“I have a great need for Christ: I have a great Christ for my need.” C. H. Spurgeon

Die gemeente loop leeg

Baie gemeentes is besig om leeg te loop. Daar kom egter ‘n snaakse effek na vore: elitisme. Daar is mense wat hierdie agteruigang  in ‘n snaakse soort trots en meerderwaardigheid verander. Daar is sommiges wat beweer dat hierdie agteruitgang tot hoofstroom kerke beperk is – en kyk neer op hulle, want dit sou dan hulle verdiende loon wees. Hierdie aanname is vals – daar is min gemeentes wat nie krimp nie. Maar om ander af te kraak, help niks nie – dit is maar net ‘n vorm van ontkenning. Die gevolg is dat die herstelpoging verder vertraag word. Ons glo dit is iemand anders se probleem en ons kan maar onversteurd aangaan. Dit herinner nogal aan Lukas 18:11: O God, ek dank U dat ek nie soos ander mense is nie.

Ander leiers sê: “Dit is nie eintlik dat die getalle krimp nie, want diegene wat die gemeente verlaat, moes in die eerste plek nooit hier gewees het nie. Hulle was slegs Christene in naam.” Hukke glo dus die vermindering in getalle is ‘n positiewe teken – ons raak ontslae van al die dooie hout. Wat agterbly, is die ware gelowiges. Hoekom doen leiers dit? Hulle is bang die dalende getalle sal die kudde demoraliseer en nog lidmate loop weg.

Dit is duidelik dat sulke reaksies nie juis die gemeente sal help nie. Vir almal van ons is die dalende getalle ‘n hartseer verhaal. Hoe moet ons dan reageer?

• Erken die dalende getalle. Ken en verstaan die feite. Eers as jy die waarheid erken, sal jy in staat wees om iets daaraan te doen.
• Hou op om ander te blameer. As jy dit doen, vertraag jy net dit wat jy moet doen om die toestand te verbeter.
• Sien die hoop. Ja die kerk sukkel, maar ons weet dat God se ware kerk – die liggaam van Christus – nooit sal verdwyn nie. Die kerk is besig om op nuwe maniere verfris te word. Ons is bevoorreg om deel te wees van iets wat God besig is om te lei.

Wees oop vir sy leiding; vergeet van hoe ons dit nog altyd gedoen het; wees bereid om te verander en te groei. Leer in nederigheid om weer kerk te wees.

“Pride is the devil’s dragnet in which he takes more fish than in any other, except procrastination.” C. H. Spurgeon

Vereistes vir ‘n wêreldsiening

‘n Wêreldsiening moet sekere sleutelvrae kan beantwoord:

• Die werklikheid: Wat is werklik? Hoekom bestaan iets? Bestaan God?
• Oorsprong: Waarvandaan kom ons?
• Die menslike natuur: Wie is ons? Het ons regte en waarde? Wat is die oplossing vir ons probleme?
• Bestemming: Wat gebeur as ek doodgaan? Is daar lewe na die dood en wat is die aard daarvan?
• Kennis: Hoe weet ons? Hoekom moet ons in enigiets glo?
• Etiek: Bestaan objektiewe morele waardes? Hoe kan ons reg van verkeerd onderskei?
• Geskiedenis: Het die geskiedenis ‘n doel? Het die lewe enige betekenis?

‘n Wêreldsiening is nie net iets wat ons intellektueel glo nie. Dit behels ook ‘n oriëntering na of weg van God. Hierdie wêreldsiening is dikwels onbewus – soos ‘n huis se fondament: jy sien die nie, maar jy weet dit is daar. Voldoen jou wêreldsiening aan hierdie vereistes?

“A Bible that’s falling apart usually belongs to someone who isn’t.” C. H. Spurgeon

Interpretasie van die Bybel – sekere kerngedeeltes

As ons die Bybel interpreteer is daar een aspek waaraan ons aandag moet gee. Sekere kerngedeeltes in die Skrif bevat ‘n uitgebreide hantering van sekere belangrike leerstellings. Dit is plekke waar ons die grootste hoeveelheid materiaal in een plek van daardie leerstelling kry. In werklikheid stel hierdie gedeeltes grense vir ons interpretasie van daardie aangeleenthede.

Kom ons noem ‘n paar van hierdie gedeeltes:

• Genesis 1 – 2: Die skepping.
• Jesaja 40: Die onvergelykbaarheid van God.
• Jesaja 53: Die aard van die versoening.
• 1 Korintiërs 15: Die opstanding van Christus.
• 2 Korintiërs 5:1 – 10: Die aard van die tussenstadium
• Filippense 2:1 – 11: Die aard van Jesus se menswording.

You may be singing ‘Holy, holy, holy,’ but if you aren’t thinking about God while singing it, you are not worshiping. —Donald Whitney

Jesus het nooit gesê ons moet kerkgeboue vol maak nie.

Om kerk toe te gaan was nog nooit die punt nie. Ons sien vandag dikwels dat mense op Facebook skryf dat hulle verlang na die ou dae toe kerkgeboue elke Sondag vol was. ‘n Mens kan dit verstaan, maar daar is probleme om na die goeie ou dae te verlang:

• Die goeie ou dae was nie werklik so goed nie. Ons het ‘n selektiewe geheue en onthou net die goeie dinge.
• Om na die verlede te verlang, beteken jy verloor. Jy kan tog nie daarheen teruggaan nie Eer die verlede, leef in die hede en beplan vir die toekoms.
• Is vol kerke ‘n teken van herlewing of geestelike ontwaking? Kerkgebou moet leeg word; lidmate moet uit in die gemeenskap wees om daar te dien en die woord te verkondig.

Ons wêreld het nie groter of voller kerke nodig nie. Wat ons nodig het is veranderde lewens, families,stede en lande. Dit kan jy nie regkry as jy in kerkgeboue vasgekluister sit nie. Jesus en sy dissipels het nooit kerkbywoning beklemtoon nie. Wat hulle wel beklemtoon het, was dat gelowiges die kerk moet wees – hulle moet in die wêreld uitgaan.

Kerk gaan nie oor ‘n gebou vol maak nie, maar oor die gemeenskap met die goeie nuus van Jesus se liefde te vul. Kerk beteken uitgaan en nie net intrek nie. Natuurlik is dit wonderlik as die kerkgebou vol entoesiastiese gelowiges wat God aanbid, is. Maar dit kan nooit die doel wees nie. ‘n Vol kerk is ‘n instrument wat God gebruik om die wêreld te bereik – nooit dié doel nie.

Miskien moet ons die gesondheid van ons gemeentes meet deur hoe ons ons kerkgeboue leegmaak en nie net vol maak nie.