In this age, telling the truth is tough business and not for the fainthearted. —Albert Mohler

‘n Bietjie waarheid

Ravi Zacharias vra ‘n interessante vraag: Is daar nog kontakpunte tussen die kerk en die gedensentifiseerde kultuur waarin ons woon? Paulus is op pad na Rome. Hy staan voor Feliks om homself te verdedig (Handelinge 24). Tertullus  is die aanklaer. Hy is klaar met sy toespraak. Paulus moet nou sy saak stel. Hy verseker vir Feliks dat hy geen wette oortree het of mense tot oproer  aangehits het nie. Hy glo dat die ware rede vir die teenstand teen hom is dat hy ‘n volgeling van Jesus Christus wat opgestaan het, is. Feliks, wat die besonderhede in verband met die leer van Christus taamlik goed geken het, onderbreek die verhoor. Wanneer Lisias, die kommandant, kom, sal ek julle saak afhandel.

Feliks en sy vrou Drusilla, ‘n Jodin,  laat na ‘n paar dae vir Paulus kom om meer van hom te hoor oor die geloof in Christus Jesus. Paulus praat met hom oor ‘n lewe van gehoorsaamheid aan God,, oor selfbeheersing en oor die komende oordeel.  Feliks word bang en eindig die gesprek net daar. Intussen het hy gehoop dat Paulus hom omkoopgeld sou aanbied.

Ons moet nadink oor die verskillende maniere waarop God mense as sy instrumente vorm. Hoe kan God iemand so eenvoudig gebruik om groot dinge te laat gebeur? Paulus het waarskynlik dieselfde vraag gevra. Paulus se agtergrond plaas sy vormingsproses in perspektief. Hierdie proses het begin lank voor hy voor Feliks moes verskyn. By sy bekering sê God vir Ananias om na Paulus toe te gaan, want Ek het hom gekies as my werktuig om my Naam uit te dra onder die heidennasies en hulle konings en ook onder Israel. Ek self sal vir hom wys hoeveel hy vir my Naam moet ly (Handelinge 9:15 – 16). Tog uit hom vloei ‘n derde van die Nuwe Testament. Wat het God in hom gedoen? Hoe verstaan ons die metodes wat hy gebruik het en kan ons daar iets kry vir vandag?

Ons moenie dink dat dit makliker was in Paulus se tyd as vandag nie. Hy het ook voor groot uitdagings gestaan – veral in Korinte. En nou kom hy voor Feliks te staan. Die eerste ding waaroor hy praat is ‘n lewe van gehoorsaamheid. Paulus praat met iemand wat allermins ‘n lewe van gehoorsaamheid geleef het oor ‘n lewe van gehoorsaamheid.

Wat ons kultuur nodig het is nie argumente vir Christus nie maar ‘n lewe wat vir Hom geleef word – met passie. Mense moenie net hoor nie, maar ook sien. Onthou ons leef in ‘n konteks – die postmodernisme – wat met sy oë hoor.

Mahatma Gandhi aan die sendeling E. Stanley Jones: Don’t attempt to propagate your faith; just live it. Be like a rose, which, without a word, silently exudes its perfume and attracts the attention of the people.

Ek vernietig my gemeente

Daar is baie gemeentes wat groei en goed doen en ‘n paar jaar later het hulle ernstige probleme. Hoe verander ‘n gemeente van gesond na dood binne ‘n paar jaar? Paulus het die antwoord in 2 Timoteus 4. Hy kyk na die toekoms en sien ‘n kerk wat vernietig word. Die kerk word vernietig deur mense wat voorgee dat hulle in die Naam van Jesus optree.

Daar is een belangrike punt wat ons moet raaksien: die gemeente vernietig homself. Dit is nie vervolging of druk deur die kuultuur wat die gemeente vernietig nie. Die kerk word van binne vernietig. Kom ons kyk na die vier stappe wat tot die gemeente se ondergang gelei het.

• Hulle het die waarheid verwerp

Want daar sal ‘n tyd kom wanneer wanneer die mense die gesonde leer nie meer sal verdra nie. Die eerste stap in die vernietiging van ‘n gemeente is as ons ons rug op die waarheid draai. – as ons belangstelling in die waarheid soos God dit openbaar verloor. Harte begin verhard.

• Mense wat die waarheid praat, word verwerp

Soos hulle hulle rug op die waarheid draai, sal mense ook teen diegene wat die waarheid verkondig draai. Dit is nie dat mense nie weet wat die waarheid is nie – hulle kan dit net nie verdra nie.

• Hulle sal vals leermeesters aanhang

Hulle het die waarheid verwerp; hulle het die leermeesters wat die waarheid verkondig, verwerp. Wat nou? Hulle sal hulle eie begeertes volg en vir hulle leermeesters bymekaarmaak wat net sal sê wat hulle graag wil hoor. Die direkte vertaling sê: omdat hulle juk ten opsigte van die oor – pragtige beeldspraak van Paulus. Dit is ore wat wil hoor wat vir die samelewing aanvaarbaar is. Hulle sal gou so ‘n tipe leermeester kry.

• Hulle sal ‘n vals leer aanvaar

Hulle sal die waarheid nie wil hoor nie en hulle tot verdigsels wend.

Op die nou pad na verlossing is daar nie plek om af te dwaal nie. As hulle die waarheid verwerp het, sal hulle hulle tot verdigsels wend – hulle aan die dwaalleer oorgee. Hulle sal afdwaal soos skape sonder ‘n herder; hulle  word so in die sonde verhard dat hulle glo dat wat verkeerd is, reg is. Op die breë pad na vernietiging is daar baie plek om af te dwaal.

As dit in ‘n gemeente gebeur moet so ‘n gemeente doodgaan. Maar Paulus gee vir Timoteus ‘n opdrag wat sy gemeente van ondergang sou red. Wat is Paulus se oplossing: Preek. Die gemeente wat getrou aan God bly, is die gemeente wat getrou aan God se woord bly. ‘n Gesonde gemeente is ‘n gemeente waar die woord van God verkondig word.

In 2 Timoteus 4:2 kry ons Paulus se opdrag vir die soort prediking wat God vergheerlik en die gemeente beskerm.

• Verkondig die woord

Prediking is net kragtig as dit getrou aan die Woord is. Die krag van prediking kom van die bron van prediking. Die punt in die teks moet die punt in die preek wees. Leermeesters moet hulle beperk tot God se woord. Wat nodig is, is ‘n leermeester met ‘n oop Bybel en ‘n gemeente met oop Bybels.

• Hou daarmee vol, tydig en ontydig

Mense wil nie meer hoor wat die woord sê nie – hulle wil weet hoe kan ons die problemne van die lewe oplos. Moenie in hierdie strik trap nie – hou vol om die woord te verkondig.

• Verkondig die woord prakties

 Weerlê, bestraf, bemoedig. Onderrig moet ‘n praktiese dimensie hê. Onderrig moet ons leer van God, maar ook hoe ons Hom kan eer en verheerlik. Lering moet mense se lewens verander en tot heiligheid aanspoor. Ons moet dwaalleer weerlë en bestraf. Dit is om mense te bemoedig in daardie dinge wat God eer.

• Gee onderrig met geduld

Met alle geduld. Leermeesters moenie moeg word of vertroue verloor in hulle onderrig nie. die beste leermeesters is dié wat geduldig is en wat vir lang tye kan volhou. Ons moet mense stadig lei  om in kennis en heiligheid te groei.

Daar is baie gemeentes wat agteruitgaan. Hoekom? Geld een van Paulus se waarskuwingstekens nie vir die gemeente nie? Maak dit reg. Keer terug na God se woord.

“We want to make certain that we view culture through the eyes of faith, that we don’t view our faith through the eyes of culture.” – Stephen D. Livesay

Ons wil iets doen

In ons Westerse kultuur wil ons graag dinge so gou as moontlik doen. Soms lei dit tot groot dinge; soms lei dit tot chaos. Hoe gaan ons te werk:

• Observeer – kry ‘n prentjie van wat aangaan.
• Reageer emosioneel op ons verstaan van wat besig is om te gebeur.
• Oordeel – maak gevolgtrekkings gebaseer op ons verstaan van die saak en hoe dit ons laat voel.
• Tree in – neem besluite en doen iets gegrond op wat ons sien en voel.

Gewoonlik is die probleem dat ons nie genoeg tyd aan observasie spandeer nie – ons probeer nie om die uitdaging voor ons te verstaan nie; ons stel nie vas watter hulpbronne beskikbaar is nie. Ons wil net iets doen. Die nadenkers onder ons word totaal oorweldig deur die lawaai en chaos deur diegene wat iets wil doen.

Hoekom gebeur dit? Observasie is moeilik as daar dringende probleme is. Rasionele denke word deur emosies verplaas. Hoe kan jy hierdie stap – observasie – verbeter?

• Kry al die feite oor die aard en omvang van die probleem. Raak ontslae van gevoelens totdat jy die nodige feite versamel het.
• Stel vas watter hulpbronne en vaardighede  jy tot jou beskikking het – wie kan wat doen.
• Bepaal wat jy oor die situasie en die mense betrokke aanvaar. Toets die geldigheid van dit wat jy aanvaar. Aanvaarding van sekere dinge verhoed dikwels dat jy die ware aard van die probleem kan vasstel.
• Maak plek vir baie vrae en ‘n verskeidenheid van stemme. Luister na elkeen wat iets te sê het. Dit is dikwels die een wat van die meerderheid verskil wat met die oplossing na vore kom.

Spanwerk vereis voldoende tyd vir observasie en kritiese denke. Om sonder om te dink, op te tree, mag aanvanklik goed lyk, maar sal later regstelling vereis – iets waarvoor jy dalk nie die nodige tyd sal hê nie.

God did not fix me up so that I couldn’t sin. He fixed me up so that I couldn’t sin and enjoy it – Henry Clay Morrison

Augustinus en gebed

Anicia Faltonia Proba was ‘n Romeinse edelvrou en Christen. Sy  het vir Augustinus geken. Ons het nog twee briewe wat Augustinus aan haar gskryf het. Een daarvan handel oor gebed. Proba het aan Augustinus geskryf omdat sy bang was dat sy nie reg gebid het nie. Augustinus reageer met verskeie beginsels vir gebed. Van hierdie beginsels is nie wat ons sou verwag nie.

• Voordat jy oor die vraag wat om te bid en hoe om te bid kan nadink, moet jy eers ‘n besondere soort persoon wees. Wat is dit? Jy moet eers besef hoe verlate en eensaam jy in hierdie wêreld is – maak nie saak hoe voorspoedig jy is nie. Maak nie saak wat jou aardse omstandighede is nie, dit kan nie vir jou vrede en vreugde bring nie. Vertroosting kry die mens net by God. As ons nie hierdie waarheid besef nie, sal al ons gebede van geen waarde is nie.
• Jy kan begin bid. Waarvoor? Dit waarvoor al die ander mense bid: ‘n gelukkige lewe. Die probleem is egter wat vir jou ‘n gelukkige lewe sal bring. Daar is baie dinge wat dalk vir jou kortstondig gelukkig sal maak, maar nie permanent nie. Hy sê die psalmis het geweet wat vir die mens ‘n gelukkige lewe kan waarborg: Net een ding het ek van die Here gevra en dit sal ek najaag: dat ek my hele lewe lank in sy huis mag woon om sy goedheid te belewe en daaroor na te dink in sy tempel (Psalm 27:4). Dit is die basiese gebed vir ‘n gelukkige lewe. Dit beteken nou nie dat dit al is waarvoor ons moet bid nie. Die Ons Vader gebed wys vir ons dat ons baie dinge nodig het, maar God is ons grootste liefde. As Hy ons grootste liefde is en om Hom te ken en te gehoorsaam ons grootste vreugde is, sal ons verander word in hoe en waarvoor ons bid. Hy haal Spreuke 30:8 aan as voorbeeld: Moet my nie arm maak of ryk nie, gee my net die kos wat ek nodig het. Soek jy vir God in gebed op om voldoende finansiële hulpbronne te kry – of soek jy die aantal hulpbronne wat jy nodig het om God te ken en te dien.
• Jy sal gelei word om reg te bid vir ‘n gelukkige lewe as jy die Ons Vader gebed bestudeer. Dink lank en hard na oor hierdie modelgebed en maak seker dat dit waarvoor jy bid daarby inpas. Doen jy dit sal jy soms skaam voel oor die dinge wat jy vra.
• Selfs al volg ons die eerste drie reëls sal ons gevalle van swaarkry nie weet wat om te bid nie. Lyding kan ons goed doen en juis omdat hulle moeilik en swaar is, bid ons dat dit van ons weggeneem moet word. Augustinus verwys dan na Jesus se eie gebed in Getsemane. Hierdie gebed was volkome gebalanseerd tussen sy eerlike begeerte (Vader, as U wil, neem tog hierdie lydensbeker van My af weg) en onderwerping aan God (Laat nogtans nie ny wil nie maar u wil geskied).

Alicia Proba was ‘n weduwee vroeg in haar dertigs. Sy moes vlug toe Rome in 410 verwoes is. Sy en haar skoondogter vlug na Afrika waar sy vir Augustinus ontmoet het. Augustinus sluit sy brief af deur te sê dat die werk van gebed vir al van waarde is vir weduwees in haar toestand. Hy vra haar dan om haar lewe aan God in gebed as haar skild op te offer.