I do not think of myself as your teacher. I think of myself as a friend who has made a very long journey and has learned something so important that he does not want to keep it to himself.” Henri Nouwen

Matteus 15:26

The Gospel Coalition is besig met ‘n reeks oor verwarrende gedeeltes uit die Bybel. Kundiges verduidelik hierdie gedeeltes. Vandag kyk ons na Matteus 15:26.

Dit is nie mooi om die kinders se brood te vat en vir die hondjies te gooi nie.  ‘n Mens kry amper die indruk dat Jesus so ‘n bietjie onbeskof is. Kom ons kyk na die konteks:

• Jesus is in die streke van Tirus en Sidon. Hy word deur ‘n Kanaänitiese vrou genader – die ideale geleentheid om oor kultuurgrense heen van die evangelie te getuig.
• Die moeder vra Jesus om haar dogter wat in die mag van ‘n bose gees is, te genees. Dit is tog ‘n redelike versoek.
• Die ontstelde vrou praat respekvol met Jesus. Sy noem Hom Here, Seun van Dawid! Ontferm U oor my – sy het vertroue in sy vermoë. Wat was Jesus se reaksie? Hy het haar niks geantwoord nie.
• Sy dissipels versoek Hom om die vrou weg te stuur. Hy antwoord: Ek is net na die verlore skape van die volk Israel toe gestuur.
• As die vrou aanhou met haar versoek antwoord Jesus met ons vers: Dit is nie mooi om die kinders se brood te vat en vir die hondjies te gooi nie. In die Joodse kultuur is honde baie negatief beskou.

Jesus se reaksie klink vir ons vreemd. Hoe moet ons sy antwoord aan die Kanaänitiese vrou verstaan? Daar is drie moontlikhede

1. Ons kan probeer om die hardheid van Jesus se stelling te versag. Jesus maak net die punt dat die fokus van sy bediening Israel is. Ander sê dat Jesus se gebruik van hondjies positief gesien moet word – Hy gebruik immers die verkleinwoordjie. Hierdie benadering misluk.
2. ‘n Tweede benadering sê dat Jesus se woorde sy diep gesetelde seksisme en rassisme openbaar. Dit is nie waar nie. In Jesus se geslagsregister kry ons twee Kanaänitiese vrou – Rut en Ragab. Ons lees ook gereeld van mense wat gevoel het dat Jesus hulle te na gekom het. Dit lyk nie asof hierdie vrou voel dat daar teen haar gesondig is nie. Sy stem selfs met Hom saam: Dit is waar, Here. Dit is duidelik dat hierdie vrou volkome vertroue in Jesus se mag het – selfs ‘n krummel van Jesus se mag sou haar dogter kon genees het.
3. Die derde benadering is dat ons hier ‘n uitnodiging tot dieper geloof het.

• Jesus se antwoord gee haar die geleentheid om die diepte van haar geloof te demonsteer. Selfs Jesus se moeilike woorde ontmoedig haar nie. Daarom sê Jesus: Jou geloof is groot. Jou wens word vervul.
• Jesus se harde woorde aan die vrou moet ander in volhardende geloof onderrig. In die gedeeltes net voor en net na hierdie gedeelte wys Jesus se dissipels hulle gebrek aan geestelike waarneming – dit beklemtoon die kontras tussen hulle klein geloof en die vrou se groot geloof. Dit wys vir hulle wat dit beteken om geloof te hê wat alle hindernisse kan oorwin.
• Jesus se woorde aan die vrou wys vir ons wat dit beteken om ons kruis op te neem en Hom te volg. As ons nie bereid is om die belediging om honde genoem te word te dra nie, is ons nog nie gereed om sy kruis op te neem nie.
• Deur die vrou se gewilligheid om in ware geloof te reageer op die eise van dissipelskap, berei Jesus se woorde die dissipels voor vir ‘n wêreldwye sending waarin geloof en nie etnisiteit die kritieke faktor is.

Aanvanklik is ons deur Jesus se gebrek aan sensitiwiteit verbaas. Na ons oor die vers nagedink het, konfronteer die teks ons met ons eie gebrek aan sensitiwiteit – vir die krag van die desperate moeder se volhardende geloof, tot die eise van dissipelskap en tot die diepte van genade van Jesus wat gereed is om enigeen wat na Hom in geloof kom, te seën.

A religion that gives nothing, costs nothing, and suffers nothing, is worth nothing – Martin Luther

Die Gordiaanse knoop

Frigië was ‘n antieke koninkryk in wat nou sentraal Turkye is. Daar was volgens legende ‘n tyd toe daar nie ‘n koning was nie. Eendag was daar ‘n heidense voorspelling dat die volgende man wat met ‘n wa getrek deur ‘n os Telmissus, die hoofstad van Frigië, inry die nuwe koning sou wees. Die man was ‘n boer met die naam Gordianus. Sy seun, Midas wat later die koning met die goue aanraking geword het, het sy vader vereer deur die ossewa aan die god Sabazios te wy. Hy maak dit aan ‘n paal vas met ‘n knoop wat so ingewikkeld was dat geglo is dat niemand dit kan losmaak nie. ‘n Verdere voorspelling was dat die man wat die raaisel van die knoop kan ontrafel oor Asië sou heers.Vir eeue kry niemand dit reg nie, totdat Aleksander die Grote daar aankom. Met sy swaard sny hy deur die knoop. Hy oorwin Asië. Die Gordiaanse knoop word die simbool van hardnekkige, ingewikkelde probleme en Aleksander se swaard die imbool beslissende, buite-die-kassie leierskapsoplossings.

Almal van ons het ons Gordiaanse knope. Dit mag wees oor God se soewereiniteit, die wese van lyding, die oorsprong van die bose, die Drie-eenheid, ens. Ons dink en redeneer, maar bereik ons perke. Hopelik kan ons dan soos Paulus uitroep:

O diepte van die rykdom en wysheid en kennis van God! Hoe ondeurgrondelik is sy oordele, hoe onnaspeurlik sy weë (Romeine 11:33).

Die pynlike knope in ons lewens is die ingewikkelde geestelike, emosionele en sielkundige strik van inwonende sonde of die tydelike swakheid, gestremdhede, teenstand of dit kan traumatiese gebeure in die verlede wees. Saam bepaal hulle dikwels hoe ons dink en wat ons doen.

Ons probeer hulle ontknoop, maar hoe meer ons aan hulle werk, hoe ingewikkelder word hulle vir ons. Berading en terapie kan sekerlik help. Maar net tot op ‘n punt. Terapie gaan ons nie genees nie; ons ontdek ons beperkings. Ons roep soos Paulus uit:

Ek, ellendige mens! Wie sal my van hierdie doodsbestaan verlos (Romeine 7:24). Nie een van ons kan dit doen nie; nie een van ons kan ‘n swaard maak wat deur die knope kan sny nie. Ons antwoord is dieselfde as wat Paulus in die volgende vers gee gee:

Aan God die dank! Hy doen dit deur Jesus Christus ons Here! (Romeine 7:25).

Daar is Een wat die raaisel van ons Gordiaanse knope kan oplos.

Sy Naam is: “Die Woord van God.” … Uit sy mond het daar ‘n skerp swaard uitgekom (Openbaring 19:13, 15).

Op Golgota het Jesus die beslissende slag op elke sondige knoop geslaan. Elke belofte van God is ‘n “ja” in Christus – Hy het die mag om deur ons knope te sny as ons in Hom glo.

Daar is sekere knope wat jy nooit op jou eie sal kan losmaak nie. Daar is iemand wat dit kan doen.

Julle moet nie ontsteld wees nie. Glo in God; glo ook in My (Johannes 14:1)

Die sleutel om ons Gordiaanse knope te hanteer is nie introspeksie en ontleding nie. Die sleutel tot vryheid is die swaard van die Gees, dit is die woord van God (Efesiërs 6:17) wat deur die knope sny.

Study the Bible to know about God. Obey the Bible to really know God – Adrian Rogers

Weet wat die wêreld aanbied, maar nie kan gee nie (1 Johannes 2:15 – 17).

In verse 12 – 14 het Johannes sy lesers bemoedig. In hierdie gedeelte waarsku hy hulle teen wat hy die wêreld noem. Hiermee verwys hy na ‘n wêreldse perspektief gelei deur Satan. Dit word gekenmerk deur die begeertes van die menslike natuur, sy oë en sy trots in sy besittings. As iemand die wêreld liefhet, is die Vader se liefde nie in hom nie (vs15). Ons gee ons oor aan dinge wat tydelik en verbygaande is – dinge sonder enige ewigheidswaarde.

Johannes sê dat ons nie van ons gedagtes, waardes en gedrag wat teenstrydig met God se woord is afgode moet maak nie. Johannes noem drie dinge wat die wêreld belowe, maar nie vir ons kan gee nie.

• Die wêreld kan nie vir jou gee wat jy nodig het nie (1 Johannes 2:15)

Die verlange van die mens se hart is om ander lief te hê en om deur ander liefgehê te word. Hierdie liefde moet op die regte dinge gerig word. Daarom sê hy: Moenie die sondige wêreld en die dinge van die wêreld liefhê nie. Hoekom?? As iemand die wêreld liefhet, is die Vader se liefde nie in hom nie. Liefde vir die Vader is wat ons nodig het – dit is waarvoor jy gemaak is. Kies wie jy liefhet versigtig en wyslik. Ons moenie ons liefde aan iets minder gee nie, want die kan nooit vir ons gee wat ons werlik nodig het nie.

• Die wêreld kan nie vir jou gee wat dit beloof nie (1 Johannes 2:16)

Hier lees ons duidelik van die wapens wat die wêreld gebruik om mense te mislei om by hom aan te sluit. Al hierdie dinge is in ons – die vyand is in ons. Dit is dieselfde drie wapens wat Adam en Eva mislei het: Toe besef die vrou dat die boom se vrugte goed is om te eet (begeertes van die menslike natuur) en mooi om na te kyk (begeertes van die oë) en begeerlik omdat dit kennis kan gee (trots). Dit is hierdie selfde drie versoekings wat Jesus in die woestyn oorwin het (Lukas 4:1 – 13). Hierdie versoekings is algemeen en alhoewel hulle oud is, is hulle nog doeltreffend. Ons moet hulle herken en teenstaan deur die krag van die Heilige Gees en die woord van God.

• Die wêreld kan nie vir ons gee wat ewig sal hou nie (1 Johannes 2:17)

Die wêreld en sy begeertes gaan verby. Die lig en dit wat ewig bly, het gekom in Jesus Christus. Wat bly? Die een wat die wil van God doen.

Een van die treurige verhale in die Bybel is dié van Demas. In Kolossense 4:14 hoor ons die eerste keer van hom. Hy word saam met ander genoem oor sy getroue diens aan Christus. Ons hoor weer van hom in 2 Timoteus 4:10: Demas het die teenswoordige wêreld liefgekry en my verlaat.  Ons moet uit hierdie verhaal van Demas leer: moenie dat die liefde vir die teenswoordige wêreld jou liefde vir die Vader uitdoof nie.

Waiting is the hardest work of hope. ~ Lewis Smedes
‘n Wetenskaplike rede om te vergewe

Jesus het nooit oor vergifnis ophou praat nie. Hy praat van ‘n God wat vergewe en wat verwag dat sy volgelinge ook moet vergewe. Hy sê vergifnis is noodsaaklik as jy ‘n oorvloedige lewe wil hê.

Jesus en die wetenskap stem hieroor saam. Daar is wetenskaplike bewyse vir baie van die dinge wat die Bybel oor vergifnis sê.

• As jy vergewe, genees jy gouer

Mense wat mishandel is en hulle aanvaller vergewe se sielkundige en fisiese gesondheid verbeter vinniger as diegene wat nie vergewe nie. Daar is egter ‘n vangplek: vergifnis is nie ‘n eenmalige laat dit agter gebeurtenis nie. Dit is ‘n voortdurende proses. Jy kan ook nie vergewe en vergeet nie – ons breine werk nie so nie. Jy kan maar net aanbeweeg.

• As jy nie vergewe nie, beperk dit jou fisies

As ek ‘n wrok teen iemand dra, is dit nie vir hom nadelig nie, maar vir my. Dit affekteer ons breine en liggame. Dit verhoog die vlakke van streshormone in ons sirkulasie; dit kan ons bloeddruk verhoog; dit kan ons laat gewig optel. Dit onderdruk ook ons vermoë om te fokus.

• Vergifnis beteken nie dat ek verdere skade aanvaar nie

Vergifnis is voordelig en doeltreffend – selfs in die ergste gevalle van mishandeling, onderdrukking en verwaarlosing. Maar ons moet vergifnis definieer. Vergifnis beteken dat ek aanvaar wat gebeur het en ek beweeg aan. Dit beteken nie dat jy jou in ‘n situasie plaas waar jy weer seergemaak of misbruik gaan word nie. Jy kan iemand vergeef en steeds sekere grense in ‘n verhouding stel. In gevalle van mishandeling mag hierdie grens selfs geen verdere kontak wees nie.

Vergewe, want dit is goed vir jou fisiese en emosionele gesondheid.