Dag 25: ‘n Gebed van Augustinus

Die Billy Graham Center for Evangelism het ‘n aantal leraars gekry om vir 25-dae stukkies te skryf vir Advent. Ons gaan oor die volgende 25 dae elke dag een van hierdie stukkies plaas.

[Advent word gewoonlik toegepas op die vier weke voor Kersfees. Latyn: ad – na + venire – kom. Dit dui dus op die naderende koms van Christus – sy eerste en tweede koms.]

Laat die regverdiges hulle verheug, want die Regverdige is gebore.

Laat die siekes hulle verheug, want hulle Verlosser is gebore.

Laat die gevangenes hulle verheug, want hulle Redder is gebore.

Laat die slawe hulle verheug, want hulle Meester is gebore.

Laat vry mense hulle verheug, want hulle Bevryder is gebore.

Laat alle Christene hulle verheug want Jesus Christus is gebore.

Regverdige, Verlosser, Redder, Meester, Bevryder, Jesus Christus.

[Augustinus van Hippo ( 354 – 430)]

Blog326

Men do not reject the Bible because it contradicts itself, but because it contradicts them. —E. Paul Hovey

Wat sal jy hierdie Kersfees kry?

En dit is vir julle die teken: julle sal ‘n kindjie vind wat in doeke toegedraai is en in ‘n krip lê … Kom ons gaan reguit Betlehem toe om te sien wat gebeur het, soos die Here dit aan ons bekend gemaak het (Lukas 2:12 en 15).

Ons spandeer baie tyd om geskikte geskenke vir ons kinders en vriende te kry. Baie van ons sal nie kry wat ons graag wil hê nie. Daardie eerste Kersfees het baie mense ook nie die kindjie gekry nie, want hulle het Hom nie gesoek nie. Die wyse manne en die skaapwagters het Hom gekry, want hulle het Hom gesoek.

Wat gaan jy hierdie Kersfees kry? Dit waarna jy soek? Soek, en julle sal kry (Matteus 7:7). Mense vra wat is die betekenis van die lewe of is daar ‘n God en as daar ‘n God is hoe kry ek Hom? Dit is waaroor Kersfees gaan: om God te soek en te kry. God weet alles van ons en Hy wil hê dat ons alles van Hom moet weet. Daarom het Hy vir Jesus gestuur.

Rick Warren sê dat God vir ons hierdie Kersfees drie geskenke gee.

1. Hierdie Kersfees gee God vir jou vergifnis

Vandag is daar vir julle in die stad van Dawid die Verlosser gebore (Lukas 2:11)

Kersfees gaan oor hierdie Verlosser. As gevolg van hierdie Verlosser kan my sondes nou vergewe word – ek kry die kosbare geskenk van ‘n skoon gewete. Van Hom getuig al die profete dat elkeen wat in Hom glo, vergewing van sondes deur sy Naam ontvang (Handelinge 10:43). Let wel: elkeen, almal. Erken net dat jy Hom nodig het om jou te verlos. Vra enige lewensredder hoe jy ‘n persoon wat besig is om te verdrink, red. Jy gaan nie slaag terwyl hy nog sukkel om homself te red nie. Eers as hy oorgegee het, kan jy hom red. Dit is ons groot probleem: ons probeer onsself red.

2. Hierdie Kersfees gee God vir jou gemoedsrus

Vir dié wat u wet liefhet, is daar groot sekerheid; niks kan hulle laat struikel nie (Psalm 119:165)

Ons weet nie meer wat ware vrede is nie. Daar is drie dinge wat ons vrede steel: skuldgevoelens, hartseer en as ek ‘n wrok dra. Ware vrede word deur ons verhouding met Jesus Christus bepaal. Ons weet dat God nooit sal ophou om ons lief te hê nie; Hy sal my nooit alleen laat nie. Maak nie saak wat gebeur nie, God gaan my krag gee om dit te hanteer.

3. Hierdie Kersfees kan ek die ewige lewe kry

• Almal van ons gaan eendag sterf.
• Ons gaan ‘n groter deel van ons lewe na die dood as voor die dood spandeer.

Hierdie is lewensfeite wat ons moet aanvaar. Hierdie Kersfees kan ons die ewige lewe kry … ons moet net in Jesus Christus glo. Dan sal Hy ons verlos.

Die probleem van ons moderne mense is dat ons dikwels nie weet wat ons soek nie. Wat ons hierdie Kersfees moet soek – soos die wyse manne en die skaapwagters – is Jesus Christus.

 En ons weet dat die Seun van God gekom het en ons verstand gegee het om die ware God te ken; en ons is in die ware God, in sy Seun, Jesus Christus. Hy is die ware God en die ewige lewe (1 Johannes 5:20)

Dag 24: Ons Advent roeping van Christus

Die Billy Graham Center for Evangelism het ‘n aantal leraars gekry om vir 25-dae stukkies te skryf vir Advent. Ons gaan oor die volgende 25 dae elke dag een van hierdie stukkies plaas.

[Advent word gewoonlik toegepas op die vier weke voor Kersfees. Latyn: ad – na + venire – kom. Dit dui dus op die naderende koms van Christus – sy eerste en tweede koms.]

Tydens Kersfees fokus ons dikwels op diere en meubels: watter diere was daar en waarin het Jesus gelê. Wat gebeur as ons na die Kersboodskap deur die Evangelie volgens Johannes kyk? Johannes begin so: In die begin was die Woord daar, en die Woord was by God, en die Woord was self God. In vers 13 lees ons: Die Woord het mens geword en onder ons kom woon. Ons het sy heerlikheid gesien, die heerlikheid wat Hy as die enigste Seun van die Vader het, vol genade en wysheid.

So dikwels word volgelinge van God so vasgevang in die diere en meubels dat hulle heeltemaal vergeet van die geheimenis van God wat sy Seun na die wêreld toe stuur om ons van ons sonde te verlos – Hy wat aan ons hoop en lewe gee. Om ons te help om Jesus hierdie Kersfees beter te verkondig, moet ons ontslae raak van al die tierlantyntjies rondom Jesus se koms. Ons moet na sy koms self kyk.

Die wonder is dat God – wat van altyd af as Vader, Seun en Heilige Gees bestaan het – sy Seun gestuur het en dat hierdie Seun mens geword het en onder ons kom woon het. Dit is die menswording – God tussen ons. In Jesus se menswording verstaan  ons die diepte van God se liefde, maar ook die passie vir sy sending. Soos die Vader My gestuur het, stuur Ek julle.

Hierdie Kersfees moet ons dit altyd onthou: net soos God vir Jesus gestuur het, stuur Jesus nou vir ons. Ons is nou op ‘n sending vir sy Naam. Die lig skyn in die duisternis, die duisternis kon dit nie uitdoof nie (Johannes 1:5). Die menswording van Jesus gee aan ons ons missie: Wys vir diegene wat in die duisternis is die lig van Christus.

Vraag: Gaan ons hierdie Kersfees op die diere en meubels fokus of gaan ons op Jesus Christus se sending vir ons fokus?

Die Woord het mens geword en onder ons kom woon. Ons het sy heerlikheid gesien, die heerlikheid wat Hy as die enigste Seun van die Vader het, vol genade en wysheid (Johannes 1:14).

It’s so much easier to pray for a bore than to go and see one – C. S. Lewis

Psalm 33(2)

[Ek gaan dwarsdeur van die Nuwe Testament en Psalms. ‘n Direkte Vertaling van die Bybelgenootskap van Suid-Afrika (2014) gebruik maak.] Ek gaan ‘n paar blogs aan hierdie psalm spandeer.

Billy Graham lees elke maand al 150 psalms. Vir hom het hulle duidelik ‘n besondere betekenis. Meeste van ons, ek ingesluit, lees die psalms nie so sistematies nie – ons pik hier en pik daar. Daarom het ek besluit dat ek hierdie jaar ‘n bietjie dieper in die psalms wil delf. Ek het veral gebruik gemaak van John Goldingay se drie-volume kommentaar – Psalms.

33:4 – 7: Redes vir lof

Want lei die eerste stel redes vir die nuwe lied in. Hier word na twee redes verwys:

• Die algemene aard van die Here se verhouding met die wêreld; en
• Die manier waarop die Here aan die begin die wêreld gemaak het.

⁴Want die woord van die Here is reg, en al sy werk is betroubaar.

⁵Hy is lief vir reg en geregtigheid; die troue liefde van die Here vul die aarde.

Die Here het die eienskappe van die mense wat Hom moes loof. Nog eienskappe word bygevoeg. Hy is opreg en betroubaar, maar ook regverdig en vol liefde. Dit is sy woord wat reg is – sy beloftes sal ons nooit mislei nie. Hy is aan betroubaarheid toegewy. Hy vul die hele aarde met sy troue liefde.

⁶Deur die woord van die Here is die hemele gemaak en deur die asem van sy mond die hemel se hele leër.

Dit is deur hierdie woord genoem in vers 4 dat die hemel gemaak is. Deur Hom begin dinge lewe. Die skepping was ‘n voorbeeld waar die woord en optrede van die Here reg en betroubaar was. Ons sou verwag het dat na die skepping van die hemele die skepping van die aarde aan die woord sou kom, maar die psalmis verwys nou na die hemelse leër – die sterre en planete. Die asem van die Here verwys na sy dinamiese mag wat mag verwys na vernietiging, maar wat hier na skepping verwys. Die wêreld is gemaak deur sy gesagvolle woord en die uitoefening van sy dinamiese mag.

 ⁷Hy hou die water van die see soos ‘n dam bymekaar; Hy gaar die oewerwaters op in voorraadkamers.

Die skepping van die aarde word in negatiewe terme beskrywe – die negatiewe magte moet ingeperk word. Die water kan die aarde oorstroom as hulle nie binne perke gehou word nie. By die skepping het die Here hierdie negatiewe kragte ingeperk. Deur op hierdie manier vir die aarde te voorsien en te beskerm is ‘n uitdrukking van die Here se betroubaarheid. Die aarde is vol van die Here se toewyding.

3:8: Indirekte oproep tot lof

⁸Die hele aarde moet die Here vrees; vir Hom moet al die bewoners van die wêreld ontsag hê.

Die aarde word beskryf as al die bewoners van die wêreld.  Die hele aarde en al sy bewoners moet ontsag hê vir die Here.