NEHEMIA – LOJALITEIT (2)

 “The Gospel we preach must not be just something we hear from men or read from books or even conceived through our meditation. Unless it is delivered to us by God, it can serve no spiritual utility.” ~ Watchman Nee

 

Nehemia – Lojaliteit (2)

Daar is al heelwat boeke oor Nehemia as leier geskryf. Nou het nog ‘n nuwe boek verskyn: Leader after God’s own Heart deur Jim George (2012). Kom ons kyk na sekere aspekte van Nehemia se leierskap.

 

Kenmerk #13:  Lojaliteit … Bevestig jou leierskap

 

Lojaliteit kweek lojaliteit

Lojaliteit moet verdien word.

‘n Goeie leier is lojaal – by die werk en by die huis, want vir hom is die welstand van ander belangriker as sy eie gemak en prestige. Hy is bekommerd oor hulle probleme en moeilikhede. Mense wil graag gelei word, maar hulle soek ‘n leier wat hulle beste belange op die hart dra. Maar hierdie kommer oor ander moet opreg wees. Lojaliteit kweek lojaliteit:

  • Dawid die vriend. Nadat Dawid vir Goliat doodgemaak het, bring koning Saul hom na sy paleis. Daar word hy en Jonatan boesemvriende. Saul word jaloers – hy glo dat Dawid beplan om sy troon oor te neem. Jonatan verdedig sy vriend. Saul, erg ontstoke, erken teenoor Jonatan dat hy Dawid gaan doodmaak. Jonatan waarsku vir Dawid en Dawid vlug. Net voor Dawid vlug, kom die twee vriende weer bymekaar en belowe om na mekaar se familie om te sien. Na Jonatan se dood het Dawid aan hierdie versoek voldoen – hy neem die kreupele Mefiboset in sy eie huishouding op (2 Samuel 4:4; 9:3).
  • Dawid die soldaat. Nadat Dawid gevlug het, skuil hy in ‘n grot. Hy word baie dors.  Ag, as iemand my tog net water uit die put in Betlehem se poort kon laat drink (2 Samuel 23). Die probleem was dat Betlehem op daardie stadium deur die Filistyne beset was. Drie van Dawid se vriende glip deur die Filistynse kamp en bring vir Dawid water uit die put. Dawid beskou die water as te heilig om te drink: Hy het dit as offer vir die Here uitgegiet. Dawid se manne was bereid om vir hom te sterf, want hulle het geweet dat hy dit ook vir hulle sou doen.

 

Leiers en lojaliteit

Lojaliteit is ‘n noodsaaklike eienskap van leiers. Die leiers moet dit eers besit en dan aan sy spanlede oordra. Hoe lyk lojaliteit?

  • Lojaliteit teenoor God. ‘n Leier wat ander wil bemoedig om God te volg, moet eers vir God volledig volg. Gebed is ‘n primêre manier om daardie lojaliteit te wys. ‘n Leier wat nie bid nie, vertrou op sy eie wysheid. ‘n Leier wat bid, erken sy eie swakhede en verklaar homself afhanklik van God. Nehemia se lojaliteit aan God is duidelik uit sy gebedslewe.
  • Lojaliteit teenoor God se woord. Hoe bewys ons ons lojaliteit aan God? Deur gehoorsaamheid. As julle My liefhet, sal julle my opdragte uitvoer (Johannes 14:15). Nehemia het te alle tye probeer om God se opdragte uit te voer. Hy gaan geen kompromieë aan nie.
  • Lojaliteit aan die wat oor jou aangestel is. Almal moet aan iemand verantwoording doen. Nehemia was ‘n lojale werknemer van die koning. Na twaalf jaar keer hy na die koning terug – soos hy onderneem het.
  • Lojaliteit aan jou werk. Wat julle ook al doen, doen dit van harte soos vir die Here en nie vir mense nie (Kolossense 3:23). Nehemia was ‘n lojale werkenemer – die koning het hom met sy lewe vertrou.
  • Lojaliteit teenoor diegene wat vir jou werk. Die Bybel sê baie oor die verhouding tussen werkgewers en werknemers – eienaars en slawe. Werkgewers moet hulle werkers regverdig en met respek behandel. Al is julle slawe doen julle werk met lus, soos vir die Here en nie vir mense nie. Julle weet tog dat die Here elkeen sal beloon as hy iets goeds gedoen het, of hy nou slaaf is of vry. En eienaars, behandel julle slawe met dieselfde gesindheid. Hou op om hulle te dreig. Dink daaraan dat die Here in die hemel hulle Here en ook julle Here is, en Hy trek niemand voor nie (Efesiërs 6:7 – 9). Nehemia het by sy mense gestaan – of dit nou teen die gierige vooraanstaande burgers en ampsdraers was of iets anders was. Hy luister na hulle probleme.
  • Lojaal tot aan die einde. Lojaliteit berus op vertroue wat soms maar broos kan wees. Ons lojaliteit teenoor God mag nooit fluktueer nie – as ons misluk in ons lojaliteit aan God sal ons misluk as leier. Nehemia was lojaal tot die einde – aan sy mense en aan sy koning.

 

Inspireer lojaliteit.

Lojaliteit begin by die leier Jy moet lojaal aan jou ideale en die behoeftes van jou volgelinge wees. Hoe kan jy lojaliteit inspireer?

  • Wees lojaal aan jou werkgewer. Dit dien as model vir diegene wat jy lei.
  • Wees onpartydig – geen witbroodjies nie, want dit lei tot wantroue. Nehemia het nie gehuiwer om die vooraanstaande burgers en ampsdraers te beskuldig nie (5:7).
  • Wees elke dag dieselfde. Lojaliteit berus op vertroue. As jy onredelik of veranderlik in jou besluite en optrede is, sal mense jou nie vertrou nie.
  • Wees getrou. As jy sê dat jy iets gaan doen, doen dit; as jy iets belowe, moenie dit vergeet nie. ‘n Belofte wat jy vergeet, is ‘n belofte wat jy verbreek – vir jou was dit dalk nie ‘n belangrike belofte nie, maar vir ander wel.
  • Wees eerlik. As mense uitvind dat jy nie eerlik is nie, sal hulle jou nie maklik weer vertrou nie.
  • Wees beslissend. Laat julle “ja” eenvoudig “ja” wees en julle ‘nee’ ‘nee’ (Matteus 5:37). Onbeslistheid is erger as geen besluit nie. Soek antwoorde en oplossings, maar bowenal soek God se wil. As jy besluit het, wees vasberade in wat jy doen. Moenie huiwer nie.
  • Wees werklik. ‘n Ware leier erken sy tekortkominge en soek die hulp van ander.
  • Wees ‘n dienaar. Hulle het dit as ‘n groot ramp beskou dat daar iemand gekom het wat iets goeds vir die Israeliete wou doen (2:10). Hierdie bekommernis oor sy mense vind uitdrukking in sy gebede, vas en trane en sy gewilligheid om die koning se paleis te verlaat vir ‘n vervalle Jerusalem. Hy misbruik nie sy gesag as goewerneur nie – hy gebruik dit as ‘n platform om sy mense te dien. Elkeen wat in julle kring groot wil word, moet julle dienaar wees; en elkeen onder julle wat die eerste wil wees, moet julle slaaf wees. So is dit ook met die Seun van die mens: Hy het nie gekom om gedien te word nie, maar om te dien en sy lewe te gee as losprys vir baie mense (Matteus 20:26 – 28).

 

Hoe meet jy die sukses van ‘n leier? Lojaliteit. Die grootste leiers in die geskiedenis was die wat die hoogste vlak van lojaliteit by hulle volgelinge verwek het.

 

Volgende keer kyk ons na die veertiende kenmerk van ‘n leier: integriteit



NEHEMIA – LOJALITEIT (1)

Peace and rest belong not to the unregenerate, they are the peculiar possession of the Lord’s people, and of them only. The God of Peace gives perfect peace to those whose hearts are stayed upon him. —  C.H. Spurgeon

 

Nehemia – Lojaliteit (1)

Daar is al heelwat boeke oor Nehemia as leier geskryf. Nou het nog ‘n nuwe boek verskyn: Leader after God’s own Heart deur Jim George (2012). Kom ons kyk na sekere aspekte van Nehemia se leierskap.

 

Kenmerk #13:  Lojaliteit … Bevestig jou leierskap

Ek was nie in Jerusalem toe dit alles gebeur het nie, want in die twee en dertigste regeringsjaar van koning Artasasta van Babel is ek terug na die koning toe (Nehemia 13:6)

 

Vir Nehemia moes dit ‘n bittersoet afskeid gewees het. Hy kom as vreemdeling in Jerusalem aan, maar hy verlaat Jerusalem as held en vriend. Hy laat vriende en lojale ondersteuners agter. Plig roep Nehemia terug na die koning.

 

Lojaliteit begin by vertroue

Lojaliteit is ‘n uitdrukking van toewyding, standvastigheid en trou. As ‘n individu glo dat hy sy leier kan vertrou om hom te lei, sal hy lojaal wees. Alle mense het lojaliteite – hulle plaas hulle vertroue in iemand of in iets. Daarom moet lojaliteit by God begin. Ons kan lojaal aan God wees, want:

  • Ons kan op sy karakter vertrou. Hy is die God wat sy woord hou (Titus 1:2). Daar is duisende beloftes in die Bybel. Salomo sê: Nie een van die goeie beloftes wat Hy deur sy dienaar Moses gemaak het, het onvervul gebly nie (1 Konings 8:56). Omdat God lojaal aan sy beloftes is, kan ons op Hom vertrou.
  • Ons kan op sy teenwoordigheid vertrou. Omdat ons Hom nie kan sien nie, is dit soms moeilik vir ons om te aanvaar dat Hy teenwoordig is. Dink net terug aan Josua. Sy eerste opdrag as nuwe leier was om land wat goed verdedig is, in te neem. Maar God sê vir hom: Wees sterk, wees vasberade. Moenie skrik nie, moenie bang wees nie; want Ek, die Here jou God, is by jou oral waar jy gaan (Josua 1:9). God se teenwoordigheid stel ons gerus en versterk ons. Ons het geen verdere ondersteuning nodig nie. Hierdie belofte van God geld steeds vir ons: En Onthou: Ek is by julle al die dae tot die voleinding van die wêreld (Matteus 28:20).
  • Ons kan vertrou dat Hy ons gebede sal antwoord. Jesus self belowe: Vra, en vir julle sal gegee word; klop, en vir julle sal oopgemaak word, want elkeen wat vra, ontvang; en elkeen wat soek, kry; en vir elkeen wat klop, sal oopgemaak word (Matteus 7:7 – 8). Dit gebeur selfs al weet ons nie altyd hoe om te bid nie – dan bid die Heilige Gees vir ons (Romeine 8:26). Ons kan God vertrou met die klein dinge in ons lewens en met die allergrootste in ons lewe – ons ewige bestemming.
  • Ons kan op God se aanbod van die ewige lewe vertrou. Hoekom het Jesus aarde toe gekom? Om vir ons sondes te sterf en aan ons die ewige lewe aan te bied. Ek het gekom sodat hulle die lewe kan hê, en dit in oorvloed (Johannes 10:10). In Johannes 10:28 sê Jesus: Ek gee hulle die ewige lewe, en hulle sal in alle ewigheid nooit velore gaan nie. Niemand sal hulle uit my hand ruk nie.

 

As ons ons geloof en vertroue in Jesus Christus plaas, belowe Hy vir ons die ewige lewe. Besef ons dat ons God vir alles – insluitende ons ewige bestemming – kan vertrou? Dan moet ons mos lojaal aan Hom wees.

 

Volgende keer bespreek ons leierskap en lojaliteit verder.



NEHEMIA – VERNUWING (2).

 

Nehemia – Vernuwing (2).

Daar is al heelwat boeke oor Nehemia as leier geskryf. Nou het nog ‘n nuwe boek verskyn: Leader after God’s own Heart deur Jim George (2012). Kom ons kyk na sekere aspekte van Nehemia se leierskap.

 

Kenmerk #12: Vernuwing … verfris jou leierskap

 

Esra

In Hoofstuk 8 ontmoet ons nou vir Esra. Die mense van Jerusalem het hard gewerk – hulle is fisies en emosioneel uitgeput. Hulle het vernuwing nodig.

Nehemia was die goewerneur en in baie opsigte die volk se geestelike leier. Hier sien ons nog ‘n dimensie van sy leierskap: hy is gewillig om sy leierskapsrol met ander te deel. Vantevore het hy Ganani en Gananja betrek. Nou laat hy toe dat Esra die leiding neem.

 

Hoe begin geestelike vernuwing vir die moeë muurbouers? Dit was ‘n week na die muur voltooi was; dit was die begin van die sewende maand; dit was die tyd vir die viering van die jaarlikse huttefees – let op God se tydsberekening. Die volk kom bymekaar op die plein voor die Waterpoort (8:2). In die volgende verse lees ons ‘n beskrywing van ‘n herlewing in aksie. Hier is die bewyse dat ‘n geestelike vernuwing op pad is:

  • Die volk stel belang in God se woord – hulle vra vir Esra om die wetboek van Moses … te bring (8:2).
  • Daar was ‘n begaafde leermeester. Esra was aktief as leermeester betrokke vir die afgelope 15 jaar. Daarom vra die volk vir hom om die wetboek te bring.
  • Daar was ‘n begeerte om God se woord te hoor en te verstaan. Dertien ander mans het Esra bygestaan om die waarheid vir die mense te interpreteer. Hulle het ook vir die volk gewys hoe dit op hulle lewens van toepassing is (8:5 – 9)
  • Daar was eerbied vir God se woord: Toe kniel hulle en buig diep voor die Here … die hele gemeente het met die hande omhoog geantwoord: “Amen, amen.” (8:6 – 7)
  • Die mense reageer op God se woord. Toe hulle God se woord hoor en verstaan, huil hulle – hulle het berou oor hulle sonde (8:10).
  • Hulle besluit om God se woord te gehoorsaam. In die wet lees hulle van die ontstaan van die huttefees. Hulle besluit daar en dan om die huttefees te vier (8:15 – 17).
  • Hierdie gees van vernuwing was nie net ‘n verbygaande emosie nie. Die hele maand deur duur dit voort. Die mense bevestig weer hulle gehoorsaamheid aan God en sy wette (Nehemia 9).

 

As ons vernuwing wil ondervind, moet ons God se woord ontvang en toelaat dat die Heilige Gees ons energie gee. God se woord is die middelpunt van vernuwing. Julle moenie aan hierdie sondige wêreld gelyk word nie, maar laat God julle verander deur julle denke te vernuwe. Dan sal julle ook kan onderskei wat die wil van God is, wat vir Hom goed en aanneemlik en volmaak is (Romeine 12:2).

 

Om die muur te herbou was ‘n noodsaaklike doelwit, maar slegs oor die korttermyn. Jy moet nooit die hele beeld uit die oog verloor nie. Die muur gee vir die mense ‘n veilige omgewing vir herlewing en vernuwing. Om te verseker dat dit kon gebeur, staan Nehemia onselfsugtig terug – hy laat Esra toe om hierdie taak te doen, want hy was beter daartoe in staat.

 

Vernuwing is ‘n voortgaande proses. Hoekom? Leierskap en die lewe dreineer ‘n mens. Jy moet verander; jy moet aanpas; jy moet jouself fisies, verstandelik en veral geestelik vernuwe om toegerus te wees vir die lewe. Doeltreffende leiers laat toe dat God hulle vorm. Hulle haak nie vas in een metode nie.

 

Volgende keer kyk ons na die dertiende kenmerk van ‘n leier – lojaliteit.

 



NEHEMIA – VERNUWING (1)

All of us would be wiser if we would resolve never to put people down, except on our prayer lists. —D.A. Carson

 

Nehemia – Vernuwing (1)

Daar is al heelwat boeke oor Nehemia as leier geskryf. Nou het nog ‘n nuwe boek verskyn: Leader after God’s own Heart deur Jim George (2012). Kom ons kyk na sekere aspekte van Nehemia se leierskap.

 

Kenmerk #12:

Vernuwing … verfris jou leierskap

Die priester Esra het toe die wet voor die gemeente gebring … Hy het daaruit voorgelees … van ligdag af tot die middel van die dag (8:3 – 4)

Almal het vernuwing nodig. Uitbranding is wanneer ‘n leier se tenk leeg is. Dan verloor hy momentum, rigting en energie. Hy word maklik moedeloos en terneergedruk. Nou is vernuwing noodsaaklik. Vernuwing beteken dat die fisiese, verstandelike en geestelike tenk weer volgemaak word – jy herlaai jou batterye. Baie leiers doen dit nie en dit beïnvloed hulle vermoë om te lei – negatief.

  • God het beveel dat ons een dag per week moet rus. Hy het besef dat die mens vernuwing nodig sal hê. Indien enigsins, is dit vandag selfs meer nodig. ‘n Dag se rus bevorder jou produktiwiteit. God weet die beste; sy voorskrif van rus op die sewende dag geld steeds.
  • Vernuwing is noodsaaklik vir doeltreffende en suksesvolle leierskap. Jy moet jou wysers dophou en sien of jy nie dalk vernuwing nodig het nie. Is jou humeur en geduld kort? Word jy nie meer opgewonde nie? Hierdie is waarskuwingstekens. Een profeet  wat nie die tekens raakgesien het nie, was Elia (1 Konings 18 – 19). Elia het pas 450 profete van Baäl gekonfronteer. Sy emosies was egter nie genoeg om hom te laat voortgaan nie. Mismoedig en vreesbevange vlug hy vir  Isebel. Hy is so terneergedruk dat hy selfs vir God vra om te sterwe. God gee vir hom kos en rus. Toe openbaar God Hom aan Elia. Hy besef dat God in beheer van alles is; sy energie is terug; hy is gereed vir sy volgende taak. Leer by Elia: moenie op jou emosies vertrou om jou aan die gang te hou nie.
  • Vernuwing beteken jy gaan terug na die basiese dinge. Jy herontdek jou suksesvolle verlede. Watter dinge het jou toe gemotiveer en energie gegee?
  1. oFisiese vernuwing. The world is run by tired men. Hulle is toegewy, maar moeg. Elke leier moet rus en oefening kry. Sodra jy moeg is, neem jou produktiwiteit af en word jy moedeloos. Dit was Jesus se voorskrif. Hy het die twaalf apostels uitgestuur. Hulle kom terug en vertel vir Hom alles wat hulle gedoen het: Kom julle alleen saam na ‘n stil plek toe en rus ‘n bietjie (Markus 6:31). Mense voel dikwels skuldig as hulle moeg is: Maar dié wat op die Here vertrou, kry nuwe krag. Hulle vlieg met arendsvlerke, hulle hardloop en word nie moeg nie, hulle loop en raak nie afgemat nie (Jesaja 40:31). Leiers moet rustig wees en geduldig wag op God se leiding. Ons moet ophou om ons fisiese en emosionele energie te mors waar God se krag ons sal help. Die lewe, bediening, werk, verhoudings, leierskap is nie naellope nie – dit is maratons.
  2. oVerstandelike vernuwing.beteken tyd maak om te dink. Selfondersoek is belangrik
  3. oGeestelike vernuwing. Wat het jou aanvanklik die nodige energie gegee? Die Here. Om die rede word ons nie moedeloos nie. Al is ons uiterlik besig om te vergaan, innerlik word ons van dag tot dag vernuwe (2 Korintiërs 4:16). Jesus is die belangrikste prioriteit in ons lewens. Keer terug na die dinge wat jy dalk begin verwaarloos het – gebed, Bybelstudie, gemeenskap en aanbidding. Laat ons dan elke las van ons afgooi, ook die sonde wat ons so maklik verstrik, en laat ons die wedloop wat vir ons voorlê, met volharding hardloop, die oog gevestig op Jesus, die Begin en Voleinder van ons geloof (Hebreërs 12:1 – 2).
  • Besef dat verandering ‘n vorm van vernuwing is. Soms is dit nodig om uit jou dodelike roetine te breek. Doen iets anders tot jy weer entoesiasties is.
  • Vernuwing is ‘n geleentheid om jou te herontdek. Jy kan jou liggaam vernuwe deur oefening te doen; jy kan jou verstand vernuwe deur ‘n goeie boek te lees; jy kan jouself geestelik vernuwe deur die Bybel te lees. Deur die liefde van die Here het ons nie vergaan nie; daar is geen einde aan sy ontferming nie, dit is elke môre nuut. U trou is groot (Klaagliedere 3:22 – 23).

 

Volgende keer gaan ons na die rol van Esra kyk.