Die koninkryk van God in die Nuwe Testament: Matteus (4)

“In the secular view, suffering is never seen as a meaningful part of life but only as an interruption.” – Tim Keller

Die koninkryk van God in die Nuwe Testament: Matteus (4)

Die koninkryk van God is ‘n baie algemene tema in die Bybel. Ek gaan ‘n hele aantal blogs gebruik om te probeer vasstel wat dit is en hoekom dit belangrik is. Ek gaan onder ander gebruik maak van The Kingdom of God: Christopher W. Morgan en Robert A. Peterson (reds) 2012.

Vandag kyk ons na die vyfde waarneming oor die koninkryk in die Matteus-evangelie.

5.Die koninkryk staan sentraal in Jesus se bergrede.

Jesus se oriëntasie teenoor die koninkryk verminder nie na die seënuitsprake nie.

Jesus waarsku: Moenie dink dat Ek gekom het om die wet of die profete ongeldig te maak nie (5:17). Enigeen wat die openbaring van God aan Israel verskraal, word deur Jesus tereggewys. Wie dan ook een van die geringste van hierdie gebooie ongeldig maak en die mense so leer, sal die minste geag word in die koninkryk van die hemel (5:19). Later gaan Jesus verder. Hy beskuldig die skrifgeleerdes en Fariseërs dat hulle die gebod van God verontagsaam ter wille van hulle oorgelewerde gebruike (15:1 – 9). Jesus waarsku sy dissipels dat as julle getrouheid aan die wet nie meer inhou as dié van die skrifgeleerdes en Fariseërs nie, sal julle nooit in die koninkryk van die hemel ingaan nie (5:20).
Jesus se oriëntasie ten opsigte van die koninkryk word voortgesit in die gebed wat Hy vir sy dissipels leer: Laat u koninkryk kom; laat u wil ook op die aarde geskied, net soos in die hemel (6:10). Implisiet in Jesus se gebed, en al die gebede van gelowiges, is erkenning van God se heerskappy – die hunkering om dit te sien. Ons moet verstaan dat sy heerskappy beteken dat sy wil gedoen word op aarde net soos ons weet dit in die hemel gedoen word. Bewustheid van die koninkryk is deel van die doeltreffendheid van ons gebede.
Lewe vir ons op aarde is vol ellende en onsekerheid. Dit is maklik om bevrees te word. In die bergrede vra Jesus vir perspektief. Jesus verwys na die wilde voëls en veldlelies om te wys dat God dinge onderhou (6;26 – 28). En dan die vraag: Is julle nie baie meer werd as hulle nie? In plaas van vrees en angs moet ons tevrede wees: Julle hemelse Vader weet tog dat julle dit alles nodig het (6:32). Maar hy gee ook raad: Nee, beywer julle allereers vir die koninkryk van God en vir die wil van God, dan sal Hy julle al hierdie dinge gee (6:33).
Die koninkryk staan sentraal in die hoogtepunt van die bergrede. In die eindgedeelte van die bergrede beskryf Matteus die ontwykendheid van die koninkryk. In 7:13 – 14 verwys Hy na ingaan deur die nou poort (koninkryk word nie spesifiek hier genoem nie) en dan weer in 7:21: Nie elkeen wat vir My sê: ‘Here, Here,’ sal in die koninkryk van die hemel ingaan nie, maar net hy wat die wil doen van my Vader wat in die hemel is. Baie sê dat hulle burgers van God se koninkryk is, maar net diegene wat aan die voorwaardes voldoen, sal ingaan.

Die klem op die koninkryk dwarsdeur die bergrede verklaar die mense se verbasing aan die einde van sy onderrig … want Hy het hulle geleer soos ‘n man met gesag en nie soos hulle skrifgeleerdes nie (7:28 – 29).

Volgende keer kyk ons na verdere waarnemings oor die koninkryk van God in die Matteus-evangelie.

Die koninkryk van God in die Nuwe Testament: Matteus (3)

The most dangerous dissensions in the world have often sprung from rather trifling beginnings. — Huldrych Zwingli

Die koninkryk van God in die Nuwe Testament: Matteus (3)

Vandag kyk ons na die derde en vierde waarneming oor die koninkryk in die Matteus-evangelie.

3.Beproewing in die huidige en vergoeding in die toekoms

In Matteus 5:1 – 12 beskryf Jesus diegene wat werklik gelukkig is. Hy beskryf die identiteit van ‘n dissipel gevolg deur die beloofde voordeel. Die hele gedeelte druis in teen ons intuïsie. Luister net: Geseënd is julle wanneer die mense julle ter wille van My beledig en vervolg en valslik al wat sleg is van julle sê. Hoe kan dit ‘n seëning wees? Die antwoord lê in die voortsetting van God se heerskappy: Want aan hulle behoort die koninkryk van die hemel (5:3); en weer dieselfde in 5:10. In hierdie seënuitsprake bevestig Jesus ‘n toekomstige stand van sake – huidige moeilike omstandighede word in ‘n ander, gunstiger lig geplaas. Aan hulle behoort die koninkryk (teenwoordige tyd) oor iets wat God in die toekoms gaan doen om hulle huidige swaarkry die moeite werd te maak. Daar is dus beide ‘n huidige en toekomstige dimensie aan die koninkryk wat Jesus verkondig.

Later beklemtoon Jesus hierdie punt in ‘n gesprek met mense wat Hom nie goedgesind was nie: Aangesien Ek deur die Gees van God die bose geeste uitdryf, het die koninkryk van God inderdaad tot by julle gekom (12:28). Jesus sê dat die koninkryk van God tot by hulle gekom het – nou reeds. Daar is egter ook ‘n toekomstige dimensie wat alle mense sal beïnvloed – goed of sleg.

4.Dissipels van die koninkryk moet ander beïnvloed en in die openbaar getuig

Nadat Hy sy dissipels verseker het van vertroosting in die toekoms (die seënuitsprake), bespreek Hy die doel van hulle huidige swaarkry.

Julle is die sout vir die aarde (5:13). Jesus het iets spesiaal na persoonlike verhoudings en sosiale situasies gebring. Sy dissipels moet dit ook doen as gevolg van hulle verhouding met Hom.
Julle is die lig vir die wêreld (5:14). Dissipels moet dien as bakens vir die lewe en boodskap van Jesus. Jesus volg dit op met ‘n opdrag: Laat julle lig so voor die mense skyn, dat hulle julle goeie werke kan sien en julle Vader wat in die hemel is verheerlik (5:16).

Sout en lig vir die wêreld word noodsaaklikhede en doelwitte vir Jesus se volgelinge.

Volgende keer kyk ons verder na sekere waarnemings in die Matteus-evangelie

Die koninkryk van God in die Nuwe Testament: Matteus (2)

“Jesus is far too important a figure to be left only to the theologians and the church.” ~Jaroslav Pelikan

Die koninkryk van God in die Nuwe Testament: Matteus (2)

Ons kyk nou ons tweede waarneming oor die koninkryk in die Matteus-evangelie.

2.Koninkryk is van die begin af die sentrale motief in die prediking van Johannes die Doper en Jesus.

Die eerste aangetekende woord van Johannes die Doper se prediking is: Bekeer julle, want die koninkryk van die hemel het naby gekom (3:2). Jode het nooit die Naam van God gebruik nie, maar ander woorde soos hemel – hulle wou nie die Naam van God goedkoop gemaak het nie. Die koninkryk van God en die koninkryk van die hemel is dieselfde. Johannes, soos Jesaja voorspel het, is die voorganger van die Here: Iemand roep in die woestyn: Maak die pad vir die Here gereed, maak die paaie vir Hom reguit.

Koninkryk is ook waar Jesus se prediking begin: Van toe af het Jesus begin preek en gesê: Bekeer julle, want die koninkryk van die hemel het naby gekom (4:17). Die belang van die koninkryk in Jesus se bediening gaan voort: Hy het toe in die hele Galilea rondgegaan en die mense in hulle sinagoges geleer, die evangelie van die koninkryk verkondig en elke soort siekte en kwaal onder die volk gesond gemaak (4:23). Hier lees ons van die evangelie van die koninkryk. Wat is die verband tussen evangelie en koninkryk?

Evangelie beteken goeie nuus. Jesus gebruik dit konsekwent deur sy bediening. Maande na die begin van sy openbare bediening sê Hy weer: Jesus het al die dorpe en klein plekkies besoek. Hy het die mense in hulle sinagoges geleer, die evangelie van die koninkryk verkondig en elke soort siekte en kwaal gesond gemaak (9:35). Toe Jesus se aardse bediening sy einde nader kyk Hy na die toekoms en sê: En hierdie evangelie van die koninkryk sal in die hele wêreld verkondig word, sodat al die nasies die getuienis kan hoor. Eers dan sal die einde kom (24:14). Jesus verbind hierdie goeie nuus nie net met die nasies en die hele wêreld nie, maar ook met individue. Nadat die vrou in Betanië sy voete gesalf het, sê Hy: Oral waar hierdie evangelie in die hele wêreld verkondig word, sal daar ook vertel word wat sy gedoen het, tot ‘n herinnering aan haar (26:13).
Dit verkondig koninkrykstydings. Dit verkondig dat die heerskappy van die God van Abraham, Isak en Jakob nou op ‘n nuwe manier vir ‘n nuwe doel teenwoordig is. Diegene wat siek en hartseer is, word herstel.
Dit word onlosmaaklik aan Jesus as koning verbind. Wat die koninkrykstaal nog belangriker maak, is dit wat dit aandui – Jesus is die koning.

Volgende keer gaan ons na ‘n derde waarneming in die Matteus-evangelie kyk: beproewing in die huidige en vergoeding in die toekoms

Die koninkryk van God in die Nuwe Testament: Matteus (1)

. —C.H. Spurgeon

Die koninkryk van God in die Nuwe Testament: Matteus (1)

Die koninkryk van God is ‘n baie algemene tema in die Bybel. Ek gaan ‘n hele aantal blogs gebruik om te probeer vasstel wat dit is en hoekom dit belangrik is. Ek gaan onder ander gebruik maak van The Kingdom of God: Christopher W. Morgan en Robert A. Peterson (reds) 2012.

In Matteus word van die Ou Testamentiese beloftes oor die koninkryk vervul. Kom ons kyk na enkele waarnemings:

1.Koninklike verwysings dien as raamwerk vir die hele evangelie

Die geslagsregister van Jesus Christus, die Seun van Dawid, die seun van Abraham – so begin die evangelie. Hier is twee koninklike weerklanke:

Die seun van Dawid. Die huis en troon van Dawid vorm die raamwerk vir die vervulling van die profetiese beloftes.

Jesus Christus. Christus beteken Messias of koning. Die woord christos (Christus) hou verband met die seremonie om ‘n koning te salf vir sy amp. Dit verwys ook na God se goedkeuring. Na die geslagsregister lees ons: Hier volg nou die geskiedenis van die geboorte van Jesus Christus (1:18) – weer ‘n verwysing na Jesus as koning.

Goddelike ingryping en teenwoordigheid is onmiddellik duidelik. Maria word swanger … wat in haar verwek is, kom van die Heilige Gees (1:20). Jesus word dus reeds in die eerste hoofstuk van Matteus as draer van God se koninkryk geïdentifiseer. Gepas dat Jesus se laaste woorde aan sy dissipels in hierdie evangelie is: Aan My is alle mag gegee in die hemel en op aarde (28:18). Natuurlik is dit so: Jesus is die koning gestuur deur God om sy heerskappy oor en in hierdie wêreld uit te brei. Jesus is ‘n koninklike figuur in Matteus – van begin tot die einde.

‘n Tweede waarneming is hierdie evangelie is dat koninkryk die sentrale motief in die prediking van Johannes die Doper en Jesus is. Daarna kyk ons volgende keer.