I am never better than when I am at full stretch for God – George Whitefield

Die nuwe Fariseërs van vandag

Paul Louis Metzger sê dat Paulus probleme met die Fariseërs gehad het. Die Fariseërs het op uitwendige godsdienspraktyke gefikseer – hulle het vertroue in hulle eie prestasies gehad. Dit verplaas opregte vertroue in God as die basis van ons vertroue. Van die godsdiensleiers in Paulus se tyd wou veral die nie-Joodse Christene oortuig dat geloof + besnydenis = verlossing. Vir Paulus was dit onaanvaarbaar. Hy bespreek die probleem in Filippense 3:1 – 21.

Ons bespreek nie meer die belang van die besnydenis nie, maar ons het probleme met ‘n subtiele vorm van prestasie-gedrewe geestelikheid. Dit is niks nuut nie. Paulus het net ‘n ou vorm hiervan ondervind. Vandag is dit net baie meer subtiel.

Ons ignoreer die diepte en kompleksiteit van die lewe en dit lei tot ‘n statiese, prestasie georiënteerde geestelikheid – ons moet net al ons dingetjies agtermekaar kry.

Ons sien dit dikwels in ons bespreking van sterk kerkleiers. Ten spyte van sy krag in Christus was Paulus swak – doelbewus soos ons in 1 Korintiërs 2 en 2 Korintiërs 11 en 12 lees. Paulus het nie sy krag in sy persoonlikheid of sy leierskap gevind nie. Lees net weer Filippense 3:1 – 6. Paulus sou ook op uiterlike dinge kon vertrou het, maar hy plaas sy vertroue in Christus: Maar wat eers vir my ‘n bate was, beskou ek nou as waardeloos ter wille van Christus. Diegene wat glo, het immers die ware besnydenis – hulle dien God en sy Gees en vertrou nie op uiterlike dinge nie. Hierdie was nie vir Paulus ‘n akademiese debat nie. Die mense wat Paulus hier uitdaag, was nie buite nie, maar binne in die kerk.

Hoeveel vertroue het ons in God se liefde of vertrou ons steeds op ons eie prestasies?

Sanctification is not a mood condition, but the submission of our wills to the will of God. —Sinclair Ferguson

Ek lees, maar onthou niks nie

Om ‘n boek te lees, kan soms baie frustrerend wees – die inligting sweef deur jou brein en haak nêrens in jou geheue vas nie. Kan ons iets daaraan doen? Daar is programme beskikbaar om jou te help. Een daarvan is die 3-Stap program. Geheue bestaan uit drie komponente: Indrukke, Assosiasie en Herhaling. Soms is ‘n enkele komponent genoeg om iets te memoriseer, maar dit is beter om al drie saam weef. Kom ons kyk na hierdie komponente.

• Indrukke

As ek baie met iets beïndruk is, is die moontlikheid dat ek dit sal onthou groter. As jy byvoorbeeld ‘n boek oor Martin Luther lees en jy is baie beïndruk met iets wat hy gedoen het, is die moontlikheid dat jy hierdie aspek gaan onthou groter. Jy kan die sterkte van hierdie indruk versterk terwyl jy lees. Hou op met lees en vorm vir jou ‘n beeld van die situasie in jou gedagtes. Jy kan selfs sekere eienskappe van die situasie oordryf om die indruk verder te versterk. Jy kan ook die indruk verder versterk deur dit hardop te lees. Sommige mense is meer sensitief vir indrukke veroorsaak deur klank as sig.

• Assosiasie

As jy dit wat jy lees met iets wat jy reeds weet kan verbind, word die moontlikheid dat jy dit gaan onthou groter. Probeer die data wat jy lees, verbind met iets wat jy weet en nie sommer sal vergeet nie. Hoe meer jy van ‘n onderwerp weet, hoe makliker is dit om meer te leer van daardie onderwerp, want dit is makliker om nou assosiasies te maak.

• Herhaling

Hoe meer jy herhaal, hoe meer onthou jy. As jy ‘n boek lees, is dit goed om belangrike dele te onderstreep – jy kan na hulle terugkom en hulle weer lees. Jy onthou hierdie gedeeltes beter. Wat interessant is, is dat hulle jou help om die res van die boek ook beter te onthou.

Jy kan jouself leer om beter te onthou deur hierdie drie stappe te gebruik.

God had one son on earth without sin, but never one without suffering (Augustinus).

Martin Luther se donker oomblikke

Martin Luther het ook sy donker tye gehad. Dan het hy hom vir dae lank toegesluit. Sy familie het alle gevaarlike implemente verwyder, want hulle was bang dat hy homself sou seermaak. Te midde van een van hierdie tye het sy vrou, Katharina, haar rouklere aangetrek Toe sy Luther se kamer inkom, was Luther ontsteld. Hy wou weet wie gesterf het Sy antwoord dat niemand dood is nie, maar dat hy so optree dat sy gedink het God is dood.

Gelowiges is nie van terneergedruktheid of depressie vrygestel nie al strewe hulle na die dinge daarbo waar Christus is (Kolossense 3:1). In 1 Korintiërs 7:6 sê Paulus dat hy neerslagtig is. Die bekende prediker Spurgeon het sy gemeente geskok toe hy van die kansel sê: “I am the subject of depressions of spirit so fearful that I hope none of you ever get to such extremes of wretchedness as I go to.” John Donne noem dit “the damp of hell.” Depressie is al genoem “die verkoue van die siel,” want vroeër of later kry almal dit.

Gelowiges moet versigtig wees hoe hulle mense met depressie hanteer. Moenie vir hulle preek nie, moenie vir hulle sê dat hulle geloof te min is nie. Wees net daar as hulle jou nodig het.

Satan will seldom come to a Christian with a gross temptation. A green log and a candle may safely be left together, but a few shavings, some small sticks, and then larger, and you may bring the green log to ashes (John Newton).

As dinge baie ingewikkeld raak, onthou die basiese dinge

Ons hardloop die wedloop, maar oor ‘n gedeelte van die baan voor ons, is daar ‘n digte mis. Ons was nog nie daar nie. Klink bekend? Tegnologiese vooruitgang en morele agteruitgang is besig om te versnel. Dit gaan so vinnig ons weet nie wat om te doen en waarheen om te gaan nie. Die probleem: dit gaan nie makliker word nie. Die ondenkbare is nou moontlik. Die druk van die kultuur gaan toeneem en ons moet aanvaar dat ons gaan verskil van die res van die wêreld – en dit gaan ons ongemaklik laat voel en ongewild maak.

Trevin Wax sê dat ons nie weet wat vir ons voorlê nie, maar wat hy wel weet, is dat as dinge baie ingewikkeld word ons na die basiese dinge moet terugkeer.

• Die wêreld wat God gemaak het, is goed. Hy het ‘n plan daarvoor. Ons is op pad.
• Die wêreld is gebroke. Ons het al almal teen ons liefdevolle Vader in opstand gekom. Ons is verlore.
• God bewys sy liefde vir ons dat selfs in ons sondigheid en opstand Hy vir Christus gestuur het om vir ons te sterf.
• Die wêreld sal verlos woord. Die gelukkige einde is verseker al mag daar tussenin donker tye kom. En wat daarna kom, sal nooit eindig nie.

Die lewe is ingewikkeld; ons keuses is nie maklik nie; as ons getrou aan Hom in hierdie nuwe wêreld wil woon, sal ons wysheid van Bo nodig hê.

Sekere dinge gaan nie verander nie.

• God het steeds sy kinders lief; God het sy kerk lief; Jesus se dood beteken vergifnis.
• Ons word opgeroep om ons naaste lief te hê. Soms is dit maklik, maar soms is dit moeilik.
• Die wêreld het Jesus steeds nodig; die evangelie is steeds kragtig; die kerk is steeds op ‘n sending.
• Daar is ‘n stad wie se fondamente nie geskud kan word nie. Maar daar is ook ‘n stad wat deur mense gebou word en wat reik na die hemel – soos Babel van ouds. In watter stad is jy gemaklik?

Jesus red. Ons moet God en ons naaste liefhê. Die basiese dinge verander nooit nie.