NEHEMIA – VISIE (2)

This above all: to thine own self be true,

And it must follow, as the night the day,

Thou canst not then be false to any man.

William Shakespeare (1564-1616)

Nehemia – Visie (2)

Daar is al heelwat boeke oor Nehemia as leier geskryf. Nou het nog ‘n nuwe boek verskyn: Leader after God’s own Heart deur Jim George (2012). Kom ons kyk na sekere aspekte van Nehemia se leierskap.

Kenmerke van ‘n visie

‘n Visie moet diep gevoel word. Hoe meer die leier in die visie glo, hoe maklik kan hy ander opgewonde maak oor die visie. As hy nie bereid is om opofferinge te maak nie, kan hy nie verwag ander moet dit doen nie. Nehemia sien die desperate toestand van sy mense; sy siel word aangeraak; hy stel ‘n plan op om hulle te help.
‘n Visie moet gedeel word. ‘n Visie wat nie gedeel word nie, is ‘n droom. As ‘n leier die visie doeltreffend kan kommunikeer, word dit ‘n sterk motiveringskrag. ‘n Visie teen die muur is van geen waarde nie. ‘n Visie moet mense inspireer om iets te doen.
‘n Visie inspireer. ‘n Visie moet emosies in die hoorder wakker maak en entoesiasme, geloof en toewyding aanwakker. Die krag van die visie is selfs meer as die leier ander kan oortuig van die waarde van die visie vir hulle. Jy moet jou volgelinge herinner aan die eindvoordele van wat hulle doen.
‘n Visie moet verenig. ‘n Visie genereer lojaliteit en eenheid deur die wedersydse betrokkenheid van die mense wat dit hoor. Saam kan hulle slaag en die visie verwesenlik.
‘n Visie moet gereeld herhaal word. Die visie is permanent in die leier se brein ingegraveer. Omdat die mense nie eienaarskap tot dieselfde mate as die leier vir die visie het nie, moet dit gereeld herhaal word – mense moet gereeld aan die visie herinner word.

Nehemia se visie was meer as die muur se voltooiing. Dit sluit ook die mense in. Toe die muur klaar was, baklei Nehemia vir hulle welstand en hulle erfenis. Nehemia se eerste doelwit is bereik (Hoofstuk 1 – 6). Nou kom Fase 2.

Nehemia kon sy visie aan ander kommunikeer. ‘n Leier sonder visie is soos ‘n boot sonder ‘n roer – rigtingloos. ‘n Leier wat nie sy visie kommunikeer nie, het nie volgelinge nie. Nehemia skilder vir hulle ‘n beeld van die voltooide muur – beskerming en hoop vir ‘n beter toekoms. Ons onthou hoe hy sy visie gekommunikeer het (2:17 – 18). Dat hy geslaag het om die visie suksesvol te kommunikeer, sien ons uit die volk se reaksie: “Kom ons bou!” en hulle het die goeie werk aangepak (2:18).
Hy is buigsaam. Tydens Fase 1 het Nehemia die projek beplan, sy mense gemotiveer en dit onderhou selfs toe die werkers moedeloos geword het. In Fase 2 versterk, delegeer, bestuur en kyk hy na die toekoms;

oHy versterk: Toe die muur voltooi is, het ek die deure gehang, en poortwagte, sangers en Leviete aangestel (7:1) Daar was nog werk om te doen.
oNehemia delegeer. Ander moet die las van leierskap help dra.soek helpers wat verantwoordelikheid vir verskeie take kan aanvaar. Hy het betroubare helpers wat met integriteit kon lei nodig gehad. Ek het Ganani, my ampsgenoot, en Gananja, die bevelhebber van die vesting in bevel van Jerusalem geplaas (7:2)
oNehemia bestuur. Hy sê vir sy twee leiers: Moenie die poorte van Jerusalem oopmaak voor die son warm is nie en maak die deure weer toe en grendel hulle terwyl die poortwagte nog op hulle pos is. Stel ook wagte aan uit die inwoners van Jerusalem, party op die wagposte en party voor hulle huise (7:3)
oNehemia beplan. Hy konsolideer die huidige, maar hy beplan ook vir die toekoms. Die stad was uitgestrek en groot, met min mense daarin, en daar was nog nie genoeg huise gebou nie. (7:4) Nehemia se mandaat vir die toekoms kom van God af: My God het my die besluit laat neem om die vooraanstaande burgers, die amptenare en die ander mense te laat bymekaarkom vir opname in die familieregister (5:5) As die stad weer prominent in die streek wil word, moet hy ‘n lewenskragtige aktiewe bevolking hê. Eerstens moet kandidate vir terugkeer na die stad geïdentifiseer word. Hy neem ‘n sensus en registreer die mense. Terwyl hy nog besig was kom daar ‘n geestelike ontwaking (Nehemia 8 – 10). Dit was ‘n goeie ding, want God berei die harte van sy mense voor vir ‘n moeilike taak – mense wat na die stad terugtrek (Nehemia 11).

Elke sterk leier het ‘n passie vir iets. Wat is jou passie? Wat dryf jou? Wat hou jou aan die gang as dinge moeilik word? Hoe verander jy ‘n visie in ‘n werklikheid?

Stap #1: Plaas jou visie op skrif. Let op die mense wat beïnvloed en bevoordeel sal word. In gebed moet jy seker maak dat dit God se wil is.

Stap #2: Dink oor die toekoms. Wat sal gebeur as jou idees ‘n werklikheid word?

Stap #3: Stel doelwitte wat hierdie ideale toekoms weerspieël. Meetbare doelwitte is ‘n voorvereiste vir sukses.

Stap #4: Kry die ondersteuning van ander. Begin by God – maak seker dat alles wat jy doen binne sy wil val. Vra ander vir raad; soek hulp soos jy jou strategie ontwikkel; bid saam met hulle. Wag vir God se opdrag om voort te gaan.

Stap #5: Hou aan vorentoe beweeg. Natuurlik sal daar hindernisse en teenstand kom, maar hou aan.

Volgende keer kyk ons na die twaalfde kenmerk van ‘n leier – vernuwing.

NEHEMIA – VISIE (1)

The Bible is alive; it speaks to me. It has feet; it runs after me. It has hands; it lays hold of me! —Martin Luther

Nehemia – Visie (1)

Kenmerk #11: Visie … gee rigting aan jou leierskap

Stuur my na Juda toe, na die stad waar my voorvaders begrawe is, sodat ek die stad kan herbou (Nehemia 2:5).

Toe Nehemia sien die mure is herbou, wou hy feesvier. Die onmoontlike is bereik; teen alle verwagting in het die mense gewerk en opgeoffer. Wat moet Nehemia nou doen? Aftree?

Of sou hy afgeblaas gevoel het soos ‘n soldaat wat geen oorloë meer het om te baklei nie. Hy kon voel dat hy alles bereik het wat hy wou – niks meer uitdagings nie. Swaksiende leiers kyk niks verder as hulle huidige probleem nie. As dit opgelos is, voel hulle verlore tot hulle weer ‘n nuwe projek en ‘n nuwe doelwit kry.

Vir Nehemia was die herbou van die muur slegs die begin. Sy doel was om die stad te herbou, die Joodse kultuur weer lewenskragtig te maak en om die volk weer trots te maak.

Fokus op die toekoms

Ons moet voortdurend verfyn, verbeter, luister en leer. Min dinge is belangriker om van jou ‘n beter leier te maak as visie. Goeie leiers beplan vir die toekoms. Hulle sien iets beter daar buite; hulle sien wat ander nie kan sien nie; hulle antisipeer. Die toekoms mag vaag wees, maar dit keer nie hierdie leiers om met afwagting na die toekoms te kyk nie.

Dink aan Josua en Kaleb. Van Sinai na die beloofde land was ongeveer 250 kilometers Terwyl die volk daar op die grens van die beloofde land wag, stuur Moses twaalf verkenners – een uit elke stam – om die beloofde land te verken. Kruis en dwars vir 40 dae lank kyk hulle. Hulle kom terug en moet nou verslag doen. Tien verkenners gee ‘n negatiewe verslag – die land was vrugbaar, maar die mense was sterk. Sommige van hulle was selfs reuse (Numeri 13).

Kaleb en Josua dien egter ‘n minderheidsverslag in: Ons moet beslis optrek en die land in besit neem, want ons kan dit doen (13:30). Die mense is bang. Toe sê Josua: As die Here ons goedgesind is, sal Hy ons na hierdie land toe bring en dit aan ons gee, ‘n land wat oorloop van melk en heuning. Julle moet net nie teen die Here in opstand kom nie. Moet ook nie vir die mense van die land bang wees nie, want ons sal hulle maklik verslaan. Hulle gode sal hulle nie kan beskerm nie. Die Here is by ons. Moenie vir hulle bang wees nie (14:8 – 9). Tien sien net mislukking; twee sien God se toekoms.

Die mense aanvaar die meerderheidsverslag en vir 40 jaar swerf die volk in die woestyn rond. Die geslag sou nooit God se seëning van ‘n eie land ervaar nie.

Bevorder ons geloof of bevorder ons vrees? Veroorsaak jy twyfel of gee jy rigting? Waar die wil van die Here nie bekend gemaak word nie, verwilder ‘n volk (Spreuke 29:18).

Maar wat is ‘n visie? Volgende keer kyk ons na die kenmerke van ‘n visie.

NEHEMIA – KONFLIKBESTUUR (2)

Character may be manifested in the great moments, but it is made in the small ones. —Phillips Brooks

Nehemia – Konflikbestuur (2)

Kenmerk #10: Konflikbestuur … gee krag aan jou leierskap

Beginsels van konflikhantering

Konflik is ‘n lewensfeit. Jou drome en ideale ontlok dikwels teenstand. Jy moet leer hoe om konflik te hanteer. Goue reël: Jy gaan nooit almal tevrede stel nie, maar jy moet altyd die Here tevrede stel. Christene moet Paulus se raad onthou: Laat ons ons dan eers beywer vir die dinge wat die onderlinge vrede en opbou bevorder (Romeine 14:19). Maar al het jy Salomo se wysheid en Job se geduld sal jy steeds met konflik gekonfronteer word.

Aanvaar konflik as ‘n werklikheid. Solank as wat daar mense met verskillende menings of verwagtings of doelwitte is, sal daar altyd konflik wees. Verwag verskille; as hulle kom moet hulle nie ignoreer nie.
Besef die eindresultaat van ‘n konflik hoef nie noodwendig negatief te wees nie. Humeure vlam op; verhoudings word gespanne – alles negatief. Maar ons kan die konflik in ‘n beter rigting kanaliseer. Leiers moet konflik in ‘n positiewe rigting kanaliseer.
Konfronteer konflik vinnig. Konflik is gewoonlik die gevolg van sake wat nie opgelos is nie. Hanteer alle sake met ‘n oop gemoed; bly gefokus; maak oplossing jou top prioriteit. As jy dus jou gawe na die altaar toe bring en dit jou daar byval dat jou broer iets teen jou het, laat staan jou gawe daar by die altaar en gaan maak eers vrede met jou broer en kom dan en bring jou gawe (Matteus 5:23 – 24).
Bepaal die rede vir die konflik. As jy die oorsaak vasgestel het, kan jy die bron en nie die simptome hanteer. In meeste gevalle kan ‘n konflik op ‘n vriendelike manier opgelos word as beide partye bereid is om in vrede te onderhandel. In Nehemia se geval was die konflik nie oor oppervlakkige sake nie. Hy besef dat hy dit nie op sy eie sou kon hanteer nie. Hy vra dus vir God om tussenbeide te tree. As konflik ontstaan, moet ons gebed on beginpunt maak.
Beperk die konflik tot diegene wat tot die oplossing kan bydra. As jy probleme het met ‘n persoon stap direk na hom toe. Moenie ander betrek nie omdat dit die verhouding mag vertroebel. Oor konflik tussen gelowiges het Jesus duidelike riglyne gegee (Matteus 18:15 – 17).
Kry ‘n oplossing. Jou benadering moet wees dat daar geen verskille is wat nie bygelê kan word nie. As mense bereid is om saam deur die sake te werk, is ‘n positiewe uitkoms meestal te verwagte. Oor die algemeen verlang mense vrede – ongelukkig op hulle voorwaardes.

Drie eienskappe wat Nehemia gehelp het om konflik te hanteer, is steeds belangrik.

Karakter. Sy sterkte van karakter het sy oorsprong in sy liefde vir en verstaan van God se woord. As jy die bestudering van God se woord verwaarloos, verloor jy die anker van jou karakter. As dit gebeur verloor jy jou vermoë om te onderskei en op te tree.
Vertroue. Nehemia het vertroue in sy doelwit gehad – hy het nooit oor sy roeping getwyfel nie. Jy mag nie toelaat dat konflik jou aandag van jou verantwoordelikhede en roeping wegtrek nie.
Moed. Moed is nie die afwesigheid van vrees nie – dit is die beheer van vrees. Ten spyte van al die konflikte staan Nehemia vas en vertrou die Here.

Hierdie drie kenmerke ondersteun jou as jy konflik hanteer. As enigeen van hierdie kenmerke afwesig is, word jy minder doeltreffend om konflik te hanteer. Jy moet hierdie drie kenmerke ontwikkel.

Volgende keer gaan ons die elfde kenmerk van ‘n leier hanteer – visie.

NEHEMIA – KONFLIKBESTUUR (1)

A clay pot sitting in the sun will always be a clay pot. It has to go through the white heat of the furnace to become porcelain. -Mildred Witte Stouven

Nehemia – Konflikbestuur (1)

Kenmerk #10: Konflikbestuur … gee krag aan jou leierskap

Volgens die gerug wil jy koning word oor hulle … Hulle het almal probeer om ons die skrik op die lyf te ja, met die gedagte: Hulle sal die werk laat staan en dit sal nie klaarkom nie. Sterk tog my hande, o God (Nehemia 6:6, 9).

Tydens sy voorbereidingstyd soek Nehemia inligting oor Jerusalem. Hy ontdek ‘n brief wat 90 jaar oud was waarin ‘n skinderveldtog teen die Joodse gemeenskap om Jerusalem beskryf word. Die konflik tussen die Jode en hulle bure was intens – op ‘n stadium is die bouwerk aan die tempel selfs gestaak. Die goeie nuus is dat God tussenbeide getree het en uiteindelik is die bouwerk aan die tempel voltooi. Nehemia het seker gewonder wat die vyande van hom sou sê. Die konflik van die verlede is nie opgelos nie – daar was steeds spanning tussen die Israeliete en hulle bure.

So lank as wat daar sonde in die wêreld is, sal daar konflik wees. In die Bybel lees ons ook van sulke konflikte. Hier is enkeles:

Kain en Abel
Moses en die farao
Miriam, Aäron en Moses (Numeri 12)

Nehemia het ook konflikte ondervind. Nehemia se pogings om die muur te herbou het die status quo uitgedaag – veral vir God se vyande. Hulle wou die Jode swak en weerloos hou. Daarom was die herbou van die muur vir hulle ‘n bedreiging. Hulle staan Nehemia by ses geleenthede teë en gebruik ses verskillende metodes

Spot: Toe Sanballat en Tobija saamstaan teen die Jode was hulle in ‘n sterk posisie. Toe hulle sien Nehemia en sy mense begin die muur herbou, het hulle ons uitgelag en smalend gevra waarmee hulle besig was. Mense is gemaklik met dit wat hulle ken al is dit nie ideaal nie; mense word deur die onbekende bedreig. In baie gevalle lei dit aanvanklik tot ‘n gespottery. Wat was Nehemia se reaksie? Hoor dit, ons God! Ons word bespotlik gemaak! Laat die smaad op hulle eie kop afkom (4:4)
Openlike dreigemente. Toe die vyande sien dat die opbou van die mure van Jerusalem vorder, neem hulle teenstand toe. Nou spot hulle nie meer nie, maar dreig met ‘n militêre aanval (4:7 – 23). Nehemia reageer deur mense in die gapings – waar die muur nog nie hoog genoeg was nie – te plaas. Daarna herinner hy hulle aan God – groot en ontsagwekkend.
Afleiding. Sanballat en sy bondgenote laat weet vir Nehemia: Kan ons mekaar in Kefirim, in die Onolaagte, ontmoet? (6:1 – 4) Die doel is om jou vyande in een rigting te laat dink terwyl jy in ‘n ander rigting beweeg. Jy verloor jou fokus en momentum; jy beland op allerhande syspore. Daarom moet jy doelwitte hê – om seker te maak jy is nog op die regte pad. Luister: Hulle het dieselfde boodskap vier keer gestuur, en elke keer het ek dieselfde antwoord teruggestuur. Die vyand volhard; Nehemia volhard. Ek is besig met ‘n groot werk. Ek kan nie kom nie. Hoekom moet die werk stilstaan terwyl ek dit laat lê om na julle toe te kom?
Laster. Sanballat en sy bondgenote probeer nou ‘n nuwe strategie. Hulle stuur ‘n ope brief. Daarin kla hulle Nehemia van hoogverraad aan. Onder die nasies word ‘n gerug versprei, en Gesem bevestig dit, dat jy en die Judeërs ‘n opstand beplan … Volgens die gerug wil jy koning word oor hulle … (6:6). Laster is dikwels ‘n baie doeltreffende wapen al is die aantygings vals. Al word dit later bewys om vals te wees, kan die aanvanklike impak baie skade berokken. Nehemia se motiewe, sy integriteit en sy invloed word ondermyn. Ongelukkig glo mense baie gou die slegte in ander. Nehemia ontken die bewerings: Ek het hom terug laat weet: “Niks van wat jy sê, is waar nie. Jy suig dit uit jou duim.” (6:8). Hy sê ook dat hy hulle bedoelings ken: Hulle het almal probeer om ons die skrik op die lyf te jaag, met die gedagte: Hulle sal die werk laat staan en dit sal nie klaarkom nie. Nehemia weet waarom hulle hom belaster. Wat doen hy? Hy bid – ‘n kort gebedjie: Sterk tog my hande, o God!
Bedrog. Die volgende taktiek is intimidasie van binne. Die teenstanders huur ‘n vals profeet (6:12). Hy moes Nehemia na die tempel toe lok onder die voorwendsel dat daar te veel bedreigings is en dat Nehemia veilig in die tempel sou wees. Maar Nehemia was nie ‘n priester nie – hy kon nie sommer in die tempel ingaan nie – hy sou die tempel ontreinig. Hy is omgekoop om my bang te maak sodat ek ‘n misstap sou begaan en hulle die geleentheid gee om my te beskinder en my naam sleg te maak (6:13). Nehemia besef die profeet was vals; hy weet was sy vyande probeer doen; daarna bid hy: My God, onthou wat Tobija en Sanballat gedoen het, en ook die profetes Noadja en die ander profete wat my wou bang maak (6:14)
Onderdrukking. Uiteindelik is die werk klaar – binne 52 dae. Uiteindelik kon Nehemia ontspan. Ons lees selfs: Toe al ons vyande dit hoor, en die nasies rondom ons dit sien, was hulle selfversekerdheid daarmee heen (6:16). Oppas! In daardie tyd het daar baie briewe van vooraanstaande Judese burgers na Tobija toe gegaan en briewe van hom af na hulle toe gekom. Baie Judeërs het noue bande met hom gehad, want hy was die skoonseun van Sekanja seun van Arag. Hierdie vooraanstaande burgers wat geweier het om te werk en wat hulle medeburgers uitgebuit het, gaan agter Nehemia se rug en ondermyn hom. Hoe reageer Nehemia? Hulle het gedurig voor my gepraat van Tobija se goeie hoedanighede, en alles wat ek gesê het, aan hom oorgedra. Dan het hy briewe gestuur en my probeer bang praat (6:19). Nehemia erken hulle sameswering, maar doen niks nie.

Volgende keer kyk ons na die beginsels van konflikhantering.