Legalism lacks the supreme sense of worship. It obeys but it does not adore. —Geerhardus Vos

God se tuin

In Psalm 92:13 – 16 gee God aan ons ‘n begeleide toer deur sy tuin. Hy sien sy mense – die regverdiges – soos palmbome en seders. Maar Hy stel veral belang in die ouer en meer volwasse dissipels. Selfs in hulle ouderdom sal hulle nog toeneem in krag. Hulle sal fris en lewenskragtig wees.

Vandag se kerk fokus op die jeug en daarom word senior burgers dikwels verwaarloos. Kyk weer na God se vriendelike en bemoedigende woorde aan hulle.

• Hulle groei

Moegheid, agteruitgang, swakheid is die woorde wat ons gewoonlik met ouderdom assosieer. Hulle is Bybelse woorde – kyk maar net na Prediker 12:1 – 8 – veral die ou vertaling. Hier gee die Here egter aan ons ‘n ander perspektief. Seniors word fisies swakker, maar geestelik sterker: Al is ons uiterlik besig om te vergaan, innerlik word ons van dag tot dag vernuwe (2 Korintiërs 4:16). Hulle groei in geloof, heiligheid, wysheid, hoop en liefde, want hulle is in die ryk grond van God se kerk geplant.

• Hulle is vrugbaar

Die psalmis verwys hier spesifiek na die palmbome, want hulle het nie alleen kos vir die nomades in die woestyn voorsien nie, maar was ook ‘n aanduiding van waar water was. Hulle diep wortels het die ondergrondse water gekry. Baie bome dra nie meer vrugte as hulle oud word nie, maar God se seniors dra steeds vrugte. Hierdie vrugte is ‘n teken dat hulle gesond is, maar is ook tot voordeel van ander. Hulle is goed gesnoei en dra takke vol geestelike vrugte.

• Hulle is fris

Fris hier beteken hulle is nog vol sap. Hierdie is ‘n innerlike sap – onsigbaar en ‘n bron van vog diep in hulle. Hulle uitwendige groei, is die gevolg van inwendige krag. Hulle word voortdurend inwendig vernuwe deur die innerlike sap van die Heilige Gees.

• Hulle is lewenskragtig

Dit staan in teenstelling met die goddeloses: Al is die goddelose voorspoedig, al floreer almal wat onreg doen, hulle sal vir goed uitgewis word (Psalm 92:8). Die regverdiges, daarenteen, floreer selfs in hulle senior dae. Natuurlik word Christene ook oud, maar hier word nie na die liggaam verwys nie, maar na geestelike vermoëns:

• Hulle oë sien nie meer nie, maar in geloof sien en glo hulle God se beloftes.
• Hulle ore hoor nie, maar hulle hoor steeds die stem van die Verlosser.
• Hulle stem kraak, maar daar is steeds ‘n melodie in hulle harte.
• Hulle voete bewe, maar hulle stap nog stewig op die pad van geregtigheid.
• Hulle vel is vol rimpels en plooie, maar hulle is mooi in die oë van die Here.
• Hulle aptyt neem af, maar hulle honger en dors steeds na geregtigheid.
• Hulle smaak neem af, maar hulle kan steeds proe en sien dat God goed is – die brood van die lewe.
• Hulle hart versaak, maar hulle geestelike hart klop sterk.
• Hulle belangstelling in die wêreld verminder, maar hulle belangstelling in die wêreld wat kom, neem toe.

• Hulle getuig

Seniors getuig met hulle lippe, maar ook met hulle lewens. Hulle verklaar dat die Here regverdig is: Hy is my rots.

Seniors glo nie dat hulle groei of vrugbaar of fris of lewenskragtig is nie. Seniors moet meer waarde aan God se woord as aan hulle spieëls heg.

Volgende keer gaan ons na sekere aktiwiteite wat seniors moet doen, kyk.

The essence of gospel-humility is not thinking more of myself or thinking less of myself, it is thinking of myself less (Tim Keller).

Die soeke na die diepste antwoord

Ons leef in ‘n glodale tydperk. Die globale tyd is ‘n produk van die Weste, net soos die Weste grootliks ‘n produk van die Christelike geloof is. Die Christelike geloof is die wêreld se eerste waarlike globale geloof. Wat is verkeerd met die Christelike kerk in die Weste as die kerk in die Suide en oor die wêreld ontplof, maar in die Weste is dit ontrou en besig om agteruit te gaan? Hoe verklaar ons die geestelik dorre situasie in Wes-Europa, Kanada, Australië en Nieu-Seeland? In die VSA is die kerk numeries steeds sterk, maar is oppervlakkig en lawaaierig. Geen wonder die mense sien neer op die kerk nie.

Die grootste uitdaging vir die Westerse kerk kan in drie woorde opgesom word: integriteit, geloofwaardigheid en beleefdheid/vriendelikheid. Die grootste hiervan is integriteit. Ten opsigte van Jesus Christus moet ons weer die integriteit van ons geloof herwin. Ten opsigte van buitestanders moet ons weer die geloofwaardigheid van die kerk herwin. Ten opsigte van mense van ander gelowe moet ons weer die beleefdheid van ons geloof herwin. Dit is die uitdaging as ons getrou aan ons Here wil wees, maar terselfdertyd betrokke by die lewe in hierdie moderne lewe wil wees.

Daar is honderde boeke wat vir ons sê dat die kerk probleme het. Min boeke sê egter vir ons hoekom. Wat veroorsaak die probleme in die Westerse kerk? Daar is baie antwoorde – baie van hulle is onvoldoende of verkeerd. Daar moet ‘n dieper, meer omvattende rede wees. Ons het die gees, styl en sisteem van die wêreld aanvaar – ‘n ontrou wat die krag van die kerk tap. Hoe het ons dit gedoen? Ons is ondermyn deur die moderne wêreld wat die Christelike geloof gehelp het om tot stand te bring.

Eenvoudig gestel: Die Christelike geloof het beslissend bygedra tot die opkoms van die moderne wêreld, maar dit is beslissend deur hierdie moderne wêreld ondermyn. Die Christelike geloof het sy eie grafgrawer geword.

Die vraag vir die volgelinge van Jesus in die Westerse wêreld vandag is: Kan ons die volle integriteit van geloof in Christus herwin terwyl ons ten volle betrokke is by die moderne wêreld?

Reasonable people adapt themselves to the world. Unreasonable people attempt to adapt the world to themselves. All progress, therefore, depends on unreasonable people.” ― George Bernard Shaw.

Praat God met ons?

Ons kan tog nie praat van ‘n persoonlike verhouding met iemand wat nooit met jou praat nie. Baie mense is ongemaklik met die idee dat God met hulle kan praat. Hulle sê dan ook dikwels dat God nie met hulle praat nie. Maar God praat met ons. Ons moet leer om wat Hy sê te verstaan – om sy stem te herken. Daar is wonderlike stories hieroor in die Bybel. In Genesis 24 lees ons van Abraham wat sy dienaar stuur na die land van sy geboorte om daar vir Isak ‘n vrou te kry. Dit is ‘n belangrike taak. Die dienaar is bekommerd en vra vir Abraham wat hy moet doen as hy nie ‘n vrou kan kry wat saam met hom sal terugkom nie. Abraham antwoord: Die Here sal sy engel voor jou uit stuur sodat jy vir my seun ‘n vrou van my land af sal kan bring.

Die dienaar glo dit nie, maar toe hy daar aankom, vra hy tog vir die Here, die God van Abraham, vir sukses op sy sending. Voor hy nog klaar gebid het, kom Rebekka met die waterkruik op haar skouer daar aan.

God praat voortdurend met mense, maar meeste  besef nie wat aangaan nie. Hulle is soos Samuel. Die Here roep hom terwyl hy nog in sy bed gelê het. Onmiddellik dink hy dat dit Eli is wat hom geroep het. Maar Eli verseker hom dat hy hom nie geroep het nie: Gaan lê maar weer (1 Samuel 3). Dit gebeur nog ‘n paar keer. Uiteindelik besef Eli wat aangaan. Hy sê vir Samuel: Gaan lê en as iemand jou weer roep, sê jy: Praat, Here, u dienaar luister!

Ons moet leer hoe God praat, want anders gaan dit my persoonlike verhouding met Hom ondermyn. Soms doen God snaakse dinge om mense se aandag te trek, maar meestal bring Hy gedagtes op in ons denke. Hierdie gedagtes het ‘n kenmerkende kwaliteit, inhoud en gees oor hulle. God het baie maniere om gedagtes in jou te veroorsaak. In Numeri 11 en Eksodus 33 sien ons dat God met Moses soos met ‘n vriend praat. In Jeremia 23:28 – 29 lees ons: Die profeet wat ‘n droom gehad het, mag vertel wat hy gedroom het, maar hy wat my woord ontvang het, moet my woord eerlik oordra. ‘n Mens kan tog nie strooi met die beste koring vergelyk nie, sê die Here. My woord is soos vuur, sê die Here, soos ‘n hamer waarmee klippe stukkend gebreek word.

Mense het dikwels iets nodig om hulle aandag te rek – soos Saulus op pad na Damaskus toe. Ons kan nie enige opsies uitskakel nie, maar God se voorkeur metode is om met gewillige hoorders deur hulle gedagtes en deur sy woord te praat.

Your holiness is not dependent on your happiness – Tim Keller

Die Christelike reaksie

Hoe reageer ons as ons hoor dat God wat al hierdie dinge soos pyn en lyding toelaat, onmoontlik nie ‘n goeie God kan wees nie??

1. Ons erken dat baie dinge op hulle eie gesien nie goed is nie. Hulle is inderdaad tragies. Ons moenie sommer ‘n eenvoudige antwoord vir iemand wat ly gee nie. Ons moet die volle werklikheid van lyding aanvaar en dit nie probeer weg verduidelik nie. Luister na diegene wat ly se storie. God is altyd daar waar lyding is. Diegene wat na Hom vra, sal Hom daar kry. Niks wat jy sê kan die pyn verminder nie; jy kan dit nie weg verduidelik nie. Jy kan sê dat daar iets groter as die pyn is.
2. God is nie die oorsaak van hierdie dinge nie. God doen nie bose dinge nie. God het ‘n wêreld gemaak waar mense die ruimte het om oor hulle eie optrede te besluit – dit het reeds by Adam en Eva begin. Daar is ‘n vyand wat hierdie vryheid uitbuit. Die boek Job laat ons verstaan dat ons in ‘n stryd gewikkel is. God martel nie mense nie; God stuur nie lyding na sy mense toe nie. Hy laat hulle toe om lyding te ondervind, omdat hulle van Hom af weggedwaal het. Lyding gebeur nie altyd vir hierdie rede nie. Dit gebeur, want daar is ‘n vyand wat wil hê dat jy in God moet twyfel. Midde in al sy swaarkry sê Job: Al sou God my doodmaak, ek kan nie wag nie, ek moet my saak vir Hom stel (13:15).Wat van belang is, is jou vertroue in God. Ons moenie aan God twyfel nie; ons moet aan Hom vasklou. Dit is nie nodig vir God om my te toets om alles van my te weet nie – Hy weet dit reeds.
3. Die wêreld met ‘n orde waar in pyn en die bose moontlik is, is goed. Dit gee aan die mens die geleentheid om te ontwikkel in ‘n mens van die hoogste waarde. There are no ordinary people. You have never talked to a mere mortal – S. Lewis
4. Earth has no sorrow that heaven cannot heal – Thomas Moore. Die stryd is nie verby nie en God gaan wen. Ons weet dat God alles ten goede laat meewerk vir dié wat Hom liefhet, dié wat volgens sy besluit geroep is (Romeine 8:28). Dink maar aan God se belofte aan Joël na die vreeslike sprinkaanplaag: Dan sal julle besef dat Ek by Israel is, dat Ek die Here julle God is, dat daar buiten My nie ‘n ander is nie! My volk sal nooit weer in die skande kom nie (2:27).

Die Christelike geloof glo aan ‘n beeld van God en die wêreld waarin elke ding verlos kan word. Alle mense, selfs die mossies word versorg. Ons kan met oortuiging sê: Die Here is my herder, ek kom niks kort nie. Gelukkig het die gelowige nie net hierdie lewe nie.