Mat 27:11-56 (fokus 27:11-26)

‘Pilatus vra: “Wat moet ek dan met Jesus, wat Christus genoem word, doen?” “Kruis toe met Hom!” skreeu die skare soos een man. Pilatus vra: “Vir wat is julle so kwaad vir hom? Wat het hy dan gedoen om dit te verdien?”’ (27:22)

“Abba” beteken pa in Aramees en “bar” seun van…. “Barabbas” se naam beteken dus “seun van pa” of “pa se seun” (27:26). Interessant genoeg, is Jesus ook “barAbbas”, want Hy is die Seun van die Vader (“Abba”). Dit is die ironie van die lewe. Die een pa se seun is vrygelaat en die ander Pa se Seun is doodgemaak. Barabbas het nog ‘n kans gekry… omdat die ander Pa se Seun bereid was om te sterf.

Dit is eintlik waaroor die bekende verhaal van Jesus gaan. Hy het mense wat dit eintlik nie verdien nie, nog ‘n kans kom gee; nog ‘n kans om te leef, maar hierdie keer saam met God.

Nou wonder ek net wat Barabbas met hierdie tweede kans gedoen het? Iemand het ‘n storieboek daaroor geskryf – in die boek het Barabbas sy lewe vir die Jesus teruggegee; nie deur te sterf nie, maar deur te lewe, nuut te lewe, vir Jesus te lewe…

Of dit regtig so was weet ons natuurlik nie, maar dit is tog lekker om te dink dat dit dalk so kon gewees het. Dan sou Barabbas eintlik vir ons almal ‘n voorganger wees – die eerste een wie se lewe deur dood, Jesus se dood, verander is. Ja, so word ‘n sondaar ‘n kind van die hemelse Vader… barAbbas en nie Barabbas nie.

Hoe spel jy jou naam – barAbbas of Barabbas?

Mat 26:57-27:10 (fokus 26:57-68 )

‘Hierdie keer het Jesus nie stilgebly nie: “Jy sê dit self. Maar dit is maar die begin! Julle sal dit van nou af self ook sien. Julle sal die Seun sien sit aan die regterhand van Hom wat al die mag het. Julle sal Hom op die wolke sien kom.”’ (26:65)

Jesus het geweet wat oneerlikheid is. Hy het dit self aan sy lyf gevoel – dit is basies oneerlikheid wat Hom kruis toe gestuur het. Een van sy dissipels het hom verraai en om Hom te kon kruisig moes mense allerhande valse stories oor Hom vertel. Een van sy beste vriende het selfs op ‘n punt gelieg en gesê Hy ken Jesus nie. Ons dink dikwels nie daaraan nie, maar dit moes Hom baie en diep seergemaak het. Wys jou net, toe Jesus dit die nodigste gehad het, was niemand eerlik genoeg om Hom te help nie.

Mense het sedertdien nog nie verander nie. Daar is vandag nog net soveel oneerlikheid en agterbaksheid as destyds – en dit sommer so tussen ons. Dit kom jy gewoonlik agter as iets gebeur waar jy ander se eerlikheid die nodigste het. Om dan agter te kom mense is nie wat hulle voorgee om te wees nie, maak die seerste.

Oneerlikheid moet Christene nie moedeloos maak nie – dit is deel van hierdie lewe, in alle geval solank sonde sy sin kry. Maar juis dit moet jou as Christen aanmoedig om n verskil te maak. Dit moet jou aanmoedig om met meer oortuiging ‘Christen’ in die wêreld te wees. Dink net daaraar: Wie gaan vir die wêreld wys hoe eerlikheid en opregtheid lyk as jy as Christen dit nie gaan doen nie? Immers, eerlikheid vra dikwels om teen jouself te kies, om keuses so te maak dat regverdigheid seëvier, al kos dit jou baie. En Jesus het Christene geleer om dit te kan doen.

Christene moet die reddingsboeie wees vir ‘n samelewing wat in die oseaan van oneerlikheid wegsink. Eerlikheid kan ‘n verskil maak… so kan Christene.

Mat 26:17-56 (fokus 26:31-46)

‘My Vader, as daar nie vir My ’n uitweg is nie, laat dan gebeur wat moet gebeur!’ (26:42)

Het God regtig Jesus liefgehad? Wie kan ooit daaraan twyfel? Eintlik behoort ‘n mens nie eers so vraag te vra nie. Die Bybel sê op hoeveel plekke dat God Jesus liefgehad het. Maar as ‘n mens na party mense luister kon God Jesus onmoontlik liefgehad het. Hulle sê mos dat as God jou liefhet moet dit net altyd goed met jou gaan. As dit sleg gaan, het God jou skielik nie meer lief nie of het Hy dalk van jou vergeet. Niks is verder van die waarheid af nie. As dit waar sou wees, het God beslis nie vir Jesus liefgehad nie.

Dit het maar swaar met Jesus ook gegaan. Jesus het ook maar in die tuin van Getsemane geworstel en druppels soos bloed gesweet (26:38-39). Hy het ook onder die kruis oppad Golgota toe geswig en aan die kruis van eensaamheid na God geroep. Dit het Hom egter nie in opstand teen God laat kom nie – nee, dit het Hom net dieper in die arms van God ingedryf met die woorde: “Nie My wil nie, maar U wil”. Hy het nie een oomblik aan God se liefde getwyfel nie. Dit was sy geheim. Hy het geweet: al gaan dit swaar, God is steeds daar!

Dit is nie God se werk om net te sorg dat alles altyd vir jou reg loop nie. God sorg egter wel dat as iets verkeerd loop, ‘n mens genoeg krag het om dit wat die lewe vir jou uitdeel, te kan hanteer. Dit was met Jesus so en is so met jou ook.

Dit gaan dus nie oor wat gebeur nie, maar hoe jy dit hanteer. Wat doen jy gewoonlik? Kyk jy na die “gebeur” of die “hanteer”?

Mat 25:31-46 (fokus 25:31-46)

‘Al hierdie mense wat so verkeerd lewe, sal gestraf word. En die hel sal nie speletjies wees nie en vir altyd duur. Maar die mense wat reg lewe, sal vir ewig saam met God leef!’ (25:46)

Die lewe is vol verrassings en een daarvan is die manier waarop Matteus vir ons hier vertel hoe die finale oordeel gaan plaasvind (25:31-46). Ons hoor gereeld in die kerk dat as ons glo, is ons saak reg. Maar die verrassing is dat die Here by die oordeel skynbaar nie na geloof gaan kyk nie. Hy kyk eerder na wat die mense gedoen het – of hulle water vir dors mense uitgedeel het of vir mense in die tronk gaan kuier het, en sulke dinge. En die mense wat sulke dinge gedoen het, is Syne.

Is ons nou verkeerd met ons klem op geloof? Beteken dit nou dat die Here mense op grond van hulle dade red? Ja en nee.

• Ja, omdat dade nie lieg nie. Dit wys wat binne in jou aangaan – wat jou hart van vol is, loop jou dade van oor.
• Nee, juis omdat die dade maar net ‘n teken is van wat in jou hart aangaan.en dus wys wie jy is… wys of jy glo of nie, wys of jy die Here regtig liefhet en Hom wil gehoorsaam wees of nie. Uit jou dade kan jy aflees of jy glo of nie.

Dade is tekens van iets dieper – van ‘n dieper geloof, of dalk ongeloof. As die Here daarom vra of iemand glo, kyk hy na sy dade, want daar kan jy dit die duidelikste sien. Dade lieg nie en daarom praat geloof die hardste deur dade.

Geloof kan nie weggesteek word nie. Ongeloof ook nie. Dit word aan jou dade gesien.

Die groot vraag is: hoe gaan dit met jou geloof? Wat sê jou dade?