We are irritable, o Lord. Until we make our peace with you –  Lewis Smedes

Maria se geloof

Ons het gesien dat tydens Kersfees God groot dinge aan ons gegee het. Hoe moet ons reageer op dit wat Hy vir ons gegee het. ‘n Goeie model is Maria. Wat kan ons by haar leer?

1. Sy reageer deur na te dink

Toe die engel by Maria kom en sê dat sy swanger sal word en aan ‘n Seun geboorte sal gee, reageer sy nie met blinde geloof nie. Sy was verbysterd oor die woorde en het gewonder wat die begroeting tog kan beteken (Lukas 1:29). Sy was bekommerd. Is dit waarlik ‘n engel wat met my praat? Sy aanvaar nie onmiddellik die boodskap nie, maar vra eers: Hoe is so iets moontlik? Om in geloof te reageer sluit ook die intellek in. Ons kultuur leer vir ons om nie in die bonatuurlike te glo nie. Maria se kultuur het haar geleer dat God nooit ‘n mens kan word nie. Die kombinasie van bewyse en ondervinding breek hierdie hindernisse tot geloof. Sy twyfel, sy vra, sy gebruik haar rede – net soos ons vandag moet doen. Daar is ‘n soort twyfel wat dui op ‘n geslote denke. Sekere vorms van twyfel soek egter antwoorde. Soos Maria moet ons oop vir die waarheid wees – al verskil die waarheid van dit wat ons verwag het.

2. Maria reageer geleidelik

Die Christelike geloof eis ons hele lewens. Baie van ons is sommer onmiddellik volkome toegewyd. Natuurlik verskil dit van mens tot mens. John Bunyan het 18 maande gestry voordat hy God se liefde en genade ontvang het. Die bewaarder in Filippi, daarenteen, het onmiddellik vir God volledig aanvaar (Handelinge 16:22 – 40). Bekering en aanvaarding kom na mense teen ‘n verskillende spoed. Deur na Maria se proses te kyk, kan ons baie leer.

• Maria reageer met ’n mate van skeptisisme. Hoe is so iets moontlik? Sy stop nie onmiddellik die gesprek nie – sy vra meer inligting.
• Sy aanvaar. Ek is tot beskikking van die Here. Laat met my gebeur wat u gesê het. Ons moet ook vertrou ten spyte van twyfel en voorbehoude.
• Sy beoefen haar geloof vanuit haar hart. Maria gaan by Elisabet kuier. Dié sê vir haar: Waaraan het ek dit te danke dat die moeder van my Here na my toe kom? Die kennis en insig wat Elisabet het, bevestig wat die engel gesê het. Sy word dus meer van haar geloof verseker. Ware geloof is ‘n proses, maar nie ‘n proses waaroor ons beheer het nie. Hy moet Hom aan ons openbaar anders sal ons Hom nie kry nie.

3. Sy reageer met verwondering

In Lukas 1:46ev kry ons die loflied van Maria. Ek besing die grootheid van die Here, ek juig oor God my Verlosser. Sy is ook verbaas dat juis sy gekies is. God het eeue lank aan hierdie dag voorberei oor hoe Hy die wêreld deur ’n eenvoudige, arm, ongetroude tiener gaan red. Die geloof is iets wat vir jou, aan jou en in jou gedoen word. Daarom die verwondering.

4. Sy reageer met gewillige oorgawe

Ek is tot beskikking van die Here. Laat met my gebeur wat u gesê het. Hierdie is ‘n stelling van gehoorsaamheid. Haar gehoorsaamheid berus op die werklikheid dat Hy God is en daarom verdien Hy ons diens. Hy het die reg om te sê wat ons moet doen.

Hierdie opdrag om ons oor te gee, is teen ons kultuur. Persoonlike outonomie is vandag alles. Die engel sê vir Maria: Niks is vir God onmoontlik nie. Die geskiedenis wys dat die engel reg was. Gee oor aan Christus en moet nooit onderskat wat Hy in en deur jou kan doen nie.

Die eerste Sondag van Advent

Klim op ‘’n hoë berg en roep hard, Sion, jy wat die goeie tyding moet bring, moenie bang wees nie; roep hard, Jerusalem, jy wat die goeie tyding moet bring, moenie bang wees nie; sê vir die stede van Juda: “Julle God is hier!” Die Here God kom, Hy is die Magtige, Hy regeer, Hy bring die volk saam wat Hy Syne gemaak het en wat aan Hom behoort, is by Hom. Soos ‘’n herder versorg Hy sy kudde: die lammers maak Hy bymekaar in sy arms en Hy dra hulle teen sy bors, Hy sorg vir die lammerooie (Jesaja 40:9 – 11).

Met die eerste Sondag van Advent staan ons in wonder oor die gawe van Jesus en die implikasies van sy koms. Maak ons nederig en bly en verander ons as ons ons oë op Jesus rig. Laat ons weer entoesiasties word oor die verhaal van Jesus met kinderlike verbasing en hernude hoop.

Volgens Jesaja kom Jesus om ons in sy arms bymekaar te maak. Soos kwesbare lammers word ons behandel na aan sy hart. Wat meer kan ons begeer? Hy wat nou die Goeie Herder is, was eers die Lam van God wat ons sondes aan die kruis gedra het. Hierdie reis neem Jesus van die hemel na die krip, na sy dood aan die kruis – vir ons. Sy ongeëwenaarde liefde en barmhartigheid, sy ongelooflike genade. Mag die Vader dit tasbaar vir ons waar maak in die komende weke.

.Maar soos Jesaja sê, kom Jesus ook as die Magtige wat regeer.. Hy regeer oor die hele geskiedenis, elke hartseer, oor alle konings en oor elke krisis. Niemand kan die storie wat jy vertel verander of onderdruk nie. Ook nie die koninkryk wat jy deur Jesus bevorder nie.

Daar is net een Koning en dit is Jesus en sy koms lei tot aanbiddende liefde by sy mense. Wys weer vir ons in hierdie Adventstyd dat Jesus die wonderlikste Verlosser vol genade is- Immanuel –God met ons.

Blessed is the season which engages the whole world in a conspiracy of love. – Hamilton Wright Mabie

Josef en die engel

In Matteus 1:18 – 23 lees ons van ‘n engel van die Here wat aan Josef verskyn. Uit hierdie gesprek leer ons ’n paar belangrike waarhede.

1. Jesus is God

Wat in haar verwek is, kom van die Heilige Gees. God is sy Vader. Die mees direkte stelling oor Jesus se identiteit kry ons in 1:23 waar Matteus Jesaja 7:14 aanhaal: “Die maagd sal swanger word en ’n Seun in die wêreld bring en hulle sal Hom Immanuel noem.” Die naam beteken God by ons. Die Jode kon glad nie aanvaar dat ‘n mens God kan wees nie. Paulus, ‘n Jood, sê: In Hom is die volle wese van God beliggaam (Kolossense 1:9). Petrus praat van ons God en Verlosser, Jesus Christus (2 Petrus 1:1). Dwarsdeur die evangelies lees ons van Jesus wat sondes vergewe – iets wat net God kan doen. Hy sê ook dat Hy sal terugkom en die aarde sal oordeel – iets wat net God kan doen.

2. Jesus is mens

Dit is iets wat ons in geen ander godsdiens kry nie. Hier sien ons dat die onsigbare sigbaar geword het. Onmiddellik die vraag: Watter verskil maak dit aan ons lewens?

• Ons moet ‘n lewe van diens leef.
• Dit vertroos ons as ons ly. Omdat Hy self versoek is en gely het, kan Hy dié help wat versoek word (Hebreërs 2:18).

3. Jesus is met ons

Hulle sal Hom Immanuel noem. Die naam beteken God by ons. Die doel van Jesus se menswording is dat ons ‘n verhouding met Hom kan hê. Hy is toeganklik; ons kan Hom ken en ons kan sy liefde ken.

Die vraag is wat beteken dit vir ons as ons weet dat Jesus God en mens en by ons is.

• Dit gee aan ons die moed om die wêreld se spot te verduur.
• Dit gee aan my die moed om my reg om alles self te bepaal, prys te gee.
• Dit gee aan ons die moed om te erken dat ons sondaars is.

Hoekom is ons samelewing so verdeeld?

Paulus skryf vir die gemeente in Galasië dat daar baie is wat mense verdeel, want ons probeer onsself regverdig. Jode het dit deur die wet gedoen Hulle het ‘’n hele stelsel wette gehad wat hulle van die ander nasies onderskei het. Die Ou Testament het 613 wette en die Jode het nog reëls bygevoeg om te verseker dat hulle nie die wette verbreek nie.

Om ‘’n lys reëls te hê om aanvaarding te verseker, is nie uniek aan die Judaïsme nie. Meeste godsdienste het sulke lyste om ons van ander te onderskei. Trots is ‘’n groot probleem in ons lewens. Ons is in ‘’n voortdurende kompetisie met ander, want die kern van kompetisie is trots. Dit bevorder verdeeldheid. Ons moet ons andersheid beskerm, want dit gee aan ons waarde bo ander.

Charles Spurgeon het in die 19de eeu drie sulke onderskeidings in die samelewing geïdentifiseer. Dit is verbasend hulle is steeds geldig.

1. Die trots van ras

Vir baie mense is hulle etniese identiteit die manier om hulle van ander te onderskei. Ras maak hulle wie hulle is en vorm hulle identiteit. Hulle is trots omdat hulle wit of swart of Indiër is. Ons kulture is mooi en is deur God geskep soos ‘’n veelkantige diamant weerspieël dit sy heerlikheid. Sodra kultuur ons primêre onderskeidende identiteit word, veroorsaak dit verdeeldheid. Mense moet hulle kultuur eer, maar die oomblik as dit met trots gepaard gaan begin hulle daardie kultuur verdedig, want dit stel hulle apart.

Dit maak dus geen verskil of ‘’n mens ‘’n Jood of ‘’n Griek is nie, want dieselfde Here is here van almal en Hy seën almal wat Hom aanroep (Romeine 10:12). Daar is net een ras: die seuns en dogters van Adam en Eva. Ons het almal een kernprobleem: sonde. Ons het almal net een hoop.

Die wortel van rasseskeiding is dat ons etniese identiteit te groot geword het. As ons enige verdeeldheid tussen ons wil oorkom, moet ons identiteit in Christus groter word. – groter as enige ander identiteit wat ons mag besit.

2. Die trots van gesig en plek

Ons neig om mense in kategorieë te sien –  suksesvol en onsuksesvol, intelligent en dom, mooi en lelik, fiks en vet, ryk en arm. Ons kyk neer op diegene wat minder as ons is op hierdie gebied en diegene wat meer as ons is, intimideer ons. Ons dink sekere persoonlike prestasies of kenmerke onderskei ons, en plaas ons hoër as hulle. Verstaan ons nie die evangelie nie. Besef ons dat ons krediet kan neem vir baie min van ons talente. Ons ouers het aan ons die gene gegee en God het aan ons die geleenthede en gesondheid gegee om ons talente te beoefen. Alles wat ons het, is ‘’n gawe. Besef ons hoe waardeloos ons talente is as dit kom by die dinge wat regtig saakmaak. Ons bankbalans en bevorderings kan ons nie voor God regverdig nie. Voor God is daar net en soorT sondaar- hopeloos.

Dit maak nie saak as ek nie nou intelligent of mooi of suksesvol is nie, want ek het die beloftes van God in Christus. Dit maak nie saak as iemand my nie waardeer nie, want in Christus het ek die ewige liefde van die Vaer.

Ons kan onsself nie red deur goeie werke of skoonheid nie. Wat ons nou in Jesus Christus het, in oneindig meer as enige van hierdie dinge.

3. Die trots van genade

Spurgeon sê dat die trots wat kom as gevolg van ‘’n godsdienstige lewe, is waarskynlik die ergste van almal Jy voel trots omdat jy ‘’n goeie lewe geleef het – jy was nog nooit in die tronk nie en jy is nog nooit by jou wek afgedank nie; jy kom uit ‘’n goeie familie en jy is nooit geskei nie. Nou voel jy meerderwaardig teenoor ander wat hierdie dinge deurgegaan het.

Verstaan jy nie die evangelie nie. In God is daar nie goeie en slegte mense nie, wenners of verloorders of funksionele en disfunksionele mense nie. Daar is net opstandige en sondige rebelle sonder hoop in hierdie wêreld wat God in genade red. Die trots van genade is eintlik ‘’n ontkenning van genade

John Owen het gesê dat die saad van elke sonde is in elke mens se hart. Omstandighede, versoekings en verhoudings gee water vir daardie saad. Net omdat God jou van sonde weerhou het, maak jou nie meerderwaardig teenoor ander nie. As jy hoor iemand anders het gesondig en jy dink: “Ek weet dat ek nooit so iets sal doen nie,” weet jy bitter min van genade en die evangelie van Jesus.

Almal het gesondig en het nie deel aan die heerlikheid van God nie (Romeine 3 :23). Daar is nie een wat regverdig is nie; een wat God instinktief soek nie. Daardie waarheid vernietig enige vals onderskeiding tussen ons. Aan die voet van die kruis is die grond gelyk.

Die evangelie dat ons deur geloof alleen in Christus geregverdig word, vernietig alle vorme van trots. In Christus het ons die vryheid om te verenig.