Jesus reinig die tempel

Jesus reinig die tempel

Jesus se reiniging van die tempel (Johannes 2:13 – 22) kan as kontroversieel beskou word. Jesus reis van Galilea na Jerusalem vir die paasfees – die belangrikste fees op die Joodse kalender. Dit roep die uittog van die Jode in herinnering op. As dit fisies enigsins moontlik was, het alle Jode na Jerusalem gereis vir die fees.

 

Toe Jesus in Jerusalem aankom, sien Hy dinge in die tempel waarmee Hy glad nie saamstem nie. Op die tempelplein was daar mense wat beeste, skape en duiwe verkoop het as ook geldwisselaars. Die verkopers van beeste, skape en duiwe het voorsien in die mense se behoeftes vir offers. Die geldwisselaars het onrein of vreemde muntstukke vir rein Joodse muntstukke verruil – muntstukke wat in die tempel gebruik kon word. Ons kan sê dat hulle noodsaaklike dienste verrig het, maar Jesus sien ‘n probleem met wat daar aan die gang is.

Johannes sê dat Jesus met toutjies ‘n sweep gemaak het en almal uit die tempel uitgejaag het. Hy keer selfs die tafels van die geldwisselaars om. Hoekom sou Jesus wat gewoonlik sagmoedig is so optree? In die gedeelte kry ons twee redes vir Jesus se optrede:

  • Dit gaan hier oor die doel van die tempel en ware aanbidding van God. Die tempel was veronderstel om ‘n plek te wees waar God aanbid moes word. Mense het egter die tempel nie as plek van ware aanbidding gesien nie, maar as ‘n geleentheid vir ekonomiese wins. Die aanbidding het sy fokus op God verloor. Aanbidding is met besigheid vervang.
  • Hierdie is ‘n aanhaling van Psalm 69:10. Dit is waaraan die dissipels dink toe hulle sien hoe Jesus optree.

Ons moet onthou dat die tempel sy uiteindelike vervulling in Jesus en die kerk kry. In vs 21 lees ons: Met “hierdie tempel” het Hy egter sy liggaam bedoel. Die vraag: Gebruik ons nie nog steeds vir Jesus en sy kerk as ‘n geleentheid om “geld/wins” te maak nie? As ons na Jesus en die kerk kom primêr vir selfsugtige voordeel en nie primêr om God te aanbid nie, maak ons misbruik van die huis van die Vader.

Nou toe nou

Calvyn

 

Nou toe nou

In Galilea is daar ‘n toeriste aantreklikheid wat die daaglikse lewe tydens Jesus se tyd laat herleef. Raai wat het hulle nou gedoen? Hulle sit Wi-Fi hotspots om die donkies se nekke sodat toeriste toegang tot die Internet het!

 

 

Kfar Kedem is ‘n park geleë naby Nasaret. Hulle gee aan toeriste die geleentheid om dieselfde klere te dra, dieselfde kos te maak en op dieselfde diere te ry as 2000 jaar gelede. Met die toegang tot die Internet kan toeriste nou hulle ondervindings met vriende en familie deel.

 

 

Beleefdheid

(Augustinus)

Beleefdheid

Rick Warren het die Saddleback Civil Forum gekanselleer. Tydens hierdie forum is daar ‘n debat tussen die twee presidentskandidate vir die Amerikaanse verkiesing. Hierdie forum is gekanselleer weens ‘n gebrek aan beleefde debat tydens die huidige verkiesingsveldtog. Is die wêreld – ook Suid-Afrika – in ‘n beleefdheidskrisis?

 

 

Hoekom is daar hierdie krisis?

  • Ons is vinnig om diegene wat van ons verskil te etiketteer. Dit lei tot verkeerde persepsies en mense begin hulleself verdedig. Geen samewerking is moontlik as mense die hele tyd hulleself verdedig nie.
  • Ons trek ander se sienings skeef sodat hulle dom lyk. Advertensies vir kandidate is vol foute en veralgemenings. Die ander kant reageer en ons kry ‘n bose kringloop. Dit is makliker om die foute van ander uit te wys as om jou eie saak te stel.
  • Ons gebruik vrees as ‘n wapen. Dit is baie doeltreffend om mense wat oningelig is te oorreed.

 

Goed en wel, maar wat nou? Drie dinge mag help:

  • ‘n Gees van samewerking. Dit beteken nie dat ons oor alles moet saamstem nie – dit beteken ons moet bereid wees om dinge vanuit ‘n ander se perspektief te sien en dan saam te werk. Ons kan van mekaar leer.
  • ‘n Kollektiewe visie. Nasionale tragedies bring ons bymekaar. Kan ons nie dieselfde gesindheid kry as dit met ons goed gaan nie? Wat ons nodig het, is ‘n kollektiewe visie vir ‘n beter land.
  • ‘n Doel wat deur almal aanvaar word. Dit is moeilik. Iemand moet die doel formuleer en wie is dit?

 

Daar is ‘n beleefdheidskrisis in die wêreld. Is hier nie ‘n groot geleentheid vir die kerk om mense weer bewus te maak van die belang van beleefdheid nie?

Geloof en Aksie

Calvyn

Geloof en Aksie

 

Ons glo dikwels dat geloof beteken dat ek sekere feite met my verstand moet aanvaar. Geloof is egter sinoniem met optrede: sonder optrede is daar geen geloof nie. Geloof is ‘n oortuiging wat as ‘n keuse uitgedruk word. Jou geloof word eers ware geloof as jy in gehoorsaamheid daarop optree.