“What is the chief end of preaching? I like to think it is this: It is to give men and women a sense of God and His presence.” ~Martyn Lloyd-Jones

Nehemia – Beplanning (3)

Daar is al heelwat boeke oor Nehemia as leier geskryf. Nou het nog ‘n nuwe boek verskyn: Leader after God’s own Heart deur Jim George (2012). Kom ons kyk na sekere aspekte van Nehemia se leierskap.

Kenmerk #5: Beplanning …fokus jou leierskap

Beginsels vir beplanning

Nehemia was nie ‘n soldaat of ‘n godsdienstige leermeester nie. By hom leer ons ‘n paar waardevolle beginsels van beplanning.

• Beplanning behels ‘n vennootskap met God. Nehemia vertrou op voortdurende gebed. Dit is ‘n goeie aanduiding van sy verhouding met God. As jy trots is, kan jy nie bid nie; die nederiges bid. Nehemia het besef dat hy net kan slaag as hy op God vertrou.
• Beplanning betrek mense. Nehemia verstaan mense. Hy ken die koning en weet hoe om hom te benader. Nehemia verwys na grafte en poorte. Hy teken vir die koning ‘n beeld van die dooies eer en die herstel van die samelewing wat vernietig sal word omdat hulle hulleself nie kan verdedig nie.
• Beplanning vereis ‘n volledige stel planne. Nehemia was gefokus en het volhard. Hy het nie opgehou nadat die koning sy aanvanklike versoeke goedgekeur het nie. Hy hou aan totdat hy alles van die koning wat hy nodig gehad het vir sy taak.
• Beplanning mag vereis dat ons sekere dinge nie doen nie. Hy kon nie die muur herbou en die koning dien nie. Hy fokus op een ding – die herbou van die mure van Jerusalem.

Nehemia was toegewyd en passievol. Hy was egter ook bereid om te wag en bid vir God se tydsberekening. Toe God die deur oopmaak en die geleentheid skep, was Nehemia ten volle voorbereid. Ons moet ons passie met ‘n absolute vertroue is God se vermoë om die verlangde resultate te behaal, temper.

Vertrou op die Here! Wees sterk en hou goeie moed! Ja, vertrou op die Here! (Psalm 27:14).

Volgende keer begin ons kyk na die sesde kenmerk van ‘n leier – motivering.

 “Only once did God choose a completely sinless preacher.” ~Alexander Whyte

Nehemia – Beplanning (2)

Daar is al heelwat boeke oor Nehemia as leier geskryf. Nou het nog ‘n nuwe boek verskyn: Leader after God’s own Heart deur Jim George (2012). Kom ons kyk na sekere aspekte van Nehemia se leierskap.

Kenmerk #5: Beplanning …fokus jou leierskap

Beplan of nie beplan nie.

Beplanning is deel van leierskap. Nehemia moes ‘n onderneming beplan wat niemand oor die vorige 90 jaar kon regkry nie. Beplanning is om vooruit te bepaal wat gedoen moet word; dit is hoe om van nou tot dan te beweeg; om dinge te verander van wat hulle nou is na wat hulle behoort te wees. Hoe meer tyd jy aan beplanning spandeer, hoe minder tyd het jy nodig om die werk te doen.

Nehemia was ‘n man van gebed. Tydens sy gebede besef hy sy persoonlike verantwoordelikheid. God lei Nehemia en antwoord sy gebede, maar Nehemia moet beplan en gereed wees. Vir vier maande steek Nehemia sy kommer en emosies oor die toestand in Jerusalem weg. Maar op ‘n dag sien die koning dat hy bedruk is (2:2). Nehemia was baie bang – ‘n dienaar wys tog nie negatiewe gevoelens in die teenwoordigheid van die koning nie. Nehemia het vier maande lank gebid en beplan; hy besef dat hy op een of ander stadium die koning vir hulp moet vra. Omdat hy gebid en beplan het, was hy gereed toe die koning hom vra. Toe die koning dus vra waarom hy so bedruk was, besef Nehemia dat dit sy groot geleentheid is – en hy was gereed daarvoor.

Wat is die eienskappe van ‘n doeltreffende beplanner?

• Passie. As jy nie sterk voel oor iets wat jy voorstel nie, hoe kan jy verwag dat ander opgewonde moet wees oor jou voorstel. Nehemia was bereid om sy werk te verloor om Jerusalem te help. Watter idees/drome laat jou op jou knieë in gebed staan? Watter projekte hou jou snags wakker, want jy is opgewonde oor die toekoms?  Bid vir passie; beplan met passie.
• Ondersteuning. Om ‘n plan uit te voer, benodig die ondersteuning van ander mense – mense met ondervinding en hulpbronne. Nehemia het dit besef. Hy besef ook dat ondersteuning van die Jode nie voldoende sal wees nie – hy het ook die koning se ondersteuning nodig. Hy was die een persoon in die ryk wat kon help. Maar die koning is onvoorspelbaar. Hoe sou hy op Nehemia se versoek reageer? Daar is ‘n tyd om te bid; daar is ‘n tyd om te beplan; daar is ‘n tyd om op te tree.
• ‘n Duidelike doelwit. Jy moet ‘n doelwit hê wat maklik verstaanbaar is. As hy nie ‘n doelwit het nie, gaan niemand die projek ondersteun nie. Nehemia se doelwit was eenvoudig: Stuur my na Juda toe, na die stad waar my voorvaders begrawe is, sodat ek die stad kan herbou (2:5). ‘n Eenvoudige versoek waarin sy doelwit duidelik uitgespel word.
• ‘n Tydraamwerk. As jy nie ‘n begin en einddatum het nie, sal jou projek waarskynlik misluk. Mense wil weet wat van hulle verwag word en vir hoe lank. Geen wonder die koning vra: Hoe lank sal jou reis duur en wanneer sal jy terug wees? (2:6) Omdat hy beplan het, kon Nehemia vir hom ‘n tyd aandui. Later vind ons uit dat die projek 12 jaar geduur het (5:14). Beplan altyd met ‘n kalender in jou hand.
• Toestemming. ‘n Doeltreffende beplanner vra toestemming. Elke plan moet deur iemand goedgekeur word. Nehemia besef dat hy aanbevelingsbriewe van die koning sou benodig (2:7). Nehemia slaag, want hy doen dinge op die regte manier. ‘n Leier volg die reëls. Moenie kortpaaie neem nie. Doen jou huiswerk.
• Verkryging. ‘n Doeltreffende beplanner  verkry wat nodig is om sy doelwit te bereik. Nehemia het materiaal vir die herbouproses nodig – soos hout. Hy vra die koning vir ‘n brief aan Asaf, die opsigter van die staatsbos, om hom van hout te voorsien (2:8). Oppas vir die besonderhede – dit is waar planne dikwels vashaak.

Jesus self leer vir ons hierdie beginsel: Wie van julle wat ‘n gebou wil oprig, gaan nie eers sit en die koste bereken, om te sien of hy genoeg geld het om die werk te voltooi nie. Anders as hy die fondament gelê het en nie in staat is om die gebou te voltooi nie, sal almal wat dit sien, met hom die spot dryf (Lukas 14:28 – 29). Beplan jou projekte.

Nehemia se afspraak met die koning was ‘n groot sukses, maar hy besef terdeë Wie sy bron van krag en sukses was: My God het sy goeie hand oor my gehou, en die koning het my versoek toegestaan (2:8). Nehemia het besef dat hy van God afhanklik is. Nooit aanvaar hy krediet vir iets wat gebeur het nie, want hy weet dat God agter hom was. Nehemia se nederigheid was opreg.  Ons mag nie spog oor dinge wat God deur ons doen nie – so asof dit in ons eie krag  en wysheid vermag het. God laat die planne slaag – nie jou beplanning nie. Kom ons kyk weer na die Spreuke-skrywer: ‘n Mens kan sy voornemens hê, maar die laaste woord daaroor kom van die Here af (16:1); ‘n Mens beplan sy pad, maar die Here bepaal hoe hy loop (16:9).

Volgende keer kyk ons na die beginsels van beplanning.

“The preaching of Christ is the whip that flogs the devil. The preaching of Christ is the thunderbolt, the sound of which makes all hell shake.” ~ Charles Spurgeon

Nehemia – Beplanning (1)

Daar is al heelwat boeke oor Nehemia as leier geskryf. Nou het nog ‘n nuwe boek verskyn: Leader after God’s own Heart deur Jim George (2012). Kom ons kyk na sekere aspekte van Nehemia se leierskap.

Kenmerk #5: Beplanning …fokus jou leierskap

Toe sê die koning vir my: “Is daar iets wat jy my wil vra?” Ek het ‘n skietgebed opgestuur na die God van die hemel en toe vir die koning gesê: “As die koning dit goedvind, as u dienaar op u goedgesindheid mag reken, stuur my na Juda toe, na die stad waar my voorouers begrawe is, sodat ek die stad kan herbou.” (2:4 – 5).

Dit is moeilik om ‘n mens se gevoelens te beskryf as hy besef dat God op die punt staan om sy gebede te antwoord. Nehemia het waarskynlik ‘n mengsel van vreugde , opwinding en angs ondervind toe die koning hom vra of daar iets is wat hy wil vra. Voordat hy met die koning praat, stuur hy eers ‘n skietgebedjie op. Wat sou die koning antwoord?

Nehemia het waarskynlik beplan van die dag toe hy van Jerusalem se benarde toestand gehoor het. Baie idees het in sy gedagtes gewoel. Hy dink aan die voorrade wat hy nodig sou hê en die hoeveelhede; die goedkeurings wat hy nodig sou hê.

Twee tipes mense

(a)Diegene wat nie beplan nie. Hulle mag drome hê, maar geen planne nie. Wat hardwerkende mense beplan, is nuttig, maar elkeen wat oorhaastig is, stuur af op gebrek (Spreuke 21:5). As jy nie jou dag beplan nie, sal iemand anders dit beslis vir jou doen.

(b)Diegene wat vooruit beplan. Beplanning is ‘n lewenstyl en dissipline vir hierdie mense. Hulle het doelwitte en behaal resultate. Dinge gebeur. Die slegte nuus is dat hierdie mense wat beplan dikwels net op die fisiese aspekte fokus en die geestelike aspekte ignoreer. Hulle beplan nie vir daardie dinge wat ewigheidswaarde – ‘n nouer verhouding met God en jou gesin –  het nie. Maak seker dat jy in jou beplanning daardie dinge wat werklik saak maak insluit.

Volgende keer gaan ons na die eienskappe van ‘n doeltreffende beplanner kyk.

Hoekom bereik ons nie die land vir Christus nie?

Greg Stier, die stigter en President van Dare 2 Share Ministries International, fokus veral op tienerbediening. Hy identifiseer sewe redes waarom die VSA nie vir Christus bereik word nie. Hierdie is ‘n Amerikaanse studie, maar baie van dit wat hy sê, geld net so vir ons.

Baie Christene kan nie die boodskap van die evangelie op ‘n eenvoudige manier verduidelik nie. Napoleon het drie opdragte vir sy boodskappers tydens die oorlog gehad: Wees duidelik. Wees duidelik. Wees duidelik. Dit geld ook vir ons. Wees duidelik wat die boodskap van die evangelie is. (Lees Paulus se opsomming in 1 Korintiërs 15:3 – 4). Daarna: Bid dat ek dit duidelik sal verkondig soos dit my opgelê is (Kolossense 4:4).

• Kerkleiers loop nie voor nie

As daar tydens die erediens meer tyd aan afkondigings as aan gebed gespandeer word, is iets iewers verkeerd. God moet harde harte sag maak en toe deure oopmaak. Daarvoor moet ons Hom in gebed vra.

• Kerke mobiliseer nie hulle jongmense om die evangelie te deel nie

Meeste mense wat tot bekering kom, doen dit voor hulle 18 jaar oud is. Hoekom bemoedig kerke nie jongmense om die evangelie aan hulle groep te verkondig nie? Rus hulle toe en laat hulle los. Ons weet tog die mense wat waarskynlik die evangelieboodskap sal aanvaar is jongmense. Maar ons rus nie jongmense toe om ander jongmense te bereik nie.

Is dit nie tyd om al ons verskonings te los en ons land vir Christus te bereik nie?