Don’t allow the Internet to become your congregation. YouTube is a horrible place to go to church. —Albert Mohler

Ek is geïrriteerd

‘n Sagte antwoord laat woede bedaar; ‘n krenkende woord laat woede ontvlam (Spreuke 15:1).

As ek geïrriteerd is plaas ek ‘n las op ander, want my skerp woorde maak dat hulle kwaad word. Ons probeer altyd ander mense blameer – dit is hulle wat my irriteer. Paulus sê die liefde word nie geïrriteerd nie (1 Korintiërs 13:5 – Interliniêre Bybel).

Geïrriteerdheid se oorsaak is gewoonlik selfsugtigheid – dit is gewoonlik omdat ons iets wat ons wil hê nie kan kry nie.

Wat ons begeer is dikwels nie verkeerd of sondig nie, maar ons selfsugtige reaksie beteken dat ek God nie vertrou nie.Vertrou altyd op Hom (Psalm 62:9). Dit is ook dikwels omdat ek iemand anders nie waardeer, liefhet of dien nie. Liefde is nie geïrriteerd nie.

Alles goed en wel, maar wat kan ek doen om minder geïrriteerd te wees?

• Stop en bely dat jy verkeerd is. Vra vir jouself: “Wat begeer ek wat ek nie kan kry nie?”
• Vertrou beloftes soos 2 Korintiërs 9:8 (En God is by magte om aan julle alles in oorvloed te skenk, sodat julle in alle opsigte altyd van alles genoeg kan hê), Filippense 4:19 (En my God sal in elke behoefte van julle ryklik voorsien), ens. Hulle sal jou help om die versoeking van geïrriteerdheid te oorwin.
• Gehoorsaam. Moet dan nie toelaat dat die sonde nog langer oor julle heerskappy voer en julle die begeertes van julle sterflike aardse bestaan laat gehoorsaam nie (Romeine 6:12). As ons besef dat liefde nie geïrriteerd word nie, sal ons emosies mettertyd aan sy opdragte gehoorsaam wees. As julle my liefhet, sal julle my opdragte uitvoer (Johannes 14:15).
• Beplan. Dink voor jy iets doen of sê. Dit kan jou help om die versoeking van geïrriteerdheid teen te staan. Vra jouself af: “Wanneer is ek geïrriteerd?” Vra ander om jou te help om hierdie vraag te antwoord. Plaas dan sisteme en gewoontes in plek wat hierdie struikelblokke sal verwyder.

Dit gaan nie maklik wees nie. Om gewoontes te verander is harde werk. Werk daaraan.

The role of a pastor is not to grow a big church. The pastor’s role is to grow mature disciples who make disciples. — Rick Howerton

Moet mense volgelinge van Jesus Christus wees?

‘n Leser vra vir Lee Strobel: Is dit nie ‘n bietjie meerderwaardig om te sê dat jy ‘n volgeling van Jesus moet wees as jy in die hemel wil kom nie?

Lee Strobel antwoord: Dit kan sekerlik so klink. Ongelukkig is sommige Christene baie arrogant in die manier waarop hulle hulle geloof uitleef en aan ander kommunikeer. Die egte Christelike geloof is alles behalwe arrogant en eksklusief.  Kom ons verbeel ons daar is twee klubs. Om lid te word van die eerste klub moet jy ‘n lang lys streng reëls nakom – jy moet jou lidmaatskap verdien.

Jy moes iets in die lewe bereik het; jy moet ‘n lang lyse vereistes nakom voordat jy ‘n lid kan word. Ten spyte van al hulle pogings is daar baie mense wat dit nie maak nie – hulle word uitgesluit. Dit is hoe ander godsdienssisteme is.

Die tweede klub se deure staan wyd oop. Hulle nooi almal in – ryk en arm, swart en wit, maak nie saak waar jy woon nie. Hulle wil jou graag insluit by hulle klub. Toegang word nie deur jou kwalifikasies of pogings bepaal nie – jy moet net die uitnodiging aanneem. Jesus het reeds vir jou lidmaatskap betaal. Jy moet besluit, maar die klub sal jou nooit wegwys as jy in nederigheid en opregtheid toegang soek nie. Dit is hoe die Christendom is.

Watter klub is arrogant? Christene is nie arrogant nie, hulle is gasvry. Hulle verbeel hulle nie hulle is beter as ander nie – nee, hulle erken hulle eie swakhede en nooi ander wat swak voel om by hulle aan te sluit om te kry wat hulle deur Christus gekry het.

N. T. Niles som opregte Christenskap goed op as hy sê ons is een bedelaar wat vir ‘n ander bedelaar vertel waar hy kos kan kry.

 Die Gees en die bruid sê: “Kom!” En elkeen wat dit hoor, moet sê: “Kom!” En elkeen wat dors het, moet kom; elkeen wat die water van die lewe wil hê, moet dit kom kry, verniet! (Openbaring 22:17).

Peace is the smile of God reflected in the soul of the believer. —William Hendricksen

Die baie godsdienste

‘n Leser vra vir Lee Strobel, bekende skrywer: “Ðaar is so baie godsdienste – hoe kan ons seker wees dat die Christelike geloof die regte een is?”

Hy antwoord: Geen twyfel nie. Mense glo allerhande godsdienstige idees. Meeste mense is opreg in wat hulle glo. Ons moet hulle met respek hanteer: Wees altyd gereed om ‘n antwoord te gee aan elkeen wat van julle ‘n verduideliking eis oor die hoop wat in julle lewe. Maar doen dit met beskeidenheid en met eerbied vir God (1 Petrus 3:15 – 16). Ons moet hulle reg om hulle godsdiens vryelik te beoefen beskerm – ook ons eie reg om dit te doen.

Mense kan opreg wees, maar steeds verkeerd wees. Alle godsdienste kan onmoontlik nie reg wees nie, want op basiese punte weerspreek hulle hulleself. As voorbeeld kyk net wat leer hulle oor God:

• Boeddhisme ontken die bestaan van God
• Hindoïsme leer dat alles deel is van ‘n onpersoonlike god (panteïsme)
• Die Christendom leer dat daar een persoonlike God is wat alles gemaak het.

Ons word dus gedwing om tussen die verskillende geloofsisteme te kies. Moet ons hierdie besluit neem op grond van ons tradisies of op grond van wat ‘n gesagsfiguur vir ons sê of moet ons glo of wat ons in ons harte voel. Hierdie is baie gevaarlik maniere om besluite te neem.

 Strobel se benadering is dat ons ‘n keuse moet maak op grond waarheen logika en die bewyse wys terwyl ons God vir leiding vra. Dit het hom laat besluit op die Christelike geloof.

 Kom ondervind en sien self dat die Here goed is. Dit gaan goed met die mens wat by Hom skuil (Psalm 34:9). Die psalmis is reg; kom en ondervind daardie seëninge. Dan sal ons kan getuig dat die psalmis reg was – die Here is werklik en Hy is goed.

Ek is die Here jou God wat jou onderrig tot jou beswil, wat jou lei op die pad waarop jy moet gaan (Jesaja 48:17).

We belong to Jesus because He has purchased us by His blood. He will not return or exchange what He has bought. —Anthony Carter

Niemand besoek die gemeente nie

Dit is interessant dat sekere gemeentes gereeld besoekers kry terwyl ander (waarskynlik die meerderheid van gemeentes)  feitlik nooit besoekers kry nie. Hoekom? Bill Tenny-Brittian noem vier redes waarom sekere gemeentes gereeld besoekers kry.

• Lewens word verander en mense weet dit

Die bestaansrede vir die gemeente is om dissipels van Jesus Christus te maak. As iemand besluit om Jesus te volg, verander sy lewe – radikaal. Sy gedrag verander; verslawings word oorwin; verhoudings word herstel – sy hele lewe word aangeraak. As ‘n lewe verander, hoor mense daarvan en as mense daarvan hoor, kom kyk hulle.

Gemeentes waar lewens verander word, sien nuwe besoekers … gereeld.

• Lidmate is opgewonde

Lewensverandering maak mense opgewonde. Dit is nie die enigste ding wat lidmate opgewonde maak nie. ‘n Spesifieke gebeurtenis of preekreeks kan die vlak van opgewondenheid in die gemeente laat styg. Gemeentes wat opgewondenheid skep en vertroetel, maak lidmate opgewonde. Opgewonde lidmate nooi besoekers.

• Die gemeente het iets wat die moeite werd is om mense na uit te nooi.

Gemeentes met geteikende eredienste en met uitmuntenheid uitgevoer, sien gereeld besoekers. As ‘n lidmaat of besoeker ‘n erediens bywoon wat by hom aanklank vind en vir hom relevant is, sal hy ander uitnooi om ook die eredienste by te woon. Hy weet dat die erediens ook by hulle aanklank sal vind. Gemeentes baat van ‘n gereelde stroom besoekers as dit geteikende gebeure aanbied – gebeure waarvan lidmate oortuig is hulle vriende sal ook waardeer.

• Die gemeente het besoekers-momentum

Dit word gesê dat ‘n blokkie 2,5 X 2,5 cm ‘n trein kan verhoed om vorentoe te beweeg. As die trein egter aan die gang is, sal ‘n muur dit nie eers keer nie. Gemeentes vind dit moeilik om die eerste klompie besoekers te kry, maar as die besoekers eers kom en uitvind hulle het iets ontdek wat die moeite werd is, nooi hulle ander uit. Nou word dit ‘n stroom besoekers. Besoekers wat terugkeer is die gemeente se doeltreffendste manier om ‘n eksponensiële styging in besoekers te sien. Momentum laat die stroom vinnig toeneem.

Daar is redes waarom sommige gemeentes elke week nuwe besoekers kry. Maak nie saak hoe groot die gemeente is nie, as nuwe besoekers opdaag en terugkeer, gaan die gemeente groei in getalle.