The difference between the almost right word and the right word is the difference between the lightning bug (die Amerikaanse woord vir ‘n vuurvliegie) and the lightning – Mark Twain.

Ek stel uit en uit

Dit is ‘n baie algemene probleem – ook by gelowiges. Die Bybel gee goeie raad om op te hou uitstel.

• Hou op verskonings maak. Die lui mens sê: “Daar is ‘n leeu daarbuite! Ek kan doodgemaak word as ek dit buite waag (Spreuke 22:13). Waarvoor maak jy verskoning? Wat gaan jy binnekort doen? Die algemeenste verskoning is: “As dinge eers weer na normaal terugkeer, sal ek …” Dinge keer nooit na normaal terug nie. Doen wat belangrik is … nou.
• Begin vandag.  Moenie roem oor wat jy môre verwag nie; jy weet nie wat die dag sal oplewer nie (Spreuke 27:1). Nie volgende week nie, nie môre nie – vandag.
• Werk volgens ‘n skedule. Alles wat ‘n verstandige mens doen, word met kennis gedoen; wie nie wysheid het nie, begaan een dwaasheid na die ander (Spreuke 13:16). As jy nie beplan nie, beplan jy om te misluk. Jy moet tyd reserveer vir dinge wat jy moet doen. Skryf dit in jou dagboek. As dit ‘n baie groot taak is, verdeel dit in hanteerbare gedeeltes.
• Hanteer jou vrese. Ons erken nie dat ons soms bang is nie, want dit is dan kwansuis ‘n teken van swakheid. Net dwase is nie bang nie. Moed beteken nie dat jy nie bang is nie, maar dat jy, ten spyte van jou vrese, vorentoe beweeg. Die Bybel maak dit duidelik dat ons met Christus se hulp alles kan bemeester.
• Fokus op wat jy wen en nie op jou pyn nie. Daar is min dinge in die lewe wat maklik is. Jy moet deurdruk ten spyte van frustrasie en pyn. Konsentreer op hoe goed jy gaan voel as jy die taak afgehandel het. Laat ons dan nie moeg word om goed te doen nie, want as ons nie verslap nie, sal ons op die bestemde tyd ook die oes insamel (Galasiërs 6:9)

Jesus belowe nooit vir sy kinders ‘n gemaklike lewe nie. Daar sal opoffering en toewyding wees. Daar wag egter ook ‘n groot beloning as ons doen dit waarvoor Hy ons geroep het.

Moenie vra nie: “Waarvoor is ek lus om te doen?” Vra: “Wat wil God hê, moet ek doen?” Dit geld vir my gesin, my persoonlike lewe en my werk.

[Hierdie is ‘n dagstukkie van Rick Warren.]

God loveth the lowest saint more than the highest angel loveth God. —Thomas Manton

Daar is vier soorte mense in die wêreld

Tim Keller (Galatians For You) sê daar is vier soorte mense. Die onderskeidende kenmerke is of mense die wet gehoorsaam en of hulle die wet vertrou.

• Gehoorsaam die wet; vertrou op die wet. Hierdie mense  is onder die wet en is dikwels baie selfvoldaan en meerderwaardig. Uitwendig is hulle baie seker dat hulle saak met God reg is, maar diep binne in hulle is hulle tog onseker. Daarom is hulle baie sensitief vir kritiek en verpletter as hulle gebede nie beantwoord word nie. Hulle toon baie ooreenkomste met die Fariseërs van Jesus se dag.
• Gehoorsaam nie die wet nie; vertrou op die wet. Hulle glo dat hulle werke hulle sal regverdig, maar hulle leef nie altyd so nie. Daarom is hulle nederiger en meer verdraagsaam as die eerste groep. Hulle het egter baie skuldgevoelens en is bang vir godsdienstige onderwerpe. Sommige gaan kerk toe, maar hulle woon op die periferie, want hulle geestelike selfbeeld is laag.
• Gehoorsaam nie die wet nie; vertrou nie op die wet nie. Hulle het die hele konsep van die wet van God verwerp. Hulle is sekulêr of geestelik maar vaag. Hulle kies hulle eie morele standaarde en glo hulle voldoen daaraan. In hulle onderbewussyn weet hulle daar is ‘n God en dat hulle Hom moet gehoorsaam. Hulle is baie verdraagsaam. Hulle is besig om hulle eie verlossing te verdien.
• Gehoorsaam die wet; vertrou nie op die wet nie. Hierdie is Christene wat die evangelie verstaan. Hulle gehoorsaam die wet uit dankbaarheid – hulle weet hulle is sy kinders. Meeste Christene sukkel om hierdie uit te leef. Hulle weet egter dat hulle verlossing nie van hulle vertroue op die wet afhang nie.

‘n Interessante indeling.

Forsake not the public worship of God, lest God forsake thee, not only in public, but in private. — John Bunyan

Jy kan nie almal altyd gelukkig maak nie

Almal van ons wil graag hê dat mense van ons hou. Daarom moet jy die regte vriende hê, die regte kar bestuur … Dit is belangrik dat die mense om my van my moet hou. Daarom, as ons besluite neem, vra ons: “Wat sal die mense hiervan dink?” Die probleem is dat ons met verloop van tyd al hoe sterker dosisse goedkeuring nodig het om tevrede te voel – ons is afhanklik van die goedkeuring van ander.

Die gevolg is ons word werkoliste en gee meer aandag aan mense buite ons familie as aan diegene vir wie ons die liefste is. Die grootste probleem is egter dat ons so ‘n obsessie het met wat mense van ons dink, dat dit wat God dink nie meer vir ons belangrik is nie. Mense word vir ons groot en God word klein.  Ons spandeer meer tyd aan ons openbare profiel as aan ons persoonlike verhoudings.

Maar wat doen ons nou? Sê vir jouself: “Ek kan nie almal tevrede stel nie, maar ek kan vir God tevrede stel.”  Wat sê God van my?

• Ons is nuwe mense (2 Korintiërs 5:17)
• Ons is verlos en ons oortredinge is vergewe (Efesiërs 1:7)
• Ons is erfgename van God (Romeine 8:17)
• Ons behoort aan God en Hy het ons lief (Romeine 1:7).

As ek ophou om te probeer om mense tevrede te stel, kan ek op een ding fokus: om God tevrede te stel. Dit is nie maklik nie – ek moet elke dag daaraan werk. Moet ons nie probeer om soos Paulus hierdie vers uit te leef nie: Klink dit nou asof ek die guns van mense soek, of soek ek die guns van God? Probeer ek by mense in die guns kom? As ek nog steeds die guns van mense soek, sou ek geen dienaar van Christus wees nie (Galasiërs 1:10).

Om almal tevrede te probeer stel is ‘n algemene probleem. Vergeet daarvan – fokus op God en probeer om Hom tevrede te stel.

“In a world of choice, obligatory religions are not faring well.” – Diana Butler Bass

Moeilike Skrifgedeeltes

Hierdie woord is moeilik; wie kan daarna luister? (Johannes 6:60). [Dit is die direkte vertaling uit die Interliniêre Bybel.] Selfs Petrus sê dat daar dinge in Paulus se briewe is wat moeilik is om te verstaan. Oningeligte en onverstandige mense gee daaraan ‘n verkeerde uitleg, soos hulle trouens ook doen met die res van die Skrif, en dit tot hulle eie ondergang  (2 Petrus 3:16).

Joe McKeever noem vyf sulke tekste:

•  Esau was tog Jakob se broer, sê die Here, en tog het Ek vir Jakob liefgehad en vir Esau gehaat (Maleagi 1:2 – 3).
• Wanneer mense een keer deur God verlig is, die hemelse gawe ontvang en deel gekry het aan die Heilige Gees, die goeie woord van God leer ken het en die kragte van die toekomstige wêreld ondervind het, en dan nogtans afvallig geword het, is dit onmoontlik om hulle weer tot bekering te bring (Hebreërs 6:4 – 6).
• Ek gee hulle die ewige lewe en hulle sal in alle ewigheid nooit verlore gaan nie. Niemand sal hulle uit my hand ruk nie. Dit wat my Vader vir My gegee het, is die belangrikste van almal, en niemand kan hulle uit die hand van my Vader ruk nie (Johannes 10:28 – 29).
• Dié wat Hy lank tevore verkies het, het Hy ook bestem om gelykvormig te wees aan die beeld van sy Seun (Romeine 8:29).
• En so het Hy na die geeste in die gevangenis gegaan en daar sy oorwinning aangekondig (1 Petrus 3:19).

McKeefer gee ‘n paar riglyne oor hoe ons hierdie moeilike gedeeltes moet benader.

• Dit is nie nodig om die definitiewe antwoorde op elke probleem oor Skrifgedeeltes te hê nie. Wees geduldig en eerlik. Dit is egter nie ‘n verskoning vir luiheid nie.
• Ons moet ons daaraan toewy om God se woord te ken – ook die probleme oor die sogenaamde moeilike teksgedeeltes.  Werk hard; studeer. Ongelukkig is dit net nie moontlik om al die bronne te raadpleeg nie. soek die beste bronne en kry ‘n paar mentors om jou te help as jy vashaak.
• As jy ‘n gedeelte bespreek, bring self die probleem na vore – moenie wag tot ander vra nie. Wat beteken dit? Goeie voorbereiding en gebed.
• As jy vasgevra word, sê dat jy nie weet nie, dat jy dit sal naslaan en weer na die persoon sal terugkom. Een vangplek: as jy dit sê, moet jy terugkom.
• Gee kort antwoorde op ingewikkelde vrae. Niks frustreer mense soos ‘n ellelange antwoord op ‘n vraag wat jy met ‘n ja of nee kon geantwoord het. As jy bang is vir vrae, antwoord elke vraag 15 minute lank – mense sal te bang wees om weer te vra!