Work as hard as you can, make as much as you can, then give as much as you can (John Wesley).

Karakterontwikkeling

Daar is groot waarde in ‘n omgewing wat mense van ‘n keuse voorsien – die moontlikheid om ‘n goeie of ‘n slegte karakter te ontwikkel. ‘n Wêreld wat die ontwikkeling van ‘n morele karakter toelaat, is van groot waarde. Dit laat die mens toe om kosbare wesens te word. As daar geen bose in die wêreld was nie, sou daar ook geen goed gewees het nie. Dit is as gevolg van die groot waarde van wat goed in die lewe is, dat ‘n wêreld wat die bose toelaat, meer waardevol is. Ook die verantwoordelikheid vir wat goed is en die pyn wat daarmee gepaard mag gaan, is waardevol.

• As persoonlikheid en karakter nie waardevol beskou word nie, sou dit verkeerd van God gewees het om lyding en swaarkry toe te laat. Die ontwikkeling van ‘n mens se persoonlikheid is slegs moontlik in ‘n wêreld van ware vryheid. Mense moet kies; mense moet leer; mense moet groei. Om morele volmaaktheid na te streef en nie die verkeerde toe te laat nie, is onmoontlik. As kinders nooit toegelaat word om die verkeerde te doen nie, sal hulle nooit ‘n karakter wat onverskrokke die goeie kies, kon ontwikkel nie. Goeie mense moet leef in ‘n wêreld waar die doen van die verkeerde ‘n opsie is. Jy kan nie mense van karakter ontwikkel sonder om vir hulle ‘n keuse te gee nie, want die vermoë om te kies is deel van ons karakter.

• Die karakter van ‘n individu ontwikkel deur optrede waarin nagedink word oor die gevolge van die optrede en aanpassings gemaak word. Dit word dan oor en oor herhaal totdat dit ‘n gewoonte word. Die mens se persoonlikheid berus op vroeëre geslagte vir sy aanvanklike karakter – sy kulturele en genetiese beginpunt. Daarna ontwikkel hy dit.

Karakterontwikkeling sonder dat mense keuses het, is onmoontlik.

 

I believe in the discipline of silence – and could talk about it for hours – George Bernard Shaw

 

Skei pyn van die bose

Pyn op sigself is nie boos nie. Ons hou net nie daarvan nie. Omdat ek nie van pyn hou nie, beteken nie dat dit  sleg of verkeerd is nie. Die probleem is dat ons geneig is om dit waarvan ons nie hou nie gelyk te stel met iets wat verkeerd of sleg is nie. Pyn en lyding op sigself is nie sleg nie.

 

Kan pyn dalk ‘n goeie doel dien? Beslis.

• Die maak die mens se lewe soos ons dit ken moontlik. Plesier en pyn is die positiewe en negatiewe pole waartussen die stroom van die lewe vloei. Maak een van die pole los en daar is geen lewe nie.
• Dit is slegs in die hitte van pyn en lyding, geestelik en fisies, dat die menslike karakter gevorm word. Ons ontwikkel nie moed sonder om voor gevare te staan nie; ons ontwikkel nie geduld sonder beproewings nie; ons ontwikkel nie volharding sonder lyding nie; ons ontwikkel nie eerlikheid sonder versoekings nie. Dit is juis hierdie dinge waaraan ons waarde in mense heg. Jy kan tog nie sonder hierdie deugde wees nie en ons kan hulle op geen ander manier bekom nie. Ons moderne mense doen alles in ons vermoë om pyn en lyding te vermy. Daarom is hierdie deugde skaars vandag.

 

Ons moenie pyn en lyding gaan soek nie. Ons moet net ‘n eerlike poging aanwend om te bepaal wat goed of sleg, reg of verkeerd  is. En as ons dit gedoen het, gaan ons uit in die lewe. Jy sal nooit jou karakter ontwikkel deur van slegte situasies weg te hardloop nie.

 

 

God’s Word, when rightly expounded, is medicinal for a whole host of spiritual diseases. —Joel Beeke

Die kerk vandag (11)

Daar het onlangs ‘n goeie boek van Jared C. Wilson – The Prodigal Church –  verskyn. [Prodigal = verkwistend, luuks, uitspattig] In hierdie boek kyk hy na die manier waarop ons vandag kerk “doen.” Ons gaan ‘n hele aantal blogs aan hierdie boek spandeer.

Die kern van die boek is: sentraal staan die evangelie. Hoe word dit prakties uitgeleef? Daar is egter geen program of skema of formule nie. Ook moet ons onthou dat dit God is wat bepaal wie sukses behaal en wie nie. Watter aanvanklike skuiwe moet ons maak?

Meet die regte dinge

In Matteus 25:14 – 27 lees ons Jesus se gelykenis van die muntstukke. Uit hierdie gelykenis kan ons ‘n paar dinge leer:

• God gee nie aan almal dieselfde aantal gawes en hulpbronne nie. Party kry min; party kry baie. Maar elkeen wat iets van God ontvang het, word vertrou met dit wat hy gekry het.
• Dit maak nie saak hoeveel jy het nie, maar wat jy doen met dit wat jy ontvang het. Wie in die kleinste dinge betroubaar is, is ook in die groot dinge betroubaar (Lukas 16:10). Getalle is nie al wat belangrik is nie. Wat belangrik is, is nie die kwantiteit van jou bediening nie, maar die kwaliteit. Ons moet baie versigtig wees om kwaliteit te meet. Vrae soos: Het jy die musiek geniet? Was die erediens opwindend en relevant? Het jy spesiaal gevoel toe jy daar was? Nie een van hierdie vrae is eintlik geestelik nie. Nie een van hulle meet die werklike waarde van die ondervinding nie. Ons kan hierdie selfde vrae oor Disney World vra.

Dit is duidelik ons moet ander dinge meet.

• Diegene wat gedoop is, wandel hulle nog in die geloof na een/twee/drie jaar?
• Hoeveel mense is opgelei om ander persoonlik te help om dissipels te word?
• Watter persentasie van mense wat die eredienste bywoon, is betrokke by gemeenskapsgroepe/ Evangelisasie/ Gemeenskapsdiens.
• Hoeveel mense kan die boodskap van die evangelie artikuleer?
• Wat is die reputasie van die gemeente in die gemeenskap?

Hierdie dinge is baie moeiliker om te meet, maar vertel vir ons baie meer as blote getalle en ondervindings. Die verskil is om ‘n skare bymekaar te maak of om dissipels te maak. Om ‘n skare bymekaar te maak, beteken ons moet voortdurend innoveer en probeer om voor die kultuurwinde te bly. Wat van belang is, is nie grootte nie, maar verhoudings. Die klem moenie op gebeure en ondervindings val nie, maar om mense by die storie van die Bybel betrokke te kry.

Ons moet ons aan die soewereine barmhartigheid van die Heilige Gees, wat nie gemeet kan word nie, oorgee. Jy han nie dissipelskap programmeer nie.  Ons is nie hier met ‘n godsdienskode besig of ‘n stel opdragte vir ‘n meer suksesvolle leefwyse of gedragsmodfikasie nie. Dit gaan oor die opstanding uit die dood. Ons word deur genade ontvang in geloof geloof verlos. Dit kom alles van die Here.

Die boodskap van die evangelie is ‘n aankondiging oor wat God in Jesus Christus gedoen het. ‘n Dinamiese prediker maak nie die evangelie kragtiger nie. Die evangelie kan nie verbeter word nie. Hartsverandering is iets wat net die Heilige Gees kan doen. God is aan die werk in die evangelie – dit kom van Hom, dit word deur Hom bemagtig en dit werk deur Hom. Die Heilige Gees wat deur die evangelie werk, is die enigste krag wat ons het. Die probleem is dat ons nie die Heilige Gees kan beheer nie. Die Heilige Gees is nie ‘n formule nie – Hy waai waar Hy wil.

Word selfkrities

Die pad vorentoe gaan bepaal word deur alles op die tafel te plaas vir onderhandeling. Dit verwys uiteraard nie na die Bybel en ons basiese geloofswaarhede in nie. Dit verys na ons metodes en aannames van “hoe dinge werk.” Elke kerk het mense met die nodige gesag nodig om te sê: “Dit is ‘n slegte idee.” Luister na wat hulle sê; bewys dat hy verkeerd is as jy van hom verskil, maar moenie die vrae onderdruk nie. Die probleem is dat baie van ons gemeentes enige kritiek uitsluit, want dit mag seermaak. Dikwels is die kritiek ook uit onkunde.

Ons kan van sekere van ons kritici leer. As ons die nodige nederigheid en vertroue in Jesus Christus het, kan ons by hulle leer. Dink ten minste oor wat hulle sê. Daar is baie kritici wat kritiseer, want hulle het die kerk lief. Begin deur betroubare persone uit te nooi om die waarheid met jou te praat; laat hulle toe om vrae te vra; laat hulle toe om te sê as hulle nie met jou saamstem nie. Mense hou nie van kritiek nie – veral nie as dit geldig is nie. Ek begin onmiddellik verdedig en verskonings maak. Moenie aanvaar dat elke goeie idee wat jy het in werklikheid goed is nie.

Success has a hundred fathers; defeat is an orphan – Anoniem

God se goeie doel in die geskiedenis van die mens

Wat is die goeie doel van God in die geskiedenis van die mens? Ons het ‘n goeie God wat teen die bose is. God waak gedurig teen die bose – ons kry dit oor en oor in die Skrif. Dink aan Job. Job was nie ‘n Jood nie – hy was nie deel van die verbondsvolk nie. Tog het God ‘n heining om hom gebou. Net so bou God ‘n heining om elkeen wat Hom soek en verhoed Hy so dat die bose hulle oorval. Deur die liefde van die Here het ons nie vergaan nie; daar is geen einde aan sy ontferming nie (Klaagliedere 3:22).

Die probleem met baie dinge in die Bybel en ons liedere is dat dit vir ons net mooi woorde wat nie werklik vir ons iets beteken nie, is. Ons moet voortdurend vir God vra om ons teen die bose te beskerm. Ons is op die slagveld vasgevang tussen twee leërs – die een is goed, die ander is boos. God is egter groot en kan ons beskerm. God is teen die bose. Ons is in die arena van die geskiedenis van die mens waarin die goeie doel van God bereik moet word.

Kom ons kyk hoe stel Paulus die doel van God in Efesiërs 2:4 – 7: Maar God is ryk aan barmhartighed en het ons innig lief. Deur sy groot liefde het Hy ons wat dood was as gevolg van ons oortredings, saam met Christus lewend gemaak. Uit genade is julle gered! Ja, in Christus Jesus het Hy ons saam met Hom opgewek uit die dood en ons saam met Hom ‘n plek in die hemel gegee, sodat God ook in die tye wat kom, sou laat sien hoe geweldig groot sy genade is deur die goedheid wat hy in Christus Jesus aan ons bewys het. Dit is waaroor die geskiedenis van die mens gaan. In vers 7 sien ons dat ons God se vertoonstukke is wat in die tye wat kom die bewyse van God se genade en goedheid sal wees.

Maar nou het God die ryke verskeidenheid van sy wysheid deur die kerk bekend laat word aan elke mag en gesag in die hemelruim (Efesiërs 3:10). Wat bekend gemaak moet word, is wat God uit die geskiedenis van die mens gaan voortbring. Wat God gaan voortbring is dat sy mense die grootste weerkaatsing van God se heerlikheid, wysheid en liefde gaan wees – ‘n geloofsgemeenskap wat die kroonjuweel in sy skepping sal wees.