PSALM 6 (3)

PSALM 6 (3)

[Ek gaan dwarsdeur van die Nuwe Testament en Psalms. ‘n Direkte Vertaling van die Bybelgenootskap van Suid-Afrika (2014) gebruik maak.] Ek gaan ‘n paar blogs aan hierdie psalm spandeer.

Billy Graham lees elke maand al 150 psalms. Vir hom het hulle duidelik ‘n besondere betekenis. Meeste van ons, ek ingesluit, lees die psalms nie so sistematies nie – ons pik hier en pik daar. Daarom het ek besluit dat ek hierdie jaar ‘n bietjie dieper in die psalms wil delf. Ek het veral gebruik gemaak van John Goldingay se drie-volume kommentaar – Psalms.

36:6 – 11: God.

⁶Here, u liefde reik tot in die hemel, u trou tot in die wolke,

⁷u geregtigheid tot op die hoogste berge, die reg wat U spreek, tot in die dieptes van die see. U sorg vir mens en dier, o Here.

⁸Hoe kosbaar is u trou, o God! U beskerm die mense wat by U skuil.

⁹In u huis geniet hulle oorvloed, U laat hulle drink uit die strome van u goedheid.

¹⁰U is die bron van die lewe, deur u lig lewe ons.

¹¹Laat u liefde bly by dié wat U erken en u trou by dié wat opreg is.

Lynreg teenoor die kwaad van die goddelose staan die goedheid van God. Sy liefde en trou reik tot in die wolke; sy reg en geregtigheid is dieper as die see; die Here sorg vir al wat lewe; Hy beskerm gelowiges teen hulle vyande; Hy laat hulle eet en drink uit die oorvloed van sy genade. Hy is vir hulle die bron van die lewe. Lewe kom net van God af – sy lig is lewe. Daarom bid die psalmis: Laat u liefde bly by dié wat U erken en u trou bly by dié wat opreg is. God se trou en liefde bly vir altyd en is oral.

Anders as die opstandige het die gelowige niks oor homself te sê nie. Om die waarheid te sê Here is die eerste woord in hierdie gedeelte.

36:12 – 13: Die gelowige se gebed.

¹²Laat my nie onder die voete van eiegeregtige mense beland nie,

moenie dat goddeloses my hier wegdryf nie!

¹³Dié wat altyd onreg doen, val net daar waar hulle is;

hulle word platgeslaan en kan nie weer opstaan nie.

Na sy vergelyking tussen God en die goddelose bid die gelowige tot God vir sy liefde en trou. Hy vra dat God hom nie aan die goddeloses se genade moet oorlaat nie. Hy sluit sy gebed af met ‘n oordeel oor die goddeloses: Hulle sal val net daar waar hulle is; hulle word platgeslaan en kan nie weer opstaan nie.

Hierdie verse kan as ‘n koor beskou word – die gemeente se reaksie op die voorafgaande. Ek het ‘n keuse:

Ek kan my skaar by die goddeloses en dié wat onreg doen. Dit beteken opstand teen God en ondergang; of
Ek kan na die woord van God luister en sy dienaar wees. Dit hou by alles wat goed is, want God is die bron van lewe. Deur Hom lewe die mens.

Psalm 36 (2)

Psalm 36 (2)

[Ek gaan dwarsdeur van die Nuwe Testament en Psalms. ‘n Direkte Vertaling van die Bybelgenootskap van Suid-Afrika (2014) gebruik maak.] Ek gaan ‘n paar blogs aan hierdie psalm spandeer.

36:2 – 5: Die goddelose persoon.

²In die hart van die goddelose het die opstand teen God die laaste woord.

Die goddelose het geen vrees vir God nie

³en praat net goed oor homself.

Hy is altyd daarop uit om kwaad te doen en om te haat.

⁴As hy praat, is dit kwaadwillig en vals; verstandig wees en goed doen bestaan nie vir hom nie.

⁵Selfs as hy gaan lê, dink hy net kwaad uit;

hy bly op ’n pad wat nie reg is nie; wat sleg is, verwerp hy nie.

Die psalmis sê die goddelose is altyd in opstand teen God. Hy het geen vrees vir Hom nie; hy praat net goed oor homself; hy is kwaadwillig en vals, vol haat en onverstandig. Goed doen bestaan nie vir hom nie. Al waaraan hy gedurig dink – selfs as hy gaan lê – is die kwaad. Hierdie beskrywing klink iewat oordrewe, maar die bedoeling is om ‘n kontras te skep met wat volg.

Wie staan onder die oordeel van God? Natuurlik alle mense, want almal is sondaars. Diegene wat teen God in opstand kom, straf hy. Diep in sy hart fluister opstand vir die goddelose mens – hy is nie meer deel van God en die verbond nie Hy dink hy is beheer van sy eie lot. Omdat hy buite die verbond staan, het hy nie meer ‘n ster om hom te lei nie. Hy besef nie die mens se vermoë om homself te verlei nie. Omdat hy buite die verbond staan, besef hy nie dat hy ‘n sondaar is nie en daarom het hy geen vrees vir God nie. Die goddelose dink dat hy al die antwoorde het.

Psalm 36 (1)

[Ek gaan dwarsdeur van die Nuwe Testament en Psalms. ‘n Direkte Vertaling van die Bybelgenootskap van Suid-Afrika (2014) gebruik maak.] Ek gaan ‘n paar blogs aan hierdie psalm spandeer.

Psalm 36 (1)

Hoe kosbaar is u trou, o God! (36:1 – 13)

36 Vir die koorleier. Van Dawid, die dienaar van die Here.

²In die hart van die goddelose het die opstand teen God die laaste woord.

Die goddelose het geen vrees vir God nie

³en praat net goed oor homself.

Hy is altyd daarop uit om kwaad te doen en om te haat.

⁴As hy praat, is dit kwaadwillig en vals; verstandig wees en goed doen bestaan nie vir hom nie.

⁵Selfs as hy gaan lê, dink hy net kwaad uit;

hy bly op ’n pad wat nie reg is nie; wat sleg is, verwerp hy nie.

⁶Here, u liefde reik tot in die hemel, u trou tot in die wolke,

⁷u geregtigheid tot op die hoogste berge, die reg wat U spreek, tot in die dieptes van die see. U sorg vir mens en dier, o Here.

⁸Hoe kosbaar is u trou, o God! U beskerm die mense wat by U skuil.

⁹In u huis geniet hulle oorvloed, U laat hulle drink uit die strome van u goedheid.

¹⁰U is die bron van die lewe, deur u lig lewe ons.

¹¹Laat u liefde bly by dié wat U erken en u trou by dié wat opreg is.

¹²Laat my nie onder die voete van eiegeregtige mense beland nie,

moenie dat goddeloses my hier wegdryf nie!

¹³Dié wat altyd onreg doen, val net daar waar hulle is;

hulle word platgeslaan en kan nie weer opstaan nie.

Tema: Die mens het ‘n keuse: hy kan hom skaar by die goddeloses of hy kan luister na die woord van God en Hom dien.

Die indruk word in 36:8 – 9 geskep dat die psalmis in die tempel wegkruip vir sy vyande. Hy bid dat hulle hom nie uit die tempel sal wegdryf en hom in hulle mag kry nie. Maar die psalmis se gebed is meer as net ‘n klag oor sy toestand of ‘n oproep om verlossing of ‘n dankwoord vir uitkoms. As die dienaar van die Here is die psalmis deur God uitverkies vir ‘n bepaalde taak. Deel van die taak is om mense te onderrig. In hierdie psalm voer hy hierdie opdrag uit. Terwyl hy by God skuil, vergelyk hy God en die goddelose met mekaar. Hy beskryf dus wie die goddeloses is en wat hulle doen en wie die Here is en wat Hy doen.

Psalm 35 sluit af met die psalmis wat homself ‘n dienaar noem. In hierdie psalm word na Dawid as die dienaar van die Here verwys. Hy is beide dienaar en lid van God se verbondsvolk. In hierdie sin moet elkeen van ons onsself as dienaars beskou.

Wat beteken kerk?

Blog35

In order that people may be happy in their work, these three things are needed: they must be fit for it; they must not do too much of it; and they must have a sense of success in it. -John Ruskin, skrywer en sosiale hervormer (1819-1900)

Wat beteken kerk?

As ons sê kerk waarvan praat ons? Die gebou? Die kerkraad? Ons weet dat die kerk dit is wat oorbly nadat die gebou afgebrand het – die mense. Maar wees eerlik: die woord kerk is deur die kultuur gekaap. In hierdie kaping staan die kerk nie onskuldig nie.

Vra vir iemand buite die kerk wat kerk is, kan jy ‘n antwoord kry soos die volgende: “Die kerk is ‘n plek wat goeie dinge doen – hulle gee kos vir die behoeftiges. Hulle is soos ‘n nie-winsgewende organisasie, Die lede van die kerk het hulle eie klub en elke Sondag gaan hulle na hulle klubhuis.” [Jy kan natuurlik ‘n erger reaksie as dit kry!] Hierdie is ‘n probleem. Die kerk is nie gestig as ‘n agentskap om nood te verlig nie. Die kerk is gestig om ‘n organisasie te wees wat dissipels maak.

Bill Tenny-Brittian sê die grootse probleem vandag is dat die woord kerk deur die lidmate gekaap is om min of meer dieselfde te beteken. Die kerk bestaan om “goed te doen” en lyding in die gemeenskap te verlig. Baie lidmate hanteer die kerk as ‘n klub. Maar ‘n klub hanteer sy lede anders as die Bybelse siening van ‘n kerk.

In ‘n klub …

Is lede belangrik – die klub bestaan vir sy lede.
Die meerderheid heers.
Daar word na lede omgesien sodat hulle gemaklik is en hulle voorkeure geniet aandag.
Lede is geregtig.

Dit pas nie in by die Bybelse model van ‘n kerk nie.

In ‘n kerk …

Diegene wat nie lede is nie is dié belangrikste – die kerk bestaan vir die kerkloses.
Wat goed is vir die sending heers.
Lede sien af van hulle persoonlike gemak en voorkeure ten gunste van diegene “wat nog nie daar is nie.”
Lede het verantwoordelikhede.

Die kerk se rede vir bestaan is om dissipels te maak. Daarom moet hulle hulle getuienis deel – hulle moet persoonlik aan ander vertel wat Jesus in hulle lewe en die lewe van ander gedoen het.

Die kerk moet weer die Bybelse model van wat dit beteken om kerk te wees, navolg. Dan sal die kerk weer sy invloed in die kultuur kan uitoefen – en nie andersom soos dit nou is nie.