Wettisisme – vyf kenmerke
If you are never born again, you will wish you had never been born at all. —J.C. Ryle
Wettisisme – vyf kenmerke
[Wettisisme = oordrewe, streng na die wet – HAT]
Hier is vyf kenmerke van mense wat wetties is.
- Munt uit in die sigbare aspekte van geregtigheid
Verder, as julle bid, moet julle nie soos die skynheiliges wees nie. Hulle hou daarvan om in die sinagoges en op die straathoeke te staan en bid sodat die mense hulle kan sien … Nee, as jy bid, gaan na jou kamer toe, maak die deur toe en bid tot jou Vader (Matteus 6:5 – 6).
As jy wetties is, is jy baie bekommerd oor wat ander mense van jou dink – meer as oor wat God sien. Wettiese mense se selfwaarneming word deur hierdie spieël, wat hulle self gemaak het, bepaal.
- Hulle fokus op die makliker gebooie van God
Julle gee tiendes van kruisement, anys en koljander, maar wat volgens die wet van God die swaarste weeg, laat julle na: geregtigheid, barmhartigheid en betroubaarheid. Juis hierdie dinge moet ‘n mens doen en die ander nie nalaat nie (Matteus 23:23). Die wettiese persoon rook nie, drink nie, vloek nie, woon eredienste gereeld by, hou gereeld stiltetyd … Alles baie belangrike dinge, maar nie die moeilikste dinge om te doen nie.
- Hulle volg die letter van die wet
Julle het gehoor dat daar van die ou tyd af aan mense gesê is: ‘Jy mag nie moord pleeg nie; en elkeen wat moord pleeg, is strafbaar voor die regbank.’ Maar Ek sê vir julle: Elkeen wat vir sy broer kwaad is, is al strafbaar voor die regbank. Verder, elkeen wat sy broer uitskel vir ‘n gek, is strafbaar voor die Joodse Raad; en wie hom uitskel vir ‘n idioot, is strafbaar met die helse vuur (Matteus 5:21 – 22)
Jy mag nie moord pleeg nie – ons tik hierdie gebod met ‘n regmerkie af. Maar Christus sê dat hierdie gebod ‘n dieper betekenis het – die emosies wat tot moord aanleiding mag gee, is net so belangrik. Die wettisis kyk net na die letter van die wet om hulle geestelikheid te evalueer. Doen ons dit lyk ons onskuldig. Kyk ons egter na die onderliggende beginsels lyk dinge nie goed nie.
- Hulle verwaarloos dié belangrikste opdragte
Julle gee tiendes van kruisement, anys en koljander, maar wat volgens die wet van God die swaarste weeg, laat julle na: geregtigheid, barmhartigheid en betroubaarheid. Juis hierdie dinge moet ‘n mens doen en die ander nie nalaat nie. Blinde leiers! Julle skep die muggie uit die beker uit, maar julle sluk die kameel in (Matteus 23:23 – 24).
Die wettisis doen die klein dingetjies, maar sien glad nie die kameel raak nie. Hulle verwaarloos die dinge wat die swaarste weeg: geregtigheid, barmhartigheid en betroubaarheid. Die kameel wat hulle insluk, is dinge soos sake van die hart – trots, jaloesie, haat en begeertes, dinge wat hulle hart vul. Hulle oordeel ander volgens die muggies.
- Hulle het ‘n verdraaide beeld van ander
Huigelaar! Haal eers die balk uit jou eie oog uit, dan sal jy goed kan sien om die splinter uit jou broer se oog uit te haal (Matteus 7:5).
Die wettisis wys gedurig ander mense tereg. Hoe meer hulle mense teregwys, hoe beter lyk hulle – altans so dink hulle. Natuurlik moet ons tereggewys word; natuurlik moet ons vriende vir ons sê as ons verkeerd optree. Die wettisis het geen verhouding met die persoon wat hy teregwys nie. Die dinge waaroor hy jou teregwys, is dinge, wat as jy dit navolg jou meer soos hom sal laat lyk – nie meer soos Jesus Christus nie. Hulle trots en selfsugtigheid veroorsaak dat hulle die wêreld nie duidelik sien nie.
Die probleem is dat wettisisme nie plek het vir hoop, genade en barmhartigheid nie. Daar is net standaarde wat maar swak is. Wat red ons van wettisisme? As ons in ons gebrokenheid voor Jesus Christus staan. Dan kan ons ander help.