Dag 18:Volg die tradisie van wyse mense

Die Billy Graham Center for Evangelism het ‘n aantal leraars gekry om vir 25-dae stukkies te skryf vir Advent. Ons gaan oor die volgende 25 dae elke dag een van hierdie stukkies plaas.

[Advent word gewoonlik toegepas op die vier weke voor Kersfees. Latyn: ad – na + venire – kom. Dit dui dus op die naderende koms van Christus – sy eerste en tweede koms.]

Van waar het die wyse manne/sterrekykers wat na die baba Jesus kom kyk het, gekom? Miskien is dit nie die regte vraag nie. Ons weet dat hulle uit die ooste gekom het – moontlik uit Persië. Maar hoekom het hulle gekom? Hoe het hulle in daardie verre land uitgekyk vir die geboorte van die koning van die Jode, Jesus?

Ons kan dit nie bewys nie, maar dit lyk tog asof hulle deur ‘n profesie van Daniël aangespoor was. Daniël, die Ou Testamentiese profeet, was in ballingskap in Babilon. Hy word die leier van ‘n groep wyse manne. In Daniël 9 profeteer hy die tyd van die geboorte en dood van die Messias. Het hierdie een profesie van ongeveer 400 jaar vantevore die wyse manne aangespoor om hulle goud, wierook en mirre as geskenke te bring?

Dit is moontlik. Dit is geen verrasing dat Jesus se geboorte vol moontlikhede is nie. As gevolg van Kersfees kan ons vir God deur sy Seun wat mens geword het, ken. As gevolg van sy geboorte is dit moontlik dat ons sondes vergewe kan word. As gevolg van hierdie geboorte kan almal wat in Hom glo toegang tot sy hemelse woning kry. As gevolg van Christus kan ons steeds aan die hoop vir vrede op aarde vir die mense in wie Hy ‘n welbehae het, vashou. Dit is vandag steeds wyse manne en wyse vroue wat reageer op die moontlikhede van daardie groot gebeurtenis wat die wyse manne uit die ooste na Betlehem gebring het.

Waar is Hy wat as koning van die Jode gebore is? Ons het sy ster sien opkom en ons het gekom om aan Hom hulde te bewys (Matteus 2:2).

The hard truth is that all people love poorly. We need to forgive and be forgiven every day, every hour increasingly – Henri Nouwen

Is dit redelik om in die Christelike godsdiens te glo?

Ek gaan ‘n aantal blogs aan Tim Keller se nuwe boek Making Sense of God: An Invitation to the Skeptical spandeer. Hy wys dat die Christelike geloof in alle opsigte – emosioneel, kultureel en rasioneel – meer sin maak as die siening van ons moderne wêreld.

Christene glo dat dié manier om God te ken is nie deur filosofiese beredenering nie, maar deur God se selfopenbaring – nie deur ons denke nie, maar deur Hom wat met ons praat. Ons glo God het Hom oortuigend in Jesus Christus geopenbaar. As Jesus is wie Hy gesê het Hy is en as Hy uit die dood opgestaan het, is daar ‘n sterk saak dat God bestaan. Jesus is dié rede waarom ons die Christelike geloof kan glo.

Jesus is die invloedrykste mens wat nog ooit geleef het. Hoe weet ons wat Jesus gesê en gedoen het? Kan ons die Bybelse verslae van Hom vertrou? Dit word algemeen aanvaar dat Jesus Christus ‘n historiese figuur was. In die vier evangelies histories betroubaar? Die vroegste evangelie, dié van Markus, is ongeveer 30 jaar na Jesus se dood geskryf. Hoe het die verslae van Jesus se lewe behoue gebly deur die jare?

Die gebeure is mondeling oorgedra.  Omdat dit redelik vinnig neergeskryf is, was daar nog mense wat ooggetuies van die gebeure was wat geleef het. Hulle het dit opgeteken soos dit aan ons oorgelewer is deur die mense wat van die begin af ooggetuies en dienaars van die Woord was (Lukas 1:2). Ons kry baie van die name van hierdie ooggetuies in die evangelies – Simon van Sirene, Kleopas, ens. Die evangelies is te gou na die gebeure geskryf om volksoorlewerings te wees. Hulle is ook nie so geskryf dat dit inpas by die behoeftes van die kultuur en gemeenskappe van destyds nie. Om die waarheid te sê ons kry beskrywings wat ‘n verleenheid geskep het – die gekruisigde Messias, die opstanding, die mense wat Jesus gelok het. Ons moet aanvaar hierdie storie se wortels lê in die geskiedenis.

Omdat Jesus Christus ‘n werklikheid was en omdat die Christelike geloof op sy lewe, dood, opstanding en hemelvaart berus, kan ons die Christelike geloof aanvaar as waar.

Dag 17: Leef met die besef dat Christus mens geword het

Die Billy Graham Center for Evangelism het ‘n aantal leraars gekry om vir 25-dae stukkies te skryf vir Advent. Ons gaan oor die volgende 25 dae elke dag een van hierdie stukkies plaas.

[Advent word gewoonlik toegepas op die vier weke voor Kersfees. Latyn: ad – na + venire – kom. Dit dui dus op die naderende koms van Christus – sy eerste en tweede koms.]

Ons aanbid ‘n God wat mens geword het – ‘n God wat na ons in die vlees gekom het. Hy doen dit gewillig – Hy het self besluit om in Jesus Christus mens te word. Dit is nie net die boodskap wat ons Kersfees verkondig nie, maar dit is die model waardeur ons ons geloof moet uitleef en aan ander verkondig die hele jaar lank.

Om Jesus te volg beteken dat ons die wêrelde van ander betree – ons medewerkers, vriende, bure en vreemdelinge wat ons pad kruis. Ons moet die lewens van ander betree soos Jesus ons lewens betree het. Doen ons dit verander dit die manier waarop ons ons geloof met ander deel. Ons deel met ander kry nou ‘n ander ritme – ‘n ritme van woord en daad. Of ons dit nou besef of nie ons verkondig elke dag die goeie nuus – formeel en informeel –  in ons gesprekke en optrede. Dit is die ritme van die wêreld. Of ons nou leef of werk of speel, hoor almal om ons ons woorde. As ons swaarkry, hoor hulle ons swaarkry; as ons feesvier, hoor hulle ons feesvier. As ons hulle stryd betree, hoor hulle ook ons woorde. As ons saam met hulle feesvier, neem hulle vreugde toe. Vir elke verdelende woord van ander wag hulle vir ‘n woord van ons. Wat sal dit wees? ‘n Woord van bevestiging? ‘n Woord van die evangelie?

Of ons dit nou weet of nie, maar ons verkondig elke dag die evangelie – soos ons optree, soos ons uitleef wat ons verkondig. Woord en daad is intiem vervleg soos in- en uitasem. Of ons dit besef of nie, maar ons leef elke dag ons geloof uit by diegene met wie ons werk, leef, speel en woon. Hulle kyk hoe ons ander behandel – of mishandel; hoe ons uitreik na diegene wat ly – of hulle ignoreer; hoe ons saam met dié wat verdruk word, staan – of teen hulle staan; hoe ons vir of teen vertroue en liefde staan. Wat sal hulle sien? Sal daar ritme in ons dade en woorde wees?

 Die Woord het mens geword en onder ons kom woon. Ons het sy heerlikheid gesien, die heerlikheid wat Hy as die enigste Seun van die Vader het, vol genade en waarheid (Johannes 1:14).

Did I offer peace today? Did I bring a smile to someone’s face? Did I say words of healing? Did I let go of my anger and resentment? Did I forgive? Did I love? These are the real questions – Henri Nouwen

Is dit redelik om in God te glo?

Ek gaan ‘n aantal blogs aan Tim Keller se nuwe boek Making Sense of God: An Invitation to the Skeptical spandeer. Hy wys dat die Christelike geloof in alle opsigte – emosioneel, kultureel en rasioneel – meer sin maak as die siening van ons moderne wêreld.

Ons kan nie sekularisme en godsdiens bewys nie. Hulle is denksisteme wat teenoor mekaar gestel moet word om te bepaal watter sisteem maak die meste sin – emosioneel, kultureel en rasioneel. Gelowiges sê dat God se bestaan nie empiries bewys kan word asof Hy ‘n fisiese voorwerp is nie. Geloof in God maak egter meer rasionele sin van die wêreld as ongeloof.

Keller gee dan vir ons ses argumente ten gunste van die bestaan van God.

1. Die kosmiese wonder

Niks kan nie iets produseer nie. Daar moet dus ‘n unieke wese wees wat sonder oorsaak bestaan. Hy is dan die bron van alles. Alle natuurlike wesens het ‘n oorsaak en daarom moet daar een of ander bonatuurlike wese wees wat bestaan sonder dat dit gemaak is. Die wetenskap weet van geen reeks gebeure sonder ‘n begin nie. Die moderne wetenskap kan nie die bestaan van die wêreld verduidelik nie. Is dit afdoende bewys vir die bestaan van God? Nee, want dit bewys nie dat die persoonlike, heilige God van die Bybel bestaan nie. Dit is wel ‘n sterk saak dat iets buite die natuurlike wêreld bestaan wat alles gemaak het.

2. Waarneembare ontwerp

Ons kry die indruk dat die wêreld noukeurig ingestel is – fine tuning.  Dink maar aan al die konstantes in fisika – die spoed van lig, swaartekrag, ens. Hulle het presies die waardes wat hulle het vir die mens om te oorleef. Hierdie noukeurige instelling van fisika maak meer sin in ‘n heelal waar daar ‘n skepper of ontwerper is. Dit is onwaarskynlik dat al hierdie fisiese konstantes sommer toevallig gebeur het. Hierdie bewys nie die bestaan van God nie, maar is ‘n sterk getuienis dat daar ‘n God is.

3. Die morele werklikheid

Meeste mense glo dat morele gevoelens, maar ook morele verpligtings, bestaan. Wat is die basis vir hierdie verpligting? Dit maak meer sin in ‘n heelal wat deur ‘n persoonlike God gemaak is en aan wie ons verantwoordelik is as aan ‘n onpersoonlike heelal sonder ‘n God. Wat van menseregte? Ongelowiges sê dat die mens glo dat die gemeenskap beter werk as daar menseregte is. Historici sê dat menseregte ontstaan het in samelewings wat in die God van die Bybel geglo het. Menseregte maak meer sin in ‘n heelal geskep deur God. Sonder God is dit moeilik om te verduidelik hoekom hulle bestaan.

4. Bewustheid

As ons na die kenmerke van bewustheid kyk, is dit baie moeilik om blote biologiese verduidelikings vir hulle te gee. Hoe verduidelik ons aspekte soos die vorming van idees en selfbewustheid? Sekulêre mense sê dit is van die gevolge van die evolusie van die brein. Hoe kan ingewikkelde wiskunde en abstrakte filosofie nou ons voorsate in staat gestel het om te oorleef? Ons weet nie hoe elektro-chemiese gebeure gedagtes kan produseer nie. Wetenskaplikes sê dit is net ‘n kwessie van tyd voor ons sal weet. Met ons huidige kennis kan ons net sê dat menselike bewustheid na iets buite hierdie natuurlike wêreld wys. Meeste mense sukkel om te aanvaar dat ons hoop, idees en liefdes slegs chemiese reaksies is. Bewustheid en die maak van idees maak meer sin in ‘n heelal geskep deur ‘n God wat bewus is en wat idees kan maak.

5. Rede

Baie mense aanvaar dat  ons vermoë om ons rede te gebruik die produk van natuurlike seleksie is. Dit beteken dat ons rede net een funksie het – oorlewing. Hoekom moet ons ons vermoë om ons rede gebruik om ons te vertel wat die waarheid is? Ons materialistiese wêreld glo dat ons die werklikheid deur ons rede kan verstaan. Hierdie sienings weerspeek mekaar.

6. Skoonheid

Almal van ons ervaar sekere kunsvorme en sekere idees as mooi. Skooonheid het ‘n fisiese effek op ons. Hoekom hou ons van skoonheid? Is dit bloot omdat ons voorouers van sekere dinge gehou het? Dit is nie ‘n goeie verklaring van hoe ons estetiese sin werk nie. Christene verduidelik skoonheid as ‘n erkenning dat die wêreld om ons goed is, maar bedorwe is. Hierdie lelikheid is nie inherent nie – dit is nie deel van God se oorspronklike ontwerp nie.

Hierdie argumente is nie so sterk dat dit ons dwing om om te glo nie. Dit maak dit wel rasioneel om te glo. Om in God te glo, is minder van ‘n geloofsprong as om nie te glo nie.