mense saam. Kerse is uniek in hierdie opsig. Mense kom nie met flitse in hulle hande bymekaar na ‘n tragedie nie. Dikwels steek hulle kerse aan deur  die vlam van ‘n ander persoon se kers te gebruik. Hulle staan saam; Hulle huil saam. Kerse kan ‘n gemeenskap skep soos geen ander bron van lig nie.

Die lig word nie uitgedoof nie.

“In the light of Jesus Christ the darkness is revealed as such. It is made plain that man is a sinner. It is shown in what his sin consists.” (Karl Barth)  In Christus sien ons die kloof wat God en mens skei. Maar hierdie Lig wat in die duisternis skyn is ook die Lig wat die duisternis nie kan uitdoof nie. Hierdie is die Lig van God se versoening met die wêreld. Hierdie lig verminder ons vrees, en wys vir ons dat ons nie alleen is nie.

Ons sê mense vandag leef ver van God af. As die terroriste toeslaan kom ons in donker plekke bymekaar en steek kerse aan. Maar na ons saam met diegene wat rou gerou het, kom daar ‘n tyd om te praat. Wat kan ons aan ‘n angstige wêreld sê? In die kerslig waarin jy die wêreld se duisternis gesien het en die gevoel van hoop gevoel het, kan ons sê: waarvoor jy gehoop het, is waar – daar is inderdaad ‘n Lig wat in die duistenis skyn en die duisternis sal dit nooit uitdoof nie.