There is no colour in this world that is not intended to make us rejoice – Johannes Calvyn

Karl Barth en die Skrif

Kark Barth was waarskynlik die grootste teoloog van die vorige eeu. Sy bekendste werk was sekerlik sy Church Dogmatics. Eendag het sy studente ‘n debat gevoer oor die metode wat hy in sy boek gebruik het. Die debat was warm en het meer as ‘n uur geduur. Barth het daar een kant gesit, sy pyp gerook en en elke af en toe van sy wyn gedrink. [Lekker universiteit waar die professor sy pyp kan rook en sy wyn kan drink in die klas.]  Hy sê nie ‘n woord nie.

Een van die studente onthou toe dat Barth in die klas sit. Die student draai na Barth en vra vir hom watter metode hy gebruik het.

Vir sekerlik ‘n minuut was alles doodstil voordat Barth geantwoord het: Wat ek probeer doen het in my boek was om te luister na wat die Skrif sê en vir julle te vertel wat ek hoor.

Eenvoudig, maar waar. Is dit nie ook wat ons moet doen nie – luister wat die Skrif vir ons sê en vertel dit vir ander.

God is most glorified in us when we are most satisfied in Him – John Piper

Hoekom moet ek wyd lees?

Ons raak gemaklik as ons net binne ons eie kerkverband lees. Almal maak dieselfde gevolgtrekkings. Maar ons kan te stamgebonde word – ons plant ons pilaar in die grond en gebruik dit om ander mee aan te val. Ons moet wyd lees en dus ook wyd leer. Ons moet uit ons gemaksone kom.

• My onderskeidingsvermoë

Dit is nogal uitdagend om deur ‘n boek te lees wat van my siening verskil. Dit dwing ons om te probeer agterkom wat die skrywer wil sê. Ons word gedwing om te probeer vasstel wat waardevol is en wat teen die Christelike leer is; dit verskerp ons onderskeidingsvermoë.

As ek net uit die een perspektief lees, verwerp ek onmiddellik dit wat nie inpas by my denke nie. As ek egter lees met die doel om te verstaan, verskerp my onderskeidingsvermoë. As ek net lees om iets af te breek, gaan ek niks leer nie.

• My trots

Ek vertrou op my eie ondersoeke; ek glo dat ek alle kante regverdig ondersoek het. As ek wyd lees, word hierdie gevoel van meerderwaardigheid gekonfronteer. Ek besef dat ek van ander kan leer – selfs dié wat van my verskil.

• My onkunde

Daar is niks wat my so nederig maak soos wanneer ek besef dat ‘n leerstelling waarvan ek verskil het omdat ek gedink het dat ek dit verstaan het, waar is. Hoe meer ons lees, besef ons dat ons dikwels premature gevolgtrekkings maak – ek oordeel oor dinge wat ek net oppervlakkig ken. Ek kan ook nie net op die oordeel van mense wat net soos ek dink vertrou nie. Ons moet leer van diegene wat ‘n spesifieke standpunt inneem. As ek wyd lees, mag ek uitvind dat daar ook ander dinge is wat ek moet oorweeg. Dit beteken nie dat ek my siening gaan verander nie, maar ten minste word my oortuigings deur deeglike studie ondersteun.

• My familie

Daar is net een liggaam van Christus met baie lede. Dikwels word ons nederig as ons sien hoe diegene wat van ons verskil aan die Here toegewy is. Dit bemoedig ons ook, want wat hier werklik ter sake is, is ons liefde vir God en ons naaste. Jesus het immers gesê dat hoe ons teenoor ander optree ‘n onderskeidingsteken van sy dissipels is. As ek wyd lees, herinner dit my daaraan dat daar ook ander lede van die familie is – hulle studeer ook; hulle wil ook die waarheid ken; hulle is ook oortuig van hulle gevolgtrekkings.

Natuurlik is daar ‘n lyn wat ons nie kan oorsteek nie. Daarom lees wyd, soek vriende wat aan ‘n ander denominasie behoort, luister na wat hulle sê om van hulle te leer nie net om hulle te kritiseer en reg te help nie.

The sure road to unbelief is not rebellion but forgetfulness – Os Guinness

Hoe weet ek dat die Bybel die geïnspireerde Woord van God is? (2)

Kom ons kyk na vier bewyse dat die Bybel wel die geïnspireerde Woord van God is.

1. A.Profesieë wat vervul is

Hier is ‘n lang lys. Kom ons kyk na slegs enkeles:

• Maar jy Betlehem-Efrata, jy is klein onder die  families in Juda, maar uit jou sal daar iemand kom wat aan My behoort en Hy sal in Israel regeer. Sy begin lê ver terug in die gryse verlede (Miga 5:1). Hier kry ons dat Miga ongeveer 700 jaar voor die geboorte van Jesus Christus reeds akkuraat sy geboorteplek, Betlehem,  profeteer.
• Ek sê vir Kores: Ek het jou as herder aangestel, jy moet my wil uitvoer, jy moet van Jerusalem sê: “Hy moet weer opgebou word en die tempel moet herstel word.” (Jesaja 44:28). Ongeveer 150 jaar later kondig Kores ‘n proklamasie af wat die Joodse ballinge in staat stel om na hulle land terug te keer en die tempel te herbou.
• Jesus het nie minder as drie maal vir sy dissipels gesê dat Hy sal sterwe, en na drie dae weer sal opstaan. Dit gebeur presies so.
• Hier sal nie een klip op die ander bly nie; alles sal afgebreek word (Matteus 24:2). Dit is deel van Jesus se profetiese rede waarin Hy onder andere sê dat die tempel afgebreek sal word – iets wat die Jode hewig ontstel het. In die jaar 70 nC word die tempel deur die Romeine afgebreek.

Hierdie is maar enkele voorbeelde van profesieë wat later vervul is.

1. B.Manuskrip bewyse.

Daar is baie bewyse dat die oorspronklike manuskripte van die Bybel baie akkuraat gereproduseer is. Dit is sekerlik een van die betroubaarste werke uit die antieke tyd. In vergelyking met ander boeke is daar baie meer manuskripte. Baie van die Bybelse manuskripte word ook kort na die gebeure gedateer. Ook die kerkvaders het baie uit die Skrif aangehaal.

As ons die verskillende manuskripte vergelyk, is daar min verskille. Baie van die verskille is onbewus gedoen: ‘n woord of sin word herhaal of weggelaat, woorde word met soortgelyke woorde vervang, spelfoute ens. Nie een van hierdie afwykings beïnvloed enige kernelement van die woord nie.

Tussen 1947 – 1956 word daar in elf grotte langs die Dooie See 227 dokumente ontdek. Hulle dateer uit die jare 175 – 150 vC. Hierdie dokumente bewys dat die Ou Testament baie akkuraat behoue gebly het.

1. C.Jesus Christus se siening van die Skrif

Hierna het ons reeds vantevore gekyk. Jesus sien die Skrif as die woord van God en as Seun van God moet sy siening tog baie gewig dra.

1. D.Argeologiese bevindings

Baie argeologiese bevindings bevestig die geskiedkundige akkuraatheid en betroubaarheid van die gebeure wat in die Bybel beskryf word. Argeologiese bevindings kan nie sê dat die Bybel die Woord van God is nie, maar dit beantwoord wel die kritici wat beweer dat die Bybel ‘n versameling legendes  sonder enige historiese basis is.

Daar is oorgenoeg bewyse vir ons om te aanvaar dat die Bybel die woord van God is.

Sometimes God allows what He hates to accomplish what He loves – Joni Ereckson Tada

Wat belemmer die gemeente se aanbidding?

Ons kom met allerhande verskonings na vore: Ons orrelis is swak; die liturgie druk my dood; die prediker inspireer my nie; ons gemeente is te groot/te klein … Beplanning, ‘n goeie orrelis en goeie leierskap is belangrik, maar die grootste belemmering lê nie buite onsself nie, maar in ons. Dit is afgodery.

Liewe kinders, bly dus weg van die afgode af (1 Johannes 5:21). God se heerlikheid moet die bron van ons blydskap, tevredenheid en hoogste gesag wees. Afgodery kan in die kerk teenwoordig wees. As ek dink dat ek nie God sonder X kan ontmoet nie en X is iets anders as Jesus Christus en die Heilige Gees is, is X ‘n afgod.

Natuurlik gebruik God instrumente om Homself te openbaar – sy woord gelees en verkondig, liedere, gebed, die geloofsgemeenskap, ens. Maar as ons die uitvoering van hierdie instrumente die basis van ons verhouding met God maak, plaas ons ‘n onnodige hindernis in ons verhouding met God. Nou woon ons die erediens as verbruikers en regters by – nie as dankbare ontvangers en dienaars nie.

Kom ons kyk na ‘n paar van hierdie Sondagoggend afgode:

• Uitmuntende musiek

Swak musiek kan ons aandag aflei. Goeie musiek word aanbeveel in die Bybel: Sing vir Hom ‘n nuwe lied, speel met volle oorgawe, jubel dit uit (Psalm 33:3). Maar in plaas van net kritiseer, kan ek God dank en my daaraan herinner dat ek offers moet bring wat deur Jesus Christus vir God welgevallig is (1 Petrus 2:5). Ek moet onthou dat selfs die beste vertoning nie vir God welgevallig sal wees as Jesus Christus nie daarin teenwoordig is nie.

• Musiekvoorkeure

Die beste musiek is nie noodwendig dit waarvan ek hou nie. Geen lied moet ons daarvan weerhou om God te verheerlik nie. Ek verheerlik God meer as ek my daarin verheug dat ander voordeel uit die lied kry – al is dit nou nie my keuse nie.

• Die preek

Alle predikers is nie ewe begaaf nie So lank as wat hulle die evangelie verkondig en God se wil getrou kommunikeer is hulle gehoorsaam aan God en ons kan ons daarin verheug. Spurgeon se oupa het gesê dat iemand dalk die evangelie beter kan verkondig, maar hulle kan nie ‘n beter evangelie verkondig nie. Bemoedig en bedank jou plaaslike prediker.

• Kreatiwiteit

Kreatiwiteit is nooit ons doelwit as ons God aanbid nie. Dit is slegs ‘n middel wat ons kan gebruik om die heerlikheid van God duideliker te maak. Dit mag aan ons ‘n nuwe perspektief gee en daartoe lei dat die waarheid ‘n groter impak op ons het. Maar as ons bekommerd is dat ons aanbidding nie “cool” is nie, moet ons altyd onthou dat die evangelie altyd goeie nuus is.

• Ondervindings

Die doel van die samekoms van die gemeente is om iets te sien en te onthou. Daardie iets is die woord, werke en heerlikheid van God soos Hy Hom in Jesus Christus geopenbaar het. As ek net emosie soek tydens ‘n erediens word God een van verskeie opsies waar ek emosie kan soek.

• Liturgie

Ons byeenkomste weerspieël en vorm dit wat ons glo. Daar is geen liturgiese perfeksionisme waarna ons kan streef om ons aanbidding meer aanvaarbaar vir God te maak as wat dit reeds in Jesus Christus is nie. Ons doel is om in geloof dit te doen wat God verheerlik. Liturgieë moet ons dien en nie beheer nie. God laat vryheid in vorm toe en daarom moet ons dit ook doen.

Elke keer as ons bymekaar kom, is dit ‘n geleentheid om ons in God de genade wat in die gekruisigde en opgestane Christus geopenbaar is, te verheug. Ons moenie dat afgode ons weerhou daarvan  om vreugde te ondervind omdat ons sondes vergewe is en ons met God versoen is nie.