Man en vrou moet een wees (huwelik)

Hoewel die manier waarop ons vandag trou en die manier waarop mense in die Bybelse tyd getrou het, verskil, staan die feit dat mense moet trou vas. God wil dit so hê. Die “hoe” is nie so belangrik nie, maar die “dat”.

Volgens Genesis 2:20-25, wat nogal dikwels in die Nuwe Testament aangehaal word, het God man en vrou vir mekaar gemaak. Die plek waar hulle saam moet bly, is die huwelik. Dit is die ruimte wat God vir hulle gegee het om saam met mekaar te leef, seks te hê, ŉ gesin groot te maak, en mekaar sommer net te geniet. Binne die huwelik moet hulle egter “getrou” aan mekaar wees; daarom sê ons man en vrou “trou” met mekaar. As hulle met mekaar trou, moet hulle ook besef dit is ŉ band wat hulle lewenslank bind. Hulle kan nie maar net vir ŉ rukkie saam wees en dan sommer koers verander en saam met iemand anders gaan bly nie. Dit doen jy as jy met iemand uitgaan of net saam is. As jy egter besluit om met iemand te trou, is dit lewenslank.

Boek: Geloof in Aksie-Bybel
Skrywers: Prof Jan van der Watt, Dr Stephan Joubert, Dr Johan Smith
Uitgewers: Christelike Uitgewers Maatskappy

Toordery en towenaars?

Towery en geeste opsoek en sulke goed is nie dinge waarmee Christene hulleself moet ophou nie.

Die Here hou nie daarvan nie. Die hart van die probleem is dat God nie verdra as ons magte en kragte buite Hom om eer of erkenning gee nie. Die gebooie sê dat ons God en Hom alleen moet eer en liefhê. Daar is nie plek vir ander nie. Om nou ander magte te eer (hulle sal nie reageer as jy hulle nie eer nie), doen afbreuk aan jou diens aan God. Dit mag nie.

Boek: Geloof in Aksie-Bybel
Skrywers: Prof Jan van der Watt, Dr Stephan Joubert, Dr Johan Smith
Uitgewers: Christelike Uitgewers Maatskappy

God is regverdig daarom is daar iets soos straf

Baie keer wonder ons waarom God mense straf. Hy is dan ŉ liefdevolle God wat vir mense omgee.

Ons vergeet dat daar mense is wat niks met God te doen wil hê nie. As hulle na God toe wil kom en Hom dien, is hulle welkom. Maar as hulle hulle rug op die Here draai, kan hulle Hom nie kwalik neem as Hy uiteindelik dieselfde met hulle doen nie. Om die waarheid te sê, hulle het net hulleself te blameer as God ook sy rug op hulle draai. Ons moet onthou dat een van die eienskappe van God is om regverdig te wees. Hy sal nie vir die een persoon sê om in Hom te glo om gered te word en vir die ander om Hom maar te ignoreer en nogtans gered te word nie. Daarom steek Hy nie weg wat met mense gebeur wat Hom eenkant toe skuif nie. Hulle sal eendag regtig sonder Hom moet klaarkom. Meer nog, jy kan nie God jou vyand maak, Hom beledig of maak of Hy nie bestaan en dan verwag dat niks gaan gebeur nie. Die Here sal ook sy eie eer beskerm en dan mag die mense wat gedink het hulle kan met God maak soos hulle wil agterkom dat dit ŉ groot fout was. Ja, hulle mag agterkom dat God straf ook.

Boek: Geloof in Aksie-Bybel
Skrywers: Prof Jan van der Watt, Dr Stephan Joubert, Dr Johan Smith
Uitgewers: Christelike Uitgewers Maatskappy

Die mense wat vir ons veiligheid moet sorg (die staat)

ŉ Mens stem nie altyd saam met wat die staat doen nie. Dit was ook so in die Bybelse tyd.

Soos die situasie verander het, word die staat ook anders in die Bybel gesien, hoewel die houding van die gelowige dieselfde bly. In Romeine 13:1-7 kry ons egter ŉ baie positiewe beskrywing van die staat. Hulle moet die veiligheid van die mense waarborg en die mense wat die wette oortree straf. Hier lyk dit dus of die verhouding tussen die Christene en die staat nie te sleg was nie. In 1 Petrus 2:13-15 gaan dit nie meer so goed met die Christene nie. Hulle word sosiaal vervolg. Tog sê Petrus dat hulle nog vir die staat moet luister en selfs vir die staat moet bid. As ons by Openbaring kom, gaan dit sommer sleg tussen die staat en die Christene. In Openbaring 13 word die staat met ŉ dier vergelyk wat vir Satan werk. Hulle probeer die Christene om elke hoek en draai vervolg of seermaak. Nogtans word die Christene nie opgeroep om wapens op te neem nie. Nee, hulle wapen moet hulle boodskap wees. Soos profete van ouds moet hulle die goeie boodskap ook aan die staat bly verkondig en die verkeerde dinge uitwys. Hulle moenie stilbly nie. Nie koeëls van yster is die Christene se wapens nie, maar koeëls van woorde.

Die Bybel sê dus dat Christene nie aktief met wapens die staat moet omver werp nie. Die staat werk ook vir God. Die staat moet sorg dat alle mense in sy gebied veilig en goed moet leef. As jy jou neus by jou voordeur uitsteek, moet dit nie afgeskiet word nie en daar moet darem basiese geriewe wees. Iemand moet daarvoor sorg en dit is die staat. Dit is die taak van die staat om ŉ goeie ruimte vir sy mense te skep om in te leef. Daarom moet Christene die staat ondersteun om dit moontlik te maak. As die staat dit nie meer doen nie, moet die Christene met die wapens van hulle woorde die staat oproep om hulle plig na te kom.

Boek: Geloof in Aksie-Bybel
Skrywers: Prof Jan van der Watt, Dr Stephan Joubert, Dr Johan Smith
Uitgewers: Christelike Uitgewers Maatskappy