Die Nuwe Testament en die Apostels
Ons kyk na Michael Kruger se reeks oor die Nuwe Testament. Wat ons moet verstaan, is dat die Nuwe Testament nou verbind is aan die aktiwiteite van die apostels. Jesus het die twaalf apostels aangestel om by Hom te bly sodat Hy hulle kon uitstuur om te preek. Hulle het ook die mag ontvang om bose geeste uit te drywe (Markus 3:14 – 15).
Die apostels se gesag kom van Jesus Christus en hulle was sy mondstuk. Hulle onderrig, saam met dié van die profete, was die fondament waarop die kerk gebou is met Jesus Christus as hoeksteen (Efesiërs 2:20). As die kerk die ware Christelike boodskap wou ken, moet hy teruggaan na die onderrig van die apostels.
Op ‘n stadium – redelik vroeg al – het die apostels hulle boodskap neergeskryf. Hulle het dit self gedoen of ander het dit vir hulle gedoen. Die kerk sou uiteraard meer waarde aan hierdie apostoliese boeke as enige ander tipe boek heg. Die boeke wat die kerk as apostolies beskou het, was juis die boeke wat gelees en neergeskryf is – en tydens aanbidding gebruik is. Hulle word uiteindelik die boeke van die Nuwe Testament.
Dit is juis die kerk se afhanklikheid van hierdie apostoliese geskrifte wat aanleiding gegee het tot die proliferasie van die apokriewe boeke wat na die apostels vernoem is – die Evangelie van Tomas, die Evangelie van Petrus, die Handelinge van Johannes en selfs die Evangelie van die Twaalf.
Die Nuwe Testamentiese kanon bestaan, want die vroeë Christene het geglo dat die apostels vir Christus gepraat het. Daarom het hulle soveel waarde aan die apostoliese boeke geheg.
Nederigheid en Vertroue
Twee vrugte van die evangelie wat ons in geen ander godsdiens gaan kry nie, is nederigheid en vertroue. Alle godsdienste het oomblikke van vertroue en oomblikke van nederigheid, maar die evangelie veroorsaak beide terselfdertyd.
Nederigheid en vertroue is die gevolg van wat jy van jouself glo. Nederigheid is die gevolg van jou besef hoe sleg jy is. Sonder die evangelie kan hierdie gevoel jou persoonlikheid domineer; sonder die evangelie word nederigheid deur skaamte vervang.
Vertroue is as ons ‘n goeie situasie herken. Sonder die evangelie sal mense hulle op die rug klop … en dit vir al die verkeerde redes. Hulle wens hulleself geluk, want hulle is meer godsdienstig, meer suksesvol, meer… as ander persone. Sonder die evangelie word vertroue met arrogansie vervang.
Hierdie is die twee grootste hindernisse wat mense verhinder om God te nader. Sommige voel skaam, want hulle voldoen nie aan die “standaarde” nie. Hulle kan nog aanvaar dat God ‘n liefdevolle God is, maar hulle kan nie aanvaar dat God hulle lief het en aanvaar nie. Ander is arrogant – hulle hoor reeds hulle hele lewe lank hoe goed hulle is … en hulle glo dit. Hulle sien geen nodigheid om God te nader nie.
Hoe hanteer ons dit? Die benadering vir beide groepe is dieselfde. Tim Keller sê dat die evangelie die nuus is dat ons terselfdertyd boser is was wat ons dink en meer geliefd en aanvaarbaar is as wat ons ooit gehoop het.
By die kruis word skaamte en arrogansie vernietig. Hulle word vervang met nederigheid en vertroue. Die kruis herinner ons daaraan hoe sondig ons is – dit maak ons nederig. Maar die kruis herinner ons ook aan God se liefde. Omdat Christus vir ons gesterf het, gee dit vir ons vertroue.
Martin Luther het gesê simul justus et peccator – terselfdertyd regverdig en sondig.
Woorde uit die Bybel – Middelaar (1)
Humpty Dumpty aan Alice in Lewis Carroll se Alice in Wonderland.
Woorde, ook woorde in die Bybel, het ‘n spesifieke betekenis. Vir mense sonder teologiese opleiding is dit dikwels moeilik om die volle betekenis van woorde te verstaan.
J. I. Packer het ‘n boek geskryf wat ons kan help: 18 Words: The Most Important Words You Will Ever Know. Ons gaan kyk na enkele van hierdie woorde. [Teksgedeeltes kom uit Die Boodskap.]
Middelaar
‘n Middelaar is ‘n bekende begrip in moderne internasionale onderhandelinge. As dinge baie gespanne raak en die twee groepe voel dat daar nie genoeg dinge is waaroor hulle saamstem nie, dan kom die middelaar na vore. Hy probeer die twee groepe weer bymekaar kry. ‘n Middelaar is dus ‘n man wat in die middel staan, maar met bande na beide groepe. Beide groepe vertrou hom. Hy soek geregtigheid en vrede en ‘n basis om die vriendskap weer te herstel.
Middelaar is nie ‘n woord wat baie in die Nuwe Testament gebruik word nie. Behalwe in Galasiërs 3:19 waar na Moses as middelaar/tussenganger verwys word, verwys Middelaar altyd na Jesus Christus. Jesus bemiddel tussen God en mense. As gevolg van hierdie bemiddeling word ‘n nuwe, ewigdurende verbond tussen God en mense gevestig. Hierdie nuwe verbond is ‘n belangrike tema in die Nuwe Testament.
Het die mens ‘n Middelaar nodig? Beslis. God en die mens is as gevolg van die mens se sonde van mekaar vervreem: Mense wat die heeltyd op die sonde ingestel is, is vyande van God (Romeine 8:7). Dit ontstel God: Uit sy hemelse woonplek wys God dat Hy baie kwaad is oor al die sondige dinge wat die mense hier op die aarde aanvang. Hulle verruil die waarheid vir leuens (Romeine 1:18). Ons is almal sondaars Nie een van ons leef tot God se eer nie (Romeine 3:23). Daar is nog baie teksgedeeltes wat ons kan aanhaal, maar die gevolgtrekking is baie duidelik: die mens se verhouding met God word deur die sonde verbreek en daarom het die mens ‘n Middelaar nodig.
In die Ou Testament kry ons die offersisteem. Die bloed van bulle of bokke kan mos nie regtig maak dat God Hom nie meer aan al hulle foute steur nie (Hebreërs 10:4). Die offersisteem was in werklikheid maar beperk en tydelik – dit moes gereeld herhaal word. Dit was duidelik nie ‘n permanente antwoord nie.
In die Hebreërbrief sien ons dat die bemiddeling van Jesus Christus voorsien in alles waarin die ou stelsel tekortgeskiet het. Deur daardie wet kon die mense se saak by God nie regtig reggemaak word nie. Maar nou is daar ‘n ander manier: Jesus! En dit werk, want so kom ons baie naby aan God (7:19). Die werk wat Jesus as priester doen, is baie beter as die ander priesters se beste pogings. Net so is die ooreenkoms wat Hy tussen God en die mense gemaak het verreweg beter as die oue, omdat dit wat God beloof het soveel beter is (8:6).
Wat is nou ons gevolgtrekking? Die mens het ‘n Middelaar nodig. Jesus Christus is dié Middelaar tussen God en mens.