“I want to start by saying just two simple sentences about the church. First, the church exists to worship God in Jesus Christ. Second, the Church exists to make new disciples of Jesus Christ. Everything else is decoration. Some of it may be very necessary, useful, or wonderful decoration – but it’s decoration.” – Justin Welby

Motiveer mense vir hulle voordeel

Hoe kan ek mense oorreed – nie intimideer nie.

1. Weet presies wat jy wil bereik

Jy moet presies weet waarheen jy op pad is. Kyk na hierdie stelling van President Kennedy: This nation should commit itself to achieving the goal, before this decade is out, of landing a man on the moon. Die president stel ‘n duidelike, bereikbare doelwit. ‘n Doelwit is ‘n droom met ‘n teikendatum. Onthou altyd:

• Watter reaksie word verwag
• Wat moet ek doen om hierdie reaksie te kry – geloofwaardigheid
• Wat moet ek sê om die nodige reaksie te kry – inhoud
• Hoe moet ek dit sê – oortuiging
• Watter stappe is nodig om die nodige reaksie te verkry.

2. Plaas jouself in die ander persoon se skoene

Hoekom moet die ander persoon oorreed word en hoekom hy dit weerstaan? Deur jouself in die ander persoon se skoene te plaas, ontwikkel jy ‘n sensitiwiteit vir sy behoeftes en kan jy dit wat hom pla beter hanteer. Vooraf moet ons drie vrae antwoord:

• Wat weet hulle? Vind uit wat vir hulle belangrik is.
• Wat voel hulle? Oorreding moet mense se gevoelens in ag neem. Mense sal volg as jy vir hulle ‘n goeie rede gee om dit te doen. Mense doen dinge vir hulle en nie jou redes nie. Hierdie redes is emosioneel – hoe hulle voel.
• Wat wil hulle hê? Mense het sekere behoeftes en verwagtings.

Begin waar daardie persoon is en werk dan verder.

3. Lê onmiddellik die probleme bloot

Plaas hulle onmiddellik op die tafel en kry die emosies uit die pad sodat jy by die belangrike dinge kan kom. Deur dit aan die begin te hanteer, skep jy vertroue. Jy sal dit in ieder geval op een of ander stadium moet hanteer. Moenie die probleme kans gee om te broei nie.

4. Wees bereid om te waag

As jy mense moet oortuig, kan jy weerstand verwag. Baie mense as hulle ander probeer oortuig, is bang hulle misluk. Hierdie vrees word oorgedra na die persoon wat hulle probeer oortuig. Vrees is dié oorsaak vir mislukking. Leiers het twee belangrike kenmerke: hulle is op pad iewers heen en hulle het die vermoë om ander te oortuig om saam met hulle te gaan.

5. Appelleer na ‘n hoër visie

Mense wil graag die regte ding doen. Hulle is egter nie altyd seker wat die regte ding is nie. As jy hulle van jou saak wil oortuig, moet jy hulle bewus maak van die onderliggende waardes van jou saak. Hulle moet empatie hê met wat jy probeer bereik.

6. Weet wanneer om te stop

As jy net aanhou en aanhou bou daar weerstand op in die persoon wat jy probeer oortuig. Eenvoud is net so belangrik. Dit praat hard en duidelik sonder om die intelligensie van die ander persoon te beledig.

7. Hanteer jou onderwerp met entoesiasme

‘n Toespraak sonder entoesiasme is soos ‘n skildery van ‘n landskap in verskillende skakerings van grys.

“In this world two things are essential: a healthy life and friendship…” – Augustinus

God se toorn

Om mense vir Christus te wen sluit in dat hulle besef dat daar ‘n behoefte is wat net Christus kan vervul. Een hiervan is die behoefte om God se toorn te ontsnap. Hierdie waarheid kry ons in 1 Tessalonisense. Paulus het die woord in hierdie stad verkondig.

In baie moeilike omstandighede het julle die woord aangeneem met ‘n blydskap wat van die Heilige Gees kom (1:6). Wat was so oortuigend in Paulus se prediking? Hoe julle julle van die afgode bekeer het en nou die lewende en ware God dien en dat julle sy Seun wat uit die dood opgewek is, uit die hemel verwag. Jesus deur wie ons gered word van die oordeel wat kom (in die ou vertaling van die toekomstige toorn verlos) (1:9 – 10).

Paulus het hulle gewaarsku: Wanneer die mense sê: “Alles is rustig en veilig,” sal die ondergang hulle skielik oorval … en niemand sal ontkom nie (5:3). Hy het die gelowiges aangemoedig: Want God het ons nie bestem tot toorn nie, maar om die verlossing te verkry deur ons Here Jesus Christus (5:9 – OAV). Paulus weet dat Jesus self gesê het: Wie egter aan die Sun ongehoorsaam is, sal die lewe nie sien nie, maar die straf van God bly op hom (Johannes 3:36).

John Piper sê dat dit lyk asof moderne mense min slaap oor God se toorn verloor. Hy sê dat alle ongelowiges bewus is van God se toorn wat sal kom … en dat hulle dit verdien. Hulle het hierdie kennis onderdruk, maar dit is daar. God openbaar vanuit die hemel sy toorn oor al die goddeloosheid en ongeregtigheid van die mense wat die waarheid deur hulle ongeregtigheid probeer onderdruk (Romeine 1:18). Hulle ken God; alle mense ken God, maar hulle onderdruk hierdie kennis.

Wat ken hierdie mense? Hulle is mense wat die verordeninge van God ken dat dié wat sulke dinge doen, die dood verdien, en tog doen hulle nie net self hierdie dinge nie, maar hulle vind dit ook goed as ander dit doen (Romeine 1:32).  Hulle ken God se verordeninge, en weet dat wat hulle doen verkeerd is. Hulle weet dat as hulle hierdie dinge doen hulle die dood verdien.

Alle mense weet dit – hulle weet hulle doen die verkeerde dinge; hulle weet dat hulle voor ‘n persoonlike Regter skuldig is; hulle weet hulle verdien die straf. Ons almal weet dat God se toorn gaan kom. Ons mag hierdie kennis onderdruk het, maar dit is daar. Maar ons as gelowiges het die goeie nuus: daar is ‘n manier om God se toorn te ontsnap. Jy is dalk die een wat deur God aangestel is om hierdie waarheid weer in hulle wakker te maak en aan hulle hoop te gee.

Almal wat die evangelie van Jesus en mense liefhet, moet duidelik praat – insluitend die waarheid dat Jesus ons van die toorn van God verlos.

Only he who believes is obedient; only he who is obedient, believes – Dietrich Bonhoeffer.

Dit is al wat nodig is

Dit word vertel dat Johannes, die apostel, by geleentheid op ‘n draagbaar na die kerk gedra is. Hy was reeds baie oud en naby die einde van sy lewe. Hy het na die geloofsgemeenskap gekyk en al wat hy gesê het was: “Julle moet mekaar liefhê.”

Toe hy gevra is hoekom dit al was wat hy vir hulle gesê het, was sy antwoord: “Want dit is genoeg.” Hy sê dieselfde in 1 Johannes 2:5: Wie sy woord egter gehoorsaam – in Hom het die liefde van God werklik sy doel volkome bereik.  Hieraan weet ons dat ons in Hom is. Deur ons liefde bewys ons dat ons aan Christus behoort en dat Hy aan ons behoort.

The fault, dear Brutus, is not in our stars, but in ourselves – Shakespeare

Kenmerke van doeltreffende leiers (2)

Ons het gesien dat die eerste kenmerk van ‘n doeltreffende leier roeping is. Ons kyk nou na ander kenmerke.

1. ‘n Doeltreffende leier moet kan kommunikeer

Goeie kommunikeerders word vertrou – mense glo in hulle. Alle hulpbronne  – geld, prosedures, tegnologie, ens – depresieer en mettertyd word dit  nutteloos. Menslike hulpbronne kan egter in waarde toeneem. Een van die sleuteltake van ‘n leier is om sy mense te ontwikkel. Die geheim van sukses is dat jy nie alles self kan doen nie. Die leier sien die groot prentjie, maar hy moet dit met ander deel. Hy moet hierdie groter prentjie in ‘n eenvoudige agenda met duidelike prioriteite oordra – iets wat mense maklik kan verstaan.

Hoe kan jy hierdie groter prentjie/visie oordra? Jy moet dit self duidelik kan sien. Jy kan nie iets oordra wat jy nie kan sien nie. Dan moet jy dit op so ‘n manier oordra dat mense dit kan verstaan. Jy moet dit ook voortdurend voor die mense plaas om hulle daaraan te herinner. Leiers moet in hulleself glo anders gaan ander ook nie in hulle glo nie.

2. ‘n Doeltreffende leier hanteer probleme op ‘n kreatiewe manier

Almal kom voor probleme te staan. Die vermoë om kreatiewe oplossings te kry bepaal sukses of mislukking. Die Chinese simbool van krisis beteken gevaar, maar ook geleentheid Die geheim is om elke probleem as ‘n geleentheid vir verandering te sien. Adversity has the effect of eliciting talents which in prosperous circumstances would have lain dormant (Homeros).

Kreatiwiteit is ‘n talent wat dikwels nie deur mense wat nie die talent het, bewonder word nie. Hulle sien dikwels kreatiewe mense as onprakties.

Walt Disney was in Graad 5 toe die onderwyseres die klas vra om ‘n blomtuin te teken. Sy  loop tussen die banke deur en ondersoek elke leerling se werk. Sy stop by Walt se lessenaar, want sy tekening was ongewoon.

Onderwyseres: “Walt, dit is nie reg nie. Blomme het tog nie gesigte nie.”

Vol vertroue antwoord die jong Walt: “Myne het.”

Hy gaan voort en voltooi sy skildery.

Blomme in Disneyland het steeds gesigte!

3. ‘n Doeltreffende leier dra vrygewig by

The measure of a leader is not the number of people who serve him but the number of people he serves – John Maxwell.

Ware leiers het iets om te gee en hulle gee dit. Moenie sinies wees nie; moenie twyfel nie; moenie bang wees nie; moenie ongelowig wees nie. Groot leiers is groot gewers.

4. ‘n Doeltreffende leier tree elke dag dieselfde op

Die oomblik as mense agterkom dat ons nie betroubaar is nie, is die oomblik wat hulle nie meer ons leierskap erken nie. The first key to greatness is to be in reality what we appear to be – Sokrates. Jesus waarsku ook teen sulke mense: Pas op vir die vals profete. Hulle kom na julle toe in skaapsklere, maar in werklikheid is hulle verskeurende wolwe (Matteus 7:15).

‘n Leier moet elke dag dieselfde wees op veral drie gebiede:

• Mense – dit bou vertroue en sekerheid
• Beginsels – dit gee rigting
• Projekte – dit bou moraal

Die roeping om ‘n leier te wees, is ‘n uitdagende een. Die behoefte aan sterk leierskap is duidelik. Die prys van leierskap was nog nooit hoër nie. Die versoekings van leierskap was nog nooit groter nie. Aanvaar die uitdaging.