“I can tell you that, when you are just outside of heaven, all that matters is that you loved and served Jesus” (Bob Pierce).

‘n Gesonde gemeentekultuur

‘n Gesonde kultuur is noodsaaklik in elke gemeente. Maar wat vereis dit?

• Liefde. Ek moet my gemeente en gemeenskap liefhê. Toe Jesus na die skare gekyk het, word Hy met deernis gevul. As ek na die mense om my kyk, is my hart gebreek vir hulle? Ek moet my gemeenskap so liefhê dat ek by hulle betrokke raak en sien hoe hulle verander … een veranderde lewe op ‘n slag. Dit moet vir my lekker wees om te lewe waar ek lewe. Watter impak kan ek op die skole, plaaslike regering, in ‘n krisis, ens hê. Ek is goed om die mense in die gemeenskap te kritiseer. Is ek net so goed om hulle lief te hê? Mense moet weet dat Jesus en die lidmate van die gemeente hulle liefhet.
• Luister. Ek moet ophou vertel en ‘n slag luister. Mense weet of ek van hulle hou of nie deur my gewilligheid om na hulle storie te luister. Mense soek verhoudings. Die samelewing leef in koffiewinkels waar hulle hulle stories kan vertel. Wat moet ek met kerklos mense doen? Sit saam met hulle, luister na hulle, bou ‘n verhouding met hulle.
• Leer. Ek moet vrae vra oor my gemeenskap. Wat is hulle waardes? Watter drome het die mense wat daar woon? Hoe kan ons gemeente hulle bedien op so ‘n wyse dat hulle die liefde van Christus ervaar? Bereik die gemeente die gemeenskap om ons? Werk al die ou metodes wat die gemeente gebruik om mense om hulle te bereik nog? ‘n belangrike les: Die pyn van ‘n gestadigde dood is erger as die pyn van verandering. Die gemeente se fokus moet van binne na buite verander.
• Lei. Baie Christene glo die gemeente is daar vir hulle. Dit is die model wat jare gelede aan hulle verkoop is. Die middelpunt van die kerk is Jesus Christus. Leiers moet die lidmate aan die rede vir hulle bestaan herinner: Om dissipels te maak wat op hulle beurt weer dissipels maak. Dit begin by liefhê, luister en leer – van die groot gemeenskap om die kerk.

Gesonde kulture het lief, luister, leer en lei.

“God, I pray, light these idle sticks of my life and may I burn up for Thee. Consume my life, my God, for it is Thine. I seek not a long life but a full one like Yours, Lord Jesus” (Jim Elliot).

 ‘n Oog vir ‘n oog en ‘n tand vir ‘n tand

Julle het gehoor dat dat gesê is: “’n Oog vir ‘n oog en ‘n tand vir ‘n tand.”  (Matteus 5:38). Jesus mag hier Deuteronomium 19:21 aanhaal. (Ons kry basies dieselfde in Eksodus 21:24 en Levitikus 24:20). Gaan ons na Deuteronomium 19:21 terug, lees ons: Jy mag so ‘n persoon nie genade betoon nie: ‘n lewe vir ‘n lewe, ‘n oog vir ‘n oog, ‘n tand vir ‘n tand, ‘n hand vir ‘n hand en ‘n voet vir ‘n voet. Geen genade nie. Vergelding is nie ‘n opsie nie maar ‘n verpligting.

In Jesus se tyd was daar die Romeinse Lex talionis wat bepaal het dat oortredings gestraf moet word, maar dat die straf by die oortreding moet pas. Jy kan nie sommer buitensporige strawwe oplê vir kleiner oortredings nie. Deuteronomium 19:21 en die Lex taliones sê wat ‘n mens verkeerd gedoen het, moet reggestel word deur dieselfde aan hom te doen – Jy mag so ‘n persoon nie genade betoon nie. Geregtigheid moet wel gebalanseer word – die straf moet by die oortreding pas.

Jesus kom in Matteus 5:38 – 42 met ‘n heeltemal nuwe benadering – bewys genade!  Julle moet julle nie teen ‘n kwaadwillige mens verset nie. In plaas van vervolging en vergelding om die verkeerde te herstel, wys Jesus ‘n ander pad vir ons … bewys genade.

Pinchas Lapide stel dit so:

Weg van konflik na deernis.

Weg van konfrontasie na samewerking.

Weg van ‘n dogmatiese monoloog na ‘n dialoog tussen gelykes

As iemand jou op die regterwang slaan (‘n groot belediging), draai ook die ander wang na hom toe. Dit is vir ons een van die moeilikste gedeeltes in die Bybel om uit te leef

“The Spirit of Christ is the spirit of missions, and the nearer we get to Him, the more intensely missionary we must become” (Henry Martyn).

Jesus se antiteses

[Antitese = bestaande uit twee teenoorgesteldes – HAT]

In Matteus 5:21 begin Jesus met ‘n reeks antiteses.  Julle het gehoor dat daar gesê is … Maar Ek sê vir julle. Jesus se luisteraars het een ding gehoor – dikwels iets wat van die ou tyd af aan die mense gesê is – maar Jesus stel iets teenoor dit. Die klem val hier op Jesus se antitese.

Jesus gebruik ‘n spesifieke metodiek:

• Hy haal die Skrif aan – Jy mag nie moord pleeg nie.
• Jesus interpreteer en brei uit op die stelling: Elkeen wat moord pleeg, is strafbaar voor die regbank.
• Jesus kyk dieper – Hy kyk as ‘t ware agter die Skrif in God se denke in. Ek moenie dink dat Jesus hier die Skrif weerspraak nie. Wat Hy wel doen, is om die mense se interpretasie van die Skrif reg te stel.
• Jesus interpreteer dan wat God se ware bedoeling met die stelling was en sê dan hoe sy volgelinge moet leef. Elkeen wat vir sy broer kwaad is,is al strafbaar voor die regbank.

Wat Jesus hier doen is dat Hy ‘n vollediger uiteensetting van God se wil vir God se mense gee. Jesus sê dat ons nie vir ons broers kwaad moet word nie, want as ons nie kwaad word nie, sal ons ook nie moord pleeg nie.

In hierdie besondere antitese is die doel versoening met ander mense – nie kwaad word vir ander nie, maar versoen jou met hulle.

It ain’t those parts of the Bible that I can’t understand that bother me; it is those parts I do understand – Mark Twain

Julle is die sout vir die aarde

Ons lees hierdie vers in Matteus 5:13. Maar in hierdie gedeelte is daar ook ‘n kragtige waarskuwing: Maar as sout verslaan het, hoe kry ‘n mens dit weer sout? Dit is niks meer werd nie. Dit word buitekant weggegooi, en die mense vertrap dit. Jesus gebruik  ‘n woord wat hier met weggooi vertaal word, wat in die Matteus-evangelie met oordeel verbind word:

• Elke boom wat nie goeie vrugte dra nie, word uitgekap en in die vuur gegooi (3:10).
• Dit is vir jou beter dat net een van jou ledemate verlore gaan as dat jou hele liggaam in die hel gegooi word (5:29).
• Maar die onbruikbares gooi hulle weg (13:48).
• Die engele sal uitgaan en die slegtes skei van die goeies en hulle in die brandende  oond gooi (13:50).

Die soutlose sout word weggegooi. Presies dieselfde gebeur met gelowiges wat hulle impak in die wêreld verloor het – hulle word weggegooi/geoordeel. As die impak wat gelowiges op die wêreld het eers verminder is dit baie moeilik om dit weer terug te wen. Jesus waarsku hier daarteen. As gelowiges hulle impak verloor, volg gevolge. Niemand van ons is volmaak nie, maar almal word opgeroep om getrou te bly.

Dit is die vraag wat ek elke dag vir myself moet afvra: Is ek nog sout vir die aarde of het ek al verslaan?