Christian prayer is complete only when we intercede for the common good of all and not merely for ourselves – Martin Luther.

Kan die kerk die wêreld verander?

The great use of a life is to spend it on something that outlasts it – William James

Die waarhid van hierdie stelling word treffend geïllustreer in die eerste paar bladsye van Handelinge. ‘n Klein groepie ongekwalifiseerde mense het letterlik die wêreld omgekeer. Nou, 2 000 jaar later, volg miljoene mense hierdie beweging wat God begin het deur hierdie mense te gebruik. Hoekom kon God hulle so kragtig gebruik? In Handelinge 1 – 2 kry ons sekere eienskappe wat hierdie vraag beantwoord. Wat bemoedigend is, is dat hierdie selfde eienskappe vandag steeds deur ons gebruik kan word. Kom ons kyk na hulle.

1. Hulle het geloof gehad wat tot gehoorsaamheid gelei het

Hulle het God vertrou en eenvoudig gedoen wat Hy gesê het hulle moet doen. God beveel hulle om nie van Jerusalem af weg te gaan nie (1:4). Nou Jerusalem was nie juis ‘n vriendelike plek vir hierdie groepie nie. Dit was die laaste plek waar hulle sou wou bly. Hoekom bly hulle dan in Jerusalem?  Omdat Jesus hulle beveel het om daar te bly. As ons die wêreld wil verander moet ons na God luister en doen wat Hy sê. Ongelukkig is ons gedurig besig om strategieë en planne te ontwikkel. Ons het nie tyd om na God te luister nie. Onthou: ons gaan nie die wêreld verander nie. Ons moet by God se missie om die wêreld te verander, aansluit.

2. Hulle het ‘n passie gehad wat eenheid bevorder het

Hulle het almal eensgesind volhard in die gebed (1:14). Van hoeveel van ons gemeentes kan ons sê dat die lidmate eensgesind is. Hoe het dit in die vroeë kerk gebeur? Die sleutel kry ons in 1:3: Na sy dood het Hy aan hulle met baie onbetwisbare bewyse ook getoon dat Hy lewe. Jesus het met hulle oor die koninkryk van God gepraat. Vir veertig dae na sy opstanding praat Jesus met hulle oor die koninkryk. Die koninkryk is God se soewereine optrede in die wêreld wat verseker dat mense in die regte verhouding met Hom is. Niks was vir hulle belangriker as juis God se roeping nie.

3. Hulle het gebid

Lees net 1:8 – 11. In vers 8 sê Jesus vir hulle: “Hierdie is my plan … julle gaan in Jerusalem waar die mense julle haat bly … dan gaan julle na Samaria, daar waar julle die mense haat … daarna gaan julle na die uithoeke van die wêreld waar julle nie weet wat om te verwag nie.” Asof dit nie genoeg is nie, word Jesus in die hemel opgeneem – hulle is alleen. Hulle kyk stip na die hemel. Twee engele verskyn aan hulle en vertel die dissipels dat hulle nou besig moet raak. Galileërs, waarom staan julle so na die hemel en kyk. Hierdie Jesus wat van julle af na die hemel toe opgeneem is, sal net so terugkom soos julle Hom na die hemel sien opgaan het.

Met hierdie woorde verander alles: Jesus kom weer. Hulle gaan terug na Jerusalem en kom in die bovertrek bymekaar. En dan: Hulle het almal eensgesind volhard in die gebed (1:14). Hulle besef dat hulle sonder God se hulp hopeloos was. Vandag het ons tyd vir allles … behalwe gebed.

4. Hulle het die Heilige Gees wat vir hulle krag gegee het, gehad.

Ons kan nie presies verduidelik wat in Handelinge 2 gebeur het nie. Ons weet egter verseker dat die Gees van God die kerk bemagtig het. Wat ons vandag nodig het, is die vars teenwoordigheid van die Heilige Gees. Dan word gewone mense op ongewone wyses gebruik. As die Gees van God beweeg, moet ons seker maak dat ons seile gespan is om by Hom aan te sluit waar Hy besig is om te werk.

Truth is so obscure in these times, and falsehood so established, that unless we love the truth, we cannot know it – Blaise Pascal

Volg My (4)

David Platt het ‘n kort boekie: What did Jesus really mean when He said: Follow me? geskryf. Ek gaan ‘n paar blogs aan hierdie boekie spandeer.

Om sonde te los en onsself af te sterwe, is duur. Toe Jesus die vier vissermanne gevra het om Hom te volg, vra Hy hulle om hulle besittings, beroep, drome, ambisies, familie, vriende en sekuriteit agter te laat. Hulle moes alles los. In ‘n wêreld waar alles om myself draai – beskerm, bevorder, vermaak sorg vir jouself – sê Jesus ons moet ons eie self doodmaak. Hierdie vier vissers het ‘n groot prys betaal –Petrus is onderstebo gekruisig, Andreas is in Griekeland gekruisig, Jakobus is onthoof en Johannes is verban.

Tog het hulle geglo dat dit die moeite werd was om Jesus te volg – hulle het iets gevind wat dit die moeite werd gemaak het om alles te verloor. In Christus vind hulle ‘n liefde wat alle verstand te bowe gaan, ‘n bevrediging wat die omstandighede verplaas het, ‘n doel wat enige ander doel in die wêreld oortref het. Hulle het gewillig en met blydskap hulle lewens verloor om Hom te ken, te volg en te verkondig.

Hoe ver het ons nie van hierdie pad afgedwaal nie. Ons probeer Jesus se oproep vergeet. Die kerke is vol mense met ‘n oppervlakkige verhouding met Jesus Christus. Baie mense glo dat om ‘n volgeling van Jesus Christus te word, moet jy sekere feite erken en sekere woorde sê. Die uitnodiging om Jesus Christus te volg, is nie ‘n uitnodiging om ‘n gebed te bid nie – dit is ‘n oproep om ons lewens af te lê.

Volgende keer kyk ons verder na die koste om Jesus Christus te volg.

The Lord frequently upsets the purposes of his saints in order to humble them, and by such humiliation to teach them to look to His providence, om which they are to depend – Calvyn

Hoe kan ek ‘n uitstekende luisteraar word?

The word listen contains the same letters as the word silent – Alfred Brendel

Luister is soos intelligensie – meeste mense glo dat hulle bokant die gemiddelde is. Dit is tog nie moontlik nie. Luister is ‘n vaardigheid waarin elkeen van ons moet uitblink. In ‘n onlangse studie van die George Washinton Universiteit is bevind dat luister 40% van ‘n leier se prestasie kan beïnvloed.

Mense praat baie. Daarom is daar baie geleenthede om te luister. Ons praat om terugvoer te gee, opdragte uit te reik en om teikendatums te kommunikeer. Behalwe dit wat ons hoor, kry ons waardevolle inligting deur na ‘n persoon se stemtoon te luister en na sy liggaamstaal te kyk.

Doeltreffende luister kan aangeleer en bemeester word. Soms is dit moeilik; soms is dit vervelig, maar doeltreffende luister kan bemeester word. Jy moet net weet wat om te doen. Dr Travis Bradberry, medeskrywer van Emotional Intelligence 2.0, gee ‘n paar riglyne.

1. Fokus

Meeste mense fokus so op wat hulle volgende gaan sê dat hulle nie hoor wat die ander persoon sê nie. Die woorde is duidelik, maar die betekenis gaan verlore. Om te fokus is nie so maklik as wat dit klink nie. Jou gedagtes kan jou aandag aflei.

2. Sit weg jou foon

Jy kan nie doeltreffend luister en jou foon terselfdertyd monitor nie. Niks ontstel mense meer as wanneer jy na jou foon loer terwyl julle met ‘n gesprek besig is nie. As jy met ‘n gesprek besig is, moet jy al jou aandag daaraan gee. Dit maak die gesprek aangenamer en doeltreffender.

3. Vra goeie vrae

Mense wil weet of jy luister. ‘n Vraag ter verduideliking wys vir hulle dat jy luister, maar ook dat jy belangstel in wat hulle te sê het. Onmiddellik wen jy respek en waardering. Jy probeer bevestig wat jy gehoor het, maar jy vra ook vrae om meer inligting te bekom. Goeie vrae is: Hoekom sê jy dit? Wat het volgende gebeur? Jy moet seker maak dat jou vrae sal bydra om die spreker te verstaan. Moenie vrae vra om die onderwerp te verander nie.

4. Oefen nadenkende luister

Dit is die luisterstrategie waar jy die betekenis van wat gesê is, parafraseer. So maak jy seker dat jy die spreker se woorde korrek geïnterpreteer het. Deur dit te goen, gee jy aan die spreker die geleentheid  om te verduidelik wat sy bedoel het om te sê. Moenie net die spreker se woorde herhaal nie. Gebruik jou eie woorde om te bewys dat jy die inligting geabsorbeer het.

5. Gebruik positiewe liggaamstaal

Wees bewus van jou uitdrukking, stemtoone en handbewegings en maak seker dat hulle positief is. Deur ‘n positiewe stemtoon te gebruik; deur nie jou arms te vou nie; deur oogkontak te behou is almal tekens van positiewe liggaamstaal. Dit kan al die verskil aan ‘n gesprek maak.

6. Moenie oordeel nie

As jy ‘n goeie luisteraar wil wees moet jy nie oordeel nie. Dit maak dat mense gemaklik voel om jou te nader. Niemand wil ‘n gesprek voer met iemand wat alreeds besluit het en nie gewillig is om te luister nie. Om toeganklik te wees beteken dat jy toegang tot nuwe idees het. Om dit reg te kry, moet jy die wêreld deur ander mense se oë sien. Dit beteken nie dat jy glo wat hulle glo nie of dat jy hulle gedrag goedkeur nie. Dit beteken jy oordeel nie voordat jy presies verstaan wat hulle sê nie.

7. Bly stil

As jy nie vrae vra om duidelikheid of meer inligting te kry nie, moet jy stilbly. As jy dink oor wat jy volgende gaan sê, neem dit die aandag van die spreker af weg. As jy die gesprek kaap, wys dat jy dink dat jy iets belangriker as die spreker te sê het. Moenie te gou met allerhande oplossings na vore kom nie. Almal van ons wil mense help – veral as dit iemand is vir wie jy omgee. As ons te gou met oplossings inspring, maak ons die ander persoon stil.

Die lewe is besig. Almal van ons probeer elke dag baie dinge doen. Maar aktiewe, doeltreffende luister is nie iets wat jy sommer so in die loop van sake kan doen nei. Dit vereis ‘n doelbewuste poging.

What we live is what we really believe. Everything else is just so much religious talk – Vance Havner

Volg My (3)

David Platt het ‘n kort boekie: What did Jesus really mean when He said: Follow me? geskryf. Ek gaan ‘n paar blogs aan hierdie boekie spandeer.

Hoe word ek ‘n volgeling van Jesus? Hoe word hierdie verlossing ‘n werklikheid in my lewe? Jesus begin sy bediening met die woorde: Bekeer julle. Dit ook wat Johannes die Doper ter voorbereiding van Jesus se koms verkondig het. Dit was ook die basis  vir die eerste Christelike preek – dié van Petrus op pinksterdag.

Bekering behels ‘n elementele transformasie in iemand se hart, verstand en lewe. As mense hulle bekeer, draai hulle deur 180 grade om. Van nou af dink hulle anders, voel hulle anders, glo hulle anders, leef hulle anders en het hulle anders lief. Toe Jesus sê “bekeer,” praat Hy met mense wat teen God in opstand was. Hulle vertrou op hulleself vir hulle verlossing. Jesus se oproep was dus dat hulle sonde moet verwerp en ook alle vertroue op hulleself vir hulle verlossing.

Bekering beteken ek verwerp ‘n lewenswyse en vervang dit met ‘n nuwe lewenswyse. Baie Christene glo dat as ons sondes vergewe is, is alles reg. Maar as daar nie ‘n ware opregte verandering in ons lewens is nie, is dit nie voldoende nie.

As ek na Jesus kom, vergeef Hy nie net my sonde nie, maar Hy vul my ook met sy Gees. Dit is die boodskap van die Christelike geloof: Jesus het vir jou gesterf sodat Hy in jou kan leef. Hy verbeter nie my ou natuur nie – Hy gee aan my ‘n volledige nuwe natuur. Alles wat aan Hom behoort, word nou joune. Sy geregtigheid verplaas jou ongeregtigheid; sy Gees vul jou gees; sy liefde word jou liefde; sy vreugde word jou vreugde; sy begeertes word jou begeertes; sy wil word jou wil; sy mag word jou mag. Die Christelike lewe is die uitlewing van die inwonende Christus. Dit is wat dit beteken om Jesus Christus te volg.

Kos dit iets om Jesus te volg? Daarna kyk ons volgende keer.