Dag 5: ‘n Toevlug en huis vir pelgrims

Die Billy Graham Center for Evangelism het ‘n aantal leraars gekry om vir 25-dae stukkies te skryf vir Advent. Ons gaan oor die volgende 25 dae elke dag een van hierdie stukkies plaas.

[Advent word gewoonlik toegepas op die vier weke voor Kersfees. Latyn: ad – na + venire – kom. Dit dui dus op die naderende koms van Christus – sy eerste en tweede koms.]

God is vir ons ‘n toevlug en ‘n beskerming; Hy was nog altyd bereid om te help in nood (Psalm 46:2).

Wat het dit met Advent te doen? Ons sing mooi Kersliedere, maar toe Jesus in Betlehem gebore is, was koning Herodes aan bewind. Hy was wreed. Hy beveel sy soldate om al die seuntjies van twee jaar en jonger dood te maak (Matteus 2:17). Hy doen dit, want hy het hulle as ‘n potensiële bedreiging van sy bewind gesien. Seuntjies is weggesteek; die mense was vreesbevange – geen blydskap en vrede nie. Bewus van die gevaar neem Josef en Maria vir Jesus Egipte toe. In Egipte kry hulle ‘n veilige plek – ‘n plek van rus en vrede.

Suid-Afrika is ‘n plek vol immigrante en vreemdelinge. Reik ons uit na immigrante en vlugetlinge? Stel ons hulle aan Jesus bekend. Mag ons lande, dorpe en huise ‘n toevlugsoord vir ontwortelde pelgrims word.

God is vir ons ‘n toevlug en ‘n beskerming; Hy was nog altyd bereid om te help in nood. Daarom is ons nie bang nie, al gee die aarde pad, al skuif die berge tot in die dieptes van die see (Psalm 46:2 – 3).

You don’t think your way into a new kind of living. You live your way into a new kind of thinking – Henri Nouwen

Tevredenheid nie afhanklik van omstandighede nie (2)

Ek gaan ‘n aantal blogs aan Tim Keller se nuwe boek Making Sense of God: An Invitation to the Skeptical spandeer. Hy wys dat die Christelike geloof in alle opsigte – emosioneel, kultureel en rasioneel – meer sin maak as die siening van ons moderne wêreld.

Die vraag is: As ons uitvind dat daar iets skort, wat kan ons daaraan doen? Daar is twee breë benaderings: jy kan leef asof tevredenheid wel moontlik is of jy kan leef uit die oortuiging dat tevredenheid net nie moontlik is nie.

1. Tevredenheid is wel moontlik

Hier kan ons vier strategieë onderskei:

• Jongmense reis met die hoop dat hulle tevredenheid sal vind – as ek net die regte werk of vrou kry, sal alles verander. Hulle is rusteloos op soek.
• Gegriefdheid – ons blameer die hindernisse wat verhoed dat ons die dinge wat ons dink tevredenheid sal bring, verhinder.
• Gedrewenheid – ons maak net meer en meer bymekaar – geld en prestasies. Ander blameer die dinge wat hulle het: as ek maar net ‘n beter werk of vrou of huis gehad het.
• Wanhopigheid – nou blameer ons onsself. As ons eerlik na onsself kyk, sal ons altyd iets kry wat tot ons frustrasie bygedra het.

2. Tevredenheid is nie moontlik nie

Hier kan ons drie strategieë onderskei:

• Altruïsme – naasteliefde. Hierdie mense kyk na die sosiale probleme in ons samelewing en die verbetering van die lot van ander. Hierdie benadering is dikwels selfsugtig: om ander te help omdat jy ontevrede is, sal op die langtermyn nie werk nie.
• Sinisisme – as jy glo dat vervulling, vreugde en tevredenheid net nie moontlik is nie en jy verhard jou hart teen enige hoop, sal jy baie van jou menslikheid verloor.
• Onttrekking – om jou liefde vir ander te verminder, sal nie jou tevredenheid vermeerder nie, maar sal dit eerder ondermyn.

Hier is sewe strategieë wat mense gebruik om tevredenheid te bou. Nie een van hulle is suksesvol nie. Wat kan ons dan doen met ons ontevredenheid? Daarna kyk ons volgende keer.

A false religion fears the progress of all truth; a true religion seeks and recognizes truth wherever it can be found – Lord Acton

Hoekom het die engele gesing?

Skielik was daar saam met die engel ‘n menigte engele uit die hemel wat God prys en sê: “Eer aan God in die hoogste hemel, en vrede op aarde vir die mense in wie Hy ‘n welbehae het.” (Lukas 2:13 – 14).

Reeds in vers 10 het ons gelees dat die engel gesê het dat hy ‘n goeie tyding van groot blydskap bring. Moes die engele ‘n lied van blydskap of eerder ‘n treursang gesing het?

Dit moes eerder ‘n treursang gewees het:

• ‘n Swanger vrou na ‘n lang reis op ‘n donkie is op die punt om in kraam te gaan. Sy en haar man soek ‘n privaat plekkie om te kraam. Hulle kry niks nie … net ‘n stal. Maria en Josef was vreemdelinge in Betlehem en word soos vreemdelinge behandel. Gewoonlik as babas kom, word hulle in mooi babakamers verwelkom met die hele familie wat om hulle saamkloek. Maria word uitgedruk en moet so onsigbaar as moontlik wees – weggesteek tussen die diere. Ons kan tog nie ‘n lied van blydskap vir haar sing nie.
• Jesus mag die Koning van die heelal wees, maar Hy word nie so behandel nie. Sy gesin was arm en sonder invloed. God kom besoek die wêreld, maar sy ontvangs is nie juis gasvry nie. Ons kan tog nie ‘n lied van blydskap daaroor sing nie.
• Toe Jesus se ouers Hom na die tempel geneem het, kry ons die wyse Simeon daar. Hy besef onmiddellik dat hierdie kindjie die Messias is. Hy sê vir Maria: “Kyk, hierdie Kindjie is bestem tot ‘n val en ‘n opstanding van baie in Israel … En wat jou betref, ‘n swaard sal deur jou siel gaan.” Sou jy ‘n lied van blydskap gesing het as jy hierdie woorde gehoor het?
• Die koning van destyds, Herodes, hoor van die kind wat gebore is en bestem is om die Koning van die Jode te wees. Die kind is skaars gebore of Herodes probeer Hom doodmaak. Jesus en sy ouers moes na Egipte vlug waar hulle as vlugtelinge moes bly tot na Herodes se dood. Dit is tog nie ‘n rede om van blydskap te sing nie.
• Jesus het Herodes se poging om Hom dood te maak, ontvlug, maar baie seuntjies twee jaar en jonger word doodgemaak. Ons lees van die gekerm en gehuil van die moeders. Dit is tog nie ‘n rede om ‘n lied van blydskap te sing nie.

Maar hoekom het die engele  ‘n lied van groot blydskap gesing? Wat het Jesus op aarde teengekom? Vyandigheid en onverskilligheid. Dit is hoekom die engele ‘n lied van blydskap gesing het: God was gewillig om na so ‘n wêreld te kom. Geen rooi tapyt nie; geen luisterryke ontvangs nie; geen indrukwekkende gastelys nie. Die wonder van Kersfees is dat Christus gekom het. Daarom sing die engele hulle lied van blydskap. Ja, die wêreld is nie altyd ‘n aangename plek nie. Mense gee nie meer om vir ander nie. Jesus en sy familie moes as vlugtelinge in Egipte gaan leef. Vandag is daar miljoene mense dwarsoor die wêreld wat as vlugtelinge moet leef. ‘n Biljoen mense gaan elke aand honger slaap. Ons harte is steeds traag en koud. Ons maak steeds nie plek vir ander nie – ons selfbeheptheid neem al die plek op.

Die Kersverhaal vertel vir ons dat God na so ‘n wêreld gekom het, want Hy het hierdie wêreld lief en wil dit herstel. Jesus het nie gewag tot die wêreld 100% skoon en reg was voor Hy gekom het nie. Hy kom aan te midde van vyandigheid en wreedheid en nooi ons uit om dit te vier.

Daar is baie om oor hartseer te wees oor die geboorte van Jesus. Die herbergiere en Herodesse van hierdie wêreld rig groot skade aan. Die goeie nuus: Dit het nie vir Jesus afgeskrik nie; Hy het steeds gekom. Ons moet nooit vergeet van diegene wat positief op Jesus se geboorte gereageer het nie: skaapwagters, die sterrekykers uit die Ooste, Anna en Simeon, Elisabet, Maria, Josef … Dit is hoekom die engele ‘n lied van blydskap gesing het – God het deurgebreek en diegene wat Hom soek, sal Hom vind.

Dag 4: Berugte vroue in Jesus se voorgeslagte

Die Billy Graham Center for Evangelism het ‘n aantal leraars gekry om vir 25-dae stukkies te skryf vir Advent. Ons gaan oor die volgende 25 dae elke dag een van hierdie stukkies plaas.

[Advent word gewoonlik toegepas op die vier weke voor Kersfees. Latyn: ad – na + venire – kom. Dit dui dus op die naderende koms van Christus – sy eerste en tweede koms.]

In Matteus 1 Kry ons Jesus se geslagsregister. Tussen al die manlike voorsate is daar ook vyf vroue. Hoekom?

• Tamar is deel van Jesus se bloedlyn deurdat sy haarself as ‘n prostituut vermom het en haar skoonpa, Juda, verlei het. Sy het swanger geword (Genesis 38).
• Ragab was ‘n prostituut in Kanaän. Sy en haar familie was die enigste oorlewendes na Israel se aanval op Jerigo. Sy het die spioene van Israel gehelp om te ontsnap. Nadat sy in Israel geïntegreer is, trou sy met Salmon en word so deel van Dawid se voorgeslag.
• Rut was ‘n Moabiet. Die Moabiete het hulle kinders aan hulle god Kemos geoffer. As gevolg van ‘n tragedie en haar lojaliteit eindig sy in Betlehem. Daar trou sy met Boas, die oupagrootjie van Dawid.
• Batseba, die vrou van Urija. Dawid het haar verlei en haar man laat doodmaak. So word sy ook ‘n voorsaat van Jesus.
• Maria word swanger voor haar huwelik met Josef. Oor hierdie skandaal sou die mense geskinder het. Sy moes seker allerhande beledigings verduur het.

Hierdie vroue het een ding in gemeen: oneer/skande. Maar hulle het almal ook iets anders ondervind: God se verlossende genade. Hierdie genade is vir elkeen van hulle deur die toekomstige werk van Jesus aan die kruis gekoop. Voordat Matteus die Kersverhaal begin wys hy eers vir ons vyf vroue om vir ons te wys waarom Jesus gekom het: om dié wat verlore is te soek; om sondaars te vergewe; om sy vyande te versoen; om vreemdelinge sy kinders te maak.

Die geslagsregister van Jesus Christus, die Seun van Dawid, die Seun van Abraham (Matteus 1:1).