None of the important things God has for us to do in church each week can happen if we’re not there. —Tony Payne

Kommentaar aanlyn

Om mense se kommentaar aanlyn te lees, is ‘n interessante, en soms onrusbarende, studie in die menslike natuur. Die probleem is dat hierdie kommentaar dikwels onmiddellik gemaak word. Daarom is hulle dikwels agterlosig. Van elke ligsinnige woord wat die mense sê, sal hulle rekenskap moet gee op die oordeelsdag (Matteus 12:36). Dus: om kommentaar op die Internet te lewer, is iets ernstig vir God.

Hoe moet ons dan kommentaar lewer?

1. Selde

Met baie praat bly die sonde nie uit nie; wie sy woorde tel is verstandig (Spreuke 10:19). Ons moet ons lippe (en vandag ook ons vingers) in toom hou. Ons moet altyd onthou dat ons sondige natuur aan ons ‘n oordrewe gevoel van selfbelang gee. In nederigheid moet die een die ander hoër ag as homself (Filippense 2:3). Miskien is ons menings nie nodig nie.

2. Stadig

Elke mens moet maar te gewillig wees om te luister, nie te gou praat nie, en nie te gou kwaad word nie (Jakobus 1:19). As ‘n artikel jou kwwad maak, moet nooit skryf terwyl jy nog geïrriteerd is nie. As jy kwaad is, is dit moeilik om inskiklik en bedagsaam te wees (Titus 3:2). Wag en bid. Dan kan jy besluit of jy wil antwoord.

3. Vriendelik

Wat julle sê, moet altyd vriendelik wees en van goeie smaak getuig; en julle moet weet hoe julle elkeen behoort te antwoord (Kolossense 4:6). Almal van ons lees dinge deur ons eie ondervindings en perspektiewe. Almal van ons sê en interpreteer dinge verkeerd. Daarom wees vriendelik en geduldig. Aanvaar die beste in ander mense.

Wanneer moet ons kommentaar lewer? Die doel om te praat, met jou lippe of vingers, is sodat dit julle hoorders ten goede kan kom (Efesiërs 4:29). As ons dan wel besluit om kommentaar te lewer, is daar ‘n paar voorstelle:

1. Bedank

Dit is die beste rede om kommentaar te lewer. As die skrywer ons verstaan van ‘n onderwerp verbeter of ons bemoedig of ons waarsku, bedank hom daarvoor. Die stuk hoef nie perfek te wees nie, maar as dit ons gehelp het, kan ons hom bedank. As dit ons nie gehelp het nie, bly stil.

2. Bemoedig

Mense vind dit makliker om ander te kritiseer as te bemoedig. Dit is dikwels trots wat ons kritiese denke besoedel. Praat mekaar moed in en versterk mekaar (1 Tessalonisense 5:11).

3. Verduidelik

As ‘n artikel vir jou verwarrend is, vra eers vrae ter verduideliking. Moenie sommer onmiddellik allerhande gevolgtrekkings maak nie. ‘n Vriendelike vraag mag wys dat die skrywer ‘n fout gemaak het of dat die leser hom misverstaan het.

4. Stel reg

Dit is selde nodig. Ons spandeer te veel tyd om kritiek uit te dink. Soms is daar ‘n ooglopende fout in die artikel wat belangrik genoeg is om ‘n regstelling te vereis. Maar in hierdie gevalle onthou Paulus se opdrag: ‘n Dienaar van die Here moenie rusie maak nie. Inteendeel hy moet vriendelik wees teenoor almal, bekwaam om ander te leer en iemand wat onreg kan dra. Met vriendelikheid moet hy teenstanders teregwys. Dit kan wees dat God hulle bekeer en hulle tot kennis van die waarheid bring (2 Timoteus 2:24 – 25).

Luister weer na die woorde van Jakobus 3:6): Die tong is ook ‘n vuur, ‘n wêreld vol ongeregtigheid, die deel van die liggaam wat die hele mens besmet. Dit steek die hele lewe van die geboorte af tot die dood toe aan die brand, en self word dit uit die hel aan die brand gesteek. Jakobus skryf hierdie waarskuwing aan Christene.

“Do noble things, not dream them, all day long.”  Charles Kingsley

Jesus het gesug

Mense sug gereeld. Dit is dikwels as gevolg van frustrasie of ongeduld. In Markus 7 lees ons van Jesus wat ‘n doofstom man genees het. Ons lees dat Jesus sy vingers in die man se ore gesteek het en spoeg aan sy tong gesmeer het. Daarna het Hy na die hemel toe opgekyk, gesug en vir hom gesê:Effata! Dit beteken: Gaan oop! Die man is onmiddellik genees.

Hoekom het Jesus dan gesug. Dit kan tog nie wees omdat Hy gefrustreerd of ongeduldig of kwaad was nie. Hoekom was hierdie sug so betekenisvol dat Markus dit in sy evangelie ingesluit het? Daar is ‘n paar moontlikhede:

1. Dit was ‘n sug van vergelyking

Ons sug as ons ‘n pragtige huis of tuin sien wat erg verwaarloos is. Jesus sug toe Hy die pragtige mens wat Hy gemaak het, nou so verwaarloos sien. Sy sug was dieper want dit het op die twee sintuie vir kommunikasie gefokus – stem en hoor. Kommunikasie is een van die dinge wat die mense van ander skepsels onderskei het.

2. ‘n Sug van oorwinning

Soos die gewigopteller sug en kreun as hy die swaar gewig optel, so sug Jesus weens die groot inspanning om die man te genees. Jesus was nie net besig om die man se fisiese probleme te genees nie, maar Hy was ook besig om die man van sy sondes te verlos. Dit vereis ‘n grootse poging en het Hom gedreineer.

3. ‘n Sug van bekommernis

Jesus besef sodra die man kan hoor en praat sal sy ore en lippe begin sonde doen. Hy sien dat groter versoekings nou hierdie man se voorland is. Hy is bekommerd hieroor en daarom sug Hy.

4. ‘n Sug van deernis

Toe God die vernietiging van hierdie man se sintuie sien, sug Hy uit deernis. Hy het ons lyding op Hom geneem, ons siektes het Hy gedra (Matteus 8:17). Jesus het hierdie dinge diep aangevoel.

Hoe wonderlik om ‘n Verlosser te hê wat vir al ons beproewings omgee. Ek kan al my sugte na Hom toe bring.

The gospel is not the ABC’s of the Christian life; it is the A to Z – Tim Keller.

Lesse uit die kankersaal

Wat het jy uit hierdie beproewing geleer? Hoe antwoord ‘n mens so ‘n vraag vanuit die kankersaal? Wat moet ons doen as ons by so ‘n pasiënt is?

1. Ware luister is belangrik. Laat die pasiënt sy gevoelens uitdruk, sonder dat jy raad gee – tensy jy daarvoor gevra word.
2. As jy sê: “Ek sal vir jou bid,” maak dit ‘n prioriteit en hou aan intree vir die persoon.
3. Praktiese hulp is belangrik – voorsien maaltye, vervoer die pasiënt en haar kinders, sit by die pasiënt terwyl die versorger uit is.
4. Moenie oordeel nie. Don’t criticize your neighbour, until you have walked a mile in his mocacasins (‘n Ou Indiaanse spreekwoord).
5. As die siekte lank duur onthou om te bid, te besoek en te bemoedig. Mense wat chronies siek is, moet weet ons het hulle nie vergeet nie. Onthou jou lewe gaan voort soos altyd, maar hulle lewens het drasties verander. Moenie moeg word om goed te doen nie.
6. Begin jou dag met God. Ons lewens is so besig dat ons dikwels ons stiltetyd tot later uitstel. Dit is dwaas, want ons het Hom elke minuut nodig.

Moenie jou vriende wat slegte nuus ontvang het of wat chronies siek is, vergeet nie.

Jesus came to raise the dead. Not to improve the improvable, not to perfect the perfectable, not to teach the teachable, but ro raise the dead – Robert Capon

Lesse geleer uit mislukking

Almal van ons gaan op een of ander stadium misluk. Die vraag is wat ons met ons mislukkings doen. Hier is ‘n paar lesse om uit ons mislukkings te leer:

1. My mislukkings is gewoonlik die gevolg van te veel vertroue

As ek misluk, is dit dikwels omdat ek te veel op myself vertrou en nie genoeg op God nie. Gelukkig lei dit dikwels tot meer afhanklikheid van God veral in gebed.

2. Mislukking maak my meer simpatiek teenoor ander

As ek nog nooit misluk het nie, sou ek geen geduld, simpatie en hulp vir ander wat misluk het, gehad het nie.

3. My mislukkings het my gehelp om my lewe in ‘n nuwe rigting te stuur

‘n Mens besef dat jy net nie die gawe het om sekere dinge te kan doen nie – dinge wat ek graag sou wou doen. Dan besef ek dat ek op daardie gebiede waarvoor God my die gawes gegee het, moet fokus. Natuurlik is dit pynlik as dit gebeur, maar ons kan met dankbaarheid terugkyk omdat God my lewe in ‘n nuwe rigting gestuur het.

4. Mislukking laat my die mense wat geslaag het waar ek misluk het, waardeer.

5. Mislukking het my geleer dat ek my suksesse aan God moet krediteer

As dinge goed gaan, besef ek dat dit net God is wat my bemagtig, gehelp en geseën het. Dit lei tot dankbaarheid en nederigheid.

6. Baie mislukkings gebeur as ek te moeg of te besig is

Ek besef ek moet my lewe beter beplan en baie rus as ek beter besluite wil neem.

7. My mislukkings maak dat ek Christus meer aanbid

As ek na al my mislukkings kyk word ek oorweldig om daaraan te dink dat Hy 33 jaar op aarde gespandeer het sonder dat Hy een maal misluk het.

Wat het jy uit jou mislukkings geleer?