What you do with your whole heart is not burdensome to do – John Piper

Die Groot Opdrag

God het aan elke gelowige ‘n roeping gegee: gaan uit in die wêreld en verkondig die goeie nuus van Jesus Christus. Hoekom? Die liefde van Christus dring ons (2 Korintiërs 5:14). Ons liefde vir Jesus motiveer ons om ons roeping te vervul.

Almal is vir God belangrik. God het sekere mense gemaak waarvan ek nie hou nie, maar Hy het nog nooit ‘n persoon gemaak wat Hy nie liefgehad het nie. Omdat God omgee, moet ek ook omgee. Jy verander nie mense met proteste nie, maar met liefde.. Die gemeenskap word een lewe op ‘n slag verander. God het spesifieke mense op ons pad geplaas – mense met wie ons die evangelie moet deel. Vir sommige mense is jy die enigste Christen wat hulle ken

As lidmate van die gemeentes nie die goeie nuus deel nie, wie gaan dit doen. God gaan ons verantwoordelik hou vir die mense wat Hy op ons pad geplaas het om die goeie nuus te hoor.

Maar hoe doen ons dit? Ons moet dit sê en wys. Hy wil hê dat ander dit deur ons lewens sien en ons moet dit met ons mond verkondig. Ons word deur die mense dopgehou. Elke ding wat jy doen of sê of gesprek wat jy het, het ewigheidsimplikasies. Dit is ‘n ontsaglike verantwoordelikheid.

Tree met wysheid op teenoor die mense wat nog buite die gemeente is. Maak die beste gebruik van elke geleentheid (Kolossense 4:5).

Be sure that you are with God, and then you may be sure that God is with you – Spurgeon

Die Lübeck-katedraal

Die Lübeck-katedraal is ‘n Lutheraanse kerkgebou. Die bouwerk aan die gebou is in 1173 begin en in ongeveer 1230 voltooi. Op een van die mure is die volgende geskrywe:

Julle noem My Meester, maar gehoorsaam My nie,

Julle noem My Lig, maar sien My nie,

Julle noem My die Weg, maar loop nie op My nie,

Julle noem My Lewe, maar begeer My nie,

Julle noem My Wys, maar volg My nie,

Julle noem My regverdig, maar het My nie lief nie.

Julle noem My Ryk, maar vra My nie,

Julle noem My Ewig, maar soek My nie,

Julle noen My ewig, maar vertrou My nie,

Julle noem My edel, maar dien My nie,

Julle noem My Magtig, maar eer My nie,

Julle noem My geregtig, maar vrees My nie.

As Ek julle veroordeel, moenie My blameer nie

Love provides the motive for obeying the commands of the law, but the law provides specific direction for exercising love –  Jerry Bridges

Ek kyk na wat ek kortkom

Niks sal jou geloof so dreineer as jy gedurig kyk na wat jy kortkom nie. Hoe meer ek op my gebrek aan hulpbronne, die krag wat ek nie het nie en die swakhede wat ek het, fokus, hoe swaarder word die gewig van ongeloof. As ek kyk na wat ek kortkom, dreineer dit my hoop en blaas my vrees aan.

‘n Tekort beteken dat ek nie genoeg het om die betaling te maak nie. Ons waag nie as ons ‘n tekort in die gesig staar nie. As ek egter na ‘n surplus kyk gee dit moed en vul my met hoop. ‘n Surplus beteken daar is meer as genoeg vir my behoeftes. Dit moedig vrygewigheid teenoor ander aan.

Aan onsself oorgelaat het ons tekorte. In dié tyd was julle sonder Christus, uitgesluit uit die burgerskap van Israel, ver van God af sonder deel aan die verbonde en die behoeftes wat daarmee saamhang, sonder hoop en sonder God in die wêreld (Efesiërs 2:12). Die goeie nuus is dat as jy ‘n gelowige is jy nie meer tekorte het nie. Christus het jou sondeskuld betaal. Sal Hy ons dan nie al die ander dinge saam met Hom uit genade skenk nie? (Romeine 8:32). Let wel: alle dinge.

En my God sal in elke behoefte van julle ryklik voorsien volgens sy wonderbaarlike rykdom in Christus Jesus (Filippense 4:19). Watter wonderlike belofte. Hierdie belofte is nie onvoorwaardelik nie Die voorwaarde is geloof. Ons open die fles van God se voorsiening en sy onuitputlike bankbalans deur geloof. Ongeloof glo die fles is leeg en daarom word dit nie oopgemaak nie.

Ons moenie net die waarheid van hierdie beloftes bevestig nie, maar as ons nie bereid is om op te tree nie, sal niks gebeur nie. In sy beloftes wys God vir ons die stoorkamers van sy voorsiening. Geloof is die sleutel wat hierdie stoorkamers oopsluit. God wil hê dat ons sy stoorkamers moet oopmaak. As ‘n mens nie glo nie, is dit onmoontlik om te doen wat God wil. Wie tot God nader, moet glo dat Hy bestaan en dat Hy dié wat Hom soek, beloon (Hebreërs 11:6).

Hoe kan ek dan meer geloof kry? As ek moeg en sat is daarvan om ‘n dissipel met ‘n klein geloof te wees, is ek gereed om my eerste treë te gee om te verander. Dit begin as ek ophou om na my tekorte te kyk. Hou op om te kyk na jou tekorte van hulpbronne, wysheid, mag en selfs geloof. Ons tekorte ontmoedig ons. Satan wil nie hê dat ons verder as onsself moet kyk nie; hy wil nie hê dat jy na Jesus en die oorvloedige genade wat Hy vir jou verkry het, moet kyk nie.

Kyk na Jesus en Hy wys vir jou hoe jy jou geloof kan vermeerder.

1. Julle moet julle ook nie gedurig afvra wat julle gaan eet of drink nie, en julle moenie besorg wees nie. Dit is alles dinge waaroor die ongelowiges in die wêreld begaan is, maar julle het ‘n Vader wat weet wat julle nodig het. Beywer julle vir sy koninkryk, dan sal Hy julle ook hierdie dinge gee (Lukas 12:29 – 31). Kyk na die Vader se koninkryk. Maak die prioriteite van die koninkryk jou prioriteite en die Vader sal in elke behoefte van julle voorsien.
2. Moenie bang wees nie, klein kuddetjie, want dit was die wil van julle Vader om die koninkryk aan julle te gee. Verkoop julle besittings en gee bydraes vir die armes. Skaf vir julle ‘n beurs aan wat nie leeg raak nie, ‘n onuitputlike rykdom in die hemel, waar geen dief dit kan bykom en geen mot dit kan verniel nie. Waar julle skat is, daar sal julle hart oor wees (Lukas 12:32 – 34). Jesus sê dat ons geloof moet beoefen deur ontslae te raak van al die afgode wat ons glo ons sekerheid waarborg.

God se belofte is dat as ons dit doen ons Hom sal sien en ons geloof sal toeneem.

Love is from God the way heat is from fire, or the way light is from the sun. Love belongs to God’s nature – John Piper

Draai die briek aan

Ons beweeg al hoe vinniger. Ons het ‘n obsessie met besig wees; ons wil dinge al hoe vinniger doen. Die pas waarteen ons lewe is buite beheer. Jesus was nooit gejaagd nie; Hy was nie deur die lewe oorweldig nie. Tog het Hy ‘n groot sending gehad wat Hy in ‘n baie kort tydjie moes afhandel. Jesus was nie gejaag nie, want Hy het teen God se pas beweeg. Om te jaag is die wêreld en nie God se pas nie.

Wat kos ons gejaagde lewe ons?

1. ‘n Gejaagde lewe vernietig ons verhouding met God.

As ek met God wil verkeer, vereis dit stilte en ek moet aandag gee. Jesus het dikwels aan die wêreld onttrek om te bid. In hierdie stil oomblikke ontvang Hy die krag om sy taak voort te sit. In hierdie stil tye kry Hy die nodige wysheid om tussen God se planne en dié van die wêreld te onderskei. Tensy ek tyd met God alleen deurbring, sal die spoed van die wêreld my verstaan van God verwring. Angs, onrustigheid en ontevredenheid is jou voorland. Bedaar en erken dat Ek God is (Psalm 46:11).

2. ‘n Haastige lewe verminder my vermoë om ander lief te hê

Dit is geen wonder dat die groot liefdeslied (1 Korintiërs 13) begin met: Die liefde is geduldig. Verhoudings kan net ontwikkel in ‘n rustige omgewing – iets wat haastige mense nie het nie. Hoe vinniger jy lewe, hoe minder is jou vermoë om ander lief te hê.

3. ‘n Gejaagde lewe vermeerder die krag van versoeking

Ons leef in ‘n kultuur van onmiddellike bevrediging. In hierdie kultuur is dit vir Satan maklik om mense te verlei. So baie van ons foute – buitehuwelikse seks, dronkenskap, dwelms, ens – is omdat ons onmiddellike bevrediging soek. As jy geduld aanleer en leer hoe om te wag, sal God vir jou die dinge op sy tyd gee.

4. ‘n Gejaagde lewe maak jou ongevoelig vir ongeregtighede.

‘n Gejaagde lewe beteken dat jy sonder diep gevoelens lewe. Jy het nie die tyd of die energie om te dink aan dinge buite jou snelbaan nie. Jy word onbewus van die gebrokenheid van die wêreld om jou. Ongeregtigheid en onderdrukking breek God se hart. As ons harte nie breek vir die dinge wat God se hart laat breek nie, is dit tyd om briek aan te draai.

5. ‘n Gejaagde lewe bevorder wettisisme

In vandag se wêreld is inligting onmiddellik beskibaar. Met al hierdie inligting sou ‘n mens dink dat gelowiges meer van God as ooit tevore weet. Dit is die probleem: inligting leer my van God, maar dit verbind my nie met Hom nie. Kennis alleen lei tot wettisisme. Om God waarlik te ken, vereis wysheid en onderskeidingsvermoë. Hierdie eienskappe kry ons slegs deur nadenke, afsondering, gebed en in die geloofsgemeenskap. Dit gebeur nie oornag nie.

6. ‘n Gejaagde lewe verwring jou doel en verminder jou passie

In ‘n gejaagde kultuur word jou lewensdoel bepaal deur wat jy doen – dit wat jy kan sien en vashou. Maar God se idee van doel is nie oor doen nie, maar oor word. Wat word ek?  Jy kan baie goeie dinge vir God doen, maar as dit nie kom uit ‘n verhouding met God nie, gaan jy nie jou lewensdoel bereik nie.

‘n Gejaagde lewe kyk na buite vir antwoorde op die groot lewensvrae. ‘n Lewe geleef teen God se pas kyk na binne vir hierdie antwoorde. Spoed is belangrk in jou lewe. As jy nie teen God se pas beweeg nie, sal jy nie die lewe deur God se lens sien nie.  Ek dink nie God is met ons uitputting beïndruk nie. Uitbranding is nie ‘n teken van trou nie.

Haal jou voet van die petrolpedaal af.