Only two kinds of people are reasonable: those who, knowing God, serve Him with their whole heart; and those, not knowing Him, seek Him with their whole heart – Blaise Pascal (Pensées)

Nehemia – Delegering (3)

Daar is al heelwat boeke oor Nehemia as leier geskryf. Nou het nog ‘n nuwe boek verskyn: Leader after God’s own Heart deur Jim George (2012). Kom ons kyk na sekere aspekte van Nehemia se leierskap.

Kenmerk #8: Delegering … Bemoediging … ondersteun jou leierskap

Ons teenstanders het gedink: hulle sal niks weet of sien voor ons tussen hulle is en hulle doodmaak en die werk tot stilstand bring nie (4:11)

Ten spyte van die voortdurende bedreigings bly die mense gefokus en hou aan met die bouwerk.

Hoe sou Nehemia keer dat hulle as gevolg van al die bedreigings ontmoedig word? Hy kan bid vir God se beskerming; hy kan seker maak dat sy mense en sy vyande hom gereeld sien. Toe die vyand sien dat die werk vorder, neem hulle vyandigheid toe. Eers spot hulle: Laat hulle bou! Daardie klipmuur van hulle sal omval as ‘n jakkals daarteen spring!  (4:2 – 3) Daarna beplan hulle ‘n aanval: Hulle het saamgesweer om Jerusalem te kom aanval en verwarring te saai (4:7 – 8).

Ontmoediging

Jy kan nie voortdurend dreigemente en negatiewe dinge hoor sonder dat dit jou raak nie. Ontmoediging is een van die grootste vyande van vooruitgang. Dieselfde gebeur hier: Die Judeërs het begin kla (4:10). Hoekom word hulle so ontmoedig?

• Uitputting. Die draers se kragte gee in, die puin is te veel. Die lang werksure het hulle uitgeput. As jy fisies moeg is, is jy meer geneig om terneergedruk te wees – jy verloor moed. Fatigue makes cowards of all of us (Vince Lombardi).
• Verloor entoesiasme. Die puin is te veel (4:10). Hulle aanvanklike ywer neem af; hulle begin kla. Die puin is nie die probleem nie, maar hulle gesindheid is wel.
• Verloor hulle visie. Ons gaan die nie regkry om die muur klaar te bou nie (4:10). Aanvanklik het Nehemia hulle oortuig dat hul die onmoontlike gaan regkry. Met verloop van tyd vervaag die visie. As dit gebeur, lei dit tot wanhoop en ‘n gevoel van hopeloosheid. Hierdie negatiewe gevoel het baie name – soos uitbranding. Hierdie mense sien nie meer die voltooide muur nie – al wat hulle sien is die puin.
• Verlies aan optimisme. Hulle hoor die negatiewe opmerkings van die vyande. Dit is moeilik om optimisties te bly as jy deur negatiwiteit omring word. Hulle hoor die gerugte van ‘n dreigende aanval. Ons teenstanders het gedink: hulle sal niks weet of sien voor ons tussen hulle is en hulle doodmaak en die werk tot stilstand bring nie (4:11). Jy kan natuurlik probeer om negatiewe persone te vermy. ‘n Positiewe gesindheid is aansteeklik – omring jou met positiewe mense.
• Verlies aan vertroue. Moenie vir hulle bang wees nie (4:14). Vir 90 jaar leef hulle in vrees. Toe kom Nehemia en verlig hulle vrese. Hulle begin werk aan die muur met volle vertroue dat God hulle sal beskerm. Nou vergeet hulle van God en sy vermoë om hulle te beskerm. Hulle oë is nie meer op God gerig nie, maar op die gevaarlike situasie om hulle.
• Verlies aan motivering. Al die negatiewe kragte om hulle veroorsaak wanhoop by die bouers. Hulle is terug waar hulle begin het. Nehemia staan op die punt om beheer oor die situasie te verloor.

Hanteer ontmoediging

By Nehemia kry ons ‘n goeie model. Onthou dat ontmoediging almal kan raak – dit is aansteeklik en versprei maklik. Vir die individu is ontmoediging verlammend; vir ‘n leier is dit dodelik. Daarom moet dit so vroeg as moontlik hanteer word. Hoe kan ons dit doen?

1. 1.Herken die bron. Jy sal dikwels met druk gekonfronteer word wat jou mag ontmoedig. Die duiwel is maar te bly as ons nie meer deel van die spel is nie. Die probleem lê nie by God nie, maar by ons – ons het onsself verlam.
2. 2.Weerstaan die versoeking. Dit is maklik om negatiewe gedagtes te dink – jy sien al die puin en jy word deur die taak ontmoedig. Jy begin dink dat die taak nooit voltooi sal word nie. Wat sê Jakobus moet ons doen? Staan die duiwel teë en hy sal van julle af wegvlug (4:7).
3. 3.Herstel jou verhouding. Het jy jou oë van jou Verlosser afgewend? Onderwerp julle dan aan God (Jakobus 4:7). Jy trek jou krag om te lei by die Here. As daardie verhouding vertroebel is, beïnvloed dit jou vertroue en vasberadenheid op ‘n negatiewe wyse. ‘n Wyse leier bly naby aan God.
4. 4.Verwyder diegene wat vertwyfeling saai. As onregverdige negativisme versprei word, moet jy dit hanteer. Vra positiewe menings en oplossings vir alle probleme – probleme is geleenthede wat wag om opgelos te word.
5. 5.Onthou jou krag. Christus se krag werk in en deur gelowiges. Ek is tot alles in staat deur Hom wat my krag gee (Filippense 4:13). Jy mag ook nie die mag van jou mense onderskat nie. Jou krag is groot as jy nie jou mense se mag en hulle vermoë om by te dra beperk nie.
6. 6.Herfokus. Het jy dalk vergeet van jou doelwitte en rigting? Gaan terug na die begin van die projek. Jy het sekerlik vir God by jou oorspronklike plan betrek. Hou aan glo en werk met entoesiasme voort.
7. 7.Reageer op die aanmoediging van ander. Diegene naby jou kom gou agter as jy moedeloos is. ‘n Wyse leier ken sy eie beperkings en laat ander toe om hom te help. Maar solank daar nog ‘n “vandag” is, moet julle mekaar elke dag aanspoor sodat niemand van julle deur die misleiding van die sonde verhard word nie (Hebreërs 3:13)

‘n Goeie leier behou die hoop deur woorde van bemoediging en werke wat jou mense ondersteun. Jou positiewe gesindheid beïnvloed altyd die mense om jou.

The infinite abyss can be filled only with an infinite and immutable object: in other words by God himself – Blaise Pascall (Pensées)

Nehemia – Delegering (2)

Daar is al heelwat boeke oor Nehemia as leier geskryf. Nou het nog ‘n nuwe boek verskyn: Leader after God’s own Heart deur Jim George (2012). Kom ons kyk na sekere aspekte van Nehemia se leierskap.

Kenmerk #7: Delegering … stel jou leierskap vry

Delegering in die NT

• Jesus, die meester van delegering. Jesus het besef dat sy aardse bediening nie baie jare gaan duur nie. Voor Hy na die hemel terugkeer, moet Hy ander voorberei om die taak wat hy begin het verder te voer. Daarom kies en onderrig Hy twaalf dissipels. Net voor sy hemelvaart gee Hy aan hulle sy groot opdrag (Matteus 28:19 – 20).
• Paulus. In die Nuwe Testamentiese kerk is take gedelegeer. Lees net weer Efesiërs 4:11 – 12 waar sekere ampte beskryf word. As jy ‘n leier is, moet jy ander toerus om te lei. As jy ‘n volgeling is, moet jy jou eie gawes ontwikkel sodat diegene in ‘n posisie van leierskap take na jou kan delegeer volgens jou gawes.
• Delegering by die huis. Mans  moet hulle vrouens vertrou; hulle moet hulle kinders oplei om self sekere take te verrig.

Begin die onmoontlike taak

Hoe pak jy so ‘n enorme taak aan? Nehemia se plan en die uitvoering daarvan kry ons in Hoofstuk 3. As jy iemand motiveer, skep jy ‘n begeerte by hom; as jy delegeer, wys jy die rigting aan. Ons lees gereeld hier van die volgende. Elke paragraaf fokus op een van die tien poorte van die stad – soos die Skaappoort en die Vispoort. Hy stel 42 spanne aan. Kom ons kyk na Nehemia se delegering:

• Take word volgens beroepe uitgedeel. Heel eerste word die hoëpriester en sy priesters genoem. Hulle werk by die Skaappoort. Hierdie poort was die naaste aan die tempelterrein. Ons lees ook van handelaars en goudsmede.
• Take word ook aan nie-inwoners gegee. Mans van Jerigo, Tekoa, Gibeon en Mispa is ook gebruik by daardie gedeeltes van die muur waar daar min huise was. Geen wonder ons lees: Die mense se hart was in die werk (4:6).

Hoe het Nehemia te werk gegaan om te delegeer?

• Bepaal die taak. Jy kan nie al jou verantwoordelikhede delegeer nie. Kies daardie take wat ander suksesvol kan afhandel.
• Bepaal die pligte. Evalueer elke taak en bepaal watter vermoëns, opleiding en gawes benodig word. Kan jy die taak vir een persoon gee of moet jy dit vir ‘n span gee? Moet jy spesifieke mense aan spesifieke take toewys?
• Kies die leierskap. Kies die persoon wie se vermoëns, opleiding, ondervinding en gawes die beste inpas om die taak te voltooi. Hy is die verantwoordelike persoon en hy moet verseker dat die ander die taak voltooi. Vir elke gedeelte van die muur word ‘n spesifieke naam genoem.
• Onderrig jou leiers. Jy moet jou mense motiveer, maar ook toerus vir die taak.
• Gee rigting aan die leiers. Gee aan hulle ‘n duidelike prentjie van jou visie. Identifiseer spesifieke datums wanneer jy terugvoer verlang.
• Gee aan die leiers die nodige gesag. Nadat die leiers toegerus is en nadat Nehemia hulle verseker het dat hulle die koning se ondersteuning het, en nadat hy hulle van die nodige voorrade voorsien het, het hulle beheer oorgeneem en die verantwoordelikhede wat aan hulle opgedra is uitgevoer.
• Vertrou die leiers. Moedig hulle aan om onafhanklik op te tree.
• Evalueer die proses. Is enige aanpassings nodig? Bemoedig. Prys. Ondersteun. Identifiseer hoe jy sukses gaan meet. In Nehemia se geval was dit voltooiing van die mure binne 52 dae.

Daar is altyd mense wat jou probeer ontmoedig. Hoe hanteer jy dit?

 “If I had only one sermon to preach, it would be a sermon against pride.” ~G. K. Chesterton

Nehemia –  Delegering (1)

Daar is al heelwat boeke oor Nehemia as leier geskryf. Nou het nog ‘n nuwe boek verskyn: Leader after God’s own Heart deur Jim George (2012). Kom ons kyk na sekere aspekte van Nehemia se leierskap.

Kenmerk #7: Delegering … stel jou leierskap vry

Hulle het gesê: “Kom ons bou!” en hulle het die goeie werk aangepak (2:18).

Die taak voor Nehemia lyk onmoontlik. Ander voor hom het tog al die handdoek ingegooi. Die mense het ook geglo dat dit ‘n onmoontlike taak was. Nehemia was hiervan bewus. Dit het hom nie gestop nie, maar hy was wel versigtig. God het immers die taak op sy hart gelê. Hy weet ook dat as God beveel, hy sal voorsien.

Nehemia het nie genoeg mense saamgebring om die taak af te handel nie. Die plaaslike inwoners moes help. Hy kon hulle tog nie dwing om hom te help nie. Wat doen hy?  Hy gee verskillende gedeeltes van die projek aan verskillende werkspanne bestaande uit plaaslike mense. Dit maak die taak meer hanteerbaar vir almal. Hy gee aan hulle die gedeelte van die muur om te herbou wat naby aan hulle huise is. Dit maak sin vir die mense. Deur take te delegeer word die oënskynlik onmoontlike moontlik.

Hierdie strategie herinner aan die raad wat Jetro aan Moses gegee het – kies bekwame manne om jou met jou taak te help (Eksodus 18:21 – 22). ‘n Goeie leier doen nie daardie dinge wat ander mense kan doen nie. In die proses van delegering kom nuwe leiers na vore. Die oorspronklike leiers bly kreatief en konsentreer op die groot take wat  hulle aandag nodig het.

Die vrees vir delegering

Soms kan die leier wat werk na ander delegeer dit beter en vinniger doen. Maar as die leier alles self probeer doen, verloor hy sy fokus en verswak sy leierskap. Elke leier se tyd, krag en vermoë is beperk. Daarom moet hy delegeer. Hoekom delegeer leiers nie? Vrees

• Vrees hy verloor beheer. Leiers wil in beheer wees; leiers wil besluite neem; leiers wil probleme oplos. Dit werk goed solank as dit ‘n klein projek is. Omdat hulle nie kan/wil delegeer nie, beperk hulle hulle doeltreffendheid.
• Vrees vir onbekwaamheid. Hy is bang ander kom nie die mas op nie; hy twyfel aan hulle vermoëns; hy is bang hy moet later kom en die gemors regstel. Omdat hy goed is in wat hy doen, vertrou hy nie ander nie.
• Vrees dat hy erkenning sal verloor. Baie leiers hou van erkenning – die kalklig. Hulle hou daarvan as mense vir hulle sê dat hulle goeie werk doen. Hy delegeer moeilik, want netnou kry ander die lof en erkenning.
• Vrees omdat jy ander nodig het. As jy delegeer erken jy dat jy ander nodig het om die taak te voltooi. Hulle glo dat dit ‘n teken van swakheid is.
• Vrees om kennis oor te dra. Kennis is ‘n kragtige leierskapsinstrument. Ons hoor dikwels: kennis is mag. As ‘n leier dit glo, gaan hy huiwerig wees om te delegeer. Hy mag stukkies kennis met ander deel, maar die kern hou hy vir homself. Die gevolg is dat diegene wat saam met hom werk gefrustreerd word. Die projek gaan waarskynlik misluk, want die mense het nie al die kennis wat hulle nodig het om die projek suksesvol te voltooi nie.

Die vraag nou is: Hoe delegeer ek?

Praktyke wat die geloofsgemeenskap ondersteun