There is one art of which man should be master, the art of reflection. -Samuel Taylor Coleridge

Wees bly

Verder, my broers, wees bly in die Here! Om dieselfde dinge aan julle te skrywe, is vir my nie  nie moeite nie, en vir julle gee dit sekerheid (Filippense 3:1). Paulus herinner ons daaraan dat ons bly moet wees, want dit gee aan ons sekerheid.

Gas is ‘n groot gevaar in steenkoolmyne. Vroeër jare is ‘n doeltreffende oplossing vir hierdie probleem gekry – kanaries. Solank as wat hierdie voëltjies sing, weet mynwerkers dat die lug veilig is. Sodra die kanaries nie meer sing en op die vloer van hulle hokkies neerval, is daar probleme – die gasvlakke is te hoog. Die vreugde van die Christen is soos hierdie voëltjies. Een van die eerste gevolge van sonde is dat ons ons blydskap verloor. As jou hart ophou sing, flikker die gevaarligte.

Jesus self het ons daaglike geestelike lewe met blydskap verbind: As julle my opdragte uitvoer, sal julle in my liefde bly, net soos Ek die opdragte van my Vader uitvoer en in sy liefde bly. Dit sê Ek vir julle sodat my blydskap in julle kan wees en julle blydskap volkome kan wees (Joannes 15:10 – 11). As ek my oë van Christus afneem, sal ek my blydskap verloor. Blydskap is die barometer vir my geestelike lewe. Christelike blydskap is nie die krag van positiewe denke nie; dit is nie ‘n optimistiese persoonlikheid nie. Dit is die vreugde van vir Jesus Christus sien, lief te hê en te vertrou. Christelike blydskap is ‘n vrug van die Heilige Gees (Galasiërs 5:22) Sulke blydskap kan nie deur ons omstandighede uitgeblus word nie. Al sou die vyeboom nie bot nie en daar geen druiwe aan die wingerde wees nie, al sou die olyfoes misluk en die lande geen oes lewer nie, al sou daar geen kleinvee in die kampe meer wees nie en die beeskrale sonder beeste wees, nogtans sal ek in die Here jubel, sal ek juig in God, my Redder (Habakuk 3:17 – 18).

Hoe kan blydskap vir ons sekerheid gee?

• Blydskap gee vir ons sekerheid as ons dien. As jy jou blydskap verloor, mag dit ‘n teken wees dat jou werk vir die Here nie meer aanbidding is nie. Blydskap beskerm jou daarteen om God vir die verkeerde redes te dien. Blydskap verhoed dat jy dien omdat dit ‘n plig is.
• Blydskap beskerm jou teen versoeking.

Blydskap in Christus is die gevolg  van tevredenheid in Christus. Jonathan Edwards sê:

The enjoyment of (God) is the only happiness with which our souls can be satisfied. To go to heaven, fully to enjoy God, is infinitely better than the most pleasant accommodations here. Fathers and mothers, husbands, wives, children, or the company of earthly friends, are but shadows; but God is the substance. These are but scattered beams, but God is the sun. These are but streams, but God is the ocean.

We are faced with this tremendous alternative of making ourselves weapons in the hand of God or weapons in the hand of sin – Barclay

Die evangelie begin met ‘n belofte (2)

In die vorige blog het ons na God se verbonde met Abraham en Dawid gekyk.

Die nuwe verbond

Daar kom ‘n tyd, sê die Here, dat Ek met Israel en Juda ‘n nuwe verbond sal sluit … Dit is die verbond wat Ek in die toekoms met Israel sal sluit, sê die Here: Ek sal my woord op hulle harte skryf en dit in hulle gedagte vaslê. Ek sal hulle God wees en hulle sal my volk wees. ‘n Man sal nie meer vir sy buurman of broer voorhou: “Jy moet die Here dien” nie, want almal sal My dien, klein en groot, sê die here. Ek sal hulle oortredings vergewe en nie meer aan hulle sondes dink nie (Jeremia 31:31 – 34)

Twee belangrike bestanddele kom na vore:

• Daar sal vergifnis van sonde wees. Vergifnis staan nooit alleen nie – dit is ontwerp om die verhouding met God te herstel.
• God se wet sal op mense se harte geskrywe wees. Die lang geskiedenis van afvalligheid bewys dat mense nie die verbond kon onderhou nie. Hulle het God se teenwoordigheid en krag in hulleself nodig.

Luister na wat God deur Esegiël sê:

Ek sal reinigingswater oor julle uitgooi sodat julle rein kan word. Ek sal julle reinig van al julle onreinheid en van al julle afgodery. Ek sal julle ‘n nuwe hart en ‘n nuwe gees gee, Ek sal die kliphart uit julle liggaam uithaal en julle ‘n hart van vleis gee. Ek sal my Gees in julle gee en Ek sal maak dat julle volgens my voorskrifte leef en my bepalings gehoorsaam en nakom (36:25 – 27).

‘n Nuwe hart en ‘n nuwe Gees; ‘n nuwe begin. As God se mense sy wet gaan gehoorsaam, sal dit nie wees omdat hulle harder probeer nie, maar omdat God se Gees in hulle woon.

Agter die evangelie staan die belofte van drie verbonde. Dit is in werklikheid een belofte: God gaan mense vorm wat God se beloftes en seëninge in ‘n wêreld vol beloftes sal weerspieël. Hierdie drie verbonde vorm die ruggraat van die evangelie. God gaan ‘n volk vorm waardeur die mensdom geseën sal word; Hy sal dit doen deur die beloofde Messias. Daardie koning bring twee dinge wat die wêreld desperaat nodig het: vergifnis van sonde en ‘n herstelde verhouding met die lewende God.

There is no absolute independence for man, our nature requires us to serve some master – J. Denney

Die evangelie begin met ‘n belofte (1)

Die mens het diep behoeftes. Ons is bewus daarvan dat ons hunker na dinge wat ons net nie op ons eie kan kry nie. Ons wil aan iets buite onsself verbind wees. Ons wil weet waarom ons bestaan. Hierdie behoeftes en verlangens staan sentraal in die storie van die Bybel. Die evangelie begin met ‘n belofte wat die diepste menslike behoefte hanteer. Waar verhoudings stukkend is, bring die evangelie herstel.

God het dus ‘n plan om hierdie verhouding te herstel. Hy doen dit deur sy verbonde. Kom ons kyk na ‘n paar.

Die verbond met Abraham

Die evangelie begin nie in Matteus 1:1 nie. Baie eeue vantevore het God ‘n belofte aan Abraham gemaak – hy sal die vader van ‘n spesiale groep mense wees. Ons lees daarvan in Genesis 12:1 – 3. Waarskynlik die grootste van God se beloftes aan Abraham was dat Hy deur hom sy seëninge na al die nasies sal versprei. Die konteks van hierdie belofte is belangrik. In Genesis 1 – 11 sien ons dat die mensdom sy eie pad loop – voortdurend van sy Skepper afdwaal. Die mens, soos vandag nog, het die neiging om sy rug op God te keer en sy eie belange na te jaag. Die verhaal is van God se standvastige liefde vir die mens. God se liefde is die kern van die evangelie.

Uit die verbond met Abraham vloei die storie van Israel. God se program is aan hierdie mense geopenbaar. Hulle was die draers van God se belofte en openbaring. Hulle word ‘n nasie geroep om God te eer.

God se verbond met Dawid

Israel het na ‘n koning verlang – soos die ander nasies gehad het. God was nie goed genoeg vir hulle nie. God gaan ‘n verbond met Dawid, die tweede koning van Israel, aan (2 Samuel 7:8 – 16). Hierdie koningslyn wat nou tot stand gekom het, het ‘n spesiale verhouding met God gehad as sy verteenwoordiger. Ek sal vir hom ‘n vader wees en hy sal vir My ‘n seun wees (2 Samuel 7:14). Hier kom die hoop van ‘n unieke koning – die soort heerser wat God begeer. Hieruit kom die hoop van die Messias – ‘n koning wat vrede sou bring en geregtigheid in ooreenstemming met God se beloftes aan Abraham sou vestig.

Die meeste van Israel se konings het misluk – hulle het nie God se ideale bereik nie. Hulle volg hulle eie koppe. Uiteindelik oordeel God die volk – oorlog en ballingskap. In hierdie konteks belowe God ‘n nuwe verbond. Volgende keer kyk ons na hierdie nuwe verbond.

Unless you point to the good news of God’s grace people will not be able to bear the bad news of God’s judgement. —Timothy Keller

Hoekom volg ek Jesus se roeping?

When Jesus bids a man to follow him, he bids him tot come and die (Dietrich Bonhoeffer)

Jesus het gesê dat as ons Hom werklik wil volg, moet ons ons kruis opneem. Die kruis was ‘n simbool van marteling. Bonhoeffer was reg: die eise van Jesus is totaal. Sy oproep om Hom te volg, is nie net ‘n aanbod van ‘n nuwe soort lewe nie, maar ‘n oproep om ons alles te gee. Watter motief sal enigeen oortuig om so ‘n roeping te volg? J. D. Greear sê dat ons in Markus 8:35 – 38 drie motiverings kry.

1. God bring lewe deur gehoorsaamheid

Wie sy lewe vir homself wil behou, sal dit verloor; maar wie sy lewe vir My en die evangelie verloor, sal dit behou (vers 35). Gehoorsaamheid aan God mag soos die dood voel, maar in werklikheid is dit lewe. Die vergifnis wat jy gaan gee, sal soos die dood voel, maar daardie “dood” sal ‘n verhouding herstel en jou van die gif van bitterheid vry maak. Daardie sondige verhouding waarvandaan jy wegloop, sal voel soos dood, maar dit open die moontlikheid vir ‘n gesonde, lewegewende verhouding. So kan ons aangaan.

Gehoorsaamheid aan God is nooit maklik nie Soms sal dit voel asof die koste van die opoffering net te groot is – dit sal soos die dood voel. Maar as ons helder kan sien, sal ons besef dat dit in werklikheid God se instrument van lewe is.

2. Jy kan in ieder geval nie daaraan vashou nie

Wat help dit ‘n mens tog om die hele wêreld as wins te verkry en sy lewe te verloor? Wat sal ‘n mens kan gee in ruil vir sy lewe (vers 36 – 37).

Waaraan jy nou ook al vasklou wat verhoed dat jy jou volledig aan Jesus Christus oorgee, sal jy nie kan behou nie. Jongmense wil aan hulle seksuele vryheid vasklou en oorweeg nie eers dat Jesus Christus die Here is nie. Jesus vra: “Is dit werklik die moeite werd? Dink jy dit is meer as jou ewige siel werd. Hoeveel mense weier nie om aan Jesus die beheer van hulle beroep of finansies oor te gee nie. Jy kan vir ‘n tyd aan jou geld vashou, maar wat dan? Waaraan jy nou vashou, gaan jy uiteindelik verloor – ons gaan met leë sakke eindig. Hoekom ons siel verruil vir daardie dinge nou?

He is no fool who gives what he cannot keep to gain what he cannot lose (Jim Elliot).

3. Jesus was nie skaam vir jou nie

Wie hom dan vir My en my woorde skaam te midde van hierdie ontroue en sondige geslag, vir hom sal die Seun van die mens Hom ook skaam wanneer hy kom saam met die heilige engele, en beklee met dieselfde heerlikheid as sy Vader (vers 38).

Die ironie van hierdie vers is dat Jesus, wat Hom vir ons behoort te skaam het, nie vir ons skaam is nie. Die kruis wat Hy opgetel het, was vrywillig. Ons kan baie baat deur ons kruise op te neem; Hy het niks gehad om te baat nie, maar baie om te verloor. Tog, uit liefde vir my het Hy my geïdentifiseer en ‘n kruis opgetel om my te red. Jesus was die enigste volmaakte mens – Hy het die reg gehad om die dood te vermy. Uit liefde vir my het Hy die dood verduur sodat ek kan lewe. Is dit nie werd om alles te verlaat vir so ‘n God nie?

Om Jesus te volg, is nie altyd maklik nie, maar beslis die moeite werd.