It is a greater mercy to descend from praying parents than from nobles. —John Flavel

Die Mona Lisa

In Jenson en Grimmond se The Archer and the Arrow word die bewaring van die evangelie vergelyk met die bewaring van die Mona Lisa skildery. Hierdie bekende skildery word in ‘n koeëlvaste kas wat spesiaal vir die doel gebou is, bewaar. Dit is so waardevol dat dit slegs twee maal tydens die laaste eeu buite die Louvre vertoon is.

Wat van diegene wat die skildery by daardie geleenthede vervoer het? Wat sou gebeur het as diegene wat die skildery vervoer het, besluit het dat daar ‘n paar gebreke aan die skildery was? Wat sou gebeur het as hulle ‘n kwas geneem het en ‘n mooi patroon op die rante bygevoeg het? Nee, hulle werk was nie om die skildery te verbeter nie, maar om dit in sy oorspronklike toestand af te lewer. Hoeveel te meer geld dit nie vir die evangelie nie.

Christene is geroep om die evangelie te bewaar. Ons moet die evangelie teen indringers, wolwe en dwaalleraars  wat gedurig iets by die evangelie wil byvoeg, beskerm. Ons moet aanhou om die evangelie te bestudeer, uit te leef en te verkondig sodat mense die evangelie kan ken en oordra aan ‘n wêreld wat ‘n groot behoefte daaraan het. Dit is ‘n taak wat ons nederig sal hou. Hoe doen ons dit? Bewaar dit deur die Heilige Gees wat in ons woon (2 Tessalonisense 1:14). God is met ons en vir ons.

Every Christian should be both conservative and radical; conservative in preserving the faith and radical in applying it. —John Stott

Ly vir die evangelie

Om vir Christus te ly is ‘n belangrike tema in 2 Timoteus. In 2 Timoteus 1:8b – 12a antwoord Paulus drie belangrike vrae oor lyding.

• Hoe ly ons? (vers 8c)

Dra jou deel van die ontberings vir die evangelie met die krag wat God jou gee.

Ons is maar swak, maar deur God se krag kan ons swaarkry hanteer. Jesus voorsien voldoende krag vir sy volgelinge sodat hulle teenstand, swakheid en vervolging kan hanteer. Jesus is voldoende. As jy vir die evangelie swaarkry, onthou dat jy deel in Christus se lyding en sy spesiale krag geniet. Sonder My kan julle niks doen nie (Johannes 15:5).

• Hoekom ly ons? (vers 9 – 12a)

In hierdie verse beskryf Paulus kortliks die evangelie. Daarna sê hy: Om hierdie rede ly ek ook hierdie dinge.  Paulus was bereid om sy lewe op te offer, want hy het geglo dat die evangelie dit werd was. Jy kan lyding verduur as jy sien wat Paulus gesien het. Wat het Paulus gesien toe hy oor die evangelie nagedink het? In hierdie verse beklemtoon hy  drie aspekte:

• Die grootheid van God in verlossing. Hy het ons gered en ons geroep … Hy het die mag van die dood gebreek en deur die evangelie die onverganklike lewe aan die lig gebring. God verlos ons
• Die genade van God in ons verlossing. Dit het Hy gedoen, nie op grond van ons dade nie, maar op grond van sy eie besluit en die genade wat Hy van ewigheid af in Christus Jesus aan ons geskenk het. Die bron van ons verlossing is nie meriete nie, maar God se onverdiende guns. God skuld ons niks nie. Ons enigste hoop op verlossing is sy genade. Ons kan dit nie doen nie; Jesus Christus het dit klaar vir ons gedoen.
• Die gronde vir ons verlossing. Die basis van ons verlossing is die persoon en werk van Christus. Hierdie genade is nou aan ons geopenbaar deur die koms van ons Verlosser, Christus Jesus. Hy het die mag van die dood gebreek en deur die evangelie die onverganklike lewe aan die lig gebring. Toe hulle vir Bonhoeffer kom haal het om hom na sy teregstelling te neem, sê hy vir sy vriend: “Dit is die einde. Vir my die begin van die lewe.”

• Wanneer moet ons lyding verwag (1 Timoteus 1:10c- 12a)

Ons kan lyding verwag as ons die evangelie verkondig. Verlossing berus volledig op genade, maar dit word ondervind deur die verkondiging van die evangelie. Paulus het die evangelie verkondig deur sy aanstelling as prediker en apostel en leraar. As prediker verkondig hy die evangelie; as apostel is hy met die evangelie gestuur; as leraar verduidelik hy die evangelie. Dit word ook van ons verwag.

As ons die evangelie verkondig, moet ons teenstand verwag. Ons moenie lyding soek nie, maar ons moenie verbaas wees as dit kom nie. Om dié rede ly ek ook hierdie dinge. Paulus ly, want hy het openlik gepraat en hy praat openlik, want hy het geglo dat die evangelie dit werd was.

“Die man wat bang is om te ly, kan nie aan Hom behoort wat gely het nie” – Tertullianus

Laat die kreatiewe potensiaal in jou gemeente los

By geleentheid het Napoleon na ‘n kaart van die wêreld gekyk. Hy wys na China en sê dat China ‘n slapende reus is – as hy eers wakker word, sal niemand hom stop nie. Is die kerk nie ‘n slapende reus nie? Elke Sondag sit die kerkbanke vol mense wat niks met hulle geloof doen nie behalwe om dit te behou nie.

‘n Aktiewe lidmaat beteken in meeste kerke iemand wat die eredienste bywoon en finansieel bydra. Daar word nie meer van hulle verwag nie Maar God verwag meer van Christene – Hy verwag dat elke Christen sy gawes en talente moet gebruik. As ons hierdie talent, hulpbron, kreatiwiteit en energie kan loslaat, sal die Christendom ontplof – dit sal groei soos nog nooit vantevore nie.

Hoekom is die entoesiasme in so baie kerke laag? Is dit nie omdat kerke kreatiwiteit ontmoedig nie? Goeie idees word afgeskiet met: “Ons het dit al vantevore probeer.” Soms het ‘n persoon ‘n baie goeie idee, maar hy het nie die leierskapsvaardighede om dit uit te voer nie. Bid dat God ‘n leier na vore sal bring. As jy al jou tyd spandeer om vir mense te sê waarom dinge nie gaan werk nie, sal hulle mettertyd nie meer probeer nie.

Die sleutel om kreatiwiteit te ontsluit, is volgens Rick Warren om gesag met verantwoordelikheid te delegeer. Mense reageer op verantwoordelikheid; hulle groei en ontwikkel as jy hulle vertrou. As jy mense altyd hanteer asof hulle onbekwaam is, sal jy hulle die res van jou lewe moet voed. Mense is net so kreatief soos die stelsel hulle toelaat om te wees. Mense wil ‘n bydrae maak; hulle wil weet dat hulle ‘n verskil kan maak; hulle wil betrokke wees. Om die beste in mense na vore te bring, moet jy vir hulle ‘n uitdaging gee – en as hulle slaag, moet jy vir hulle daarvoor krediet gee. Jy moet ook vir hulle die vryheid gee om foute te maak. Jy leer immers deur jou foute.

Om die beste in mense na vore te bring, moet jy ook vir hulle beheer gee. As ‘n gemeente wil groei, moet mense beheer afstaan – veral groter gemeentes.

As jy wil hê die gemeente moet groei, moet die leiers beheer afgee en die bediening aan die lidmate toevertrou. So many pastors are so afraid of wildfire that they spend all their time putting out every little camp fire that’ll warm up the church! (Rick Warren)

For the inexperience of youth requires the practical wisdom of age to strengthen and direct it – Cicero

Moenie skaam wees vir die evangelie nie

Jy moenie skaam wees om die boodskap van die Here te verkondig nie (2 Timoteus 1:8a)

Wat moet ons met die evangelie doen? Ten eerste moet ons nie skaam wees daarvoor nie. In die voorafgaande verse het Paulus vir Timoteus  herinner aan God se werk in hom wat enige lafhartigheid oorwin. In hierdie vers sien ons duidelik dat ons van die Here moet getuig. Ons verkondig nie ‘n idee nie, maar ‘n Verlosser.

Timoteus sit in Efese. Efese was ‘n stad vol afgode. Die kruisdood was vir baie in Efese ‘n skande. ‘n Verlosser wat aan ‘n kruis gesterf het, was vir hulle onsin. Ons moet eerder die passie van Polikarpus aangryp. Hy weier om Christus te verloën ten spyte van die wete dat hy daarvoor gemartel gaan word. Eighty and six years have I served Him, and He never did me any injury; how then can I blaspheme my King and my Savior.

Vandag word die idee dat die mense “sleg/sondig” is en ‘n Verlosser nodig het, gesien as onkundig, primitief of sommer net dwaas. So kry ons ook ander wêreldsienings, soos die nuwe ateïsme, wat God verwerp. Daar is ook die opkoms van ander godsdienste wat die Christendom nie goedgesind is nie. Daarom is Paulus se opdrag vandag steeds relevant. Onthou Jesus se eie woorde: Wie hom dan vir My en my woorde skaam te midde van hierdie ontroue en sondige geslag, vir Hom sal die Seun van die mens Hom ook skaam wanneer Hy kom saam met die heilige engele, en beklee is met dieselfde heerlikheid as sy Vader (Markus 8:38). Dit gaan hier oor Jesus en sy woorde.

Paulus vra ook dat Timoteus hom nie vir Paulus wat in die tronk sit, moet skaam nie. Hy sit immers om Jesus se ontwil in die gevangenis. Lafhartige gelowiges weier dikwels om met hulle medegelowiges wat opstaan vir Christus te assosieer. Paulus soek nie die goedkeuring van mense nie. Hy sit nie in die tronk om deur mense geloof te word nie, maar tot eer van sy Verlosser deur aan sy wil gehoorsaam te wees.