Don’t judge men’s wealth or godliness by their Sunday appearance. -Benjamin Franklin.

Rick Warren en selfmoord

Op 5 April 2013 pleeg Rick Warren se seun na ‘n jarelange stryd met depressie selfmoord. Op 27 Julie 2013 keer Rick Warren vir die eerste keer terug om te preek. Bygestaan deur sy vrou bring hy ‘n boodskap: How to get through what you’re going through.

Hy deel drie dinge wat aan hom en sy vrou stabiliteit gegee het tydens hierdie tydperk van rou:

• Die lewe maak nie altyd sin nie, maar ons het vrede, want God is met ons en het ons lief.
• Alles op aarde is stukkend, maar ons kan vreugde ervaar, want ons weet dat God ‘n groter plan het.
• Ons weet dat die lewe ‘n stryd is, maar ons kan hoop, want ons weet daar is meer aan die storie.

Hy sê dat hy vir 27 jaar elke dag gebid het dat God sy seun se geestesongesteldheid sal genees. Hy kon nie verstaan waarom God nie sy gebed geantwoord het nie. Hy sê dat as ons deur ‘n moeilike tyd gaan ons outomaties probeer om ‘n antwoord te kry. Verduidelikings vertroos nie. Jy het nie verduidelikings nodig nie … jy het die teenwoordigheid van God nodig.

Kay Warren het in 2012 ‘n boek geskryf: “Choose Joy.” Sy sê dat as jou hoop nie is soos wat jy gehoop het dit sal wees nie, het jy net een opsie: Herbou jou hoop. 

Warren het sy preek afgesluit deur te sê dat hy alles moontlik gaan doen om die stigma verbonde aan geestesongesteldhede te verwyder. “Enige deel van jou liggaam kan seerkry en nie reg werk nie, en daar is geen skaamte aan verbonde nie. Maar as jou brein nie reg werk nie, word daar ‘n stigma aan jou gekoppel. Dit is tog net ‘n ander orgaan in jou liggaam … As jy sukkel met ‘n gebreekte brein, hoef jy nie meer skaam te wees as wanneer jy jou arm breek nie. Dit is nie ‘n sonde om medikasie te gebruik nie; dit is nie sonde om hulp te doek nie; dit is nie ‘n rede om skaam te wees nie.”

Ons moet alles in ons vermoë doen om die stigma wat so dikwels aan geestesongesteldhede gekoppel word, te verwyder.

Laws too gentle are seldom obeyed; too severe, seldom executed. -Benjamin Franklin

Kry die gemeenskap betrokke

Toe die mense hoor wat Filippus verkondig en die wonders sien wat hy doen, het hulle aandagtig na sy prediking geluister … Daar was groot blydskap in daardie stad (Handelinge 8:6 – 8).

Is daar groot blydskap in ons stede as gevolg van die kerk se teenwoordigheid daar? As ons baie eerlik wil wees, sal ons moet sê: Nee. Hoe kan ons gemeentes ons stede seën? Hoe kan ons God se liefde vir hulle demonstreer? Hoe kan ons genesing bring na waar dit die meeste benodig word?

J. D. Greear sê dat ons kan slaag. Hy som sy filosofie soos volg op. [‘n Skietlood is ‘n tou waaraan ‘n stukkie lood hang wat onder andere deur messelaars gebruik word om die loodregte rigting aan te dui; ‘n tou met ‘n gewig aan die een ent en merke om die diepte van die water te meet – HAT)

Skietloot #1: Almal is geroep

In Lukas 14:12 – 14 gee Jesus raad aan ‘n gasheer oor wie hy na sy feesmaal moet nooi – diegene wat jou nie kan terug betaal nie. Dit is wat Jesus gedoen het; dit is wat ons ook moet doen. Hierdie is nie ‘n opdrag aan ‘n uitgesoekte groepie nie – dit is die roeping van elke dissipel van Jesus. Dit is deel van Jesus se Volg My roeping. If we marginalize the poor in our community, God will marginalize us (Tim Keller)

Skietlood #2: Mense is die roeping

Uitreikprojekte help gelowiges om verhoudings aan te knoop met wie ons normaalweg nie in aanraking kom nie. Die grootste behoefte van mense in ons gemeenskappe is die evangelie van Jesus Christus. Om dissipels te maak is die kern van ons roeping. Ons dien nie mense om hulle te bekeer nie, maar soek geleenthede om hulle van die evangelie te vertel.

Skietlood #3: Die kerk is God se demonstrasie gemeenskap.

As die evangelie verkondig word, gaan dit met tekens gepaard. Soms is dit wondertekens, maar meer dikwels is dit tekens van liefde – Tabita wat klere vir die gemeenskap gemaak het. Toe sy sterf kom die hele gemeenskap bymekaar om te rou. Die tekens is nie die evangelie nie, maar dit wys in die rigting van die evangelie.  Francis Schaeffer sê: “The final apologetic that Jesus gives is the love in the church.”

Skietlood #4: Die kerk is nie ‘n groep mense wat om ‘n leier saamtrek nie – die kerk is ‘n leierskapsfabriek

Ons bou graag ons bedienings om ‘n paar begaafde mense. Dit is nie waar die ware krag van die kerk lê nie. In Handelinge word 40 wonderwerke beskryf – 39  gebeur buite die kerk. Jy meet nie die sukses van ‘n gemeente deur die aantal sitplekke nie, maar deur sy stuurkapasiteit. Die kerk is meer as die eredienste op ‘n Sondag.

Skietlood #5: Die beste bedieningsidees kry jy in die gemeente

Identifiseer lidmate met idees en bemagtig hulle om dit te implementeer. Luister na die lidmate.

Skietlood #6: Die evangelie is nie net die duikplank nie – dit is die hele swembad

As ons leer hoe ver God bereid was om te gaan om ons te verlos,hoe groter is ons passie om uit te reik na ongelowiges om ons. Die evangelie skep nie net passie nie, maar ook visie. Die evangelie wys vir ons die verlorenheid van die samelewing om ons en God se bereidwilligheid om na hulle uit te reik. Mense wat met die evangelie versadig is, skep ‘n kultuur van diens.

Is ons gemeentes genoeg betrokke by die samelewings om ons? Beslis nie. Ons moet en kan dit regstel.

Talking to men for God is a great thing, but talking to God for men is greater still. —E.M. Bounds

Die smoorpunt

IN MILITÊRE STRATEGIE IS ‘N SMOORPUNT (CHOKEPOINT) ‘N GEOGRAFIESE EIENSKAP SOOS ‘N VALLEI OF BRUG OF POORT WAARDEUR ‘N LEËR MOET GAAN. DIT IS GEWOONLIK NOU EN DAAROM KAN ‘N KLEIN VERDEDIGINGSMAG DIT TEEN ‘N GROTER AANVALSMAG BESKERM. IN 480 VC KOM 300 SOLDATE VAN SPARTA TE STAAN DEUR ‘N OORMAG SOLDATE UIT PERSIË. TERMOPYLAE WAS ‘N KLEIN BERGPAS IN DIE OOSTE VAN GRIEKELAND. LEËRS WAT HIERDIE DEEL VAN GRIEKELAND WOU INVAL, MOES HIERDIE PAS GEBRUIK. DIE SPARTANE WEET DAT KONING XERXES EN SY LEËR DEUR HIERDIE PAS MOES TREK OM GRIEKELAND TE VEROWER.

Wat het dit met dissipelskap te doen? As jy dissipels wil maak wat op hulle beurt dissipels maak, is daar ook so ‘n smoorpunt. Jesus gee ‘n laaste opdrag aan sy dissipels: Gaan dan na al die nasies toe en maak die mense my dissipels (Matteus 28:19). Wat is hierdie smoorpunt? Evangelisasie. As jy nie ‘n bekeerling het nie, kan jy nie ‘n dissipel hê nie.

In die middel van hierdie smoorpunt staan dikwels nie 300 dapper soldate nie, maar 300 verskonings wat oor en oor gebruik word. (Ek het nie die gawe van evangelisasie nie; Evangelisasie werk nie in ‘n postmoderne kultuur nie … ) Hoeveel gelowiges kan die goeie nuus natuurlik aan ‘n ongelowige oordra; kan die evangelie verduidelik sodat ‘n ongelowige dit verstaan. Nie baie nie.

Die gevolg is dat ons in ons gemeentes ‘n kultuur geskep het wat praat van die vermeerdering van dissipels, maar wat eindig met ‘n groepie gelowiges wat weekliks bymekaarkom om oor dinge van die Bybel te praat – vergaderinggedrewe en ingeteel. Dissipelskap dwing ons om betrokke te raak by ons buurman, die motorwerktuigkundige wat ons motor regmaak, die kelner wat ons in die restaurant bedien … Ons is deur die smoorpunt en nou moet ons wyd en diep gaan.

As jy dissipels wil vermeerder moet jy leer om die evangelie oor te dra. Jy moet verby die smoorpunt kom.

Scripture is the womb from which arises divine truth and the church – Luther

‘n Nuwe Kategismus: Vraag 31

Vraag:

Wat glo ons deur ware geloof?

Antwoord:

Alles wat vir ons in die evangelie geleer word. Die Apostoliese Geloofsbelydenis druk dit wat ons glo in hierdie woorde uit:

Ek glo in God die Vader, die Almagtige, die Skepper van die hemel en die aarde.

En in Jesus Christus, sy eniggebore Seun, ons Here; wat ontvang is van die Heilige Gees, gebore is uit die maagd Maria; wat gely het onder Pontius Pilatus, gekruisig is, gesterf het en begrawe is en ter helle neergedaal het; wat op die derde dag weer opgestaan het uit die dode; wat opgevaar het na die hemel en sit aan die regterhand van God, die almagtige Vader, van waar Hy sal kom om te oordeel die wat nog lewe en die wat reeds gesterf het.

Ek glo aan die Heilige Gees.

Ek glo aan ‘n heilige, algemene, Christelike kerk, die gemeenskap van die heiliges;

Die vergewing van sondes,

Die opstanding van die vlees

En ‘n ewige lewe.

Teksgedeelte:

Maar nou voel ek my verplig om julle met my brief aan te spoor om te stry vir die geloof wat een maal oorgelewer is aan dié wat God vir Hom afgesonder het (Judas :3)

Kommentaar:

Maar wat is geloof? Nie ‘n mening nie; nie ‘n aantal woorde nie; nie ‘n aantal menings, al is hulle ook waar,  wat saamgevoeg is nie. ‘n Aantal menings is net so min die Christelike geloof as wat ‘n string krale Christelike heiligheid is. Dit is nie aanvaarding van ‘n mening of ‘n aantal menings nie. ‘n Man mag met drie of drie en twintig geloofsbelydenisse saamstem; hy mag met die hele Ou en Nuwe Testament saamstem (ten minste in so verre as wat hy hulle verstaan) en tog geen Christelike geloof in hom hê nie … Christelike geloof … is ‘n goddelike oortuiging wat God in die harte van diegene wat glo, gedryf het  dat Hy met hulle deur sy Seun versoen is. Om te glo (in die Christelike sin) is om in die lig van die ewigheid te loop; en om ‘n helder beeld van en vertroue in die Allerhoogste te hê wat deur sy Seun met my versoen is.

Hierdie kommentaar is deur John Wesley (1703–1791) geskryf. Hy was ‘n Engelse prediker en teoloog. Hy, saam met sy broer Charles, was die stigters van die Engelse Metodiste beweging. Hy het meestal te perd gereis en het twee tot drie maal elke dag gepreek. Hy het meer as 40 000 preke gepreek. Hy was ook ‘n skrywer van liedere.

Hierdie kommentaar kom uit “Letter to the Rev. Dr. Middleton” in The Works of the Reverend John Wesley, Volume 5 (New York: Emory & Waugh, 1831), 757.

Verdere Leesstof

 “Apostles” in Concise Theology, by J. I. Packer.

Gebed:

Dit is reg om Vader, Seun en Heilige Gees te aanbid – die Drie-eenheid onverdeeld. Dit is reg om vir U te sing, te seën’ te loof, te dank , te aanbid oral waar U heers. U is God, onuitspreeklik, ondenkbaar, onsigbaar, onverstaanbaar, altyd Ek is: U en u enigste Seun en u Heilige Gees. U het ons tot bestaan gebring; en toe ons geval het, het U ons opgetel; U het niks ongedaan gelaat om ons na die hemel te bring en aan ons u koninkryk gegee het. Vir dit alles bedank ons U en U enigste Seun en U Heilige Gees vir alles wat ons weet en nie weet nie, vir die sigbare en onsigbare seëninge wat ons ontvang het. Ons sê, o Here: U is heilig, U en U enigste Seun en U Heilige Gees, groot is U heerlikheid. U het die wêreld so liefgehad dat U U enigste Seun vir ons gegee het, sodat almal wat in Hom glo nie verlore sal gaan nie, maar die ewige lewe sal hê. Ons moet onthou dat dit alles vir ons gebeur het deur die kruis, die graf, die opstanding op die derde dag, die hemelvaart, die troon aan die regterhand, die tweede en heerlike wederkoms. Vir U loof ons, vir U dank ons; vir U sing ons, Here ons God. Amen.

Hierdie kommentaar is deur Johannes Chrissostomus (347 – 408) geskryf. Hy was die aartsbiskop van Konstantinopel. Hy is in Antiogië gebore. Hy kry later die titel Chrisostomus wat “goue mond” beteken, want hy was so ‘n goeie prediker. Hy word deur beide die Oosters-Ortodokse en Rooms-Katolieke kerke as heilige erken. Hy is bekend vir sy Divine Liturgy of St. John Chrysostom, en sy groot aantal preke – insluitend 67 preke oor Genesis, 90 oor die Matteus-evangelie en 88 oor die Johannes-evangelie.

Hierdie gebed kom uit The Divine Liturgy of St. John Chrysostom Archbishop of Constantinople (London: Joseph Masters, 1866), 61–63.

Copyright © 2012 by Redeemer Presbyterian Church

We encourage you to use and share this material freely—but please don’t  charge money for it, change the wording, or remove the copyright information. Ek het slegs die gedeeltes vertaal.