The design of the Lord is to exercise the patience of his servant by adversity; Satan endeavours to drive him to despair–  Johannes Calvyn

Psalm 119:35

Laat my wandel volgens u gebooie, want daarin vind ek vreugde (NAV)

Laat my wandel op die pad van u gebooie, want daarin het ek ‘n behae (OAV)

Laat my elke dag loop op die pad wat U voorskryf, want dit maak my baie gelukkig (Die Boodskap)

Onthou julle nog daardie eenvoudige liedjie van Peter Pan? “We’re following the leader, the leader, the leader. We’re following the leader wherever hy may go.” Dit is nogal toepaslik op hierdie vers wat fokus op hoe om die leier te volg.

 Die probleem is dat mense vandag nie sommer volg nie. Almal bied leierskapskursusse aan, maar niemand leer mense hoe om te volg nie. Mense wil leiers wees – nie volgelinge nie. Om ‘n volgeling te wees, klink vir ons moderne oor ‘n bietjie negatief.

 Maar om die leier te volg is ‘n belangrike tema in die Skrif. Wat is die eerste ding wat Jesus vir sy dissipels sê? Volg My! Die psalmis verstaan dat om God se leiding te volg belangrik is vir mense wat in ‘n verhouding met Hom staan. Om te volg is soortgelyk aan gehoorsaamheid, maar om te volg dui meer op ‘n verhouding. Om te volg beteken dit jy gaan in dieselfde rigting – jy loop dieselfde pad – as die leier.

 Die psalmis versoek dat hy volgens God se gebooie sal loop. Dit klink nou nie baie aantreklik nie, maar juis daarin vind die psalmis sy vreugde. Om vreugde in God se gebooie te ondervind, is ‘n belangrike tema van Psalm 119. Die psalmis verstaan dat God lei op die pad en al is dit soms moeilik om Hom te volg, lei dit tot vreugde en ‘n dieper verhouding met God.

Here, help ons om u leiding te volg. Laat ons vreugde in U en u Woord ondervind. Amen.

Those who are strong only in fervor and sharpness, but are not fortified with solid doctrine, weary themselves in their vigorous efforts, make a great noise, rave, [and] make no headway because they build without a foundation. — Johannes Calvyn

Skuldgevoelens
Richard Coeken (in The Big Fight waarvan Richard Perkins en Tim Thornborough die redakteurs is) het ‘n interessante gedeelte oor skuldgevoelens geskryf. Hy beklemtoon vier aspekte:

(1)    Mense voel nie skuldig voor God nie al behoort hulle skuldig te voel. In die hart van die goddelose het die opstand teen God die laaste woord. Die goddelose het geen vrees vir God nie en praat net goed oor homself. Hy is altyd daarop uit om kwaad te doen en om te haat (Psalm 36:2 – 3). Baie mense soek nie die Verlosser nie, want hulle vrees nie vir God soos hulle behoort te doen nie. Hoekom? Hulle voel nie skuldig oor hulle sonde nie.
(2)    Baie gelowiges voel skuldig voor God oor dinge wat nie verkeerd is nie! Paulus waarsku teen dwaalleraars: Hulle verbied mense om te trou en bepaalde soorte kos te eet. Maar God het die voedsel gemaak, sodat dié wat glo en tot die kennis van die waarheid gekom het, dit met danksegging kan gebruik (1 Timoteus 4:3). Goeie voorbeelde hiervan is die voedselwette van die Jode, die vastye van die Moslems en Katolieke monnikke wat nie mag trou nie.
(3)    Baie mense voel skuldig voor God wanneer sy Gees hulle oortuig van hulle behoefte aan ‘n Verlosser. En wanneer Hy kom, sal Hy bewys dat die wêreld skuldig is aan sonde, en dat die reg aan my kant is, en dat die oordeel al gekom het (Johannes 16:8). Die Heilige Gees oortuig ons deur die Skrif dat ons onder God se wet skuldig is, en dat ons Hom nodig het. Dit gebeur dwarsdeur ons lewens as gelowiges. Ons bewustheid van skuld is ‘n bemoedigende teken van die Heilige Gees se werking in ons lewens.
(4)     Gelowiges moenie aanhou skuldig voel nie, want ons is van ons sondes gereinig. Laat ons nou tot God nader met ‘n opregte hart en met volle geloofsekerheid. Ons harte is immers gereinig van ‘n skuldige gewete, en ons liggame is gewas met skoon water (Hebreërs 11:22). Soos ‘n hoëpriester God nader met die bloed van offers vir sy mense, so is Jesus permanent in die teenwoordigheid van God as ons Hoëpriester nadat Hy sy eie bloed aan die kruis vir ons sondes gestort het. Ons kan dus nou sonder skuldgevoelens in die teenwoordigheid van God lewe – indien ons in Jesus Christus en dit wat Hy gedoen het, glo.

Elkeen van ons kan hier iets leer.

Education without values, as useful as it is, seems rather to make man a more clever devil – C. S. Lewis

 Bonhoeffer (11)

Ek wil enkele gedeeltes uit 40-Day Journey with Dietrich Bonhoeffer (Augsburg Books) hanteer.

Wie is dié wat rein van hart is? Net diegene wat hulle harte volledig aan Jesus gegee het, sodat Hy alleen in hulle heers. Net diegene wat nie hulle eie harte met hulle boosheid bevlek nie. ‘n Rein hart is die eenvoudige hart van ‘n kind – die hart van Adam voor die sondeval; die hart waarin die wil van Jesus en nie my eie wil heers nie. So ‘n hart behoort volledig/onverdeeld aan Christus; so ‘n hart volg Hom waar Hy ook al lei.

Sulke mense se harte is skoon van onrein beelde; hulle word nie heen en weer getrek deur hulle eie bedoelings en begeertes nie.

Bonhoeffer gee weer twee Bybelverse:

• Geseënd is dié wat rein van hart is, want hulle sal God sien (Matteus 5:8).
• Wie mag die berg van die Here opgaan en wie mag in sy heiligdom gaan staan? Dié een wie se hande rein en wie se hart suiwer is, wat alle bedrog vermy en geen vals eed aflê nie. So iemand sal van die Here seën ontvang, en God, sy redder, sal reg aan hom laat geskied – (Psalm 24:3 – 5).

Here, laat my enigste wil wees om volledig aan U te behoort. Amen.

“The Christian ideal has not been tried and found wanting; it has been found difficult and left untried.” – G. K. Chesterton

Ek het misluk

Voel julle moeg vir hierdie lewe? Knak julle knieë onder al die probleme en verantwoordelikhede wat julle moet dra? Het julle godsdiens leeg geword sodat dit julle geestelike dors nie meer les nie? Kom dan na My toe. By My sal jy weer die sin van die lewe ontdek. Kom luister na wat ek vir jou oor jou lewe wil leer. Ek sal jou leer dat geluk nie is om heeltyd net vir jouself te leef nie. Jy sal ontdek wat dit beteken om nog vir ander mense tyd en liefde oor te hê. Kom ontdek watter vreugde dit bring om te leef soos God wil hê jy moet leef. Dis nie moeilik om so te leef nie; om die waarheid te sê, as jy so begin leef, sal jy agterkom hoe lekker die lewe regtig kan wees (Matteus 11:28 – 30 – Die Boodskap).

Die reëls en die definisie van sukses verskil tussen Christenleiers en nie-Christenleiers. As ‘n Christenleier se resultate nie voldoen aan sy hoop nie, staan hy voor n keuse:

• Jy verbind God se goedkeuring aan jou swak prestasie – met ander woorde jy probeer harder en jy doen meer totdat jy uiteindelik totaal uitgeput is.
• Jy vertrou op genade en word ‘n aktiewe student van God se wysheid en weë.

Die tweede opsie is die beste, want dit verseker jou dat jou goedkeuring deur God nie van jou prestasies afhang nie. Nou kan jy God in alle opregtheid nader oor wat die probleem is:

• God wat sien ek nie raak nie?
• God hoekom is daar weerstand?
• Wat in die groter agenda  waarna U my uitnooi om deel van te wees?
• Wat is U spesifieke begeerte in hierdie geval?Wat verwag U van my?
• God, aan watter ander vrae moet ek dink?

As jou doel is om dit wat jy beplan het ten alle koste te doen, want jou reputasie hang daarvan af, sal jy aan jou strategie en nie aan God vasklou nie. Maar dit is nie wat God van jou verlang nie. Raak stil en luister na wat God vir jou wil sê.