“When you have been sinned against you have two options: to either lovingly cover or lovingly confront.” (Jim Newcomer)

Waar staan dit in die Bybel?

Die Bybel is letterlik God wat Hom aan die mensdom openbaar. Ortodokse Christene glo dat die Bybel deur die Heilige Gees geïnspireer is en dat menslike instrumente in die proses gebruik is. Tog hoor ons gereeld dat Christene dinge sê wat nie in die Bybel staan nie. Hulle haal ‘n stelling aan wat vir ons baie goed klink en ons herhaal dit as ‘n Bybelse waarheid – sonder om seker te maak dat dit uit die Bybel kom.

Kom ons kyk na ‘n paar gewilde stellings wat Christene glo.

1. God help diegene wat hulleself help

God het aan ons gawes en talente gegee wat ons moet gebruik, maar vertroue op jouself en selfgeregtigheid belemmer eintlik God se werk. Hierdie gesindheid om harder te probeer en beter te doen kom in die pad van God se werk. Toe sê Jesus vir sy dissipels: “As iemand agter My aan wil kom, moet hy homself verloën, sy kruis opneem en My volg.´(Matteus 16:24)

2. God wil hê dat ek gelukkig moet wees

Geluk word aan gevoelens en emosies gekoppel wat dikwels deur omstandighede bepaal word. Dit mag met tyd verander. God wil hê dat ons Hom moet gehoorsaam, vertrou en besef dat alles wat Hy doen vir ons beswil is – al maak dit ons op daardie stadium nie gelukkig nie. Ons weet dat God alles ten goede laat meewerk vir dié wat Hom liefhet, dié wat volgens sy besluit geroep is (Romeine 8:28).

3. Ons is almal God se kinders

God het almal gemaak, maar nie almal is in ‘n verhouding met Hom nie. Slegs diegene wat hulle geloof in Jesus Christus as hulle Here en Verlosser geplaas het en dié in wie die Heilige Gees is, kan daarop aansprak maak dat God hulle Vader is. Julle het die Gees ontvang wat julle tot kinders van God maak en wat ons tot God laat roep: “Abba!” dit beteken Vader. Hierdie Gees getuig saam met ons gees dat ons kinders van God is (Romeine 8:15 – 16).

4. God sal jou nooit meer gee as wat jy kan hanteer nie

In die lewe moet ons besef dat ons nie alleen ons las kan dra nie. Ons moet besef ons kan dit nie doen nie en dit aan God oorgee. Dit is immers wat geloof is. As Paulus oor sy moeilikhede in die provinsie Asië praat sê hy: Die swaar wat ons moes verduur, het ver bo ons kragte gegaan, sodat ons selfs die hoop om te bly lewe, laat vaar het … maar dit het gebeur sodat ons nie op onsself sou vertrou nie, maar op God wat die dooies opwek tot die lewe (2 Korintiërs 1:8 – 9).

5. Slegte dinge gebeur met goeie mense

Ten eerste is die idee van ‘n goeie persoon baie subjektief. Dikwels besluit ons self wat goed en wat sleg is, maar ook wie goed en wie sleg is. Die gewildste manier vir ons om te oordeel, is deur te vergelyk. Maar volgens die Bybel staan ons almal op dieselfde vlak, want niemand is inherent goed nie. Daar is nie een wat regverdig is nie, selfs nie een nie (Romeine 3:10).

6. As jy doodgaan, kry God nog ‘n engeltjie by

Mense is mense en engele is engele. Aan hulle is geopenbaar dat wat hulle geprofeteer het, nie vir hulleself bedoel was nie, maar vir julle. Nou het dié wat die evangelie aan julle verkondig het, dit aan julle bekend gemaak deur die Heilige Gees wat van die hemel af gestuur is. Dit is dinge waarin selfs engele begerig is om insig te kry (1 Petrus 1:12).

Die feit dat so baie Christene hierdie Bybelse onwaarhede glo, is ‘n teken van ons huidige Bybelse ongeletterdheid. Ons is nie meer soos die mense van Berea nie. Hulle het met groot belangstelling na die woord geluister en elke dag die Skrif ondersoek om te sien of dit is soos Paulus sê (Handelinge 17:11).

Do not work so hard for Christ that you have no strength to pray, for prayer requires strength. —Hudson Taylor

Bonhoeffer as leier (2)

Eberhardt Bethge, Bonhoeffer se beste vriend, skryf oor Bonhoeffer se tyd as leier by Finkenwalde. Hy het sy persoonlike besittings – materieel en geestelik –met sy studente gedeel. Hy was groothartig. Die studente was aanvanklik oorweldig deur die diepte van sy denke. Gou besef hulle dat hy na hulle luister – so intens dat hy vir hulle kon raad gee en eise aan hulle kon stel wat niemand vantevore nog gedoen het nie.

Maar Bonhoeffer se denke was net die voorloper tot iets baie belangrik – sy optrede. Hy was ‘n mens vol teenstrydighede. Hy was nie-gewelddadig, maar neem deel aan ‘n plan om Hitler dood te maak. Hy was kosmopolitaans (hy het van musiek die teater en alle soorte literatuur gehou), maar was ‘n denker wat sy studente in afsondering gelei het.

Dit was veral Bonhoeffer se teologie wat van hom ‘n unieke leier gemaak het. Sy diep verstaan van die bergrede veroorsaak dat hy dit in die praktyk met sy studente uitgeleef het. Sy studie van die psalms beteken dat hy hard probeer het om die krag van God se woord te verstaan. Daarom het hy almal verbied om soggens te praat voordat hulle eers God se woord gehoor het.

Hierdie unieke kenmerke van Bonhoeffer is eienskappe van leierskap. Leierskap beteken dat jy aan die voorpunt is, dat jy dinge sien wat ander nie raaksien nie en om hulle dan met sorg en oortuiging daarheen te lei. Daarom, sewentig jaar na sy dood, inspireer Bonhoeffer steeds mense deur sy skrywes en voorbeeld.

Where Scripture speaks, God speaks –  Augustinus.

Die tien gebooie (5)

[Ek gaan ‘n hele aantal blogs aan Eksodus spandeer. Ek maak onder andere van “Exalting Jesus in Exodus” (2014) vanTony Merida gebruik.]

(v) Die Vyfde Gebod

Eer jou vader en jou moeder, dan sal jy lank bly woon in die land wat die Here jou God vir jou gee.

Letterlik beteken eer om die gewig van iets te erken – mense moet dus die regte gewig (eerbied) vir die posisie van hulle ouers gee. Later lees ons dat mense wat hierdie gebod verontagsaam die doodstraf kan kry (Levitikus 20:9). Eer jou vader en moeder, en alle gesagsfigure, in die algemeen.

Wat leer ons hier van God? Ons leer van sy gesag en sy voorsiening. Die laaste gedeelte van die vers dien as motivering om die gebod te onderhou. Dit verwys na God se vrygewigheid. Maar as vaders moet ons ook vir God, die volmaakte vader, naboots.

(vi) Die Sesde Gebod

Jy mag nie moord pleeg nie.

Dit sluit in doelbewuste, vooraf beplande moord sowel as nie-doelbewuste moord in. God maak dit baie duidelik dat die lewe heilig is. Ons mag nie moord pleeg nie, want net God gee lewe en mense is na sy beeld gemaak. Jesus brei hierdie gebod uit in sy bergrede: Elkeen wat vir sy broer kwaad is, is al strafbaar voor die regbank (Matteus 5:22).

(vii) Die Sewende Gebod

Jy mag nie egbreuk pleeg nie.

Hierdie gebod gaan oor seksuele reinheid veral in die huweliksverhouding. In sy bergrede het Jesus ook hierdie gebod uitgebrei: Elkeen wat na ‘n vrou kyk en haar begeer, het reeds in sy hart met haar egbreuk gepleeg (Matteus 5:28). Die onderliggende beginsel is ‘n rein hart.

Hierdie gebod herinner ons aan God se trou en heiligheid – God is heilig en Hy verwag dat sy mense ook heilig moet wees. Hulle moet sy woord oor verhoudings getrou navolg.

(vii) Die Agste Gebod

Jy mag nie steel nie.

Jy mag nie iets neem wat nie aan jou behoort nie. Dit kan op baie verskillende maniere gebeur. Adam en Eva het geneem van dit wat nie aan hulle behoort het nie – die vrug van die boom in die tuin van Eden. In plaas van steel, moet ons dankbare harte hê wat hulle verbly in wat God vir ons voorsien het. Ons moet goeie rentmeesters wees van dit wat God aan ons gegee het. Ons moet altyd onthou dat wat ons het nie ons s’n is nie, maar alles behoort aan God wat alles aan ons gegee het. Ons moet ook vryelik aan ander gee.

God is ons voorsiener. Omdat Hy alles wat ons nodig het aan ons gee, mag ons nie steel nie. Hulle moet nie hulle hoop op die onsekerheid van rykdom vestig nie, maar in God wat alles ryklik aan ons gee om te geniet (1 Timoteus 6:17).

(ix) Die Negende Gebod

Jy mag nie vals getuienis teen ‘n ander gee nie.

Hierdie gaan nie net oor die vertel van leuens nie. Dit het ook te doen met getuienis in ‘n hof. Die getuie moet eerlike getuienis gee. Maar hierdie gebod is nie beperk tot die hofsaal nie – niks val buite die hofsaal van God nie. Hierdie gebod onderstreep God se kenmerk van waarheid.

(x) Die Tiende Gebod

Jy mag nie iemand anders se huis begeer nie. Jy mag nie sy vrou begeer nie, ook nie ‘n slaaf of slavin, ‘n bees of ‘n donkie, of enigiets anders wat aan hom behoort nie.

Hierdie gebod beklemtoon die verwronge begeertes en gevoel van ontevredenheid van die mens. In plaas van ‘n dankbare hart begeer hierdie mense dit wat ander het. Begeerte gaan oor die hart. Dit mag of mag nie tot optrede lei nie, maar selfs as jy nie optree nie, is dit verkeerd. Ons begeerte moet na God wees.

Hierdie gebod leer ons van God se trou, goedheid en voorsiening. Ons hoef ons nie oor God se voorsiening aan ons of ‘n ander mens se goed te bekommer nie – ons Vader weet wat ons nodig het en bevredig ons diepste verlange.

Ons moet die gebooie verstaan en sien hoe God Hom in hulle geopenbaar het – hulle weerspieël sy heilige karakter. Dit is daarom nie net ‘n lys reëls nie.

Hoe lief het ek u wet! Dit bly my elke oomblik by (Psalm 119:97)

Volgende keer gaan ons kyk na hoe Jesus die tien gebooie vervul het

“It is not the glorious battlements, the painted windows, the crouching gargoyles that support a building, but the stones that lie unseen in or upon the earth. It is often those who are despised and trampled on that bear up the weight of a whole nation.” — JOHN OWEN

Bonhoeffer as leier (1)

Een aand, na sy jong studente by die ondergrondse opleidingskool, Finkenwalde, klaar was met hulle aandete gaan Dietrich Bonhoeffer kombuis toe om die skottelgoed te was. Hy werk alleen; hy versoek die studente om hom te kom help. Die studente luister nie. Toe niemand hom kom help nie, sluit hy die kombuisdeur.

Toe die studente besef wat hy gedoen het, voel hulle sleg en bied aan om hom te help. Die deur bly gesluit en Bonhoeffer maak die werk alleen klaar. Sy les was eenvoudig: diens en leierskap kan nie van mekaar geskei word nie.

Die studente by Finkenwalde het heelwat sulke ondervindings gehad. In sy begeerte om hulle te leer, sou Bonhoeffer iets ongewoon doen of ‘n ongewone opdrag gee. Hiermee wou hy die radikale aard van leef in die koninkryk van God beklemtoon. Om dissipels vir Jesus in hierdie onderstebo koninkryk te maak, vereis soms hiperbool en dramatiese gebeure. Soms beteken dit dat die leier in die kombuis die skottelgoed moet doen.