“As a moth gnaws a garment, so doeth envy consume a man.” ~ St. John Chrysostom

Is die kerk nog Christelik?

‘n Baie snaakse vraag om te vra. Michael Horton ( Christless Christianity) sê dat hy soms die gevoel kry dat baie leraars in die Bybel soek vir aanhalings wat by hulle preek pas – verder is die Bybel irrelevant. Dit is tog sekerlik ‘n oordrywing. Maar kom ons kyk van nader  na die kerk vandag:

• God is vir ons ‘n persoonlike hulpbron – nie meer iemand wat ons ken, vertrou en aanbid nie.
• Jesus Christus is ‘n lewensafrigter met ‘n baie goeie wedstrydplan vir ons oorwinning – nie meer ons Verlosser wat alles reeds vir ons gedoen het nie.
• Verlossing verwys na ‘n goeie lewe nou – nie meer na ons Verlosser van God se oordeel nie.
• Die Heilige Gees is ‘n elektriese prop wat ons inprop wanneer ons krag nodig het.

Die kerk in die Weste word toenemend ‘n kultuurinstelling wat nog slegs ‘n sentimentele band met Jesus Christus het. Ons het nie meer baie krag vir Paulus se boodskap nie: Ons verkondig Christus wat gekruisig is. Vir die Jode is dit ‘n aanstoot en dit die ander is dit onsin (1 Korintiërs 1:23). Die kerk kan tog nie ‘n aanstoot wees nie, want dit bots met ons verbruikerskultuur waar aanvaarbaarheid deur ander mense belangrik is.

Speel Jesus Christus die hoofrol in die kerk of net ‘n ondersteunende rol? Het ons boodskap nie niksbeduidend, sentimenteel en irrelevant geword nie? Wat soek ons vandag by God? Geluk of vermaak? Verlossing of ons terapeutiese welstand? Roeping of pragmatiese sukses gemeet aan getalle – kerkbywoning, begroting, ens – nie? Is daar iets in die kerk wat ons nie by Dr Phil of Oprah kan kry nie?

Hoe meer ek hieroor nadink, hoe meer kom ek tot die gevolgtrekking dat hier baie waarheid hierin steek. Is die kerk daar om mense tevrede te stel of om mense op te roep om weer te besef wat God reeds in Jesus Christus vir ons gedoen het? Ons dra armbandjies – WWJD – What Would Jesus Do. Moet ons hulle nie vervang met WHJD – What Has Jesus Done – nie?

 Blog57c

“As a moth gnaws a garment, so doeth envy consume a man.” ~ St. John Chrysostom

There are no crown-wearers in heaven who were not cross-bearers here below. —C.H. Spurgeon

Verlossing = Selfverbetering

Ons glo dat as jy suksesvol wil wees, moet jy ‘n goeie selfbeeld en baie selfvertroue hê. Die laaste ding wat ons wil hoor is dat ons niks kan doen om onsself te verlos nie. Ons glo dat ons belangrike antwoorde moet kry, ons dit binne onsself moet kry – nie buite nie; ook nie by God nie

Jeremia het probleme met mense wat nie van sy uitsprake hou nie – hy verkondig nie net goeie nuus nie, maar ook die swaarkry wat voorlê. Vals profete maak sy naam sleg. Hulle sê dat hy onnodig pessimisties is.  Dan sê die Here: Hulle het ‘n goedkoop raat vir die wonde van my volk. Hulle sê net: “ Alles is reg! Alles is reg!” Maar niks is reg nie. Wanneer hulle aan die kaak gestel word oor die gruwelike dinge wat hulle gedoen het, skaam hulle hulle nie eers nie, hulle weet nie van skaamte nie. Daarom sal hulle tot ‘n val kom soos al die ander voor hulle; wanneer Ek hulle straf, sal hulle omkom, sê die Here (6:14 – 15). Is ons skaam as ons iets verkeerd doen? Sê ons nie dikwels Alles is reg! Maar niks is reg nie. Ons kry basies dieselfde in Paulus se afsluiting in sy Brief aan die Romeine. Hy waarsku die gemeente teen mense wat verdeel en hulle afvallig maak van die leer wat hulle ontvang het. Dan sê hy: Met al hulle mooipraatjies en vleitaal mislei hulle die liggelowige mense (16:17  – 18).

Kry ons dit nie nog steeds in die kerk nie – mooipraatjies en vleitaal? Kyk maar na die voorpoedsteologie – God is daar vir my en my geluk. Verlossing word nou ‘n saak van selfverbetering.

The knowledge of faith consists in assurance rather than in comprehension – Calvyn

Christene moet lesers wees!

Hoekom is dit belangrik dat Christene gereeld moet lees? Tim Gombis gee vier redes:

• Om te weet

Die beste rede om boeke te lees, is om God te leer ken.

Ons glo dat elkeen van ons vir God in sy woord kan en sal ontmoet. Dit beteken nie dat Hy Hom in dieselfde mate aan almal openbaar nie. Ons kan en moet voordeel trek uit wat ander geleer het deur hulle boeke te lees. Baie mense word deur teologiese boeke geïntimideer. Dit maak nie saak wie jy is nie, daar is ‘n boek op jou vlak beskikbaar. As ons nie toelaat dat moeilike boeke ons intimideer nie, glo ons dat ons God uitgewerk het. Lees dan Calvyn en jy besef hoe min jy werklik van God weet. Om te lees beteken dat jy leer, maar ook dat jy nederig bly. As jy nie lees nie, ontneem jy jou die geleentheid om te leer wie God is en hoe Hy optree in hierdie wêreld.

• Om te groei

Deur te lees inisieer en behou jy persoonlike groei. Ons lees om God te ken en ons lees om te groei in ons vermoë om Hom te eer op al ons lewensterreine. Daar is drie gebiede waarop ons kan lees om te groei:

1. oIdentifiseer jou swakpunte en lees boeke om jouself daar te versterk. As jy nie weet waar jou swakpunte is nie, lees ‘n boek oor nederigheid.
2. oIdentifiseer jou sterkpunte en lees om nog meer te groei. Nou beweeg jy van beginsels na meer gevorderde werke.
3. oIdentifiseer jou verantwoordelikhede en lees om jou daar te versterk. Verbeter so jou vaardighede en jou verstaan van Bybelse beginsels.

Bibliografieë kan baie nuttig wees op al hierdie terreine.

• Om te lei

Almal van ons word geroep om iewers te lei. Soms is dit by die huis, soms in die kerk of elders. Goeie leiers is goeie lesers. Min groot leiers is deur die televisie gevorm!  “When you find a leader, you have found a reader. The reason for this is simple—there is no substitute for effective reading when it comes to developing and maintaining the intelligence necessary to lead.” (Al Mohler). As leier is jy dit aan die mense wat jy lei verskuldig om te groei – lees.

• Om lief te hê

Hoe kan ek ander liefhê deur te lees?

1. oLees om te verstaan. Jou leeswerk is nie net vir jou voordelig nie, maar vir almal om jou. Jy leer om ander mense beter te verstaan.
2. oLees om aan te beveel. Beveel boeke wat ander sal help aan. Daarom moet jy wyd lees.
3. oOm dissipels te maak. Hier lees jy saam met mense – saam bespreek julle die boek.

Vir sommige mense is lees ‘n plesier – hulle lees of hulle nou verplig word om te groei, te weet, te lei of lief te hê of nie. Ander mense hou niks van lees nie. Jy kan leer om plesier uit lees te put.

Justification is an understandably strange doctrine to those who have substituted self-realization for salvation – C. Fitzsimons Allison

Sola

[Sola = solus Latyn = alleen, slegs]

As ons aan die Hervorming dink, dink ons dikwels aan die sola’s.  Ons sien dit as ‘n opsomming van die sleuteltemas van die hervorming.

Die Skrif alleen (sola Scriptura) is die bron en norm van die Christelike geloof en praktyk. Hierdie woord verkondig verlossing deur God se genade alleen (sola gratia), in Christus alleen (sola Christo) en deur geloof alleen (sola fide). Daarom gaan al die eer en heerlikheid aan God alleen (soli Deo gloria).

Elke ondersteunende eienskap van ons teologie moet daarop gerig wees om hierdie kern van die Christelike geloof  te ondersteun. Die doel moet wees om sondaars met God in Christus te versoen vir ware aanbidding van die Drie-enige God.