“We must not be wise and prudent according to the flesh, but, instead, we must be simple, humble and pure.” – Franciskus van Assisi

Die pad na geloof

Die Nuwe Testament vertel die verhaal van Jesus. Die evangelies vertel ons van sy tyd op aarde. Handelinge vertel ons van die gevolge van Jesus se aardse bediening – meer en meer mense glo in Jesus as die Messias. Ons kry voorbeelde van hoe mense volgelinge van Jesus Christus word.

In Handelinge 8 lees ons van een mens se reis – ‘n Etiopiër. Hy was ‘n soeker. Hy reis al die pad van Etiopië na Jerusalem om te kom aanbid. Hy het ‘n hoë pos beklee in die hof van die koningin van Etiopië. Terwyl hy reis lees hy uit die profeet Jesaja, maar verstaan nie mooi wat hy lees nie. Toe kom Filippus daar aangehardloop. Toevallig? Nee, hy het ‘n opdrag van die Gees gekry om saam met die wa te loop. God se Gees bring Filippus en die Etiopiër bymekaar uit, want God gee om. Hy weet wat die mens se diepste behoeftes is en Hy wil dit hanteer. Hy wil hê dat mense wat Hom soek Hom moet kry. Soek jy? Weet jy dat God aan die werk is om jou behoeftes te hanteer? Is jou hart oop vir die ontdekking van sy woord.

Toe kom Filippus daar aan. Hy hoor dat die Etiopiër uit Jesaja lees. Hy vra: Verstaan u wat u lees? Die Etiopiër antwoord: Hoe sou ek kon as niemand dit vir my uitlê nie? Ook ons het soms hulp nodig. ‘n Gids is van groot waarde om jou pad deur die Bybel te kry.

Die Etiopiër lees Jesaja 53 – ‘n gedeelte wat ongeveer 700 jaar vantevore geskryf is. In Jesaja 52 lees ons van God se dienaar en in Jesaja 53 word die aaklige dood van die dienaar beskrywe. Ons het almal gedwaal soos skape, ons het elkeen sy eie pad geloop, maar die Here het ons almal se sonde op hom laat afkom … Na sy bitter lyding sal hy weer die lig sien en hy sal die Here ken. My dienaar, die regverdige, sal baie mense regverdig maak: hy sal die straf vir hulle sonde dra (Jesaja 53:6, 11).

Hierdie dienaar is tevrede, want hy sal baie mense regverdig maak, en hulle sonde wegneem en op hom plaas. Tog is hierdie dienaar onskuldig: Hy het ‘n graf gekry by goddeloses, hy was by sondaars in sy dood al het hy geen misdaad gepleeg nie en al was hy nooit vals nie (Jesaja 53:9). Maar hoekom sou hy dit doen? As hy sy lewe as skuldoffer gee, sal hy ‘n nageslag hê en nog lank lewe, deur hom sal die wil van die Here sy doel bereik (Jesaja 53:10).

Volgende keer kyk ons verder na die Etiopiërs se reis.

“A dead thing can go with the stream, but only a living thing can go against it.” (G. K. Chesterton)

1 Korintiërs 15:29

The Gospel Coalition het ‘n afdeling waarin hulle moeilike Bybelgedeeltes verduidelik. Hier is een van hulle.

Want anders, wat sal dié bereik wat ter wille van die dooies gedoop word? As dooies hoegenaamd nie opgewek word nie, hoekom word hulle dan ter wille van hulle gedoop? (Direkte vertaling in die Interliniêre Bybel). Hoofstuk 15 is Paulus se groot hoofstuk oor die opstanding.

Die doop ter wille van die dooies se betekenis is onseker. Daar is verskeie interpretasies hiervan. Kan ons dit nie net los nie? Nee, want vir die Mormone is dit van belang en Paulus gebruik dit om die opstanding van gelowiges te verdedig.

Die eenvoudigste interpretasie is dat sekere Korintiërs plaasvervangend gedoop is vir diegene wat reeds gesterf het. So soek hulle ‘n geestelike voordeel. Daar is egter probleme met hierdie siening

• Daar is geen presedent vir die die doop vir dooies in die Bybel of die vroeë kerk of selfs in heidense godsdienste nie. Niemand weet wie dit gedoen het en watter geestelike voordeel hulle daaruit wou verkry nie.
• Dit is ‘n belediging van die Christelike godsdiens. Dit weerspreek die leer van vryspraak deur geloof.

Daar is net geen ander verduideling vir hierdie vers nie.

Daar is twee beginsels wat ons moet lei:

1. Ons stel vas wat ons weet en werk van daar af.
2. Ons gevolgtrekking moet inpas by die konteks van 1 Korintiërs 15. Paulus het gehoor dat sekere Korintiërs die toekomstige liggaamlike opstanding van die gelowiges ontken het. Jesus se opstanding is ‘n integrale deel van die evangelie. In vers 1 – 12 van hierdie hoofstuk vra Paulus hoe hulle kan sê dat daar nie so iets soos die opstanding van die dooies is nie. Omdat Christene in Christus is, beteken dit as iemand die opstanding van die gelowiges ontken, hy ook die opstanding van Jesus Christus ontken. As Christus nie opgestaan het nie, is Paulus se evangelie vals, is ons geloof tevergeefs en is ons lewe sinloos. Maar Christus het opgestaan en almal wat in Hom is sal die opstandingslewe hê. Christus was opgewek as die eersteling van die gelowiges (vers 12 – 28).

Die gedeelte wat volg en by vers 29 begin bevat ‘n reeks ad hoc argumente vir die opstanding. As daar dan geen opstanding is nie, hoekom stel hy hom gereeld aan lewensgevaar bloot? As daar geen opstanding is nie, is dit  beter om te eet en te drink, want môre sterf ons (Vers 30 – 32)?

1 Korintiërs 15 gaan oor die opstanding van die dooies en nie oor  die verkryging van verlossing nie. Die Mormone se doop vir die dooies is ‘n volmag vir ‘n afgesterwe persoon wat nie die “evangelie” van die Mormone gehoor het terwyl hy nog geleef het nie.

Ons sit steeds met die probleem: waarom laat hulle hulle vir die dooies doop? Dit bly onseker. Waarskynlik het sekere Korintiërs hulle laat doop vir mense wat reeds dood was – moontlik familielede. Hiermee word die waarde van die doop oordryf. Die doop speel nie ‘n rol in die verlossing van die dooies nie. Moontlik was hulle bekommerd oor gelowiges wat gesterf het voordat hulle gedoop is. Hulle sou dan geestelik daardeur verloor.

‘n Moeilike gedeelte waarvoor ons geen aanvaarbare verklaring het nie.

“Where there is charity and wisdom, there is neither fear nor ignorance.” – Franciskus van Assisi

God praat met ons deur die profete

Ons het gesien dat God met ons deur die natuur praat. Dit is nie voldoende nie – ons het meer as dit nodig. Natuurlik kan ons baie wardevolle lesse uit die natuur leer. Die orde van alles in die natuur vertel vir ons van God se wysheid en mag.

Ons is dikwels onseker of God kan praat. As God spesiale boodskappers gebruik, kan Hy tog sekerlik met ons praat. God sê vir Moses: Wie het aan die mens ‘n mond gegee? Wie maak stom of doof of siende of blind. Is dit nie Ek, die Here, nie? Gaan nou, Ek sal jou help met die praat en jou leer wat jy moet sê (Eksodus 4:11 – 12). Hy wat die mond gemaak het, kan tog verseker dat ons ‘n duidelike boodskap kry, Daarom sê die Hebreërskrywer: In die verlede het God baiekeer en op baie maniere met ons voorvaders gepraat deur die profete (1:1).

God bly nie stil nie; Hy laat ons nie alleen nie en onkundig nie. God praat met ons. Hy doen dit op verskillende maniere – in die verlede onder andere deur die profete. Ons kan ook let op aanhalings van die Ou Testamentiese profete in die Nuwe Testament. Die woord wat die profete gepraat het, was nie hulle woord nie, maar God se woord. U het u goeie gees gegee om hulle te onderrig … U was geduldig met hulle, baie jare lank, U het hulle gewaarsku deur u Gees, deur middel van u profete, maar hulle het nie geluister nie (Nehemia 9:20, 30).

Die probleem is dat enigeen daarop aanspraak kan maak dat hy ‘n profeet is. God was daarvan bewus dat daar vals profete sou kom. Hoe sou ons weet of ons met ‘n ware of vals profeet te doen het. Moses het hierdie probleem voorsien. Hy het in Egipte grootgeword en was nie as ‘n profeet bekend nie.  Sê nou die Israeliete glo my nie en hulle luister nie na my nie en hulle sê die Here het nie aan my verskyn nie? (Eksodus 4:1). God stel Moses in staat om sekere wondertekens te doen. Die probleem was dat die Egiptiese towenaars ook sekere tekens kon doen. God se tekens was egter altyd groter en die mense kon dit sien.

Maar nie alle profete kon wondertekens doen nie. Daarom sê Moses vir die volk: Wanneer jy jou afvra: Hoe sal ek die woorde kan uitken wat die Here nie met die profeet gepraat het nie? moet jy weet: as ‘n profeet iets in die Naam van die Here aankondig en dit kom nie uit nie en dit gebeur nie so nie, dan het die Here nie met die profeet gepraat nie. Dan het die profeet hom dit aangematig en hoef jy jou nie aan hom te steur nie (Deuteronomium 18:21 – 22).

Daar is dus drie tekens om ‘n ware profeet te identifiseer:

• Wondertekens wat God se mag oor die skepping bewys.
• Wat voorspel word, word waar.
• Wat voorspel word, is in ooreenstemming met wat God oor Homself geopenbaar het.

God se groot wysheid word onder andere daarin geopenbaar dat Hy mense met mense laat praat – hulle praat in die taal van mense wat ons kan verstaan. Dink net hoe donker ons lewe sou gewees het as God nie met ons deur sy profete gepraat het nie.

It is difficult to express how ingenious almost all men are in counterfeiting a love which they do not really possess (Calvyn).

Hoekom moet ons die Bybel ernstig opneem?

In ‘n vorige blog het ons gesien dat die Bybel die woord van God is en dat ons dit as padkaart vir ons lewe kan gebruik.

Die Bybel is vol praktiese wysheid vir ‘n suksesvolle lewe. Wat is jou behoeftes in die lewe? Die Bybel hanteer hulle. Kom ons kyk na ‘n paar van die mens se behoeftes en hoe hulle in die Bybel hanteer word:

• My behoefte aan liefde (Die lewe wat ek nou nog hier lewe, leef ek in die geloof in die Seun van God wat sy liefde vir my bewys het deur sy lewe vir my af te lê (Galasiërs 2:20).
• My behoefte aan ‘n familie (Julle is dus nie meer ver van God af nie, nie bywoners nie, maar medeburgers van die gelowiges en lede van die huisgesin van God –  Efesiërs 2:19).
• My behoefte aan lewe (Ek het gekom sodat hulle die lewe kan hê. En dit in oorvloed – Johannes 10:10.
• My behoefte aan leiding (Jy ken van kleins af die heilige Skrif. Dit kan jou die kennis bybring wat tot verlossing lei deur die geloof in Christus Jesus – 2 Timoteus 3:15).
• My behoefte aan krag (Ek is tot alles in staat deur Hom wat my krag gee – Filippense 4:13).
• My behoefte aan sekuriteit (my hulp kom van die Here wat hemel en aarde gemaak het … Die Here sal jou beskerm teen alle gevaar, jou lewe sal Hy beskerm. Hy sal jou beskerm waar jy ook gaan, nou en vir altyd – Psalm 121:2, 7 – 8).
• My behoefte aan vergifnis (Maar as ons ons sondes bely – Hy is getrou en regverdig, Hy vergewe ons ons sondes en reinig ons van alle ongeregtigheid – 1 Johannes 1:9).
• My behoefte aan gesondheid (As daar iemand onder julle is wat swaar kry, moet hy bid …En as hulle gelowig bid, sal dit vir die sieke genesing bring: die Here sal hom gesond maak – Jakobus 5:13, 15).
• My behoefte aan vrede (Moet oor niks besorg wees nie, maar maak in alles julle begeertes deur gebed en smeking en met danksegging aan God bekend. En die vrede van God wat alle verstand te bowe gaan, sal oor julle harte en gedagtes die wag hou in Christus Jesus – Filippense 4:6 – 7)
• My behoefte aan kos en klere (Ek was jonk en ek het oud geword, maar nooit het ek ‘n regverdige verlate gesien of dat sy nageslag brood soek nie – Psalm 37:25).
• My behoefte aan vriendskap (Niemand het groter liefde as dit nie: dat hy sy lewe vir sy vriende aflê. julle is my vriende as julle doen wat Ek julle beveel. Ek noem julle nie meer ondergeskiktes nie, want ‘n ondergeskikte weet nie wat sy baas doen nie. Nee, Ek noem julle vriende, omdat Ek alles wat Ek van my Vader gehoor het, aan julle bekend gemaak het – Johannes 15:13 – 15).
• My behoefte aan hoop (Hierdie hoop besit ons as ‘n veilige en onbeweeglike lewensanker, wat agter die voorhangsel vas is – Hebreërs 6:19).
• My behoefte aan alles (En my God sal in elke behoefte van julle ryklik voorsien volgens sy wonderbaarlike rykdom in Christus Jesus – Filippense 4:19; En God is by magte om aan julle alles in oorvloed te skenk, sodat julle in alle opsigte altyd van alles genoeg kan hê en volop kan bydra vir elke goeie werk – 2 Korintiërs 9:8).

Ons het hierdie blog begin deur te sê dat die Bybel vol praktiese wysheid is en ons behoeftes kan hanteer. Hier het ons nou ‘n klompie voorbeelde genoem om te wys dat god ons behoeftes kan hanteer.